2 TUI 21
21
Sa tui Jutia ko Manasa, a sa uasivi e nai valavala ca, 1-18; a sa tarava ko Emoni, 19-26.
1Sa tinikarua na yabaki i Manasa ni sa tekivu me lewa, a sa lewa tiko mai Jerusalemi ka yabaki limasagavulu ka lima: ia na yaca i tinana ko Efise-pa. 2A sa daucaka ca ko koya e na mata i Jiova, me vaka na nodra ka vakasisila na veimatanitu ka vakaseva tani ko Jiova e matadra na Isireli. 3A sa tara tale ko koya na veitikina cecere ka vakacacana ko Esekaia na tamana; a sa cakava eso nai cabocabo-ni-soro vei Peali, ka cakava e dua na kalouyalewa ni veikau, me vaka ka kitaka ko Eapi na tui Isireli, ka soro ki na kalokalo kecega ni lomalagi, ka qarava. 4A sa cakava eso nai cabocabo-ni-soro e na vale i Jiova, ko ya sa kaya kina ko Jiova, Au na vakatikora na yacaqu mai Jerusalemi. 5A sa cakava ko koya eso nai cabocabo-ni-soro e na vuku ni kalokalo kecega ni lomalagi e na loma ni rara vakabai ruarua mai na vale i Jiova. 6A sa vakacabora na luvena e loma ni bukawaqa, a sa parofisai e na o, ka parofisai e na gata, ka ia na nodra i valavala era sa curumi, kei ira era sa dauveinita: sa kitaka ko koya na ka ca e vuqa e na mata i Jiova, ka sa vakacudruya. 7A sa vakatikora na matakau ni kalouyalewa ni veikau sa cakava ko koya, e na vale ka kaya kina ko Jiova vei Tevita kei Solomoni na luvena, E na vale oqo, ka mai Jerusalemi talega, ka'u a digitaka mai na nodra veimataqali kecega na Isireli, ka'u na vakatikora kina na yacaqu, ka tawa mudu: 8ia ka'u na sega ni vakasesea tale na yavadra na Isireli mai na vanua ka'u a solia vei ira na nodra qase, kevaka era sa vakabauta me ra cakava na ka kecega ka'u a vakarota vei ira, kei nai vakaro kecega ka vakarota vei ira ko Mosese na noqu i talatala. 9A ra sa sega ga ni vakarorogo: a sa vakacalai ira ko Manasa me ra cakava na ka ca e levu, ka lailai na ka ca era a cakava na veimatanitu ka vakarusa ko Jiova e matadra na Isireli.
10A sa vosa ko Jiova e na gusudra na nonai talatala na parofita, ka kaya, 11Ni sa cakava ko Manasa na tui Juta na veika vakasisila oqo, ka cakava e levu na ka ca, ka lailai na ka ca kecega sa cakava ko ira na Amoraiti, ka tiko eliu, sa tiko emuri ko koya, ka sa vakaivalavalacataki ira talega na Juta e na nona veimatakau: 12sa kaya kina ko Jiova na nodra Kalou na Isireli, Raica, ka'u sa vakayacora na ca ki Jerusalemi kei ira na Juta, ena qasikanunu kina na daligana ruarua na tamata yadua sa rogoca: 13ia ka'u na vakarauti Jerusalemi e nai vakarau i Samaria, kei nai vakadodonu ni mataqali i Eapi: ia ka'u na qusi Jerusalemi, me vaka sa qusia na bilo e dua, ni sa qusia ka qai cobora. 14Ia ka'u na biuta na kena vo ni noqu i votavota, ka soli ira ki na ligadra na nodra meca; me ra vakacacani, ka vakabobulataki vei ira na nodra meca; 15ni ra sa caka ca e mataqu, ka vakacudrui au, mai na siga era lako maikina ko ira na nodra qase mai Ijipita, ka yacova na siga oqo.
16A sa vakadavea talega ko Manasa na kedra dra na lewe vuqa sara era sega ni cala, ka me sinai mada kina ko Jerusalemi e na veiyasana kecega: ia oqo sa kenai kuri ni nonai valavala ca sa vakaivalavalacataki ira kina na Juta, ni ra cakava na ka ca e na mata i Jiova.
17Ia na kena vo ni cakacaka i Manasa, kei na ka kecega sa cakava ko koya, kei na nonai valavala ca sa kitaka ko koya, sa sega li ni volai e nai vola ni veika sa caka e na nodra gauna na tui Juta? 18A sa moce vata kei ira na nona qase ko Manasa, a sa bulu e na were ni nona vale, io e na were i Usa: a sa lewa ko Emoni na luvena, me kenai sosomi.
19Sa ruasagavulu ka rua na yabaki i Emoni ni sa tekivu me lewa, a sa lewa tiko mai Jerusalemi ka yabaki rua. Ia na yaca i tinana ko Mesulemeci, na luve i Arusi na kai Jotipa. 20A sa daucaka ca ko koya e na mata i Jiova, me vaka ka cakava ko Manasa na tamana. 21A sa muria kecega nai valavala ka muria ko tamana, a sa qarava na veimatakau ka qarava ko tamana, a sa soro vei ira: 22a sa biuti Jiova na nodra Kalou na nona qase, ka sega ni lako e na sala i Jiova. 23A ra sa buki kena vere ko ira na tamata nei Emoni, a ra sa vakamatea na tui e nona vale. 24A ra sa vakamatei ira kecega era a bukia na kena vere ko Emoni na tui ko ira na lewe ni vanua: ka ra sa buli Josaia na luvena me tui ko ira na lewe ni vanua, me kenai sosomi.
25Ia na kena vo ni cakacaka i Emoni sa kitaka ko koya, sa sega li ni volai e nai vola ni veika sa caka e na nodra gauna na tui Juta? 26A sa bulu ko koya e na nonai bulubulu e na were i Usa: a sa lewa ko Josaia na luvena, me kenai sosomi.
Currently Selected:
2 TUI 21: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
