2 TUI 25
25
Sa kabai ko Jerusalemi; sa visa na koro; sa qai kau tale vakabobula ko ira na Juta ki Papiloni, ka vo tikoga ko ira na tamata dravudravua, 1-21. Sa lesi ko Kitalaia me lewai Juta, a sa moku ko koya, 22-26. Sa vakacegui ko Jioiakini, 27-30.
1Ia e na kenai kaciwa ni yabaki ni nona lewa, e na kenai katini ni vula, e na kenai katini ni siga ni vula, sa lako mai me kabai Jerusalemi ko Nepukanesa, na tui Papiloni, o koya kei ira kece na nonai valu, a ra sa la'ki tiko vakaivalu maikina; ka tara na veivale ni valu me vakavolivolita. 2A sa buku tiko na druadrua ni koro, ka yacova na kenai katinikadua ni yabaki i Setekaia na tui. 3E na kenai kaciwa ni siga e nai kava ni vula, sa ka levu na viakana e na koro, a sa sega na kakana vei ira na lewe ni vanua. 4A sa basuki na koro, a sa dro e na bogi ko ira kecega na tamata i valu, e na sala ni matamata-ni-koro, e na macawa ni bai ruarua, mai na nona were na tui, a sa lako yani e na sala vaka ki na buca: (ia ko ira na kai Kalitia, era sa tiko vakavolivolita na koro): a sa lako na tui e na sala ki na buca. 5A ra sa cicimuria na tui ko ira na nodra i valu na kai Kalitia, ka vauci koya e na buca mai Jeriko: a ra sa vakasesei tani vua ko ira kecega na nonai valu. 6A ra sa taura na tui, ka kauta vei tui Papiloni ki Ripila; a ra sa lewai koya. 7A ra sa vakamatei iratou na luve i Setekaia e matana, ka bokoca ruarua na mata i Setekaia, ka vesuki koya e nai vesu parasa, ka kauta ki Papiloni.
8Ia e na kenai kalima ni vula, e na kenai kavitu ni siga ni vula, ko ya na kenai katinikaciwa ni yabaki ni tui, ko Nepukanesa, na tui Papiloni, sa qai lako mai ki Jerusalemi ko Nipusaretani, a kapiteni ni valu i vakatawa, e dua na nona tamata na tui Papiloni: 9a sa vakama na vale i Jiova, kei na vale ni tui; a sa vakama na vale kecega mai Jerusalemi, io na vale lelevu kecega. 10A sa talaraka sobu na bai sa voliti Jerusalemi, ko ira kecega na nodra i valu na kai Kalitia era tiko kaya na kapiteni ni valu i vakatawa. 11Ia ko ira na kena vo ni tamata era vo tiko e loma ni koro, kei ira era dro vei tui Papiloni, kei ira sa vo vei ira na lewe vuqa, sa kauti ira vakabobula yani ko Nipusaretani na kapiteni ni valu i vakatawa. 12Ia ko koya na kapiteni ni valu i vakatawa, sa laivi ira na tamata dravudravua sara e na vanua me ra tiko ga, me ra wereca na veivaivaini kei na veiwere.
13Ia na duru parasa ka tu e na vale i Jiova, kei na veitutu ni taqi, kei na taqi levu parasa sa tu e na vale i Jiova, era sa vorolaka na kai Kalitia, ka kauta na kena parasa ki Papiloni. 14Ia na kuro, kei nai sivi ni dravusa, kei nai koti-ni-cina, kei nai taki, kei nai yaya parasa kecega era sa daucakacaka kina, era sa kauta tani. 15A sa kauta tani na kapiteni ni valu i vakatawa na dari ni de-ni-bukawaqa, kei na bilo me kau kina na dra me kureitaki, o koya sa dui koula ka dui siliva. 16Na duru ruarua, na taqi levu e dua, kei na veitutu ni taqi, o koya ka cakava ko Solomoni me yaga e na vale i Jiova; sa sega ni kilai na kena bibi ni parasa ni yaya kecega oqo. 17Na kena cecere e dua na duru sa tinikawalu na kiupiti, ka sa parasa na domodomo sa tu e delana: ia na kena balavu e dua na domodomo sa tolu na kiupiti; kei na sinucodo sa muloci, kei nai ukuuku e vaka na pomekaraneti sa viviraka na domodomo, sa parasa kecega: a sa tauvata kei na ka oqo na duru kadua e na sinucodo sa muloci.
