مَرْخُوس 6
6
المسيح أبوه في حِلِّته
1وَ عِيسَى قَمَّ مِنْ هِنَاكْ وَ مَشَى فِي حِلِّتَهْ. وَ تَلَامِيذَهْ مَشَوْا مَعَايَهْ. 2وَ يَوْم السَّبْت هُو بَدَا يِعَلِّمْ النَّاسْ فِي بَيْت الصَّلَاةْ. وَ نَاسْ كَتِيرِينْ سِمْعَوْا كَلَامَهْ وَ كُلُّهُمْ أَلْعَجَّبَوْا مِنَّهْ بِلْحَيْن. وَ قَالَوْا: «هَايْ! النَّادُمْ دَا لِقِي كَلَامَهْ دَا مِنْ وَيْن؟ وَ الْحِكْمَةْ الْعِنْدَهْ دِي مِنْ وَيْن؟ وَ كِكَّيْف بِإِيدَيْنَهْ بَسْ يِسَوِّي عَجَايِبْ؟ 3دَا مَا النَّجَّارْ وَلَّا؟ هُو مَا وِلَيْد مَرْيَمْ بَسْ وَ أَخُوهُمْ لِيَعْقُوبْ وَ يُوسِي وَ يَهُوذَا وَ سِمْعَانْ؟ وَ أَخْوَاتَهْ كُلَ قَاعِدَاتْ هِنِي مَعَانَا.» وَ خَلَاصْ زِعِلَوْا وَ مَا آمَنَوْا بَيَّهْ. 4وَ عِيسَى حَجَّى لَيْهُمْ وَ قَالْ: «كُلَّ النَّاسْ يِكَرُّمُوا أَيِّ نَبِي، إِلَّا نَاسْ حِلِّتَهْ وَ أَخْوَانَهْ وَ نَاسْ بَيْتَهْ مَا يِكَرُّمُوهْ».
5وَ مَا قِدِرْ يِسَوِّي عَجَايِبْ فِي الْبَكَانْ دَا، إِلَّا خَطَّ إِيدَيْنَهْ فِي مَرْضَانِينْ وَاحِدِينْ وَ دَاوَاهُمْ. 6وَ هُو أَلْعَجَّبْ مِنْهُمْ أَشَانْ مَا عِنْدُهُمْ إِيمَانْ. وَ قَمَّ يُرُوغْ فِي الْحِلَّالْ وَ يِعَلِّمْ النَّاسْ.
عِيسَى رسّل تلاميذه
7وَ عِيسَى نَادَى تَلَامِيذَهْ الْأَتْنَا عَشَرْ وَ رَسَّلَاهُمْ إِتْنَيْن إِتْنَيْن. وَ أَنْطَاهُمْ سُلْطَةْ أَشَانْ يَطُرْدُوا الشَّوَاطِينْ. 8وَ أَمَرَاهُمْ وَ قَالْ: «مَا تِشِيلُوا مَعَاكُو شَيّءْ لِلسَّفَرْ إِلَّا عَصَاةْ. مَا تِشِيلُوا أَكِلْ وَ لَا مُخْلَاةْ وَ لَا جُزْلَانْ. 9أَلْبَسَوْا نَعَالْ وَ مَا تِشِيلُوا مَعَاكُو خُلْقَانْ هَنَا غِيَارْ». 10وَ قَالْ لَيْهُمْ: «وَكِتْ تِدَلُّوا فِي بَيْت هَنَا نَادُمْ، أَقْعُدُوا فَوْقَهْ لَحَدِّي تَمُرْقُوا مِنْ الْحِلَّةْ. 11وَ أَيِّ بَكَانْ الْمَا يَقْبَلَوْكُو فَوْقَهْ وَ يَابَوْا كَلَامْكُو، أَمُرْقُوا مِنَّهْ وَ حِتُّوا الْعَجَاجْ مِنْ رِجْلَيْكُو. وَ دَا يَبْقَى لَيْكُو شَهَادَةْ.»
