ማርቆሳ 3

ኩሺ ሲሌዳ ቢታኒያ

(ማት 12፡9-14፤ ሉቅ 6፡6-11)

1ዬሱሲ ኣዪሁዳ ዎሳ ጎሊያ ሺሬቲካ ጌሌዳ፤ ሄዋን ኩሺ ሲሌዳ ኢቲ ቢታኒ ዴዔ። 2ኢቲ ኢቲ ኣሳይ ዬሱሳ ሞታናው ኮዪዴ፥ ኩሺ ሲሌዳ ቢታኒያ ሳምባታን ኢ ፓፔ ቤዓናው ናጌ። 3ዬሱሲ ሄ ኩሺ ሲሌዳ ቢታኒያ፥ «ዴንዳ ኤቃዴ ሲንው ሃ ያ» ያጌዳ። 4ሄዋፔ ጉዪያን ኣሳ፥ «ሳምባታን ሎዖባ ኦያዌ ዎጌዬ ኢታባ ኦያዌ ዎጌ? ኣሳ ሼምፑዋ ኣሺያዌ ዎጌዬ ዎያዌ ዎጌ?» ያጊዴ ኦቼዳ።

ሺን ኣሳይ ጮዑ ጌዳ። 5ዬሱሲ ሃንቄቲዴ፥ ኡንቱንታ ዩሺ ኣ ፄሊዴ፥ ኡንቱንቱ ኦዲና ሲሴናዋንታ ጊዲያ ዲራው፥ ኡንቱንቶ ዳሪ ካዮቴዳ፤ ሄ ቢታኒያ፥ «ኔ ኩሺያ ፒዲ ኦ» ያጌዳ፤ ቢታኒ ፒዲ ኦና፥ ኣ ኩሺ ፓፂ ኣጌዳ። 6ፓሪሳዋቱ ኣዪሁዳ ዎሳ ጎሊያፔ ካሬ ኬሲዴ፥ ዬሱሳ ዎቲ ዎኔንቶ ሄሮዲሳና ዴዒያዋንቱና ማቄቴዲኖ።

ኣሳይ ኣባ ላንቂያን ዬሱሳኮ ሺቄዲኖ

7ዬሱሲ ባሬና ካሊያዋንቱና ጋሊላ ኣባ ቤዳ፤ ጋሊላፔ ጮራ ኣሳይ ኣ ካሌዳ። 8ቃሲካ ጮራ ኣሳይ ዪሁዳፔ፥ ዬሩሳላሜፔ፥ ኤዶሚያሳፔ፥ ዮርዳኖሳ ሻፋፔ ሄፊን ባጋፔ፥ ፂሮሳ ካታማፔኔ ሲዶና ካታማፔ ዬሱሲ ኦዳዋ ሲሲዴ፥ ኣኮ ዬዳ። 9ዬሱሲ ጮራ ኣሳይ ባሬና ሱጊ ኡንዔና ማላ፥ ባሬና ካሊያዋንታ ዎንጊሪያ ባሬው ጋሚዔና ማላ ኣዛዜዳ። 10ዳሮ ኣሳ ኢ ፓዳ ዲራው፥ ሃርጊያ ኣሳይ ኡባይ ኣ ቦቻናው ሱጌሬቴ። 11ኢታ ኣያናይ ዴዒያ ኣሳቱካ ኣ ቤዔዳ ዎዴ ኡባን ኣ ሲንን ጉፋኒዴ፥ ባሬንቱ ቃላ ቁ ኦዴ፥ «ኔን ፆሳ ናዓ ጊዲኪ!» ያጌዲኖ።

12ዬሱሲ ሄ ኢታ ኣያናቱ ባሬባ ኣሳው ኦዲዴ፥ ባሬና ቆንጪያ ኬሴና ማላ፥ ኡንቱንታ ሚኒሲዴ ኣዛዜዳ።

ዬሱሲ ባሬ ኪቲያዋንታ ዶሬዳ

(ማት 10፡1-4፤ ሉቅ 6፡12-16)

13ዬሱሲ ዴሪያ ቦላ ኬሲዴ፥ ባሬ ኮዬዳ ኣሳቱዋ ባሬኮ ፄሴዳ፤ ሄዋፔ ጉዬ ኣኮ ቤዲኖ። 14-15ኡንቱንቱ ባሬናና ዴዓና ማላኔ ቃላ ኦዳናው ኡንቱንታ ኪታና ማላ፥ ኢታ ኣያናቱዋ ኣሳፔ ኬሳናው ኡንቱንቶ ማታይ ዴዓና ማላ፥ ታማኔ ላዑ ኣሳቱዋ ዶሬዳ።

16ኢ ዶሬዳ ታማኔ ላዓቱ ሃዋንታ፡ ጴፂሮሳ ያጊዴ ሱንዳ ሲሞና፥ 17ቦዓኔርጌሳ ያጊዴ ሱንዳ ዛቢዲዮሳ ናና ያዪቆባኔ ያዪቆባ ኢሻ ዮሃኒሳ። «ቦዓኔርጌሳ» ጊያዌ «ዎልቃማ ኣሳቱዋ» ጊያዋ። 18ኢንዲራሳኔ ፒሊጶሳ፥ ባርታላሞሳኔ ማቶሳ፥ ቶማሳኔ ኢልፒዮሳ ናዓ ያዪቆባ፥ ታዶሳኔ ባሬ ቢታው ሴሌቲያ ሲሞና፥ 19ዬሱሳ ኣ ኢሜዳ ዪሁዳ ኣስቆሮታ። #14፡10

