1 ቴሴሎንቃ 5
5
ጎዳ ዩሳ ጊጊዴ ናጊቴ
1ሺን ኑናዳን ፆሳ ካሊያዋንቶ፥ ሃ ዬዋቱ ኣዉዴ ሃናኔንቶ፥ ዎዲያኔ ኣጌና ሂንቴንቶ ፃፋናው ኮሼና። 2ኣዪሲ ጎፔ፥ ጎዳ ጋላሳይ ካዪሱ ቃማ ዪያዋዳን ያናዋ ሂንቴንቱ ሎይ ኤሪታ። 3ኣሳይ፥ «ኡባባይ ሳራ፤ ኣያይካ ሃኔና» ጊሺን፥ ማጫ ኣሳ ዬሉ ኦይቂያዋዳን፥ ባሻይ ኡንቱንቱ ቆፔናን ኡንቱንቱ ቦላ ያና። ኡንቱንቱ ሙሌካ ኬሲ ኣኪኪኖ።
4ሺን ኑናዳን ፆሳ ካሊያዋንቶ፥ ሄ ጋላሳይ ሂንቴንቶ ካዪሱ ዪያዋዳን ያናው ሂንቴንቱ ማኒ ዴዒኪታ። 5ሂንቴ ኡባይ ፖዑዋ ኣሳኔ ጋላሳ ኣሳ፤ ኑኒ ቃማ ኣሳ ዎይ ማ ኣሳ ጊዶኮ። 6ሄዋ ዲራው፥ ኑኒ ሃራቱ ጌሚዒሺያዋዳን ጌሚዒሻናው ቤሴና። ኑኒ ቤጎታናዉኔ ዎጋን ዴዓናው ቤሴ። 7ኣዪሲ ጎፔ፥ ጌሚዒሺያዋንቱ ቃማ ጌሚዒሺኖ፤ ማቲያዋንቱካ ቃማ ማቲኖ። 8ሺን ኑኒ ጋላሳ ኣሳ ጊዲያዋንቱ ዎጋን ዴዓናው ቤሴ። ኑኒ ኣማኑዋኔ ሲቁዋ ቲራን ዎያ ኦላ ሚሻዳን ኦይቂዴ፥ ኑኒ ሂዶታን ናጊያ ኣቶቴ፥ ቢራታ ቆቢያዳን፥ ሁጲያን ዎናው ቤሴ። #ኢሳ 59፡17፤ ኤፌ 6፡13-17 9ኣዪሲ ጎፔ፥ ፆሳይ ኑና ኑ ጎዳ ዬሱሲ ኪሪስቶሳ ባጋና ኣቶቴ ዴማናው ዶሬዳዋፔ ኣቲን፥ ኣ ሃንቁዋ ኣካናው ዶሪቤና። 10ኑኒ ፓፃ ጊዲና ዎይ ሃዪቄዳዋንታ ጊዲና፥ ኪሪስቶሳና ኢቲፔ ዴዓና ማላ፥ ኪሪስቶሲ ኑ ዲራው ሃዪቄዳ። 11ሄዋ ዲራው፥ ሂንቴንቱ ቃሲ ሃዒ ኦያዋዳን፥ ሃራቱዋ ሜንቴኔ ኢቱ ኢቱዋ ዲቺቴ።
ዉርሴ ዞሪያኔ ሳሮታ
12ኑናዳን ፆሳ ካሊያዋንቶ፥ ሂንቴንቱ ጊዶን ኦያዋንታ፥ ሂንቴና ኣማኑዋ ኦጊያን ካሌያዋንታኔ ዞሪያዋንታ፥ ሂንቴንቱ ቦንቻና ማላ፥ ሂንቴና ዎሴቶ። 13ኡንቱንቱ ኦያ ኦሱዋ ዲራው፥ ኡንቱንታ ሎይ ቦንቺቴኔ ሲቂቴ። ኢቱ ኢቱዋና ሳሮቴን ዴዒቴ።
14ኑናዳን ፆሳ ካሊያዋንቶ፥ ኑኒ ሂንቴና ዞሬቶ፤ ማራይ ባዪና ዴዑዋ ዴዒያዋንታ ሴሪቴ። ያዪያዋንታ ሜንቴ። ዎልቂ ባይናዋንታ ማዲቴ። ኣሳ ኡባ ዳንዳዪቴ። 15ኦኒኔ ኢታ ዲራው ኢታ ዛሬና ማላ ናጌቲቴ፤ ሺን ኡባ ዎዴ፥ ኢቱ ኢቶኔ ቃሲ ኣሳ ኡባው ሎዖባ ኦናው ሚኒቴ።
16ኡባ ዎዴ ናሼቲቴ። 17ኡባ ዎዴ ቃንፄናን ፆሳ ዎሲቴ። 18ኡባባኒ ጋላቲቴ። ኣዪሲ ጎፔ፥ ኪሪስቶሳ ዬሱሳ ባጋና ፆሳይ ሂንቴፔ ኮዪያዌ ሄዋ።
19ጌሻ ኣያና ታማ ቶዪሶፒቴ። 20ቲምቢቲያ ቃላ ካፒቴ። 21ኡባባካ ፓጪቴ። ሎዖባ ኦይቂቴ። 22ኢታ ኦሱዋ ኡባፔ ሃኪቴ።
23ሳሮቴ ፆሳይ ባሬ ሁጴው ሂንቴና ኡባባኒ ፖሎ ጌሾ፤ ቃሲ ኑ ጎዳይ ዬሱሲ ኪሪስቶሲ ዪያ ዎዴ፥ ፆሳይ ሂንቴንቱ ኣያና፥ ሼምፑዋኔ ኣሳቴ ኢቲፔ ቦሬቴናዋኔ ፖሎ ኡዲዴ ናጎ። 24ሂንቴና ፄሲያዌ ኣማኔቴዳዋ፤ ቃሲ ሄዋ ኢ ፖላና።
25ኑናዳን ፆሳ ካሊያዋንቶ፥ ኑሲ ፆሳ ዎሲቴ።
26ኢሻቱዋ ኡባ ጌሻ ዬሩዋ ዬሪዴ ሳሮቲቴ።
27ሂንቴ ሃ ዳቢዳቢያ ጌሻ ኢሻቱዋ ኡባው ናባባናዳን፥ ጎዳ ሱንን ሂንቴና ዎሳይ።
28ኑ ጎዳ ዬሱሲ ኪሪስቶሳ ኣ ኬካቴይ ሂንቴናና ኢቲፔ ጊዶ።
Currently Selected:
1 ቴሴሎንቃ 5: dwrENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn More About Ooratha Caaquwaa
