مَتَّى 8
8
المسيح داوى نادم عِنْده جِدام
1وَكِتْ عِيسَى دَلَّى مِنْ الْحَجَرْ، نَاسْ كَتِيرِينْ مَرَّةْ وَاحِدْ تَابَعَوْه. 2وَ رَاجِلْ وَاحِدْ عِنْدَهْ جِدَامْ#8:2 جِدَامْ: في الوكت داك، أيِّ مرض جِسْمي ينادوه جِدام. جَاءْ سَجَدْ قِدَّامْ عِيسَى وَ قَالْ: «يَا سَيِّدْنَا، كَنْ تِدَوْر تَشْفِينِي، أَكِيدْ إِنْتَ تَقْدَرْ وَ أَنَا نَبْقَى طَاهِرْ.» 3وَ عِيسَى مَدَّ إِيدَهْ وَ لِمِسْ الرَّاجِلْ الْعِنْدَهْ جِدَامْ وَ قَالْ: «نِدَوْر نَشْفِيكْ. أَبْقَى طَاهِرْ.» وَ طَوَّالِي بِقِي طَاهِرْ مِنْ الْجِدَامْ. 4وَ عِيسَى قَالْ لَيَّهْ: «أَوْعَى بَالَكْ، مَا تِأَوْرِي نَادُمْ وَاحِدْ لَحَدِّي تَمْشِي تِوَصِّفْ نَفْسَكْ لِرَاجِلْ الدِّينْ وَ تِقَدِّمْ ضَحِيَّةْ لِلّٰهْ مِثِلْ النَّبِي مُوسَى أَمَرَانَا بَيْهَا. وَ مِثِلْ دَا، النَّاسْ يَعَرْفُوا كَدَرْ إِنْتَ لِقِيتْ الْعَافَيْ وَ بِقِيتْ طَاهِرْ.»
إيمان هنا كبير العسْكر
5وَكِتْ عِيسَى مَشَى فِي حِلَّةْ كَفَرْ نَاحُومْ طَوَّالِي نَادُمْ وَاحِدْ جَاءْ لَيَّهْ. هُو كَبِيرْ عَسْكَرْ الرَّوْمَانِيِّينْ وَ شَحَدَهْ لِعِيسَى. 6وَ قَالْ: «يَا سَيِّدْنَا، خَدَّامِي مَرْضَانْ وَ بِقِي مُكَرْسَحْ. جِلْدَهْ مَاتْ. هُو رَاقِدْ فِي الْبَيْت وَ تَعْبَانْ شَدِيدْ.» 7وَ عِيسَى قَالْ لَيَّهْ: «خَلَاصْ، نَمْشُوا وَ نِدَاوِيهْ.»
8وَ كَبِيرْ الْعَسْكَرْ رَدَّ لَيَّهْ وَ قَالْ: «يَا سَيِّدْنَا، أَنَا مَا عِنْدِي حَقّ لِتَدْخُلْ فِي بَيْتِي. وَ لَاكِنْ قُولْ كِلْمَةْ وَاحِدَةْ بَسْ وَ خَدَّامِي يَلْقَى الْعَافَيْ. 9أَشَانْ أَنَا كُلَ عِنْدِي كَبِيرْ مِنْ فَوْق لَيِّ النِّطَبِّقْ أَمْرَهْ. وَ أَنَا كُلَ مَسْؤُولْ فِي نَاسْ التِّحِتْ مِنِّي الْيِطَبُّقُوا أَمْرِي. وَ كَنْ نُقُولْ لِوَاحِدْ: ‹أَمْشِي›، هُو يَمْشِي. وَ كَنْ نُقُولْ لِنَادُمْ آخَرْ: ‹تَعَالْ›، هُو يَجِي. وَ كَنْ نُقُولْ لِعَبْدِي: ‹سَوِّي كَيْ›، هُو يِسَوِّيهْ.»