12وَ خَلَاصْ قَمَّوْا يِبَلُّغُوا كَدَرْ وَاجِبْ النَّاسْ يُتُوبُوا مِنْ ذُنُوبْهُمْ. 13وَ طَرَدَوْا شَوَاطِينْ كَتِيرِينْ. وَ صَبَّوْا دِهِنْ فِي نَاسْ مَرْضَانِينْ كَتِيرِينْ وَ شَفَوْهُمْ.
مَوْت النبي يَحْيَى
14وَ الْمَلِكْ هِرُودُسْ سِمِعْ خَبَرْ عِيسَى أَشَانْ فِي كُلَّ بَكَانْ النَّاسْ قَاعِدِينْ يِحَجُّوا بَيَّهْ. وَ وَاحِدِينْ قَاعِدِينْ يُقُولُوا: «يَحْيَى الْمُغَطِّسْ بَعَثْ مِنْ أُسْط الْمَيْتِينْ. أَشَانْ دَا بَسْ، عِنْدَهْ الْقُدْرَةْ لِيِسَوِّي الْعَجَايِبْ.» 15وَ نَاسْ آخَرِينْ قَاعِدِينْ يُقُولُوا: «هُو النَّبِي إِلِيَاسْ قَبَّلْ». وَ بَتَّانْ آخَرِينْ يُقُولُوا: «هُو نَبِي مِثِلْ أَنْبِيَاء هَنَا الزَّمَنْ الْفَاتْ.» 16وَ وَكِتْ هِرُودُسْ ذَاتَهْ سِمِعْ خَبَرَهْ، قَالْ: «دَا يَحْيَى الْمُغَطِّسْ. أَنَا قَطَعْت رَاسَهْ لَاكِنْ هُو بَعَثْ مِنْ أُسْط الْمَيْتِينْ.»
17وَ قَبُلْ دَا، هِرُودُسْ رَسَّلْ عَسْكَرَهْ وَ كَرَبَوْا يَحْيَى وَ رَبَطَوْه وَ دَسَّوْه فِي السِّجِنْ فِي شَانْ مَرْتَهْ هِرُودِيَّةْ. وَ أَوَّلْ هِرُودِيَّةْ هِي مَرِةْ فِلِبُّسْ أَخُو هِرُودُسْ وَ بَعَدْ دَا، هِرُودُسْ ذَاتَهْ أَخَدْهَا. 18وَ فِي الْوَكِتْ دَاكْ، يَحْيَى قَاعِدْ يُقُولْ لِهِرُودُسْ: «مَرِةْ أَخُوكْ مَا حَلَالَةْ لَيْك.» 19وَ أَشَانْ دَا، هِرُودِيَّةْ مَا تِرِيدْ يَحْيَى وَ تِدَوْر تَكْتُلَهْ. لَاكِنْ مَا قِدْرَتْ تِسَوِّي فَوْقَهْ شَيّءْ فَسِلْ 20أَشَانْ هِرُودُسْ خَايِفْ مِنْ يَحْيَى. هُو عِرِفْ يَحْيَى نَادُمْ صَالِحْ وَ نَادُمْ هَنَا اللّٰهْ. وَ هُو قَاعِدْ يَحْفَضَهْ مِنْ كُلَّ شَيّءْ فَسِلْ. بِالصَّحِيحْ، كَلَامْ يَحْيَى بَرْجَلَهْ بِلْحَيْن لَاكِنْ هِرُودُسْ يِرِيدْ يَسْمَعَهْ كُلَ.
