ማቶሳ 5

ዬሱሲ ዴሪያ ቦላን ጊዲዴ ታማሪሴዳ ቲሚርቲያ

(ማት 5፡1-7፡29)

1ዬሱሲ ጮራ ኣሳ ቤዒዴ፥ ፑዴ ዴሪያ ኬሲዴ ኡቴዳ። ኣ ካሊያዋንቱ ኣኮ ሺቄዲኖ። 2ኡንቱንታ ሃዋዳን ያጊ ታማሪሱዋ ዶሜዳ።

ቱሙ ኣንጁዋ ኣኪያ ኣሳቱዋ

(ሉቅ 6፡20-23)

3«ባሬንቱ ኣያና ዴዑዋን ሂዬሳ ጊዴዳዋ

ኤሪያዋንቱ ኣንጄቴዳዋንታ፤

ኣዪሲ ጎፔ፥ ሳሉዋ ካዉቴይ ኡንቱንቱሳ።

4ካዮቲያዋንቱ ኣንጄቴዳዋንታ፤

ኣዪሲ ጎፔ፥ ፆሳይ ኡንቱንታ ሚኒሳና። #ኢሳ 61፡2

5ኣሺኬ ጊዴዳዋንቱ ኣንጄቴዳዋንታ፤

ኣዪሲ ጎፔ፥

ኡንቱንቱ ሳዓ ላታና። #ማዝ 37፡11

6ፂሎቴ ኮሻቲያዋንቱኔ ሳሜቲያዋንቱ #5፡6 ሃዋ ቢሌይ ፆሳው ኤኖ ጊያዋንታ ዎይ ሎዖባ ዎይ ቱሞባ ኦያዋንታ ጉሳ።

ኣንጄቴዳዋንታ፤

ኣዪሲ ጎፔ፥ ፆሳይ ኡንቱንታ ካሊሳና።

7ማሪያዋንቱ ኣንጄቴዳዋንታ፤

ኣዪሲ ጎፔ፥

ፆሳይ ኡንቱንታ ማራና።

8ዎዛና ጌሻቱ ኣንጄቴዳዋንታ፤

ኣዪሲ ጎፔ፥

ኡንቱንቱ ፆሳ ቤዓና።

9ኣሳ ሲጌያዋንቱ ኣንጄቴዳዋንታ፤

ኣዪሲ ጎፔ፥ ፆሳይ ኡንቱንታ፥

ባሬ ናና ጊዴ ፄሳና።

10ፂሎቴ ዲራው

ዬዴርሴቲያዋንቱ ኣንጄቴዳዋንታ፤

ኣዪሲ ጎፔ፥ ሳሉዋ ካዉቴይ ኡንቱንቱሳ። #5፡10 ሳሉዋ ካዉቴይ ኡንቱንቱሳ፡ ጉሳይ ሄ ኣሳቱ ሳሉዋ ካዉቴ ላታናው ዳንዳዪያዋንታ ጊዲያዋ ቤሴ።

11«ሂንቴ ታና ካሊያ ዲራው፥ ኣሳይ ሂንቴና ቦሪያ ዎዴኔ ዋዪሲያ ዎዴ፥ ቃሲ ሂንቴ ቦላ ኢታባ ኡባ ዎርዱዋን ሃሳዪያ ዎዴ፥ ሂንቴ ኣንጄቴዳዋንታ። 12ሂንቴው ሳሉዋን ዎልቃማ ዎይታይ ዴዒያ ዲራው፥ ናሼቲቴ፤ ሃሹ ጊቴ፤ ኣዪሲ ጎፔ፥ ኣሳይ ሂንቴፔ ካሴ ዴዔዳ ናባቱዋ ሄዋዳን ዬዴርሴዲኖ።

ማፂኒያኔ ፖዑዋ ሌሚሱዋ

(ማር 9፡50፤ ሉቅ 14፡34-35)

13«ኣሳ ኡባሲ ሂንቴ ማፂኔ ማላ፤ ሺን ማፂኒ ማልዓና ዮፔ፥ ዛሪዴ ኣ ዎቲ ማልዔኔ? ካሬ ኦሊና፥ ኣሳይ ኣ ዬ ሃሜታናፔ ኣቲን፥ ሲንው ኣይኔ ማዴና።