18Ia na kapiteni ni valu i vakatawa, sa tauri Siraia na bete levu, kei Sefanaia nai karua ni bete, kei iratou nai vakatawa ni katuba tolutolu: 19ia vei ira sa tiko e na koro sa taura ko koya e dua na ovisa, o koya sa lesi me lewai ira na tamata i valu, ka lewe lima vei ira na tamata era dautiko e na mata ni tui, era sa kune e na koro, kei koya na nona vunivola na kapiteni ni valu, o koya ka dauvakasoqoni ira vata na lewe ni vanua, ka lewe onosagavulu vei ira na lewe ni vanua era sa kune e loma ni koro. 20A sa kauti ira oqo ko Nipusaretani na kapiteni ni valu i vakatawa, vua na tui Papiloni ki Ripila. 21A sa mokuti ira ko tui Papiloni, ka vakamatei ira mai Ripila e na vanua ko Emaci. A sa kau vakabobula tani ko ira na Juta mai na nodra vanua.
22Ia ko ira na tamata era vo tiko e na vanua ko Juta, o ira ka laiva ko Nepukanesa na tui Papiloni, sa lesi Kitalaia na luve i Eaikami na luve i Safani ko koya, me turaga vei ira. 23Ia ko ira kecega na turaga ni veimataivalu, ko ira kei ira na nodra tamata, ni ra sa rogoca sa lesi Kitalaia me turaga ko tui Papiloni, era sa lako mai kivei Kitalaia ki Misipa, io ko Isimeli na luve i Necanaia, kei Joenani na luve i Karia, kei Siraia na luve i Tanumeci na kai Nitofa, kei Jeesanaia na luvena e dua na kai Meeka, io ko iratou kei ira na nodratou tamata. 24A sa bubului e matadratou ko Kitalaia, e matadratou talega na nodratou tamata, ka kaya vei ira, Dou kakua ni rerevaki iratou na nodra tamata na kai Kalitia, dou tiko ga e na vanua, ka qaravi koya na tui Papiloni; ia dou na vinaka ga. 25Ia e na kenai kavitu ni vula sa lako ko Isimeli na luve i Necanaia na luve i Ilisama, e dua vei ira na kawa ni tui, kei iratou vata kaya e lewe tini na tamata, a ratou sa mokuti Kitalaia, a sa mate kina, kei ira talega na kai Juta kei ira na kai Kalitia era tiko vata kaya mai Misipa. 26A ra sa cavu tu ko ira kecega na tamata, ko ira na lalai kei ira na lelevu, kei ira na turaga ni veimataivalu, a ra sa lako ki Ijipita: ni ra sa rere e na vukudra na kai Kalitia.
27Ia ni sa tiko bobula ko Jioiakini na tui Juta ka yabaki tolusagavulu ka vitu, e na kenai katinikarua ni vula, e na kenai karuasagavulu ka vitu ni siga ni vula, sa qai sereki Jioiakini na tui Juta mai na vale ni veivesu ko Ivili-mirotaki na tui Papiloni, e na yabaki sa buli kina me tui; 28a sa vosa vinaka vua, ka sa vakatikora na nonai tikotiko vakaturaga me cecere cake e na nodra i tikotiko vakaturaga na tui era tiko vata kaya mai Papiloni. 29A sa luvata tani na nonai sulu ni vale ni veivesu ka sulumaki koya e nai sulu tani: a sa kana tikoga ko koya e matana e na veisiga kecega ni nona bula. 30A sa dua na nonai votavota maivua na tui, e na veisiga yadua ka yacova nai otioti ni nona bula.
Currently Selected:
2 TUI 25: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