21وَ لَاكِنْ فِي الأَخِيرْ، هِرُودِيَّةْ لِقَتْ فُرْصَةْ. فِي يَوْم عِيدْ مَوْلِدْ هِرُودُسْ هُو سَوَّى عَازُومَةْ وَ عَزَمْ جَمَاعْتَهْ وَ كُبَارَاتْ الْعَسْكَرْ وَ كُبَارَاتْ هَنَا دَارْ الْجَلِيلْ. 22وَ بِنَيَّةْ هِرُودِيَّةْ جَاتْ وَ لِعِبَتْ قِدَّامْهُمْ وَ هِرُودُسْ وَ ضِيفَانَهْ فَرْحَانِينْ بِلْحَيْن مِنْهَا. وَ الْمَلِكْ حَجَّى لِلْبِنَيَّةْ وَ قَالْ: «أَطُلْبِي مِنِّي أَيِّ شَيّءْ التِّدَوْرِيهْ». 23وَ حَلَفْ وَ قَالْ: «أَطُلْبِي أَيِّ شَيّءْ التِّدَوْرِيهْ مِنِّي نَنْطِيكِ لَحَدِّي نُصّ هَنَا مَمْلَكَتِي كُلَ». 24وَ الْبِنَيَّةْ مَرَقَتْ وَ سَأَلَتْ أَمَّهَا. وَ قَالَتْ: «نَطْلُبْ مِنَّهْ شُنُو؟» وَ أَمَّهَا قَالَتْ: «أَطُلْبِي رَاسْ يَحْيَى الْمُغَطِّسْ».
25وَ طَوَّالِي هِي قَبَّلَتْ لِلْمَلِكْ وَ طَلَبَتْ وَ قَالَتْ: «نِدَوْر تَنْطِينِي رَاسْ يَحْيَى الْمُغَطِّسْ هَسَّعْ هِنِي فِي صُفْرَةْ». 26وَ الْمَلِكْ نِدِمْ نَدَامَةْ شَدِيدَةْ بِسَبَبْ الْحَلِيفَةْ الْأَوَّلْ حَلَفْهَا قِدَّامْ ضِيفَانَهْ. وَ لَاكِنْ هُو مَا دَوَّرْ يَفْشُلْ الْحَلِيفَةْ دِي. 27وَ طَوَّالِي الْمَلِكْ رَسَّلْ عَسْكَرِي وَ أَنْطَى إِذِنْ أَشَانْ يِجِيبْ لَيَّهْ رَاسْ يَحْيَى. وَ الْعَسْكَرِي مَشَى وَ قَطَعْ رَاسْ يَحْيَى فِي لُبّ السِّجِنْ. 28وَ جَابْ رَاسَهْ فِي صُفْرَةْ وَ أَنْطَاهَا لِلْبِنَيَّةْ. وَ خَلَاصْ الْبِنَيَّةْ أَنْطَتْهَا لِأَمَّهَا.
29وَ وَكِتْ تَلَامِيذ يَحْيَى سِمْعَوْا الْخَبَرْ دَا، هُمَّنْ جَوْا وَ شَالَوْا جَنَازْتَهْ وَ دَفَنَوْهَا.
المسيح أنْطى أكِل لـ 5 000 ناس
30وَ الرُّسُلْ قَبَّلَوْا لِعِيسَى وَ خَبَّرَوْه بِكُلَّ شَيّءْ السَّوَّوْه وَ عَلَّمَوْه لِلنَّاسْ. 31وَ عِيسَى قَالْ لَيْهُمْ: «تَعَالُوا مَعَايِ وِحَيْدكُو وَ نَمْشُوا فِي بَكَانْ مَا عِنْدَهْ نَاسْ وَ أَنْجَمَّوْا شِيَّةْ». أَشَانْ النَّاسْ الْيَجُوا لِعِيسَى وَ يَمْشُوا بِقَوْا كَتِيرِينْ مَرَّةْ وَاحِدْ لَحَدِّي عِيسَى وَ جَمَاعْتَهْ كُلَ مَا قِدْرَوْا يَاكُلُوا.
