مَتَّى 10

المسيح رسّل رُسُله

1وَ عِيسَى نَادَى تَلَامِيذَهْ الْأَتْنَا عَشَرْ وَ أَنْطَاهُمْ سُلْطَةْ أَشَانْ يَطُرْدُوا الشَّوَاطِينْ وَ يَشْفُوا أَيِّ نَادُمْ الْعِنْدَهْ أَيِّ مَرَضْ. 2وَ أَسَامَيْ الرُّجَالْ الْأَتْنَا عَشَرْ الْجَعَلَاهُمْ رُسُلْ. هُمَّنْ أَوَّلْ سِمْعَانْ الْبِنَادُوهْ بُطْرُسْ وَ أَخُوهْ أَنْدَرَيَّسْ، وَ يَعْقُوبْ وِلَيْد زَبَدِي وَ أَخُوهْ يُوحَنَّا، 3وَ فِلِبُّسْ وَ بَرْتُلْمَا، وَ تُومَا وَ مَتَّى الْيِشِيلْ الْمِيرِي، وَ يَعْقُوبْ وِلَيْد حَلْفَا وَ تَدَّايَا، 4وَ سِمْعَانْ الثَّوْرِي وَ يَهُوذَا الْإِسْخَرِيَوْطِي الْبَعَدَيْن يُخُونْ عِيسَى.

5دَوْل هُمَّنْ الرُّسُلْ الْأَتْنَا عَشَرْ. وَ عِيسَى رَسَّلَاهُمْ فِي أُسْط النَّاسْ. وَ أَمَرَاهُمْ وَ قَالْ: «مَا تَمْشُوا لِلنَّاسْ الْمَا يَهُودْ وَ مَا تَدْخُلُوا فِي أَيِّ حِلَّةْ هَنَا السَّامِرِيِّينْ. 6أَمْشُوا إِلَّا فِي أُسْط الْغَنَمْ الْمُوَدِّرِينْ هَنَا بَنِي إِسْرَائِيلْ. 7وَ وَكِتْ إِنْتُو مَاشِينْ فِي الدَّرِبْ، بَلُّغُوا الْبِشَارَةْ قُولُوا: ‹مَمْلَكَةْ اللّٰهْ قَرَّبَتْ!› 8الْمَرْضَانِينْ دَاوُوهُمْ وَ الْمَيْتِينْ قَوُّمُوهُمْ وَ الْعِنْدُهُمْ جِدَامْ أَنْطُوهُمْ الْعَافَيْ وَ الشَّوَاطِينْ أَطُرْدُوهُمْ مِنْ النَّاسْ. إِنْتُو لِقِيتُوا بَلَا تُكْفَاةْ وَ خَلَاصْ، أَنْطُوا لِلنَّاسْ بَلَا تُكْفَاةْ. 9مَا تِشِيلُوا مَعَاكُو دَهَبْ وَ لَا فُضَّةْ وَ لَا سِلَيْ فِي جُزْلَانْكُو. 10وَ مَا تِشِيلُوا وَ لَا مُخْلَاةْ وَ لَا خُلْقَانْ هَنَا غِيَارْ وَ لَا نَعَالْ وَ لَا عَصَاةْ. أَشَانْ الْخَدَّامْ لَقَّامْ.

11«وَ أَيِّ مَدِينَةْ أَوْ حِلَّةْ تَدْخُلُوا فَوْقهَا، فَتُّشُوا فِيهَا نَادُمْ إِجْوَادِي وَ دَلُّوا فِي بَيْتَهْ لَحَدِّي تَمْشُوا مِنْ الْبَكَانْ دَا. 12وَ وَكِتْ إِنْتُو تَدْخُلُوا فِي الْبَيْت، أَسْأَلَوْا سَلَامْ اللّٰهْ فَوْقَهْ. 13وَ كَنْ نَاسْ الْبَيْت إِجْوَادِيِّيْن، خَلِّي سَلَامْكُو يَقْعُدْ فَوْقهُمْ. وَ كَنْ نَاسْ الْبَيْت مَا إِجْوَادِيِّيْن، خَلِّي سَلَامْكُو يِقَبِّلْ لَيْكُو. 14وَ كَنْ نَاسْ هَنَا أَيِّ بَيْت وَلَّا أَيِّ حِلَّةْ مَا يَقْبَلَوْكُو وَ يَابَوْا كَلَامْكُو، أَمُرْقُوا مِنَّهْ وَ حِتُّوا الْعَجَاجْ مِنْ رِجْلَيْكُو. 15نُقُولْ لَيْكُو الْحَقّ، فِي يَوْم الْحِسَابْ، الْعَذَابْ الْيَنْزِلْ فَوْق نَاسْ الْبَكَانْ دَا يَبْقَى زِيَادَةْ مِنْ الْعَذَابْ النَّزَلْ فَوْق نَاسْ حِلَّالْ سَدُومْ وَ عَمُورَةْ.#10‏:15 سَدُومْ وَ عَمُورَةْ: التاريخ دا تلقوه في تكوين 19‏:24‏-25.

