ማርቆሳ 2

ዬሱሲ ቦላይ ሲሌዳ ቢታኒያ ፓዳ

(ማት 9፡1-8፤ ሉቅ 5፡17-26)

1ኣማሬዳ ጋላሳፔ ጉዪያን፥ «ዬሱሲ ቂፊሪናሆማ ጉዬ ሲሚዴ፥ ሶዪን ዴዔ» ጊያ ሃሳያይ ሲሴቴዳ። 2ጎሊ ኣኬናን ኢፂና፥ ሃራይ ኣቶ፥ ካሪካ ኡንዓና ጋካናሲ ጮራ ኣሳይ ሺቄዳ፤ ሄዋንቱሲ ዬሱሲ ቃላ ኦዴ። 3ኦይዱ ኣሳቱ ቦላይ ሲሌዳ ኢቲ ቢታኒያ ቶኪዴ፥ ኣኮ ኣሄዲኖ። 4ኣሳይ ጮሬዳ ዲራው፥ ቢታኒያ ዬሱሳኮ ኣፋናው ኡንቱንቶ ዳንዳዬቴናን ኢፂና፥ ዬሱሲ ዴዒያ ባጋና ጎሊያ ቃሪዴ፥ ካራ ሉኬዲኖ፤ ሄ ሉኬዳሳና ቢታኒያ ኢ ጊሴዳ ሻንቻማና ዱጌ ዎዲኖ። 5ዬሱሲ ኡንቱንቱ ኣማኑዋ ቤዒዴ፥ ሄ ቦላይ ሲሌዳ ቢታኒያ፥ «ታ ናዓው፥ ኔ ናጋራይ ኣቶ ጌቴቴዳ» ያጌዳ።

6ሂጊያ ታማሪሲያዋንቱፔ ሄዋን ኡቴዳ ኢቱ ኢቱ ባሬንቱ ዎዛናኒ፥ 7«ላ ሃ ቢታኒ ሃዋ ማላ ኢታባ ፆሳ ቦላ ኣዪሲ ሃሳዪ? ፆሳ ፃላላፔ ኣቲን፥ ሃራይ ኦኔ ናጋራ ኣቶ ጋናው ዳንዳዪያዌ?» ያጊዴ ቆፔዲኖ።

8ኡንቱንቱ ባሬንቱ ዎዛናን ሄዋዳን ቆፖዋ ዬሱሲ ኤሌካ ባሬ ኣያናን ኤሪዴ፥ ኡንቱንታ «ሂንቴንቱ ሂንቴ ዎዛናን ኣዪሲ ሄዋዳን ቆፒቴ? 9ቦላይ ሲሌዳ ቢታኒያ፥ ‹ኔ ናጋራይ ኣቶ ጌቴቴዳ› ጊያዌ ማቴዬ? ዎይ፥ ‹ዴንዳ ኤቃዴ ኔ ሻንቻማ ቶካዴ ሃሜታ› ጊያዌ ማቴ? 10ሺን ታኒ፥ ኣሳ ናዓው፥ ሳዓ ቦላን ናጋራ ኣቶ ጋናው ማታይ ዴዒያዋ ታኒ ሂንቴንታ ኤሪሳና» ያጊዴ ሄ ቦላይ ሲሌዳ ቢታኒያ፥ 11«ኔና ጋይ፤ ዴንዳ ኤቃ፤ ያታዴ ኔ ሻንቻማ ቶካዴ ኔ ሶይ ባ» ያጌዳ።

12ቢታኒ ኤሌካ ዴንዲ ኤቂዴ፥ ባሬ ሻንቻማ ቶኪዴ፥ ኣሳይ ኡባይ ፄሊሺን ቢና ኣሳይ ኡባይ ማላሌቲዴ፥ «ኑኒ ሃዋ ማላባ ኡባካ ቤዒ ኤሮኮ» ያጊዴ ፆሳ ጋላቴዲኖ።

ዬሱሲ ሌዊያ ፄሴዳ

(ማት 9፡9-13፤ ሉቅ 5፡27-32)

13ዬሱሲ ጉጂካ ጋሊላ ኣባ ዶና ቤዳ፤ ኣሳይ ኡባይ ኣኮ ዬዳዋንታ ታማሪሴዳ። 14ሄዋና ኣዴ፥ ኢልፒዮሳ ናዓ ሌዊያ፥ ጊያዌ ቃራፃ ቃንፂያሳን ኡቴዳዋ ዴሚዴ፥ «ታና ካላ» ያጌዳ። ሄዋፔ ጉዬ ሌዊ ዴንዲ ኤቂዴ፥ ኣ ካሌዳ።

15ዬሱሲ ቁማ ማናው ሌዊያ ሶዪን ኡቴዳ ዎዴ፥ ቃራፃ ኣኪያ ጮራ ኣሳይኔ ናጋራንቻቱ ኣናናኔ ኣ ካሊያዋንቱና ኢቲፔ ኡቴዲኖ። ኣ ካሊያዋንቱ ጊዶን ሄዋንቱ ማላ ኣሳቱ ዳሬዲኖ። 16ሂጊያ ታማሪሲያ ኢቲ ኢቲ ፓሪሳዋቱ ዬሱሲ ናጋራንቻቱዋናኔ ቃራፃ ኣኪያዋንቱና ቁማ ሚሺን ቤዒዴ፥ «ኢ ኣዪሲ ናጋራንቻቱዋናኔ ቃራፃ ኣኪያዋንቱና ቁማ ሚ?» ያጊዴ፥ ኣ ካሊያዋንታ ኦቼዲኖ።

