1 ቴሴሎንቃ 4

ፆሳ ናሼቺያ ዴዑዋ

1ሲሚ ዉርሴን፥ ኑናዳን ፆሳ ካሊያዋንቶ፥ ፆሳ ናሼቻናው ሂንቴንቱ ዋኒ ዴዓናው ቤሲንቶ፥ ኑፔ ታማሬዲታ። ሄዌ ሂንቴንቱ ካሴዴፔ ዴዒያ ማራ፤ ሺን ሃዒ ሂንቴንቱ ካሴዋፔ ሎይዴ ኦናዳን፥ ጎዳ ዬሱሳ ሱንን ሂንቴና ዎሴቶኔ ዞሬቶ። 2ኣዪሲ ጎፔ፥ ኑኒ ጎዳ ዬሱሳ ማታ ባጋና ሂንቴንቶ ኢሜዳ ኣዛዙ ሃቃዌንቶ፥ ሂንቴንቱ ኤሪታ።

3ኣዪሲ ጎፔ፥ ፆሳይ ሂንቴፔ ኮዪያዌ ኣዬ ጎፔ፥ ሂንቴንቱ ጌሻ ጊዳናዋኔ ዎሹሚያዋ ኡባና ኣጋናዋ ኮዬ። 4ሂንቴንቱ ሁጲያን ሁጲያን ጌሻቴኒኔ ቦንቹዋን ሂንቴንቱ ማቺያና ዎቲ ዴዓኔንቶ #4፡4 ጌሻቴኒኔ ቦንቹዋን ሂንቴንቱ ማቺያና ዎቲ ዴዓኔንቶ፡ ጉሳይ ባሬ ኣሳቴ ናጊዴ ጌሻቴን ዴዓናው ኮሺያዋ ቤሴ። ኤራናው ቤሴፔ ኣቲን፥ 5ፆሳ ኤሬና ኣማኔና ኣሳቱዋዳን፥ ሎይ ኣሞቲያዋን ኣካናው ቤሴና። 6ኑኒ ቃሲ ካሴ ሂንቴንቶ ኦዴዳዋዳኒኔ ሂንቴና ሚኒሲ ዞሬዳዋዳን፥ ጎዳይ ሃዋ ማላባን ኡባን ሃሉዋ ኬሲያዋ ጊዲያ ዲራው፥ ኦኒኔ ሃ ዬዉዋን ባሬ ኢሻ ናቃናዉኔ ጪማናው ቤሴና። 7ኣዪሲ ጎፔ፥ ፆሳይ ኑና ጌሻቴን ዴዓናው ፄሴዳዋፔ ኣቲን፥ ቱናቴን ዴዓናው ፄሲቤና። 8ሄዋ ዲራው፥ ሃ ቲሚርቲያ ኢፂያ ኦኒኔ ሂንቴንቶ ባሬ ጌሻ ኣያና ኢሚያ ፆሳ ኢፄፔ ኣቲን፥ ኣሳ ኢፄና።

9ሂንቴ ሂንቴንቱ ሁጲያን ኢቱ ኢቱዋ ሲቃናዳን፥ ፆሳይ ሂንቴና ታማሪሴዳ ዲራው፥ ሂንቴንቱ ሂንቴንቱ ኢሻቱዋ ዎቲ ሲቃናው ቤሲንቶ፥ ኑኒ ፃፋናው ኮሼና። 10ቃሲ ማቂዶኒያ ቢታ ኡባን ዴዒያ ኢሻቱዋ ኡባቱዋ ቱሙ ሂንቴንቱ ሲቂታ። ሺን ኑናዳን ፆሳ ካሊያዋንቶ፥ ሂንቴንቱ ሄዋፔ ጉጂ ጉጂዴ ኡንቱንታ ሲቃና ማላ፥ ሂንቴና ዎሴቶ።

11ኑኒ ካሴ ሂንቴንቶ ኦዴዳዋዳን፥ ዎፑ ጌዳ ዴዑዋ ዴዒቴ። ቃሲ ሂንቴና ኮሺያዋ ዴማናው፥ ሂንቴ ኩሺያን ኦቴ። 12ሄዋ ጊዶፔ፥ ኣማኔናዋንቱ ማታን ሂንቴንቱ ቦንቼታናኔ ቃሲ ሂንቴና ኮሺያባው ኦናኔ ኣዉዳሺኪታ።

ጎዳይ ዪያ ዎዴ ሃዪቄዳ ኣሳይኔ ፓፃ ዴዒያ ኣሳይ ሃናናባ

13ሺን ኑናዳን ፆሳ ካሊያዋንቶ፥ ሂንቴንቱ ሂዶታይ ባይና ኣሳቱዋዳን ካዮቴና ማላ፥ ሃይቄዳ ኣሳቱዋባ ሂንቴንቱ ኤራና ማላ ኮዬቶ። 14ኑኒ ዬሱሲ ሃዪቄዳዋኔ ቃሲ ሃዪቁዋፔ ኢ ዴንዴዳዋ ኣማኔቶ፤ ሄዋዳንካ፥ ፆሳይ ዬሱሳ ኣማኒዴ ሃዪቄዳዋንታ ዬሱሳና ኣሃናዋ ኣማኔቶ።

15ኣዪሲ ጎፔ፥ ኑኒ ሂንቴንቶ ኦዲያ ጎዳ ቃላይ ሃዋ፤ ኑኒ፥ ጎዳ ላዔንዋ ዩሳ ጋላሳይ ጋካናው ሃዋን ፓፃ ዴዒያዋንቱ፥ ሃይቄዳዋንቱፔ ካሴቶኮ። 16ኣዪሲ ጎፔ፥ ጎዳይ ባሬ ሁጲያን ኣዛዙዋና፥ ኪታንቻቱዋ ካፑዋ ኮሻና፥ ፆሳ ማላካታ ጊሬና ሳሉዋፔ ዎና። ኪሪስቶሳ ኣማኒዴ ሃዪቄዳዋንቱ ካሴቲዴ ሃዪቁዋፔ ዴንዳና። 17ሄዋፔ ጉዪያን፥ ኑኒ ሄ ዎዴ ፓፃ ዴዒያዋንቱ፥ ጎዳና ጫርኩዋ ጊዶን ጋኬታናው ኡንቱንቱና ኢቲፔ ሻሪያን ዴንዳና። ሄዋ ዲራው ኑኒ ጎዳና ኢቲፔ ኡባ ዎዴ ዴዓና። 18ሄዋሲ፥ ሃ ቃላን ኢቱ ኢቱዋ ሜንቴ።

Currently Selected:

1 ቴሴሎንቃ 4: dwrENT

Highlight

Copy