CAKACAKA 10

E dua na agilose ni Kalou sa rairai vei Konilio, ka vakavulica me lakovi ko Pita, 1—8. Eratou sa lako ki Jopa na nona tamata, a sa raica na raivotu ko Pita, mai Jopa, 9—18. Sa lako ki Sisaria ko Pita, ka vunautaki Jisu vei Konilio kei ira na wekana, 19—48.

1Sa dua na tamata mai Sisaria, ko Konilio na yacana, a nodra turaga na mata sotia sa vakayacani vaka-Itali, 2a tamata daulotu, a sa rerevaka na Kalou, ko koya, kei ira kecega na nona lewe ni vale, a sa dausolia vakalevu na ka-ni-loloma vei ira na tamata, a sa daumasu vua na Kalou e na veisiga. 3Sa raica ko koya e na raivotu, e nai kaciwa ni aua, e dua na agilose ni Kalou ni sa curu vua, a sa kaya vua, I Konilio. 4Ia ni sa vakaraica, sa rerevaka, ka kaya, Sa vakaevei noqu Turaga? A sa kaya vua ko koya, A nomu masu kei na nomu ka-ni-loloma sa lako cake ki na mata ni Kalou mo nanumi kina: 5ia mo tala na tamata eso ki Jopa, me lakovi Saimoni, a yacana talega ko Pita: 6sa tiko vata ko koya kei Saimoni na matai ni kuli-ni-manumanu, sa tu e baravi na nona vale: ena tukuna vei iko ko koya na ka e dodonu mo cakava. 7Ia ni sa lako tani na agilose ka vosa vei Konilio, sa qai kaciva e lewe rua na nona lewe ni vale, ka dua na sotia sa daulotu, e dua vei ira sa dauqaravi koya: 8ia ni sa tukuna vei iratou na ka kecega, sa talai iratou ki Jopa.

9Ia e na mataka, ni ratou sa lako tu e na gau-ni-sala, ka toro voleka ki na koro, sa cabe cake ki dela ni vale ko Pita me masu e nai kaono ni aua; 10a sa viakana sara, ka garova na ka me kania; ia ni ra sa vakarau tiko, sa raica na raivotu, 11sa raici lomalagi sa tawase rua, a sa dua na ka sa lako sobu mai vua, sa vaka nai tutuvi levu sa buki na tutuna vava, a sa tukuci sobu mai ki vuravura; 12a sa tiko kina na manumanu ni vanua e yavai va e dui nodra veimataqali kecega, kei na manumanu kila, kei na veika sa dauqasi voli kei na manumanu vuka. 13Sa qai rogo mai vua na vosa, Tu cake, Pita; mo vakamatea, ka kania. 14A sa kaya ko Pita, Me’u kakua noqu Turaga; ni’u a sega ni kania na ka sa tabu se tawa-savasava. 15A sa vakarua tale vua na vosa, A ka sa vakasavasavataka na Kalou, mo kakua ni vaka e tabu. 16A sa caka vakatolu na ka oqo: a sa qai kau tale na ka ki lomalagi.

17Ia ni sa taqaya tiko na loma i Pita, se cava nai balebale ni raivotu, raica, sa taroga na vale i Saimoni ko iratou na tamata sa tala ko Konilio, a ratou sa tu e na matamata-ni-koro; 18a ratou sa kaci, ka taroga, se sa tiko ekeri ko Saimoni, a yacana talega ko Pita, se segai.

19Ia ni sa vakananuma tiko na raivotu ko Pita, sa kaya vei koya na Yalo Tabu, Raica, e lewe tolu na tamata sa vakasaqarai iko. 20Mo tu cake kina ka lako sobu, ia mo lako vata kei iratou, me kakua ni veileti na lomamu: ni’u sa talai iratou mai. 21Sa qai lako sobu ko Pita vei iratou na tamata; ka sa kaya, Raica, koi au ga oqo dou sa vakasaqara: a cava na vu ni nomudou lako mai? 22A ratou sa kaya, Sa dua na agilose yalosavasava sa vakatakila vei Konilio, e dua na turaga ni valu, a tamata yalododonu, ka sa rerevaka na Kalou, a sa rogorogo vinaka vei ira kecega na kai Jutia, me lakovi iko, mo mai lako ki nona vale, me rogoca vei iko na vosa ko koya. 23Sa qai kacivi iratou mai ko koya, ka vakacegui iratou. Ia e na mataka sa lako vata kei iratou ko Pita, ka sa lako kaya eso na veiwekani mai Jopa. 24Ia e na bogi rua eratou sa curu ki Sisaria. A sa waraki iratou ko Konilio, a sa vakasoqoni ira vata oti na kai nona kei na wekana dina. 25Ia ni sa curu ko Pita, sa tavaki koya ko Konilio, a sa cuva sobu ki yavana, ka vakarokoroko vua. 26A sa vakaduria cake ko Pita, ka kaya, Tu cake; au sa bau tamata talega koi au. 27A rau sa veivosaki kaya, ka sa qai curu ki loma, a sa kunei ira na lewe vuqa era sa soqoni vata mai.

