CAKACAKA 16

Sa lako ko Paula ki Filipai, ka lotu kina ko Litia, 1—15. Sa vakaseva tani ko Paula na yalo ni tevoro sa tiko vua e dua na yalewa, a rau sa biu kina ko Paula kei Sailasa ki na vale ni veivesu, 16—24. Sa veivutuni nai vakatawa, ka vakabauti Jisu, ka sa papitaisotaki, kei ira kecega na nona lewe ni vale, 25—34. Sa lako tani e na koro ko Paula kei Sailasa, 35—40.

1Sa qai tadu ko koya ki Tapi kei Lisitira: ka raica, sa tiko kina e dua sa lotu, ko Timoci na yacana, a luve ni yalewa ni Jutia sa vakabauta; ia sa kai matanitu tani na tamana: 2a sa rogo vinaka ko koya oqo vei ira na veiwekani mai Lisitira kei Ikoniona. 3Sa vinakati koya ko Paula me rau lako kaya: a sa kauta mada ka ciliva, e na vukudra na Jiu era sa tiko e na yasana ko ya: ni ra sa kila kecega sa kai matanitu tani na tamana. 4Ia ni rau sa lakova na veikoro, erau sa tukuna vei ira, me ra vakabauta nai vakaro ka lesia ko ira nai apositolo kei ira na qase sa tiko mai Jerusalemi. 5A sa vakataudeitaki vakakina na veisoqosoqo lewe ni lotu e na vakabauta, a ra sa tubu talega e na veisiga me ra lewe vuqa.

6Ia ni rau sa lakovi Firijia kei na vanua ko Kalatia, a sa tarovi rau na Yalo Tabu me rau kakua ni vunautaka na vosa mai Esia, 7ni rau sa yaco mada ki Misia, erau sa vakatovolea sara me lako ki Picinia: a sa sega ni laivi rau na Yalo i Jisu. 8A rau sa sivi Misia, ka lako sobu ki Tiroa. 9A sa rairai vei Paula e na bogi na raivotu: Sa tu e dua na kai Masitonia, ko koya sa vakamasuta, ka kaya, Lako mai ki Masitonia, mo vukei keimami. 10Ia ni sa raica oti na raivotu ko koya, keitou sa vakatovolea sara me lako ki Masitonia, ni keitou sa vakananuma e dina sara sa kacivi keitou na Turaga me keitou vunautaka vei ira nai tukutuku-vinaka.

11Ia ni keitou sa vakarewa mai Tiroa, keitou sa vue yani ki Samoceresa, ka ia e na mataka ki Niapoli; 12ia maikea ki Filipai, a koro levu e na yasayasa vaka-Masitonia ko ya, a koro vaka-Roma: ka keitou sa tiko e na koro ko ya ka bogi vica. 13Ia e na siga ni vakacecegu keitou sa lako ki nai bili ni koro e na bati ni uciwai, ki na yasana keitou nanuma sa dauia kina na lotu masumasu; ka keitou sa tiko sobu, ka vosa vei ira na yalewa era sa soqoni vata kina. 14A sa vakarogoca e dua na yalewa ko Litia na yacana, mai na koro ko Ceataira, sa dauvolitaka na kalokaloka, ko koya sa daulotu vua na Kalou: a sa dolava na yalona na Turaga, ka sa vakabauta kina ko koya na veika sa tukuna ko Paula. 15Ia ni sa papitaisotaki ko koya, kei ira talega na nona lewe-ni-vale, sa vakamamasu ko koya, ka kaya, Kevaka dou sa lewa ni’u sa dina vua na Turaga, curu ki na noqu vale, ka tiko kina, A sa cikevi keitou sara ko koya.

16A sa yaco, ni keitou sa lako ki na yasana sa ia kina na masumasu, keitou sa sota kei na dua na vada sa tiko vua na yalo i Paiconi, ko koya sa dauvakavutuniyautaki iratou vakalevu na nona turaga e na nona parofisai vakailasu: 17a sa muri Paula kei keitou ko koya oqo, a sa qoqolou, ka kaya, Sai talatala ni Kalou cecere sara ko iratou na tamata oqo, a ratou sa vakatakila vei kemudou na sala ni bula. 18A sa bogi vuqa ka kitaka tiko na ka oqo. A sa qai rarawa na loma i Paula, a sa rai vuki, ka kaya vua na yalo, Au sa vakarota vei iko e na yaca i Jisu Karisito mo lako tani mai vua. A sa lako tani sara e na tiki-ni-siga ko ya.

