مَتَّى 9
9
المسيح غفر للمُكرْسح
1وَ خَلَاصْ، عِيسَى رِكِبْ فِي الْمَرْكَبَةْ وَ قَطَعْ الْبَحَرْ وَ قَبَّلْ فِي حِلِّتَهْ كَفَرْ نَاحُومْ. 2وَ نَاسْ وَاحِدِينْ جَابَوْا لَيَّهْ رَاجِلْ مُكَرْسَحْ رَاقِدْ فِي فُرَاشَهْ. وَ عِيسَى شَافْ إِيمَانْهُمْ وَ قَالْ لِلرَّاجِلْ الْمُكَرْسَحْ: «يَا وِلَيْدِي، شِدّ حَيْلَكْ! ذُنُوبَكْ أَنْغَفَرَوْا.»
3وَ وَاحِدِينْ مِنْ الْعُلَمَاءْ قَالَوْا فِي قُلُوبْهُمْ: «كَلَامْ النَّادُمْ دَا كَلَامْ كُفُرْ!» 4وَ عِيسَى عِرِفْ فِكِرْهُمْ. وَ سَأَلَاهُمْ وَ قَالْ: «مَالَا تُقُولُوا شَيّءْ فَسِلْ فِي قُلُوبْكُو؟ 5وَيْنُو الْهَيِّنْ نُقُولَهْ مِنْ الْكَلَامْ الْإِتْنَيْن دَوْل؟ نُقُولْ: ‹ذُنُوبَكْ أَنْغَفَرَوْا› وَلَّا نُقُولْ: ‹قُمّ وَ رُوغْ›؟ 6أَنَا نِدَوْر إِنْتُو تَعَرْفُوا كَدَرْ أَنَا إِبْن الْإِنْسَانْ عِنْدِي سُلْطَةْ فِي الْأَرْض أَشَانْ نَغْفِرْ لِلنَّاسْ ذُنُوبْهُمْ.» وَ خَلَاصْ قَالْ لِلْمُكَرْسَحْ: «قُمّ، شِيلْ فُرَاشَكْ وَ أَمْشِي بَيْتَكْ!»
7وَ خَلَاصْ النَّادُمْ قَمَّ وَ مَشَى بَيْتَهْ. 8وَكِتْ النَّاسْ شَافَوْه، خَافَوْا بِلْحَيْن وَ شَكَرَوْا اللّٰهْ أَشَانْ هُو أَنْطَى سُلْطَةْ مِثِلْ دِي لِلنَّاسْ.
المسيح نادى مَتَّى
9وَ فِي رُوَاغْتَهْ عِيسَى شَافْ نَادُمْ وَاحِدْ أُسْمَهْ مَتَّى قَاعِدْ يَخْدِمْ فِي مَكْتَبْ الضَّرَايِبْ. وَ عِيسَى قَالْ لَيَّهْ: «تَعَالْ تَابِعْنِي.» وَ خَلَاصْ قَمَّ فَوْق وَ تَابَعَهْ.
10وَ عِيسَى أَلْعَشَّى فِي بَيْت مَتَّى وَ نَاسْ كَتِيرِينْ جَوْا مِنْ نَاسْ الْيِشِيلُوا مِيرِي وَ مُذْنِبِينْ آخَرِينْ. وَ جَوْا قَعَدَوْا مَعَ عِيسَى وَ تَلَامِيذَهْ. 11وَ وَاحِدِينْ مِنْ الْفَرِيزِيِّينْ شَافَوْهُمْ وَ سَأَلَوْا تَلَامِيذَهْ وَ قَالَوْا: «مَالَا سَيِّدْكُو يَاكُلْ مَعَ نَاسْ الضَّرَايِبْ وَ الْمُذْنِبِينْ؟»
12وَ عِيسَى سِمِعْ كَلَامْهُمْ وَ قَالْ: «النَّاسْ الطَّيْبِينْ مَا حَوْجَانِينْ دَكْتَوْر، إِلَّا الْمَرْضَانِينْ بَسْ. 13أَمْشُوا أَقْرُوا وَ أَفْهَمَوْا كَلَامْ اللّٰهْ الْبُقُولْ: <نِدَوْر الرَّحْمَةْ زِيَادَةْ مِنْ الضَّحَايَا.>#9:13 الكلام دا تلقوه في هُوشَع 6:6، حسب الترْجمة اليونانيّة. أَنَا مَا جِيتْ أَشَانْ نِنَادِي الصَّالِحِينْ لَاكِنْ جِيتْ لِنِنَادِي الْمُذْنِبِينْ لِلتَّوْبَةْ.»