تعب التلاميذ في الدُنْيا

16«أَسْمَعَوْا! نِرَسِّلْكُو فِي أُسْط النَّاسْ وَ تَبْقَوْا مِثِلْ غَنَمْ فِي أُسْط الْمَرَافْعِينْ. أَشَانْ دَا، وَاجِبْ تَبْقَوْا حَضِيرِينْ مِثِلْ الدَّابِي وَ بَرِيِّينْ مِثِلْ الْحَمَامَةْ. 17أَوْعُوا بَالْكُو مِنْ النَّاسْ، أَشَانْ يِوَدُّوكُو لِلشَّرِيعَةْ وَ يَجْلُدُوكُو فِي بُيُوتْ الصَّلَاةْ. 18وَ يِوَدُّوكُو قِدَّامْ الْحُكَّامْ وَ الْمُلُوكْ أَشَانْ إِنْتُو نَاسِي. وَ فِي الْبَكَانْ دَا، تَشْهَدَوْا لَيِّ قِدَّامْ النَّاسْ الْعِنْدُهُمْ دِينْ وَ قِدَّامْ النَّاسْ الْمَا عِنْدُهُمْ دِينْ. 19وَ وَكِتْ يَكُرْبُوكُو وَ يِوَدُّوكُو لِلشَّرِيعَةْ، مَا تِهِمُّوا لِلْكَلَامْ التُّقُولُوهْ وَلَّا كِكَّيْف تِحَجُّوا. أَشَانْ فِي الْوَكِتْ دَا، اللّٰهْ يَنْطِيكُو الْكَلَامْ التُّقُولُوهْ. 20الْكَلَامْ مَا يَجِي مِنْكُو إِنْتُو وَ لَاكِنْ يَجِي مِنْ رُوحْ أَبُوكُو اللّٰهْ. وَ هُو يِحَجِّي بِخُشُومْكُو.

21«وَ فِي الْوَكِتْ الْجَايِ دَا، نَادُمْ وَاحِدْ يِسَلِّمْ أَخُوهْ لِلْمَوْت وَ أَبُو عِيَالْ يِسَلِّمْ وِلَيْدَهْ لِلْمَوْت وَ الْعِيَالْ يَبْقَوْا عَاصِيِينْ لِوَالْدَيْنهُمْ وَ يِسَبُّبُوا لَيْهُمْ الْمَوْت. 22وَ فِي شَانْ أُسْمِي كُلَّ النَّاسْ يَكْرَهَوْكُو. وَ لَاكِنْ النَّادُمْ الْيَقْعُدْ ثَابِتْ لَحَدِّي كُمَالَةْ كُلَّ شَيّءْ، هُو يَنْجَى. 23وَ وَكِتْ يِتَعُّبُوكُو فِي حِلَّةْ وَاحِدَةْ، أَجْرُوا فِي حِلَّةْ آخَرَةْ. نُقُولْ لَيْكُو الْحَقّ، مَا تَقْدَرَوْا تِكَمُّلُوا عَمَلْكُو فِي حِلَّالْ إِسْرَائِيلْ قُبَّالْ إِبْن الْإِنْسَانْ مَا يَجِي».

ما تخافوا من الناس

24وَ عِيسَى قَالْ بَتَّانْ: «التِّلْمِيذْ مَا أَكْبَرْ مِنْ سَيِّدَهْ وَ الْعَبِدْ مَا أَكْبَرْ مِنْ سِيدَهْ. 25وَ التِّلْمِيذْ رَضْيَانْ كَنْ يَبْقَى مِثِلْ سَيِّدَهْ وَ الْعَبِدْ رَضْيَانْ كَنْ يَبْقَى مِثِلْ سِيدَهْ. وَ كَنْ يُقُولُوا سِيدْ الْبَيْت: ‹هُو إِبْلِيسْ›، أَكِيدْ يُقُولُوا نَفْس الشَّيّءْ زِيَادَةْ فِي نَاسْ بَيْتَهْ. 26مَا تَخَافَوْا مِنْهُمْ. أَشَانْ مَا فِي شَيّءْ مُغَطَّى الْبَعَدَيْن مَا يِنْكَشِفْ وَ مَا فِي سِرّ الْمَا يِنْعَرِفْ. 27أَيِّ شَيّءْ النُّقُولَهْ لَيْكُو فِي اللَّيْل، قُولُوهْ فِي النَّهَارْ. وَ الْكَلَامْ الْكَلَّمْتَهْ لَيْكُو بِبِشَيْش فِي أَدَانْكُو، بَلُّغُوهْ بَرَّا فِي الشَّوَارِعْ.