32وَ خَلَاصْ قَمَّوْا مِنْ هِنَاكْ بِمَرْكَبَةْ وَ مَشَوْا وِحَيْدهُمْ فِي الْخَلَاءْ. 33وَ وَكِتْ مَاشِينْ، نَاسْ كَتِيرِينْ شَافَوْهُمْ وَ عِرْفَوْهُمْ. وَ نَاسْ مِنْ كُلَّ الْحِلَّالْ قَمَّوْا جَرَوْا بِرِجْلَيْهُمْ لِلْبَكَانْ الْهُو يِدَوْر يَمْشِي فَوْقَهْ. وَ وَصَّلَوْا قُبَّالَهْ. 34وَ وَكِتْ عِيسَى دَلَّى مِنْ الْمَرْكَبَةْ، هُو شَافْ نَاسْ كَتِيرِينْ مَرَّةْ وَاحِدْ قَاعِدِينْ يَرْجَوْه. وَ هُو حَنَّ فَوْقهُمْ أَشَانْ هُمَّنْ مِثِلْ غَنَمْ الْمَا عِنْدُهُمْ رَاعِي. وَ هُو بَدَا يِعَلِّمْهُمْ كَلَامْ كَتِيرْ. 35وَ فِي الْعَشِيَّةْ تَلَامِيذَهْ جَوْا لَيَّهْ وَ قَالَوْا: «الْبَكَانْ دَا خَلَاءْ وَ الْمَغْرِبْ قَرِيبْ. 36خَلِّي النَّاسْ يَمْشُوا فِي الْفُرْقَانْ وَ الْحِلَّالْ الْمُجَاوِرِينْ وَ يَشْرُوا لِنُفُوسْهُمْ أَكِلْ». 37وَ لَاكِنْ عِيسَى رَدَّ لَيْهُمْ وَ قَالْ: «لَا! إِنْتُو بَسْ أَنْطُوهُمْ أَكِلْ». وَ هُمَّنْ قَالَوْا لَيَّهْ: «هَايْ! تِدَوْر أَنِحْنَ نِأَكُّلُوا كُلَّ النَّاسْ دَوْل وَلَّا؟ تِدَوْر أَنِحْنَ نَمْشُوا نَشْرُوا أَكِلْ هَنَا 200 دِينَارْ وَلَّا؟» 38وَ عِيسَى سَأَلَاهُمْ وَ قَالْ: «عِنْدُكُو كَمْ خُبْزَةْ؟ أَمْشُوا شِيفُوا». وَ شَافَوْا وَ قَالَوْا: «عِنْدِنَا خَمْسَةْ خُبْزَةْ وَ حُوتْ إِتْنَيْن بَسْ».
39وَ عِيسَى أَمَرَاهُمْ كُلُّهُمْ أَشَانْ يِلِمُّوا فِي مَجْمُوعَاتْ وَ يَقْعُدُوا تِحِتْ فِي الْقَشّ الْأَخْضَرْ. 40وَ النَّاسْ قَعَدَوْا فِي مَجْمُوعَاتْ هَنَا 100 وَ هَنَا 50. 41وَ عِيسَى شَالْ الْخَمْسَةْ خُبْزَةْ وَ الْحُوتْ الْإِتْنَيْن. وَ رَفَعْ رَاسَهْ عَلَيْ السَّمَاءْ وَ شَكَرْ اللّٰهْ وَ كَسَّرْ الْخُبْزَةْ وَ أَنْطَاهُمْ لِتَلَامِيذَهْ أَشَانْ يِقَسُّمُوهُمْ لِلنَّاسْ. وَ قَسَّمْ الْحُوتْ كُلَ أَمْبَيْنَاتْهُمْ. 42وَ كُلَّ النَّاسْ أَكَلَوْا لَحَدِّي شِبْعَوْا. 43وَ خَلَاصْ التَّلَامِيذ لَمَّوْا الْأَكِلْ الْفَضَّلْ مِنْ الْخُبْزَةْ وَ الْحُوتْ وَ مَلَوْا بَيَّهْ 12 قُفَّةْ. 44وَ عَدَدْ النَّاسْ الْأَكَلَوْا مِنْ الْخُبْزَةْ تَمَّ 5 000 رَاجِلْ.
المسيح راغ في راس الألْمي
45وَ طَوَّالِي، عِيسَى أَمَرْ تَلَامِيذَهْ يَرْكَبَوْا فِي الْمَرْكَبَةْ أَشَانْ يَقْطَعَوْا الْبَحَرْ وَ يَمْشُوا قِدَّامَهْ فِي حِلَّةْ بَيْت صَيْدَا. وَ هُو ذَاتَهْ يُقُولْ لِلنَّاسْ خَلِّي يَمْشُوا. 46وَ وَكِتْ عِيسَى سَلَّمْ النَّاسْ خَلَاصْ، طَلَعْ فِي رَاسْ الْحَجَرْ لِيِصَلِّي.
