مَتَّى 22

مَثَل العازومة و الضيفان

1وَ بَتَّانْ عِيسَى حَجَّى لَيْهُمْ بِأَمْثَالْ وَ قَالْ: 2«مَمْلَكَةْ اللّٰهْ هِي مِثِلْ مَلِكْ وَاحِدْ السَّوَّى عَازُومَةْ فِي عِرِسْ وِلَيْدَهْ. 3وَ رَسَّلْ عَبِيدَهْ أَشَانْ يِنَادُوا النَّاسْ الْمَعْزُومِينْ فِي الْعَازُومَةْ وَ لَاكِنْ الْمَعْزُومِينْ أَبَوْا مَا يَجُوا. 4وَ الْمَلِكْ رَسَّلْ عَبِيدْ آخَرِينْ وَ قَالْ لَيْهُمْ: ‹قُولُوا لِلنَّاسْ الْعَزَمْتُهُمْ: ”دَاهُو، أَنَا جَهَّزْت الْأَكِلْ خَلَاصْ. تِيرَانِي وَ عَجَّالِي الْعَدِيلِينْ دَبَحْتُهُمْ وَ كُلَّ شَيّءْ جَاهِزْ. تَعَالُوا لِلْعَازُومَةْ.“›

5«وَ لَاكِنْ النَّاسْ الْعَزَمَاهُمْ أَبَوْا مَا يَجُوا. الْوَاحِدْ مَشَى فِي الزَّرَعْ وَ الْآخَرْ مَشَى يِسَاوِقْ. 6وَ الْآخَرِينْ كَرَبَوْا عَبِيدْ الْمَلِكْ وَ عَيَّرَوْهُمْ وَ كَتَلَوْهُمْ. 7وَ الْمَلِكْ زِعِلْ مَرَّةْ وَاحِدْ وَ رَسَّلْ عَسْكَرَهْ وَ كَتَلَوْا الْكَتَّالِينْ دَوْل وَ تَشَّوْا حِلِّتْهُمْ.

8«وَ قَالْ لِعَبِيدَهْ: ‹أَكِلْ الْعَازُومَةْ حَاصِلْ وَ لَاكِنْ النَّاسْ الْعَزَمْتُهُمْ مَا وَاجِبْ لَيْهُمْ. 9خَلَاصْ، أَمْشُوا فِي كُلِّ مَوْقَفْ وَ أَيِّ نَادُمْ اللِّقِيتُوهْ نَادُوهْ فِي الْعَازُومَةْ!› 10وَ الْعَبِيدْ مَرَقَوْا وَ مَشَوْا فِي الشَّوَارِعْ وَ لَمَّوْا كُلَّ النَّاسْ اللِّقَوْهُمْ. وَ لَمَّوْا الْفَسْلِينْ مَعَ الْعَدِيلِينْ سَوَا وَ بَيْت الْعِرِسْ أَنْمَلَى ضِيفَانْ.

11«وَ الْمَلِكْ أَنْدَسَّ فِي لُبّ الْبَيْت أَشَانْ يِسَلِّمْ الضِّيفَانْ وَ شَافْ نَادُمْ وَاحِدْ مَا لَابِسْ خَلَقْ هَنَا الْعِرِسْ. 12وَ الْمَلِكْ قَالْ: ‹أَخُويِ، كِكَّيْف دَخَلْت وَ مَا لِبِسْت الْخَلَقْ الْأَنْطَيْتَهْ لِلضِّيفَانْ؟› وَ النَّادُمْ دَا مَا رَدَّ لَيَّهْ كَلَامْ. 13وَ الْمَلِكْ أَمَرْ عَبِيدَهْ وَ قَالْ: ‹أَرْبُطُوا رِجِلَيْنَهْ وَ إِيدَيْنَهْ وَ أَزْقُلُوهْ فِي الضَّلَامْ الْبَرَّانِي. هِنَاكْ نَاسْ يَبْكُوا وَ يِعَضُّوا سُنُونْهُمْ مِنْ الْعَذَابْ.›

14«أَشَانْ اللّٰهْ يِنَادِي نَاسْ كَتِيرِينْ وَ لَاكِنْ يَعَزِلْ نَاسْ شِيَّةْ.»