28«مَا تَخَافَوْا مِنْ النَّاسْ. يَقْدَرَوْا يَكْتُلُوا جِسِمْ النَّادُمْ وَ لَاكِنْ مَا يَقْدَرَوْا يَكْتُلُوا رُوحَهْ. أَخَافَوْا مِنْ اللّٰهْ أَشَانْ هُو يَقْدَرْ يَهْلِكْ الْجِسِمْ وَ الرُّوحْ سَوَا فِي جَهَنَّمْ. 29تَعَرْفُوا كَدَرْ يِبِيعُوا طُيُورْ إِتْنَيْن بِرِيَالْ وَاحِدْ. وَ بَيْدَا كُلَ، كَنْ وَاحِدْ مِنْهُمْ يَقَعْ فِي التُّرَابْ، أَبُوكُو اللّٰهْ يَعَرْفَهْ. 30وَ لَاكِنْ إِنْتُو، اللّٰهْ قَاعِدْ يِفَكِّرْ فِيكُو زِيَادَةْ لَحَدِّي يَعَرِفْ عَدَدْ الصُّوفْ الْفِي رَاسْكُو! 31خَلَاصْ، مَا تَخَافَوْا. أَيِّ نَادُمْ مِنْكُو مُهِمّ زِيَادَةْ لِلّٰهْ مِنْ طُيُورْ كَتِيرِينْ.

32«وَ أَيِّ نَادُمْ الْيَشْهَدْ لَيِّ قِدَّامْ النَّاسْ، أَنَا كُلَ نَشْهَدْ لَيَّهْ قِدَّامْ أَبُويِ اللّٰهْ. 33وَ أَيِّ نَادُمْ الْيَنْكُرْنِي قِدَّامْ النَّاسْ، أَنَا كُلَ نَنْكُرَهْ قِدَّامْ أَبُويِ اللّٰهْ.

تعب المُؤمِنين

34«مَا تَحْسُبُوا أَنَا جِيتْ أَشَانْ نِجِيبْ السَّلَامْ فِي الْأَرْض. مَا جِبْت السَّلَامْ لَاكِنْ جِبْت السَّيْف. 35أَنَا جِيتْ أَشَانْ نِخَالِفْ الْوِلَيْد مَعَ أَبُوهْ وَ الْبِنَيَّةْ مَعَ أَمَّهَا وَ الْمَرَةْ مَعَ نَسِيبِتْهَا. 36وَ بِمِثِلْ دَا، نَاسْ بَيْتَهْ يَبْقَوْا عَدُوهْ لِلنَّادُمْ.

37«أَيِّ نَادُمْ الْيِحِبّ أَبُوهْ وَلَّا أَمَّهْ زِيَادَةْ مِنِّي، مَا وَاجِبْ لَيَّهْ يَبْقَى تِلْمِيذِي. وَ أَيِّ نَادُمْ الْيِحِبّ وِلَيْدَهْ وَلَّا بِنَيِّتَهْ زِيَادَةْ مِنِّي مَا وَاجِبْ لَيَّهْ يَبْقَى تِلْمِيذِي. 38وَ أَيِّ نَادُمْ الْأَبَى مَا يِشِيلْ تَعَبْ الصَّلِيبْ#10‏:38 الصَّلِيبْ: في الزمن داك، الرَوْمانيّين كتلوا المُجْرِمين في صليب قِدّام الناس أشان يعيُّبوهم بزيادة. المسيح قاعد يقول أيِّ نادم اليدَوْر يتابِعه واجِب يعرِف الناس يتعُّبوه. وَ مَا يِتَابِعْنِي لِلْمَوْت، مَا وَاجِبْ لَيَّهْ يَبْقَى تِلْمِيذِي. 39أَيِّ نَادُمْ الْيِدَوْر يِنَجِّي نَفْسَهْ، يِوَدِّرْهَا. لَاكِنْ النَّادُمْ الْيِوَدِّرْ نَفْسَهْ فِي شَانِي أَنَا، هُو دَا يَنْجَى.

40«وَ أَيِّ نَادُمْ الْقِبِلَاكُو قِبِلَانِي. وَ النَّادُمْ الْقِبِلَانِي قِبِلْ اللّٰهْ الرَّسَّلَانِي. 41وَ أَيِّ نَادُمْ الْيَقْبَلْ نَبِي فِي بَيْتَهْ أَشَانْ هُو نَبِي، يَلْقَى أَجُرْ هَنَا نَبِي. وَ أَيِّ نَادُمْ الْيَقْبَلْ رَاجِلْ صَالِحْ أَشَانْ هُو رَاجِلْ صَالِحْ، يَلْقَى أَجُرْ هَنَا رَاجِلْ صَالِحْ. 42وَ أَيِّ نَادُمْ الْيَنْطِي لِنَادُمْ مِنْ نَاسِي الصُّغَارْ دَوْل شُغُلْ صَغَيَّرْ مِثِلْ كَاسْ هَنَا أَلْمِي بَارِدْ أَشَانْ هُو تِلْمِيذِي، نُقُولْ لَيْكُو الْحَقّ، أَجْرَهْ مَا يِوَدِّرْ أَبَداً.»

Currently Selected:

مَتَّى 10: ع.د.ت19

Highlight

Copy