14«ሃ ኣላሜው ሂንቴ ፖዖ፤ ዴሪያ ሁጲያን ኬፄቴዳ ካታማይ ጌማና ዳንዳዬና። 15ፆምፒያ ፆምፒዴ፥ ሶዪን ዴዒያ ኣሳ ኡባው ፖዓና ማላ፥ ቂያ ሳን ዎፔ ኣቲን፥ ካሚያ ሚሻ ጊዶን ቁምዒ ዎያ ኣሳይ ኦኒኔ ባዋ። 16ሄዋዳንካ፥ ኣሳይ ሂንቴ ኦያ ሎዖ ኦሱዋ ቤዒዴ፥ ሳሉዋን ዴዒያ ሂንቴ ኣዉዋ ቦንቻና ማላ፥ ሂንቴ ፖዑ ኣሳ ሲንን ፖዖ።

ሙሴ ሂጊያባ

17«ታኒ ሙሴ ሂጊያኔ ናባቱ ታማሪሲያዋ #5፡17 ሙሴ ሂጊያኔ ናባቱ ታማሪሲያዋ፡ ጉሳይ ኣዪሁዲያ ጌሻ ማፃፋ፤ ሄዌኔካ ኤጫ ጫቁዋ። ዪሳናው ዬዳዋ ሂንቴው ማላቶፖ፤ ታኒ ፖላናው ዬዳዋፔ ኣቲን፥ ዪሳናው ያቤይኬ። 18ኣዪሲ ጎፔ፥ ታኒ ሂንቴው ቱሙዋ ኦዳይ፤ ሳሉኔ ሳዓይ ኣና ጋካናው፥ ቃሲ ኡባባይካ ፖሌታና ጋካናው፥#5፡18 ኡባባይካ ፖሌታና ጋካናው፡ ጉሳይ ቃላይ ታማሪሲያ ኡባይ ቱማቴን ቆንጫና ጋካናው። ሂጊያፔ ኢቲ ጫቻይካ ዎይ ቄሪ ፒዶሊካ ኣና። 19ሄዋ ዲራው፥ ሃ ኣዛዙዋ ኡባፔ ጉፂያ ኢቲ ኣዛዙዋ ሜንያ ኡራይ ኦኒኔ፥ ቃሲ ሃራቱካ ባሬዋዳን ሃናናዳን ታማሪሲያ ኡራይ ኦኒኔ፥ ሳሉዋ ካዉቴን ኡባፔ ጉ ጊዳና፤ ሺን ኣዛዙዋ ኦያዌኔ ሃራንቱካ ኦናዳን ታማሪሲያዌ ኦኒኔ ሳሉዋ ካዉቴን ቃ ጊዳና። 20ኣዪሲ ጎፔ፥ ሂንቴ ፂሎቴይ ሙሴ ሂጊያ ታማሪሲያዋንቱ ፂሎቴፔኔ ፓሪሳዋቱዋ ፂሎቴፔ ዳራና ዮፔ፥ ሳሉዋ ካዉቴ ሂንቴ ሙሌ ጌሌናዋ ታኒ ኦዳይ።

21«ቤኒ ኣሳው፥ ‹ኣሳ ዎፓ፤ ኣሳ ዎዳ ኦኒኔ ፒርዴታና› ጌዳዋ ሲሴዲታ። #ኬስ 20፡13፤ ዛር 5፡17 22ሺን ታኒ ሂንቴው ኦዳይ፤ ባሬ ኢሻ ሃንቄቲያ ኡባይ ፒርዴታና፤ ባሬ ኢሻ ቦሪያ ኡባይ ሻንጉዋ ፒርዳው ሺቃና፤ ቃሲ ባሬ ኢሻ፥ ‹ሎዌ› ጊያ ኡባይ ጋናሚያ ታማ ፒርዳው ሺቃና። 23ሄዋ ዲራው፥ ኔኒ ያርሺያሳን ያርሺሺን፥ ኔ ኢሻ ናቄዳባይ ኔው ሄዋን ሃሳዬቶፔ፥ 24ኔ ያርሹዋ ሄዋን ኣጋዴ ባ፤ ካሴታዴ ኔ ኢሻና ሲጌታ ዲጋ፤ ሄዋፔ ካላ ያዴ፥ ኔ ያርሹዋ ያርሻ።

