زَكَرِيَّا 6

رُؤية عربات الحرِب

1وَ بَتَّانْ رَفَعْت رَاسِي وَ شِفْت رُؤْيَةْ. وَ دَاهُو شِفْت أَرْبَعَةْ عَرَبَاتْ هَنَا حَرِبْ مَرَقَوْا مِنْ بَيْن جِبَالْ إِتْنَيْن هَنَا نَحَاسْ. 2الْعَرَبَةْ الْأَوَّلَانِيَّةْ كَارِّينْهَا خَيْل حُمُرْ وَ التَّانِيَةْ كَارِّينْهَا خَيْل زُرُقْ. 3وَ التَّالْتَةْ كَارِّينْهَا خَيْل بُيُضْ وَ الرَّابْعَةْ كَارِّينْهَا خَيْل رُقُطْ وَ قَادْرِينْ. 4وَ أَنَا سَأَلْت الْمَلَكْ الْقَاعِدْ يِحَجِّي لَيِّ وَ قُلْت: «هُمَّنْ دَوْل يِمَثُّلُوا شُنُو، يَا سِيدِي؟» 5وَ الْمَلَكْ رَدَّ لَيِّ وَ قَالْ: «هُمَّنْ دَوْل يِمَثُّلُوا رِيحْ السَّمَاءْ التُّسُوقْ عَلَيْ الْجِيهَاتْ الْأَرْبَعَةْ، الْمَارْقَةْ مِنْ حَضَرَةْ اللّٰهْ سِيدْ كُلَّ الْأَرْض. 6وَ عَرَبَةْ الْخَيْل الزُّرُقْ تَمْشِي عَلَيْ بَلَدْ الْمُنْشَاقْ. وَ الْخَيْل الْبُيُضْ يِتَابُعُوهُمْ. وَ الْخَيْل الرُّقُطْ كَمَانْ يَمْشُوا عَلَيْ بَلَدْ الْجُنُوبْ. 7وَ الْخَيْل الْقَادْرِينْ دَوْل مَرَقَوْا لِيَمْشُوا يُرُوغُوا الْأَرْض. وَ اللّٰهْ قَالْ لَيْهُمْ: ‹أَمْشُوا رُوغُوا الْأَرْض.› وَ هُمَّنْ مَشَوْا رَاغَوْا الْأَرْض.»

8وَ بَعَدْ دَا، اللّٰهْ نَادَانِي بِحِسّ عَالِي وَ قَالْ: «شِيفْ! الْيَمْشُوا فِي بَلَدْ الْمُنْشَاقْ يِهَدُّوا غَضَبِي فِي الْبَلَدْ دِي.»

يسوّوا تاج لكبير رجال الدين

9وَ اللّٰهْ حَجَّى لَيِّ وَ قَالْ: 10«أَقْبَلْ الْهَدَايَا الْجَابَوْهُمْ حَلْدَايْ وَ طُوبِـيَّا وَ يَدَعْيَا مِنْ النَّاسْ الْوَدَّوْهُمْ فِي الْغُرْبَةْ. الْيَوْم بَسْ، إِنْتَ ذَاتَكْ أَمْشِي فِي بَيْت يُوشِيَّا وِلَيْد صَفَنْيَا أَشَانْ التَّلَاتَةْ رُجَالْ دَوْل دَلَّوْا هِنَاكْ وَكِتْ جَوْا مِنْ بَابِلْ. 11وَ أَقْبَلْ مِنْهُمْ هَدَايَا الْفُضَّةْ وَ الدَّهَبْ وَ دُقّ بَيْهُمْ تَاجْ. وَ خُطَّهْ فِي رَاسْ كَبِيرْ رُجَالْ الدِّينْ يَشُوعْ وِلَيْد يُوصَادِقْ.

12«وَ قُولْ لِيَشُوعْ: ‹دَاهُو اللّٰهْ الْقَادِرْ قَالْ:

”دَاهُو الرَّاجِلْ الْبِنَادُوهْ بِذْرَةْ

وَ تِحِتْ رِجِلَيْنَهْ يَبْذُرْ كُلَّ شَيّءْ

وَ هُو يَبْنِي بَيْت اللّٰهْ بَتَّانْ.

13أَيْوَى، هُو بَسْ يَبْنِي بَيْت اللّٰهْ

وَ هُو بَسْ الْيَلْبَسْ خَلَقْ الْمُلُكْ

وَ يَقْعُدْ فِي كُرْسِيهْ وَ يَحْكِمْ.

وَ رَاجِلْ الدِّينْ كُلَ

يَقْعُدْ جَنْب كُرْسِيهْ

وَ أَمْبَيْنَاتْهُمْ هُمَّنْ الْإِتْنَيْن

فِي مُوَافَقَةْ كَامِلَةْ.“›

14«وَ يُخُطُّوا التَّاجْ دَا فِي بَيْتِي أَنَا اللّٰهْ وَ يِذَّكَّرَوْا بَيَّهْ حَلْدَايْ وَ طُوبِـيَّا وَ يَدَعْيَا وَ الْخَيْر السَّوَّاهْ وِلَيْد صَفَنْيَا.»

15وَ نَاسْ بَعِيدِينْ يَجُوا يَبْنُوا بَتَّانْ بَيْت اللّٰهْ. وَ بَيْدَا، تَعَرْفُوا كَدَرْ اللّٰهْ الْقَادِرْ بَسْ رَسَّلَانِي أَنَا زَكَرِيَّا لَيْكُو. وَ دَا يُكُونْ كَنْ إِنْتُو تَسْمَعَوْا عَدِيلْ كَلَامْ اللّٰهْ إِلٰـهْكُو.

Currently Selected:

زَكَرِيَّا 6: ع.د.ت19

Highlight

Copy