المسيح سألوه في الصيام
14وَ خَلَاصْ وَاحِدِينْ مِنْ تَلَامِيذ يَحْيَى جَوْا لِعِيسَى وَ سَأَلَوْه وَ قَالَوْا: «أَنِحْنَ وَ الْفَرِيزِيِّينْ نُصُومُوا دَايْماً. مَالَا تَلَامِيذَكْ مَا يُصُومُوا؟» 15وَ عِيسَى رَدَّ لَيْهُمْ وَ قَالْ: «كَنْ نَاسْ قَاعِدِينْ فِي عِرِسْ وَ الْعَرِيسْ مَعَاهُمْ، يَحْزَنَوْا وَلَّا؟ وَ لَاكِنْ يَجِي يَوْم وَاحِدْ الْعَرِيسْ يِشِيلُوهْ مِنْهُمْ وَ خَلَاصْ فِي الْوَكِتْ دَاكْ، يُصُومُوا.
16«مَا فِي نَادُمْ الْيَرْقَعْ خَلَقْ قَدِيمْ بِقِطْعَةْ جَدِيدَةْ أَشَانْ الرُّقْعَةْ الْجَدِيدَةْ دِي تِشَرِّطْ الْخَلَقْ الْقَدِيمْ وَ الْقَدّ يَبْقَى زِيَادَةْ مِنْ أَوَّلْ. 17وَ النَّاسْ مَا يُصُبُّوا خَمَرْ جَدِيدْ فِي قِرْبَةْ قَدِيمَةْ أَشَانْ كَنْ سَوَّوْا مِثِلْ دَا، الْقِرْبَةْ تِنْشَقَّ. وَ مِثِلْ دَا، الْخَمَرْ يِدَفِّقْ وَ الْقِرْبَةْ تَتْلَفْ. وَ لَاكِنْ يُصُبُّوا الْخَمَرْ الْجَدِيدْ فِي قِرْبَةْ جَدِيدَةْ وَ مِثِلْ دَا يَحْفَضَوْا الْخَمَرْ مَعَ الْقِرْبَةْ سَوَا.»
عِيسَى أنْطى الحياة و العافي
18وَ وَكِتْ عِيسَى قَاعِدْ يِحَجِّي فِي الْكَلَامْ دَا، نَادُمْ وَاحِدْ مَسْؤُولْ جَاءْ وَ سَجَدْ قِدَّامَهْ وَ قَالْ: «بِنَيِّتِي دَهَابْهَا مَاتَتْ وَ لَاكِنْ تَعَالْ أَلْمَسْهَا بِإِيدَكْ وَ هِي تَحْيَى.» 19وَ عِيسَى قَمَّ وَ مَشَى مَعَايَهْ وَ تَلَامِيذَهْ كُلَ مَشَوْا مَعَايَهْ سَوَا.
20وَ مَرَةْ وَاحِدَةْ قَرَّبَتْ لِعِيسَى مِنْ وَرَاءْ وَ هِي تَعْبَانَةْ. دَمَّهَا يِدَفِّقْ مِنْ 12 سَنَةْ. وَ جَاتْ لِمْسَتْ طَرَفْ خَلَقَهْ 21وَ قَالَتْ فِي قَلِبْهَا: «كَنْ نَلْمَسْ خَلَقَهْ نَلْقَى الْعَافَيْ.» 22وَ عِيسَى أَنْلَفَتْ وَ شَافْهَا وَ قَالْ: «يَا بِنَيِّتِي، شِدِّي حَيْلكِ. إِيمَانْكِ بَيِّ نَجَّاكِ». وَ خَلَاصْ مِنْ الْوَكِتْ دَا بَسْ، هِي لِقَتْ الْعَافَيْ.
23وَ عِيسَى دَخَلْ فِي بَيْت الْمَسْؤُولْ وَ شَافْ ضَرَّابِينْ الصُّفَّارَةْ هَنَا الْمَوْت وَ نَاسْ قَاعِدِينْ يَبْكُوا كَتِيرْ. 24وَ عِيسَى قَالْ لَيْهُمْ: «يَلَّا أَمْشُوا. الْبِنَيَّةْ مَا مَاتَتْ. هِي نَايْمَةْ بَسْ». وَ ضِحْكَوْا لَيَّهْ بِشَمَاتَةْ. 25وَ وَكِتْ كُلَّ النَّاسْ مَرَقَوْا، عِيسَى دَخَلْ فِي لُبّ الْبَيْت وَ كَرَبْ إِيدْ الْبِنَيَّةْ وَ هِي قَمَّتْ. 26وَ الْخَبَرْ دَا أَنْسَمَعْ فِي كُلَّ الْبَلَدْ دِي.