25«ኔና ሞቲያዋና ዎዲ ዴዒሺን ኤሌ ኣናና ሲጌታ ዲጋ፤ ሄዌ ዮፔ፥ ኢ ኔና ዳና ሲን ኣና፤ ቃሲ ዳናይ ኔና ፖሊሴው ኣ ኢሚና፥ ፖሊሲ ኔና ቃሾ ጎሌን ዬጋና። 26ታኒ ኔው ቱሙዋ ኦዳይ፤ ኔኒ ኢቲ ሳንቲሚ ኣቴናን፥ ኔ ማጋጩዋ ዉርሳዴ ጪጋና ጋካናው፥ ሙሌካ ቃሾ ጎሌፔ ኬሳካ።

ዎሹማባው ኢሜቶ ቲሚርቲያ

27« ‹ዎሹሞፓ› ጌዳዋ ሲሴዲታ። #ኬስ 20፡14፤ ዛር 5፡18 28ሺን ታኒ ሂንቴው ያጋይ፤ ‹ማጫዉኖ ፄሊዴ ኣሞቲያ ኡባይ፥ ባሬ ዎዛና ጊዶን ሄ ዎዴ ኢናና ዎሹሜዳ።› 29ኔ ኡሼቻ ኣይፊ ኔና ናጋራ ኦሲሶፔ፥ ኔፔ ዎጫዴ ኦላ ኣጋ፤ ኣዪሲ ጎፔ፥ ኔ ቦላይ ሙሌካ ጋናሚያ ታማን ኦሌቲያዋፔ፥ ኣፔ ኢቱ ፓጪንቶ ኔው ሎዓ። #ማት 18፡9፤ ማር 9፡47 30ቃሲ ኔ ኡሼቻ ኩሺ ኔና ናጋራ ኦሲሶፔ፥ ኔፔ ቃንፃዴ ኦላ ኣጋ፤ ኣዪሲ ጎፔ፥ ኔ ቦላይ ሙሌካ ጋናሚያ ታማን ኦሌቲያዋፔ፥ ኣፔ ኢቱ ፓጪንቶ ኔው ሎዓ።

ማቺያ ዬዴናዳን ኢሜቶ ቲሚርቲያ

(ማት 19፡9፤ ማር 10፡11-12፤ ሉቅ 16፡18)

31« ‹ቃሲ ባሬ ማቻቶ ዬዲያ ኦኒኔ ኢዞ ዬዲያ ፓራማ ኢሞ› ጌቴቴዳ። #ዛር 24፡1-4፤ ማት 19፡7፤ ማር 10፡4 32ሺን ታኒ ሂንቴው ያጋይ፤ ‹ባሬ ማቻታ ዎሹሜናን ዴዒሺን ዬዲያ ኦኒኔ ኢዞ ዎሹማ ኬሴ፤ ቃሲ ኣሲናይ ዬዴዳ ሚሺራቶ ኣኪያዌ ኦኒኔ ዎሹሜ።› #ማት 19፡9፤ ማር 10፡11-12፤ ሉቅ 16፡18፤ 1ቆር 7፡10-11

ጫቄናዳን ኢሜቶ ቲሚርቲያ

33«ቃሲ ቤኒ ኣሳው፥ ‹ዎርዱዋን ጫቆፓ፤ ሺን ኔ ጎዳው ጫቄዳዋ ፖላ› ጌዳዋ ሲሴዲታ። #ዎግ 19፡12፤ ፓይ 30፡2፤ ዛር 23፡21 34ሺን ታኒ ሂንቴው ያጋይ፤ ‹ኡባካ ጫቆፒቴ›፤ ሳሉ ፆሳ ካዉቴ ኦይዲያ ጊዲያ ዲራው፥ ‹ሳሉዋን ጫቆፒቴ› 35ቃሲ ሳዓይ ኣ ጌዲ ዬያሳ ጊዲያ ዲራው፥ ‹ሳዓን ጫቆፒቴ›፤ ቃሲካ፥ ዬሩሳላሜ ዎልቃማ ካቲያ ካታማ ጊዲያ ዲራው፥ ‹ዬሩሳላሜኒካ ጫቆፒቴ› #ኢሳ 66፡1፤ ማዝ 48፡2 36ኔኒ ኢቲ ቢናናካ ቦ ዎይ ካሬ ኬሳናው ዳንዳዬና ዲራው፥ ‹ኔ ሁጲያንካ ጫቆፓ።› 37ሺን ሂንቴ፥ ‹ኤ› ዎይ፥ ‹ጊዴና› ጊቴ፤ ሃዋንቱፔ ሃራይ ሴፃናፔ ዬ።