47وَ بَعَدْ الْمَغْرِبْ الْمَرْكَبَةْ قَاعِدَةْ فِي أُسْط الْبَحَرْ وَ عِيسَى قَاعِدْ وِحَيْدَهْ فِي الْحَجَرْ. 48وَ هُو شَافْ كَدَرْ التَّلَامِيذ مَاشِينْ قِدَّامْ بِتَعَبْ أَشَانْ الرِّيحْ قَاعِدَةْ تُسُوقْ عَلَيْهُمْ مِنْ قِدَّامْ. وَ بِوَرَدَّيْ عِيسَى جَاءْ لَيْهُمْ رَايِغْ مِنْ فَوْق لِلْأَلْمِي. وَ هُو سَوَّى مِثِلْ يِبَارِيهُمْ وَ يُفُوتْ. 49لَاكِنْ هُمَّنْ شَافَوْه رَايِغْ مِنْ فَوْق لِلْأَلْمِي وَ فِي فِكِرْهُمْ شَافَوْا ضُلّ هَنَا نَادُمْ وَ صَرَخَوْا. 50كُلُّهُمْ شَافَوْه وَ خَافَوْا خَوْف شَدِيدْ. وَ طَوَّالِي هُو حَجَّى لَيْهُمْ وَ قَالْ: «شِدُّوا حَيْلكُو، دَا أَنَا بَسْ. مَا تَخَافَوْا!» 51وَ عِيسَى رِكِبْ فِي الْمَرْكَبَةْ، خَلَاصْ الرِّيحْ وَقَفَتْ. وَ هُمَّنْ أَلْعَجَّبَوْا مَرَّةْ وَاحِدْ. 52أَوَّلْ هُمَّنْ شَافَوْا عِيسَى زَادْ الْخُبْزَةْ لَاكِنْ مَا فِهْمَوْا مَعَنَاتَهْ أَشَانْ قُلُوبْهُمْ مُقَفَّلِينْ.
المسيح داوى الناس في قِنِّيْسَرَت
53وَ وَكِتْ قَطَعَوْا الْبَحَرْ خَلَاصْ، نَزَلَوْا فِي بَلَدْ قِنِّيْسَرَتْ وَ رَبَطَوْا الْمَرْكَبَةْ فِي خَشُمْ الْبَحَرْ. 54وَ وَكِتْ دَلَّوْا مِنْ الْمَرْكَبَةْ، طَوَّالِي النَّاسْ عِرْفَوْا عِيسَى. 55وَ طَوَّالِي قَمَّوْا مَشَوْا فِي أَيِّ بَكَانْ فِي بَلَدْهُمْ. أَشَانْ يِجِيبُوا لَيَّهْ الْمَرْضَانِينْ أَيِّ وَاحِدْ شَايْلِينَهْ فِي فُرَاشَهْ فِي أَيِّ بَكَانْ السِّمْعَوْا كَدَرْ عِيسَى قَاعِدْ فَوْقَهْ. 56وَ أَيِّ بَكَانْ الْمَشَى فَوْقَهْ، كَنْ حِلَّةْ أَوْ مَدِينَةْ أَوْ فَرِيقْ، النَّاسْ يِجِيبُوا لَيَّهْ الْمَرْضَانِينْ وَ يُخُطُّوهُمْ فِي الْأَسْوَاقْ وَ يَشْحَدَوْا عِيسَى أَشَانْ الْمَرْضَانِينْ يِقَرُّبُوا لَيَّهْ وَ يَلْمَسَوْا طَرَفْ خَلَقَهْ. وَ كُلِّ نَادُمْ اللِّمِسَهْ لِقِي الْعَافَيْ.
Currently Selected:
مَرْخُوس 6: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