28A sa kaya vei ira ko koya, Dou sa kila ni sa ka tabu vua na kai Jutia me tiko vata, se me veiriti kaya na tamata sa matanitu tani; ia sa vakatakila vei au na Kalou me’u kakua ni vakatoka e dua na tamata me tabu se tawa-savasava. 29O koya ga oqo ka’u sa lako mai kina ka sega ni veileti, ni’u sa lakovi yani; au sa taroga kina se cava dou sa lakovi au yani kina. 30A sa kaya ko Konilio, Sa qai oti ga e va na bogi ka’u a lolo ka yacova na aua oqo; e nai kaciwa ni aua ka’u a masu e na noqu vale, ka raica, sa dua na tamata sa tu e mataqu sa vakaisulu lumilumisa, 31a sa kaya, I Konilio, sa rogo na nomu masu, a sa vakananumi na nomu ka-ni-loloma e na mata ni Kalou: 32o koya ga oqo mo qai talaki ki Jopa, ka lakovi Saimoni mai, a yacana talega ko Pita; sa tiko ko koya e na vale nei Saimoni na matai ni kuli-ni-manumanu mai baravi: ni sa lako mai ko koya, ena vosa vei iko. 33O koya ga oqo ka’u sa talaki sara kina vei iko; ia ko sa caka vinaka ni ko sa lako mai. Keimami sa qai tiko kecega eke e na mata ni Kalou, me keimami rogoca na ka kecega sa vakarota vei iko na Kalou.

34Sa qai vosa ko Pita, ka kaya, E dina ka’u sa qai kila ni sa sega ni digitaki ira vakailoa na tamata na Kalou: 35ia e na veivanua kecega sa vinaka vua ko koya sa rerevaki koya, ka caka dodonu. 36Ai vakavuvuli sa tukuna ko koya vei ira na luve i Isireli, ni sa vunautaki na veivinakati e na vuku i Jisu Karisito: (ko koya ga sa Turaga vei ira kecega:) 37ai vakavuvuli ko ya, dou sa kila, sa vunautaki mai Jutia taucoko, a sa tekivu mai Kalili, ni sa oti na papitaiso ka vunautaka ko Joni; 38ni sa lumuti Jisu na kai Nasareci na Kalou e na Yalo Tabu kei na kaukauwa: ko koya ka lako voli ka daucaka vinaka, a sa vakabulai ira kecega sa vakasaurarataki ira na tevoro; ni sa tiko vata kaya na Kalou. 39Ia keitou sa yaco me dautukutuku e na ka kecega ka cakava ko koya e na nodra vanua na kai Jutia, mai Jerusalemi talega; ko koya era sa vakamatea ni ra sa vakarubeca e na dua na kau: 40sa vakaturi koya cake na Kalou e nai katolu ni siga, a sa vakatakilai koya votu; 41e segai vei ira na tamata kecega, vei ira ga ka digitaka eliu na Kalou, me ra dautukuna, io vei keitou, koi keitou a kana ka gunu kaya ni sa tu cake tale mai na mate ko koya. 42A sa vakarota vei keitou me keitou vunau vei ira na tamata, ka vakadinadina ni sai koya ga ka lesia eliu na Kalou me lewai ira na bula kei ira na mate. 43O koya era sa dautukuna ko ira kecega na parofita, ni na bokoci e na vuku ni yacana na nodrai valavala ca na tamata kecega era sa vakabauti koya.

44Ni sa tukuna tiko na vosa oqo ko Pita, sa lutu na Yalo Tabu kivei ira kece era sa rogoca na vosa. 45Ia ko iratou sa cili ka sa vakabauta, ka sa lako vata mai kei Pita, eratou sa kurabui, ni sa sovaraki na Yalo Tabu kivei ira talega era sa matanitu tani. 46Ni ratou sa rogoci ira ni ra sa vosataka na vosa ni veivanua tani, ka vakarokorokotaka na Kalou. Sa qai kaya ko Pita, 47Sa dua beka na tamata me bureitaka na wai, me kakua ni papitaisotaki ko ira na tamata oqo, era sa rawata na Yalo Tabu me vakataki keda? 48A sa qai kaya me ra papitaisotaki e na yaca i Jisu Karisito. A ra sa qai masuti koya me tiko mada kei ira e na veisiga eso.

Currently Selected:

CAKACAKA 10: FOV

Highlight

Copy