السُؤال في شان الميري

15وَ الْفَرِيزِيِّينْ مَشَوْا أَشَّاوَرَوْا أَشَانْ يُغُشُّوا عِيسَى وَ يَرْمُوهْ بِكَلَامَهْ. 16وَ رَسَّلَوْا لِعِيسَى وَاحِدِينْ مِنْ تَلَامِيذْهُمْ مَعَ نَاسْ مِنْ حِزِبْ هِرُودُسْ. وَ قَالَوْا لَيَّهْ: «يَا مُعَلِّمْ، نَعَرْفُوا كَدَرْ كَلَامَكْ حَقّ وَ تِعَلِّمْ النَّاسْ فِي دَرِبْ اللّٰهْ بِكَلَامْ صَحِيحْ وَ إِنْتَ مَا خَايِفْ مِنْ أَيِّ نَادُمْ وَ مَا تَخَافْ مِنْ وِجِهْ النَّاسْ. 17خَلَاصْ، قُولْ لَيْنَا فِكْرَكْ. حَسَبْ التَّوْرَاةْ، وَاجِبْ لَيْنَا نِكَفُّوا الْمِيرِي لِسُلْطَانْ الرَّوْمَانِيِّينْ وَلَّا مَا وَاجِبْ؟»

18وَ عِيسَى عِرِفْ نِيِّتْهُمْ شَيْنَةْ وَ قَالْ لَيْهُمْ: «يَا مُنَافِقِينْ. مَالَا تِدَوْرُوا تِجَرُّبُونِي؟ 19وَصُّفُونِي السِّلَيْ التِّكَفُّوا بَيَّهْ الْمِيرِي.» وَ أَنْطَوْه دِينَارْ وَاحِدْ. 20وَ سَأَلَاهُمْ وَ قَالْ: «الصُّورَةْ وَ الْأُسُمْ الْقَاعِدِينْ فَوْقَهْ دَوْل، هَنَا يَاتُو؟» 21وَ رَدَّوْا لَيَّهْ وَ قَالَوْا: «هَنَا سُلْطَانْ الرَّوْمَانِيِّينْ.» وَ قَالْ لَيْهُمْ: «خَلَاصْ. هَنَا السُّلْطَانْ، أَنْطُوهْ لِلسُّلْطَانْ وَ هَنَا اللّٰهْ، أَنْطُوهْ لِلّٰهْ.» 22وَ أَلْعَجَّبَوْا مَرَّةْ وَاحِدْ فِي كَلَامَهْ وَ فَاتَوْا خَلَّوْه.

