1 JONI 5
5
Sa lomani ira na tamata lotu dina ko ira na luve ni Kalou, a ra sa muria na vosa ni Kalou, 1-5. A Luve ni Kalou ko Jisu kei na nodai Vakabula, a sa rogoca ko koya na noda masu, 6-21.
1O koya yadua sa vakadinata ni sa Karisito ko Jisu, sa vakasucumi koya na Kalou: ia ko koya yadua sa lomani koya sa vakatubura, sa lomani koya talega sa vakatuburi. 2E na ka oqo eda sa kila ni da sa lomani ira na luve ni Kalou, kevaka eda sa lomana na Kalou, ka muria na nona vunau. 3Ni sai koya oqo na loloma vua na Kalou, me da muria na nona vunau: a sa sega ni ka bibi na nona vunau. 4Ni sa rawai vuravura ko koya yadua sa vakasucumi koya na Kalou; ia oqo na qaqa eda sa rawai vuravura kina, a noda vakabauta. 5O cei sa rawai vuravura, o koya duaduaga sa vakadinata ni sa Luve ni Kalou ko Jisu?
6O koya oqo ka lako mai kei na wai kei na dra, o Jisu Karisito; sa segai kei na wai walega, ia, kei na wai kei na dra talega. Ia sai koya na Yalo Tabu sa vakadinadina, ni sa vu ni dina na Yalo Tabu. 7Ni ratou sa lewe tolu sa tukutuku mai lomalagi, a Tamada, kei koya na Vosa, kei koya na Yalo Tabu; ia sa dua bauga na lewe tolu oqo. 8A ratou sa lewe tolu sa tukutuku e vuravura, a yalo, kei na wai, kei na dra; a ratou sa tukutuku vata na lewe tolu oqo.
9Kevaka eda sa vakabauta na nodra i tukutuku na tamata, sa uasivi cake kina nai tukutuku ni Kalou; ni sai koya oqo nai tukutuku ni Kalou sa tukuna kina na Luvena ko koya. 10O koya sa vakabauta na Luve ni Kalou sa rawata e lomana nai tukutuku: o koya sa sega ni vakadinata na Kalou sa vakalasui koya ga; ni sa sega ni vakadinata nai tukutuku ni Kalou ni sa tukuna na Luvena. 11Oqo ga nai tukutuku, ni sa solia vei keda na Kalou na bula tawa mudu, ia na bula oqo sa tu vua na Luvena. 12O koya sa tu vua na Luvena, sa tu vei koya na bula; o koya sa sega ni tu vua na Luve ni Kalou, sa sega ni tu vua na bula.
13A veika oqo kau sa vola vei kemudou mo dou kila kina ni dou sa rawata na bula tawa mudu, io, vei kemudou sa vakabauta na yaca ni Luve ni Kalou. 14Ia na ka oqo eda sa vakararavi kina vua, kevaka eda sa kerea e dua na ka me vaka na lomana, sa rogoci keda ko koya: 15ia kevaka eda sa kila ni sa rogoci keda ko koya, e na ka kecega eda sa kerea, eda sa kila ni da sa rawata na kerekere eda sa kerea vua.
16Kevaka e dua na tamata sa raica na wekana ni sa ia nai valavala ca sa sega ni yaco kina na mate, ena masulaka, ia na Kalou ena solia vua na bula me nodra era sa sega ni ia nai valavala ca sa yaco kina na mate. Sa tu nai valavala ca sa yaco kina na mate; au sa sega ni kaya me masu e na vuku ni ka ko ya. 17Sai valavala ca na ka kecega e sega ni dodonu; ka sa dua nai valavala ca sa sega ni yaco kina na mate.
18Eda sa kila, ni sa sega ni valavala ca ko koya yadua sa vakasucumi koya na Kalou; ia ko koya sa vakatuburi koya na Kalou sa maroroi koya, a sa sega ni tarai koya na vu-ni-ca ko ya. 19Eda sa kila ni da sa luve ni Kalou, a sa koto ga vua na vu-ni-ca ko ira kecega na kai vuravura. 20Eda sa kila talega ni sa yaco mai na Luve ni Kalou, a sa solia mai vei keda na vuku, me da kilai koya kina sa dina, ia eda sa tu vata kei koya sa dina, vei Jisu Karisito na Luvena. Sai koya oqo na Kalou dina, kei na vu-ni-bula tawa mudu.
21Oi kemudou na gone lomani, maroroi kemudou mai na veimatakau. Emeni.
Currently Selected:
1 JONI 5: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific