مِيخا 5
5
يلْدوا حاكِم في بيت لحم
1 # 5:1 الفصُل 5 آية 1 بالعربي هو الفصُل 4 آية 14 بالفرنساوي. لاكن ما زاد و لا نقص شيّء إلّا النِمر بس ألبدّلوا. وَ هَسَّعْ دَا، يَا سُكَّانْ مَدِينَةْ الْقُدُسْ،
جَرُّحُوا نُفُوسْكُو مِنْ الْحِزِنْ.
حَاصَرَوْا مَدِينِتْكُو
وَ بِالْعِصَيْ ضَرَبَوْا وِجِهْ حَاكِمْ بَنِي إِسْرَائِيلْ.
2وَ اللّٰهْ قَالْ:
«إِنْتِ، يَا بَيْت لَحَمْ أَفْرَاتَةْ،
إِنْتِ صَغَيْرَةْ لِتِنْحَسْبِي
أَمْبَيْن عَايِلَاتْ يَهُوذَا.
وَ لَاكِنْ نَادُمْ وَاحِدْ يَمْرُقْ مِنْكِ
الْيَحْكِمْ بِأُسْمِي فِي بَنِي إِسْرَائِيلْ.
وَ قَعَرَهْ جَايِ مِنْ بَعِيدْ
مِنْ الزَّمَنْ الْقَدِيمْ.»
3وَ اللّٰهْ يِخَلِّي شَعَبَهْ
لِوَكِتْ شِيَّةْ
لَحَدِّي الْمَرَةْ الْغَلْبَانَةْ
تَلْدَ وِلَيْدهَا.
وَ أَخْوَانَّا الْفَضَّلَوْا فِي الْغُرْبَةْ
يِقَبُّلُوا مِنْ هِنَاكْ
وَ يِلِمُّوا مَعَ بَنِي إِسْرَائِيلْ.
4وَ هُو يُقُمّ
وَ يُقُودْهُمْ مِثِلْ رَاعِي
بِقُدْرَةْ اللّٰهْ
وَ بِعَظَمَةْ أُسُمْ اللّٰهْ إِلٰـهَهْ.
وَ شَعَبَهْ يَسْكُنُوا بِأَمَانْ
أَشَانْ قُدُرْتَهْ تِلْوَسَّعْ
لَحَدِّي آخِرْ الْأَرْض.
5وَ هُو ذَاتَهْ يِجِيبْ السَّلَامْ.
وَكِتْ عَسْكَرْ بَلَدْ أَشُورْ يَهْجُمُوا بَلَدْنَا
وَ يَدْخُلُوا فِي قُصُورْنَا،
أَنِحْنَ نِقَوُّمُوا ضِدُّهُمْ
سَبْعَةْ كُبَارَاتْ
وَ تَمَانَةْ شُيُوخْ شَعَبْ.
6وَ هُمَّنْ يَحْكُمُوا بَلَدْ أَشُورْ بِالْسَّيْف
وَ بَلَدْ نِمْرُودْ بِالْحُرَابْ.
وَ الْحَاكِمْ الْاللّٰهْ يِرَسِّلَهْ
يِنَجِّينَا مِنْ إِيدْ الْأَشُورِيِّينْ
وَكِتْ يَهْجُمُوا بَلَدْنَا
وَ يَدْخُلُوا أَرْضِنَا.
ذُرّية يَعْقُوب يبْقوا مِثِل دود
7وَ الْفَضَّلَوْا مِنْ ذُرِّيَّةْ يَعْقُوبْ
يُكُونُوا فِي أُسُطْ شُعُوبْ كَتِيرِينْ.
يَبْقَوْا مِثِلْ مَطَرَةْ الْجَايَةْ مِنْ اللّٰهْ
وَ مِثِلْ كَرَنْج فِي الْقَشّ.
مَا يَرْجَوْا شَيّءْ مِنْ نَادُمْ
وَ لَا يُخُطُّوا عَشَمْهُمْ فِي إِنْسَانْ.
8وَ الْفَضَّلَوْا مِنْ ذُرِّيَّةْ يَعْقُوبْ
يُكُونُوا بَيْن الْأُمَمْ
فِي أُسُطْ شُعُوبْ كَتِيرِينْ.
يَبْقَوْا مِثِلْ دُودْ
أَمْبَيْن حَيْوَانَاتْ الْغَابَةْ
وَ مِثِلْ فَرْخ الدُّودْ
أَمْبَيْن دَوْر الْغَنَمْ.
وَ فِي أَيِّ بَكَانْ الْيَمْشِي،
يَكْتُلْ وَ يِشَرِّطْ
وَ مَا فِي نَادُمْ الْيِخَلِّصْ مِنَّهْ.
9يَا الْفَضَّلَوْا مِنْ ذُرِّيَّةْ يَعْقُوبْ،
أَرْفَعَوْا إِيدَيْكُو ضِدّ خُصْمَانْكُو
وَ دَمُّرُوا كُلَّ عُدْوَانْكُو.
اللّه يدمِّر كل شيّء
10دَاهُو كَلَامْ اللّٰهْ:
«فِي الْيَوْم دَا، نِدَمِّرْ خَيْلكُو مِنْ أُسُطْكُو
وَ نِكَسِّرْ عَرَبَاتْكُو هَنَا الْحَرِبْ.
11وَ نِدَمِّرْ مُدُنْ بَلَدْكُو
وَ نِهَدِّمْ كُلَّ بَكَانَاتْكُو الْقَوِيِّينْ.
12وَ نِدَمِّرْ سِحِرْكُو الْفِي إِيدْكُو
وَ مَا يُكُونْ فِي أُسُطْكُو الْيِحَجِّي بِعِلِمْ الْغَيْب.
13وَ نِدَمِّرْ مِنْ أُسُطْكُو أَصْنَامْكُو
وَ الْحُجَارْ الْغَزَّيْتُوهُمْ لِلْعِبَادَةْ
وَ أَبَداً مَا تَسْجُدُوا لِشَيّءْ السَّوَّيْتُوهْ بِإِيدْكُو.
14وَ نِمَلِّطْ مِنْ أُسُطْكُو الْعِيدَانْ
الْغَزَّيْتُوهُمْ لِعِبَادَةْ أَشِيرَةْ
وَ نِدَمِّرْ مُدُنْكُو.
15وَ بِغَضَبْ وَ زَعَلْ،
نِشِيلْ التَّارْ فِي الْأُمَمْ
الْأَبَوْا مَا يَسْمَعَوْنِي.»
Currently Selected:
مِيخا 5: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
