1 ዮሃኒሳ ኪታ 5

ሃ ኣላሚያ ፆኒያዋ

1ኦኬቴዳ ኪሪስቶሳ ያጊዴ፥ ዬሱሳ ኣማኒያ ኡባይ ፆሳ ናና፤ ቃሲ ፆሳ ኣዉዋ ሲቂያ ኦኒኔ ኣ ናናቱዋካ ሲቄ። 2ኑኒ ፆሳ ሲቂያዋኒኔ ኣ ኣዛዙዋ ናጊያዋን፥ ፆሳ ናናቱዋ ሲቂያዋ ኤሬቶ። 3ኣዪሲ ጎፔ፥ ኑኒ ፆሳ ሲቂያዌ ኣ ኣዛዙዋ ናጊያዋ፤ ኣ ኣዛዙካ ዴፆ ጊዴና። 4ኣዪሲ ጎፔ፥ ፆሳ ናዓ ጊዲያ ኦኒኔ ሃ ኣላሚያ ፆናናው ዳንዳዬ፤ ኑኒካ ሃ ኣላሚያ ፆናናዌ ኑ ኣማኑዋና። 5ሃ ኣላሚያ ፆናናው ዳንዳዪያዌ ኦኔ? ዬሱሲ ፆሳ ናዓ ጊዲያዋ ኣማኒያዋ ፃላላይ ፆናና።

ኪሪስቶሳዋ ማርካቴዳዋ

6ፂንቃታ ሃናኔ ሃይቁዋ ሱና ዬዳዌ ሃዋ፤ ኢካ ዬሱሲ ኪሪስቶሳ፤ ሃናኔ ሱና #5፡6 ሃናኔ ሱና፡ ዬሱሲ ሃ ኣላሚያ ዪዴ ፂንቃታ ሃ ፃላላና ጊዴናን ባሬ ሃይቁዋ ሱን ዬዳ። ሄዋ ጉሳይ ኢ ኣሳ ኩሺያን ፃማቄቱሳ ፃላላ ጊዴናን፥ ሃ ኣላሚያን ሃይቄዳ ጉሳ። ኢ ዬዳዋፔ ኣቲን፥ ሃ ፃላላና ዪቤና። ጌሻ ኣያናይ ቱማ ጊዲያ ዲራው፥ ሄዌ ቱማ ጊዲያዋ ኢ ባሬ ሁጴው ማርካቴ። 7ኣዪሲ ጎፔ፥ ሄዙ ማርካቱ ዴዒኖ። 8ሄዋንቱ፥ ፆሳ ኣያና፥ ሃኔ ሱ፤ ሃ ሄዛቱ ኢቱ ኢቱዋዋ ጳልቂኪኖ። 9ኑኒ ኣሳይ ማርካቲያዋ ኣማኖፔ፥ ፆሳይ ማርካቲያዌ ኣሳዋፔ ሎይ ኣ፤ ኣዪሲ ጎፔ፥ ፆሳይ ባሬ ናዓባ ማርካቴዳ ማርካቴይ ሃዋ። 10ፆሳ ናዓ ኣማኒያ ኡራ ዎዛናን ሃ ማርካቴይ ዴዔ። ፆሳ ኣማኔና ኡራይ ኦኒኔ ፆሳይ ባሬ ናዓው ማርካቴዳ ማርካቴ ኣማኒቤና ዲራው፥ ፆሳ ዎርዱዋ ጌ።

11ሲሚ ማርካቴይ ሃዋ፤ ፆሳይ ኑሲ ሜና ዴዑዋ ኢሜዳ፤ ሄዌካ ኣ ናዓን ዴዔ። 12ፆሳ ናዓይ ዴዒያ ኦሲኔ ዴዑ ዴዔ፤ ፆሳ ናዓይ ባይና ኦሲኔ ዴዑ ባዋ።

ሜና ዴዑዋ

13ፆሳ ናዓ ሱንን ኣማኒያ ሂንቴንቶ ሜና ዴዑ ዴዒያዋ ሂንቴ ኤራና ማላ፥ ሃዋ ሂንቴንቶ ፃፋዲ። 14ፆሳይ ኮዪያዋዳን፥ ኣዪኔ ኑኒ ኣ ዎሶፔ፥ ኢ ሲሲያዋ ኑኒ ኤሪያ ዲራው፥ ኣ ሲንን ያዮኮ። 15ኑኒ ዎሲያ ኡባን ኢ ሲሲያዋ ኤሮፔ፥ ኑኒ ኣ ዎሴዳዋ ኢ ዛሬዳዋ ኤሬቶ።

16ኦኒኔ ሃይቁ ቤሴና ናጋራ ባሬ ኢሻይ ኦሺን ቤዖፔ፥ ፆሳ ዎሳናው ቤሴ፤ ሃይቁ ቤሴና ናጋራ ኦዳዋንቶ ፆሳይ ዴዑዋ ኢማና። ሃይቁ ቤሲያ ናጋራይ ዴዔ፤ ታኒ ሂንቴና ሄዎ ፆሳ ዎሲቴ ጊኬ። 17ባዪዞ ኦሱ ኡባይ ናጋራ፤ ሺን ሃይቁ ቤሴና ናጋራይ ዴዔ።

18ፆሳ ናናይ ኦኒኔ ናጋራ ኡባ ዎዴ ኦናዋ ኑኒ ኤሬቶ። ኣዪሲ ጎፔ፥ ፆሳ ናዓይ ኡንቱንታ ናጌ፤ ቃሲ ፃላሂያ ካፑካ ኡንቱንታ ቆሃናው ዳንዳዬና። 19ኑኒ ፆሳዋንታ ጊዲያዋኔ ሃ ኣላሚ ኡባይ ፃላሂያ ካፑዋን ሞዴቴዳዌ ኤሬቶ።

20ኑኒ ቱሙ ፆሳ ኤራናዳን፥ ፆሳ ናዓይ ዬዳዋኔ ኑሲ ኣኬካ ኢሜዳዋ ኤሬቶ። ኑኒ ቱሙ ፆሳ ጊዶን፥ ኣ ናዓ ዬሱሲ ኪሪስቶሳ ጊዶን ዴዔቶ፤ ኢ ቱሙ ፆሳኔ ሜና ዴዑዋ።

21ታ ናቶ፥ ኤቃቱዋፔ ሂንቴ ሁጲያ ናጊቴ።

Currently Selected:

1 ዮሃኒሳ ኪታ 5: dwrENT

Highlight

Copy