19Ia ni sa raica ko iratou na nona turaga ni sa takali na ka eratou a vakararavi kina me rawa kina na nodratoui yau, eratou sa tauri Paula kei Sailasa, ka yarataka ki na rara ni veivoli vei ira na turaga; 20ka kauti rau ki na mataveilewai, ka kaya, Oi rau na tamata la oqo, erau kai Jutia, erau sa vakidroataka na noda koro, 21ka vakarota nai valavala eso sa sega ni dodonu vei keda me da vakabauta, se muria, ni da sa kai Roma. 22Era sa qai tu cake vata vakaukauwa vei rau ko ira na lewe vuqa: a ra sa luvata sara na nodraui sulu ko ira na mataveilewai, a ra sa kaya me rau warolaki. 23Ia ni ra sa warolaki rau vakalevu, era sa qai biuta ki na vale ni veivesu, a ra sa vakarota vua nai vakatawa me rau tauri matua: 24ko koya, ni sa vakaroti vakaoqo, sa biliraki rau ki na tiki ni vale ni veivesu eloma, a sa vesuka matua sara na yavadrau e nai vesu kau.

25Ia ni sa lomaloma-ni-bogi na vanua, sa masu ko Paula kei Sailasa, ka sere vua na Kalou; a ra sa rogoci rau ko ira na tamata sa vesu tu. 26A sa tavuki vakalevu vakasauri na vanua, a sa yavala kina na yavu ni vale ni veivesu: a sa tadola vakasauri kecega nai sogo ni katuba, a sa sereki yadua na kedrai vesu na tamata. 27A sa yadra mai na moce nai vakatawa ni vale ni veivesu, ia ni sa raica sa tadola tu nai sogo ni katuba ni vale ni veivesu, sa ucuna na nonai seleiwau, ka nakita me vakamatei koya, ni sa nanuma era sa dro ko ira na tamata sa vesu tu. 28A sa kaci e na domo levu ko Paula, ka kaya, Kakua ni ko vakacacani iko: keitou sa tiko kecega eke. 29Sa qai kaci ko koya me kau mai na cina, a sa rika ki loma, a sa sautaninini mai, a sa cuva sobu vei Paula kei Sailasa, 30a sa kauti rau ki tuba, ka kaya, Oi kemudrau na turaga, a cava me’u kitaka me’u bula kina? 31A rau sa kaya, Vakabauta na Turaga ko Jisu Karisito, ko na bula kina, kei ira talega na nomu lewe-ni-vale. 32A rau sa tukuna vua na vosa ni Turaga, vei ira kece talega era sa tiko e nona vale. 33A sa kauti rau ko koya e na tiki-ni-bogi ko ya, a sa quaraka na we ni kuita; a sa papitaisotaki sara, ko koya kei ira kecega na kai nona. 34Ia ni sa kauti rau ki nona vale sa tauca na kakana e matadrau, a sa reki vakalevu, ni sa vakabauta na Kalou, kei ira kecega na nona lewe-ni-vale.

35Ia ni sa siga mai, era sa tala na ovisa ko ira na mataveilewai, ka kaya, Sereki rau na tamata oqori me rau lako. 36A sa tukuna vei Paula na vosa oqo nai vakatawa ni vale ni veivesu, Sa talaki mai na mataveilewai mo drau sereki: drau qai cavu tu, ka lako e na vakacegu. 37A sa kaya vei ira ko Paula, Era sa warolaki keirau votu ka ra sa sega ni lewai keirau mada eliu, ia keirau sa kai Roma koi keirau; ka ra sa biuti keirau ki na vale ni veivesu; ka ra sa qai biuti keirau vuni, oi? me kakua sara; ia me ra lako ga mai ka kauti keirau yani ki tuba. 38A ra sa tukuna na vosa oqo ko ira na ovisa vei ira na mataveilewai; era sa qai rere, ni ra sa rogoca erau sa kai Roma. 39A ra sa lako mai ka vakamasuti rau, ka kauta ki tuba, ka vakamamasu me rau lako tani e na koro. 40A rau sa lako tani e na vale ni veivesu, ka curu ki na vale i Litia; ia ni rau sa raici ira na veiwekani, erau sa vakacegui ira, ka qai lako yani.

Currently Selected:

CAKACAKA 16: FOV

Highlight

Copy