10وَ عِيسَى سِمِعْ كَلَامَهْ وَ أَلْعَجَّبْ بِلْحَيْن وَ حَجَّى لِلنَّاسْ الْقَاعِدِينْ يِتَابُعُوهْ وَ قَالْ: «نُقُولْ لَيْكُو الْحَقّ، مَا لِقِيتْ نَادُمْ وَاحِدْ مِنْ بَنِي إِسْرَائِيلْ الْعِنْدَهْ إِيمَانْ شَدِيدْ مِثِلْ إِيمَانْ النَّادُمْ دَا! 11وَ نُقُولْ لَيْكُو، نَاسْ كَتِيرِينْ يَجُوا مِنْ صَبَاحْ وَ مِنْ غَرِبْ وَ يِلْعَشَّوْا مَعَ إِبْرَاهِيمْ وَ إِسْحَاقْ وَ يَعْقُوبْ فِي مَمْلَكَةْ اللّٰهْ. 12وَ لَاكِنْ النَّاسْ الْوَاجِبْ يَمُلْكُوا الْمَمْلَكَةْ دِي، اللّٰهْ يَطْرُدْهُمْ فِي الضَّلَامْ الْبَرَّانِي. هِنَاكْ نَاسْ يَبْكُوا وَ يِعَضُّوا سُنُونْهُمْ مِنْ النَّدَامَةْ.»
13وَ عِيسَى حَجَّى لِكَبِيرْ الْعَسْكَرْ وَ قَالْ: «خَلَاصْ أَمْشِي وَ خَلِّي يَبْقَى لَيْك مِثِلْ إِنْتَ آمَنْت بَيَّهْ.» وَ فِي الْوَكِتْ دَا بَسْ، خَدَّامَهْ لِقِي الْعَافَيْ.
المسيح في بيت بُطْرُس
14وَ عِيسَى مَشَى فِي بَيْت بُطْرُسْ وَ لِقِي نَسِيبْتَهْ لِبُطْرُسْ وَ هِي رَاقْدَةْ عِنْدَهَا وِرْدَةْ. 15وَ عِيسَى لِمِسْ إِيدْهَا وَ الْوِرْدَةْ خَلَّتْهَا وَ هِي قَمَّتْ ضَيَّفَتَهْ.
16وَ فِي الْمَغْرِبْ، نَاسْ كَتِيرِينْ جَوْا لَيَّهْ وَ جَابَوْا مُشَوْطِنِينْ كَتِيرِينْ وَ عِيسَى قَاعِدْ يَطْرُدْ الشَّوَاطِينْ بِكِلْمَةْ وَاحِدَةْ بَسْ وَ الْمَرْضَانِينْ كُلُّهُمْ لِقَوْا الْعَافَيْ. 17وَ مِثِلْ دَا، الْكَلَامْ الْاللّٰهْ قَالَهْ بِخَشُمْ النَّبِي إِشَعْيَا تَمَّ. النَّبِي قَالْ: <الْمَرَضْ الْفَوْقنَا أَنِحْنَ، هُو ذَاتَهْ شَالَهْ وَ الْوَجَعْ الْفَوْقنَا، هُو بَسْ حِمْلَهْ.>#8:17 الكلام دا تلقوه في إشَعْيا 53:4.
ناسَيْن دوّروا يتابُعوا عِيسَى
18وَ عِيسَى شَافْ نَاسْ كَتِيرِينْ لَمَّوْا فَوْقَهْ وَ أَمَرْ تَلَامِيذَهْ وَ قَالْ: «تَعَالُوا نَقْطَعَوْا الْبَحَرْ.» 19وَ وَاحِدْ مِنْ الْعُلَمَاءْ جَاءْ لَيَّهْ وَ قَالْ: «يَا سَيِّدْنَا، نِتَابِعَكْ فِي أَيِّ بَكَانْ التَّمْشِي فَوْقَهْ.» 20وَ عِيسَى رَدَّ لَيَّهْ وَ قَالْ: «الْبَعَشَوْم عِنْدَهْ نُقْرَةْ وَ الطَّيْر عِنْدَهْ عُشّ وَ لَاكِنْ أَنَا إِبْن الْإِنْسَانْ مَا عِنْدِي بَكَانْ نِدِسّ رَاسِي فَوْقَهْ.»
21وَ نَادُمْ آخَرْ مِنْ تَلَامِيذَهْ قَالْ: «يَا سَيِّدْنَا، أَنْطِينِي إِذِنْ أَشَانْ نَمْشِي نَدْفِنْ أَبُويِ. وَ بَعَدْ دَا، نَجِي نِتَابِعَكْ.» 22وَ عِيسَى رَدَّ لَيَّهْ وَ قَالْ: «تَعَالْ تَابِعْنِي هَسَّعْ وَ خَلِّي الْمَيْتِينْ يَدْفُنُوا مَيْتِينْهُمْ.»
