1 TIMOCI 4
4
Sa tukuna ko koya era na biuta na lotu dina ko ira eso, 15. A sa vakarota vei Timoci me dautukuna na ka dina, me gumatua sara e na wili vola, ka me dauvakatavuvuli, 616.
1Ia sa tukuna vakamacala na Yalo Tabu ni na vuki tani eso mai na vakabauta e na gauna emuri, ni ra vakarogoca eso na yalo e dauveivakacalai kei na nodra i vakavuvuli na tevoro; 2e na nodra dauveivakaisini era sa vosa lasu, sa tavuni na nodra lewa-eloma me vaka e na kaukamea katakata; 3era sa dautarova na vakawati, a ra sa vakatabuya na kakana eso, sa cakava na Kalou me ra kania ka vakavinavinaka kina ko ira sa vakabauta ka kila nai vakavuvuli dina. 4Ni sa vinaka na ka kecega sa cakava na Kalou, a sa sega na ka me beci, kevaka sa da vakavinavinaka kina ni da kania; 5ni sa vakasavasavataki e na vosa ni Kalou kei na masu.
6Kevaka ko sa vakananumi ira na veiwekani e na veika oqo, o na qai talatala vinaka nei Jisu Karisito, sa vakatuburi cake e na vakabauta kei nai vakavuvuli vinaka ko ya ko sa daumuria. 7Ia mo biuta sara na vosa tabu kei na vosa lialia ni yalewa qase, ia mo dauvakaogai iko ki na lotu. 8Ni sa yaga vakalailai ga na ogaoga vakayago: ia na lotu sa yaga e na ka kecega, ni sa yalataki kina na ka ni bula oqo, kei na ka ni bula talega ena muri mai. 9Sa dina na vosa, a sa yaga me vakabauti vakalevu. 10Ni sai koya ga oqo keitou sa daucakacaka kina ka sa vakalialiai, ni keitou sa vakararavi ki na Kalou bula, nai Vakabula ni tamata kecega, a sa nodra dina sara era sa vakabauta. 11A veika oqo mo vakarota ka vakatavuvulitaka.
12Me kakua ni beci iko e dua ni ko sa cauravou; ia mo yaco mo nodra i vakarau era sa vakabauta, e na vosa, e nai valavala, e na loloma, e na lomadina, e na yalosavasava. 13Mo gumatua e na wili vola, e na dauveivakaroti, e nai vakavuvuli, ka yacova na noqu lako yani. 14Kakua ni weletaka nai solisoli sa tu vei iko, o koya ka soli vei iko e na parofisai, kei na veitabaki ni ligadra nai talatala qase. 15Mo dauvakananuma na veika oqo; me ra rawai iko sara; me rairai kina ni ko sa vuku cake mai e na ka kecega. 16Vakaraici iko vinaka, kei nai vakavuvuli; tu dei kina: ni ko sa kitaka vakaoqo ko na vakabulai iko, kei ira talega era sa rogoci iko.
Currently Selected:
1 TIMOCI 4: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