ዬሱሳኔ ቢዔል-ዜቡላ

(ማት 12፡22-32፤ ሉቅ 11፡14-23፤ 12፡10)

20ዬሱሲ ሶይ ቤዳ፤ ላዔንዋካ ቃሲ ጮራ ኣሳይ ሺቂና፥ ኢኔ ኣ ካሊያዋንቱና ሃራይ ኣቶ፥ ቁማ ማናዉካ ዳንዳይቤይኪኖ፤ 21ኣሳይ ኣ፥ «ጎዬ» ጊያ ዲራው፥ ኣ ዳባቱ ሄዋ ሲሲዴ፥ ኣ ኣካናው ቤዲኖ።

22ሂጊያ ታማሪሲያ ኢቲ ኢቲ ኣሳቱ ዬሩሳላሜፔ ዪዴ፥ «ዬሱሳ ቦላ ቢዔል-ዜቡል ዴዔ» ያጌዲኖ፤ ቃሲ፥ «ፃላሃቱዋ ካፑ ባሬው ዎልቃ ኢሚና፥ ኢታ ኣያናቱዋ ኬሴ» ያጊዴ ሃሴዬዲኖ። #ማት 9፡34፤ 10፡25

23ዬሱሲ ኣሳ ባሬኮ ፄሲዴ፥ ሌሚሱዋ ኦዲዴ፥ «ሴፃናይ ሴፃና ዎቲ ኬሳናው ዳንዳዪ? 24ኢቲ ካዉቴይ ባሬ ጊዶን ሻኬቶፔ፥ ሄ ካዉቴይ ኤቃናው ዳንዳዬና፤ 25ቃሲ ኢቲ ጎሌ ኣሳይካ ባሬ ጊዶን ሻኬቶፔ፥ ሄ ጎሌ ኣሳይካ ኤቃናው ዳንዳዬና። 26ሴፃናይ ባሬናና ዋላቄቲዴ ሻኬቶፔ፥ ባያናፔ ኣቲን፥ ዴዓና ዳንዳዬና።

27«ሺን ዎልቃማ ኣሳ ጎሌ ጌሊዴ ካሴቲዴ ኣ ቃቼናን ዴዒዴ፥ ኣ ሚሻ ቦንቃናው ዳንዳዪያ ኣሳይ ባዋ፤ ቃቼዳዋፔ ጉዪያን፥ ኣ ጎሊያ ቦንቃናው ዳንዳዬ።

28«ታኒ ሂንቴንቶ ቱሙዋ ጋይ፤ ፆሳይ ኣሳ ናናው ናጋራ ኡባኔ ኡንቱንቱ ቦሪያ ቦሪያ #3፡28 ቦሪያ ቦሪያ፡ ጉሳይ ፆሳ ቦላን ኣሳይ ሃሳዪያ ኢታ፥ ባላኔ ጌላ ሃሳያ። ኡባ ኣቶ ጋና፤ 29ሺን ጌሻ ኣያና ቦላ ኢታ ቦሪያ ሃሳዪያ ኦሲኔ ሜናው ናጋራ ጊዳናፔ ኣቲን፥ ፆሳይ ኡባካ ኣቶ ጌና» ያጌዳ። #ሉቅ 12፡10 30ዬሱሲ ሄዋ ጌዳዌ፥ ኢቲ ኢቲ ኣሳቱ፥ «ዬሱሳ ቦላ ኢታ ኣያናይ ዴዔ» ያጌዳ ዲራሳ።

ዬሱሳ ዳዮኔ ኢሻቱዋ

(ማት 12፡46-50፤ ሉቅ 8፡19-21)

31ዬሱሳ ዳያኔ ኣ ኢሻቱ ዪዴ፥ ካሬን ኤቂ ኣኮ ኣሳ ኪቲዴ፥ ኣ ፄሲሴዲኖ። 32ጮራ ኣሳይ ኣ ማታን ኡቴዲኖ፤ ሄ ኪቴቴዳዌ ኣ፥ «ቤዓ፤ ኔ ዳያኔ ኔ ኢሻቱ ካሬን ኤቂዴ፥ ኔናና ጋኬታናው ኮዪኖ» ያጌዳ።

33ዬሱሲ ዛሪዴ፥ «ታ ዳያ ኦኔ? ቃሲ ታ ኢሻቱ ኦኔ?» ያጌዳ። 34ባሬ ማታን ኡቴዳ ኣሳ ዩሺ ኣ ፄሊዴ፥ «ቤዒቴ፤ ታ ዳያኔ ታ ኢሻቱ ሃዋንቱሺ። 35ፆሳይ ኮዪያዋ ኦያ ኡባይ ታ ኢሻ፥ ታ ሚቻቶኔ ታ ዳዮ» ያጌዳ።

Currently Selected:

ማርቆሳ 3: dwrENT

Highlight

Copy