ኢታ ኢታን ዛሬናዳን ኢሜቶ ቲሚርቲያ

(ሉቅ 6፡29-30)

38« ‹ኣዪፊያ ዲራው ኣዪፊያ፤ ኣቻ ዲራው ኣቻ› ጌዳዋ ሲሴዲታ። #ኬስ 21፡24፤ ዎግ 24፡20፤ ዛር 19፡21 39ሺን ታኒ ሂንቴው ያጋይ፤ ‹ሂንቴው ኢታባ ኦያ ኡራው ኢታን ዛሮፒቴ፤ ኦኒኔ ኔ ኡሼቻ ባጋ ሻዪያ ባቆፔ፥ ኔ ሃዲርሳ ባጋ ሻዪያካ ኣ ቤሳ፤ 40ኔ ሻሚጪያ ኣካናው ኢቲ ኡራይ ኔና ሞቶፔ፥ ሄ ኡራው ኔ ኮቲያካ ጉጃ ኢማ። 41ኦኒኔ ኔና ኢቲ ሳቲያ ኦጊያ ባሬናና ባናዳን ዎልቃንፔ፥ ኣናና ላዑ ሳቲያ ኦጊያ ባ። 42ኔና ዎሲያ ኡራው ኢማ፤ ቃሲ ኔፔ ታልዓና ኮዪያ ኡራዉካ ዲጎፓ።›

ሞርኪያ ሲቃና ማላ ኢሜቶ ቲሚርቲያ

(ሉቅ 6፡27-36)

43« ‹ኔ ላጌቱዋ ሲቃ፤ ኔ ሞርኪያ ሞርካ› ጌዳዋ ሲሴዲታ። #ኬስ 19፡18 44-45ሺን ታኒ ሂንቴው ያጋይ፤ ሳሉዋን ዴዒያ ሂንቴ ኣዉዋሲ ናና ጊዳና ማላ፥ ሂንቴ ሞርኬቱዋ ሲቂቴ፤ ሂንቴና ሼቂያዋንታ ኣንጂቴ፤ ሂንቴና ኢፂያዋንቶ ሎዖባ ኡዲቴ፤ ሂንቴና ዬዴርሲያዋንቶ፥ ፆሳ ዎሲቴ፤ ኣዪሲ ጎፔ፥ ኢታ ኣሳዉካ ሎዖ ኣሳዉካ ፆሳይ ባሬ ኣዋ ኣዋፂሴ፤ ቃሲ ፂላቱዋሲካ ናጋራንቻቱዋሲካ ባሬ ኢራ ቡኪሴ። 46ሂንቴ ሂንቴና ሲቂያዋንቱ ፃላላ ሲቆፔ፥ ሂንቴው ኣይ ዎይታይ ዴዒ? ሃራይ ኣቶ፥ ናጋራንቻቱካ ሄዋዳን ኡዲኖ። 47ሂንቴ ሂንቴንቱ ኢሻቱዋ ፃላላ ሳሮቶፔ፥ ሃራቱ ኡዲያዋፔ ኣያባ ኣያ ኡዴዲቴ? ሃራይ ኣቶ፥ ኣዪሁዴ ጊዴና ኣሳይካ ሄዋዳን ኡዴ። 48ሄዋ ዲራው፥ ሳሉዋን ዴዒያ ሂንቴ ኣዉ ፖሎ ጊዶዋዳን፥ ሂንቴካ ፖሎ ጊዲቴ። #ኬስ 19፡2፤ ዛር 18፡13

Currently Selected:

ማቶሳ 5: dwrENT

Highlight

Copy