العمْيانين و النادم الأبْكم
27وَ عِيسَى مَاشِي قِدَّامْ وَ عَمْيَانِينْ إِتْنَيْن تَابَعَوْه. وَ قَاعِدِينْ يَصْرَخَوْا وَ يُقُولُوا: «يَا إِبْن دَاوُدْ! أَرْحَمْنَا!» 28وَ وَكِتْ عِيسَى دَخَلْ فِي الْبَيْت، هُمَّنْ جَوْا لَيَّهْ وَ هُو سَأَلَاهُمْ وَ قَالْ: «صَحِيحْ إِنْتُو تِآمُنُوا كَدَرْ عِنْدِي قُدْرَةْ نِدَاوِيكُو وَلَّا؟» وَ رَدَّوْا لَيَّهْ وَ قَالَوْا: «أَيْوَى سَيِّدْنَا.» 29وَ عِيسَى لِمِسْ عُيُونْهُمْ وَ قَالْ: «خَلِّي يَبْقَى لَيْكُو مِثِلْ آمَنْتُوا بَيَّهْ.» 30وَ خَلَاصْ، عُيُونْهُمْ أَنْفَتَحَوْا وَ شَافَوْا. وَ عِيسَى أَمَرَاهُمْ وَ قَالْ: «أَنْقَرْعُوا! مَا تِأَوْرُوا بَيَّهْ نَادُمْ وَاحِدْ.» 31وَ لَاكِنْ مَشَوْا وَ شَتَّتَوْا الْخَبَرْ دَا وَ أُسْمَهْ طَلَعْ فِي كُلَّ الْبَلَدْ دِي.
32وَ وَكِتْ الرُّجَالْ دَوْل مَارْقِينْ مِنْ الْبَيْت، نَاسْ وَاحِدِينْ جَابَوْا نَادُمْ أَبْكَمْ وَ مُشَوْطِنْ. 33وَ عِيسَى طَرَدْ الشَّيْطَانْ وَ الْأَبْكَمْ قَمَّ يِحَجِّي. وَ النَّاسْ أَلْعَجَّبَوْا بِلْحَيْن وَ قَالَوْا: «شَيّءْ عَجِيبْ مِثِلْ دَا أَبَداً مَا شِفْنَا فِي دَارْ إِسْرَائِيلْ!» 34وَ لَاكِنْ الْفَرِيزِيِّينْ قَالَوْا: «النَّادُمْ دَا يَطْرُدْ الشَّوَاطِينْ بِقُدْرَةْ كَبِيرْ الشَّوَاطِينْ.»
الخدّامين شيّة
35عِيسَى قَاعِدْ يُرُوغْ فِي كُلَّ الْمُدُنْ وَ فِي كُلَّ الْحِلَّالْ وَ يِعَلِّمْ النَّاسْ فِي بُيُوتْ الصَّلَاةْ وَ يِبَشِّرْهُمْ بِبِشَارَةْ مَمْلَكَةْ اللّٰهْ. وَ يَشْفِيهُمْ مِنْ أَيِّ وَجَعْ وَ أَيِّ مَرَضْ. 36وَ عِيسَى شَافْ نَاسْ كَتِيرِينْ مَرَّةْ وَاحِدْ جَايِينْ لَيَّهْ وَ حَنَّ فَوْقهُمْ أَشَانْ هُمَّنْ تَعْبَانِينْ وَ عَيَّانِينْ مِثِلْ غَنَمْ الْمَا عِنْدُهُمْ رَاعِي. 37وَ قَالْ لِتَلَامِيذَهْ: «النَّاسْ دَوْل مِثِلْ زَرَعْ كَبِيرْ وَ غَلِّتَهْ نِجْضَتْ خَلَاصْ. وَ لَاكِنْ النَّاسْ الْيَخْدُمُوا شِيَّةْ. 38أَشَانْ دَا، أَطُلْبُوا مِنْ سِيدْ الزَّرَعْ هُو يِرَسِّلْ خَدَّامِينَهْ يِلِمُّوا غَلِّتَهْ.»
Currently Selected:
مَتَّى 9: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