المسيح وقّف الريح الشديدة
23وَ خَلَاصْ عِيسَى رِكِبْ فِي الْمَرْكَبَةْ وَ تَلَامِيذَهْ تَابَعَوْه وَ رِكْبَوْا مَعَايَهْ. 24وَ بِغَفْلَةْ رِيحْ شَدِيدَةْ مَرَّةْ وَاحِدْ سَاقَتْ فِي الْبَحَرْ وَ قَوَّمَتْ الشَّلَّالْ وَ الْمَرْكَبَةْ أَنْمَلَتْ أَلْمِي. وَ عِيسَى نَايِمْ. 25وَ التَّلَامِيذ قَرَّبَوْا لَيَّهْ وَ قَوَّمَوْه مِنْ النَّوْم وَ قَالَوْا: «يَا سَيِّدْنَا، نَجِّينَا! أَنِحْنَ مُتْنَا!» 26وَ عِيسَى قَالْ لَيْهُمْ: «إِيمَانْكُو لِسَّاعْ ضَعِيفْ. مَالَا تَخَافَوْا؟»
وَ قَمَّ فَوْق وَ كَشَّ لِلرِّيحْ وَ الْبَحَرْ. وَ طَوَّالِي، الْوَطَاةْ بِقَتْ هَادِيَةْ مَرَّةْ وَاحِدْ. 27وَ النَّاسْ أَلْعَجَّبَوْا مَرَّةْ وَاحِدْ وَ قَالَوْا: «النَّادُمْ دَا، هُو يَاتُو؟ لَحَدِّي الرِّيحْ وَ الْبَحَرْ كُلَ يِطِيعُوهْ!»
مُشَوْطِنين إتْنَيْن لِقوا العافي
28وَ بَعَدْ عِيسَى قَطَعْ الْبَحَرْ وَ وَصَّلْ فِي بَلَدْ الْقَدَرِيِينْ، رُجَالْ إِتْنَيْن مَرَقَوْا مِنْ الْقُبُورْ وَ جَوْا لَاقَوْه. وَ هُمَّنْ مُشَوْطِنِينْ وَ خَطِيرِينْ بِلْحَيْن وَ النَّاسْ خَافَوْا مِنْهُمْ وَ نَادُمْ وَاحِدْ كُلَ مَا يَقْدَرْ يَمْشِي بِالدَّرِبْ دَا. 29وَ الْمُشَوْطِنِينْ قَمَّوْا عَاطَوْا وَ قَالَوْا: «يَا إِبْن اللّٰهْ، إِنْتَ تِدَوْر مِنِّنَا شُنُو؟ إِنْتَ جِيتْ أَشَانْ تِعَذِّبْنَا قُبَّالْ يَوْم الْحِسَابْ وَلَّا؟»
30وَ شِيَّةْ بَعِيدْ مِنْهُمْ، فِي خَنَازِيرْ كَتِيرِينْ قَاعِدِينْ يَسْرَحَوْا. 31وَ الشَّوَاطِينْ شَحَدَوْا عِيسَى وَ قَالَوْا: «كَنْ تَطْرُدْنَا، خَلَاصْ رَسِّلْنَا فِي الْخَنَازِيرْ دَوْل». 32وَ عِيسَى قَالْ لَيْهُمْ: «يَلَّا أَمْشُوا!» وَ هُمَّنْ مَرَقَوْا مِنْ الرُّجَالْ دَوْل وَ دَخَلَوْا فِي الْخَنَازِيرْ. وَ الْخَنَازِيرْ كُلُّهُمْ جَرَوْا مِنْ طَرَفْ الْحَجَرْ وَ وَقَعَوْا فِي الْبَحَرْ وَ خَلَاصْ الْأَلْمِي أَكَلَاهُمْ.
33وَ رُعْيَانْ الْخَنَازِيرْ عَرَّدَوْا وَ مَشَوْا خَبَّرَوْا فِي الْحِلَّةْ بِكُلَّ شَيّءْ الشَّافَوْه وَ كِكَّيْف الْمُشَوْطِنِينْ لِقَوْا الْعَافَيْ. 34وَ خَلَاصْ نَاسْ الْحِلَّةْ مَرَقَوْا كُلُّهُمْ أَشَانْ يِقَابُلُوا عِيسَى وَ وَكِتْ لَاقَوْه، شَحَدَوْه أَشَانْ يَمْرُقْ مِنْ بَلَدْهُمْ.
Currently Selected:
مَتَّى 8: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