17ዬሱሲ ኡንቱንቱ ጊያዋ ሲሲዴ፥ «ሃርጋንቻቱዋፔ ኣቲን፥ ፓፃ ኣሳው ኣኪሚ ኮሼና፤ ታኒ ናጋራንቻቱዋ ፄሳናው ዬዳዋፔ ኣቲን፥ ፂላቱዋ ፄሳናው ያቤይኬ» ያጊዴ ኡንቱንቶ ዛሬዳ።

ፆማባ ኤራናው ሺቄዳ ኦሻ

(ማት 9፡14-17፤ ሉቅ 5፡33-39)

18ፃማቂያ ዮሃኒሳ ካሊያዋንቱኔ ፓሪሳዋቱ ፆሚኖ፤ ኣማሬዳ ኣሳቱ ዬሱሳኮ ዪዴ፥ «ዮሃኒሳ ካሊያዋንቱኔ ፓሪሳዋቱዋ ካሊያዋንቱ ፆሚኖ፤ ሺን ኔና ካሊያዋንቱ ኣዪሲ ፆሚኪኖ?» ያጌዲኖ።

19ዬሱሲ ኡንቱንታ «ቡላቻ ዬዳ ኣሳቱ ማቻቶ ኣኪያዌ ባሬንቱና ዴዒሺን፥ ፆማናው ዳንዳዪኖ? ማቻቶ ኣኪያዌ ኡንቱንቱና ዴዒሺን፥ ፆማናው ዳንዳይኪኖ። 20ሺን ማቻቶ ኣኪያዋ ኡንቱንቱ ማታፔ ኣፋና ዎዲ ያናዋ፤ ኡንቱንቱ ሄ ዎዴ ፆማናዋንታ።

21«ኤጫ ማዩዋ ቦላ ኦራ ፊያ ዎ ሲኪያ ኣሳይ ባዋ፤ ኤጫ ዎ ሲኮፔ፥ ኦራ ፊ ኤጫ ማዩዋ ፔሬ፤ ፔይካ ኮይሮዋፔ ዳራና። 22ቃሲ ሆዖ ዎዪኒያ ኤሳ ኤጫ ኦጎሩዋን ናዒያ ኣሳይ ባዋ፤ ሺን ናዖፔ፥ ሄ ዎዪኒያ ኤሳይ ኦጎሩዋ ዳኬ፤ ባሬዉካ ዎፌቴ፤ ኦጎሩካ ባዬ፤ ሺን ሆዖ ዎዪኒያ ኤሳ ኦራ ኦጎሩዋን ናዔቴ» ያጌዳ።

ሳምባታባ ኤራናው ሺቄዳ ኦሻ

(ማት 12፡1-8፤ ሉቅ 6፡1-5)

23ዬሱሲ ኢቲ ሳምባታ ጋላሲ ቲሻ ባንጋ ጊዶና ኣሺን፥ ኣ ካሊያዋንቱና ኣናና ቢዴ፥ ባንጋ ቲሻፔ ዱሳ ዶሜዲኖ። #ዛር 23፡25 24ፓሪሳዋቱ ዬሱሳ፥ «ቤዓ፤ ኔና ካሊያዋንቱ ሳምባታ ጋላሲ ሂጌ ጊዴናባ ኣዪሲ ኦኖ?» ያጌዲኖ።

25ዬሱሲ ኡንቱንታ፥ «ዳዊቴ ኮሻቲዴ፥ ሚያባ ኮዬዳ ዎዴ፥ ባሬናና ዴዒያዋንቱና ኦዳዋ ኡባካ ናባቢቤይኪቴ? #1ሳም 21፡1-6 26ኣቢያታሪ ቄሳቶ ኡባቶ ካፖ ጊዴዳ ዎዴ፥ ዳዊቴ ፆሳ ጎሊያ ጌሊዴ፥ ቄሳቱዋ ፃላላይ ማናፔ ኣቲን፥ ኦኒኔ ማናው ሂጌ ጊዴናዋ ጎዳ ሲንን ዎዳ ቁማ ሚዴ፥ ባሬናና ዴዒያዋንቶካ ኢሜዳ» ያጌዳ። #ዎግ 24፡9

27ቃሲካ ዬሱሲ ኡንቱንታ፥ «ሳምባታይ ኣሳው ሜቴዳዋፔ ኣቲን፥ ኣሳይ ሳምባታው ሜቲቤና። 28ሄዋ ዲራው፥ ታኒ፥ ኣሳ ናዓይ፥ ሃራይ ኣቶ፥ ሳምባታዉካ ጎዳ» ያጌዳ።

Currently Selected:

ማርቆሳ 2: dwrENT

Highlight

Copy