السُؤال البُخُصّ البُعاث

23وَ فِي الْيَوْم دَا، صَدُّوقِيِّينْ وَاحِدِينْ جَوْا لِعِيسَى. وَ الصَّدُّوقِيِّينْ، هُمَّنْ مَا مُؤمِنِينْ بِالْبُعَاثْ. وَ سَأَلَوْه 24وَ قَالَوْا: «يَا السَّيِّدْ، فِي التَّوْرَاةْ، مُوسَى قَالْ كَنْ رَاجِلْ مَاتْ وَ مَا عِنْدَهْ عِيَالْ، أَخُو الرَّاجِلْ دَا وَاجِبْ يَاخُدْ الْمَرَةْ وَ يَلْدَ مِنْهَا ذُرِّيَّةْ لِأَخُوهْ الْمَرْحُومْ.#22‏:24 الكلام دا تلقوه في تَثْنِية 25‏:5‏-6. 25زَيْن. أَوَّلْ سَبْعَةْ أَخْوَانْ قَاعِدِينْ أَمْبَيْنَاتْنَا. وَ الْكَبِيرْ مِنْهُمْ أَخَدْ مَرَةْ وَ بَعَدْ وَكِتْ، مَاتْ وَ مَا عِنْدَهْ مِنْهَا ذُرِّيَّةْ. وَ أَشَانْ دَا، وَاجِبْ لِأَخُوهْ يَاخُدْهَا. 26وَ الْأَخُو التَّانِي كُلَ أَخَدْ الْمَرَةْ وَ مَاتْ. وَ بَعَدْ دَا، الْأَخُو التَّالِتْ وَ كُلُّهُمْ لَحَدِّي السَّابِعْ أَخَدَوْهَا وَ مَاتَوْا. 27وَ بَعَدْ كُلَّ الْأَخْوَانْ مَاتَوْا، الْمَرَةْ كُلَ مَاتَتْ. 28وَ خَلَاصْ وَكِتْ الْمَيْتِينْ يَبْعَثَوْا، هِي تَبْقَى مَرِةْ يَاتُو مِنْ الْأَخْوَانْ السَّبْعَةْ؟ أَشَانْ كُلُّهُمْ أَخَدَوْهَا.»

29وَ عِيسَى رَدَّ لَيْهُمْ وَ قَالْ: «إِنْتُو مُوَدِّرِينْ أَشَانْ مَا تَعَرْفُوا وَ لَا كِتَابْ اللّٰهْ وَ لَا قُدْرَةْ اللّٰهْ. 30أَشَانْ وَكِتْ النَّاسْ يَبْعَثَوْا، الرُّجَالْ مَا يَاخُدُوا عَوِينْ وَ الْعَوِينْ مَا يَاخُدَنْ رُجَالْ وَ يَبْقَوْا مِثِلْ مَلَائِكَةْ اللّٰهْ فِي السَّمَاوَاتْ الْأَمْبَيْنَاتْهُمْ أَخِيدَةْ مَا فِي. 31وَ فِي الشَّيّءْ الْبُخُصّ الْبُعَاثْ، هَلْ نِسِيتُوا الْكَلَامْ الْقَرَيْتُوهْ الْقَالَهْ لَيْكُو اللّٰهْ وَلَّا؟ 32هُو قَالْ: <أَنَا اللّٰهْ رَبّ جُدُودْكُو إِبْرَاهِيمْ وَ إِسْحَاقْ وَ يَعْقُوبْ.>#22‏:32 الكلام دا تلقوه في خُروج 3‏:6. وَ بَيْدَا، هُو رَبّ الْحَيِّينْ وَ مَا رَبّ الْمَيْتِينْ.»

33وَ النَّاسْ سِمْعَوْا تَعْلِيمَهْ وَ أَلْعَجَّبَوْا بِلْحَيْن.

الوصيّة الأكْبر

34وَ وَكِتْ الْفَرِيزِيِّينْ سِمْعَوْا كَدَرْ عِيسَى سَكَّتْ الصَّدُّوقِيِّينْ، خَلَاصْ هُمَّنْ لَمَّوْا أَشَانْ يَسْأَلَوْه. 35وَ نَادُمْ وَاحِدْ مِنْهُمْ عَالِمْ فِي التَّوْرَاةْ وَ دَوَّرْ يَسْأَلَهْ أَشَانْ يِجَرِّبَهْ. 36وَ سَأَلَهْ وَ قَالْ: «يَا السَّيِّدْ، مِنْ كُلَّ الْوَصَايَا الْفِي التَّوْرَاةْ، وَيْنِي الْوَصِيَّةْ الْأَكْبَرْ؟» 37وَ عِيسَى رَدَّ لَيَّهْ وَ قَالْ: «<حِبّ رَبَّكْ اللّٰهْ بِكُلَّ قَلْبَكْ وَ بِكُلَّ نَفْسَكْ وَ بِكُلَّ فِكْرَكْ.>#22‏:37 الكلام دا تلقوه في تَثْنِية 6‏:5. 38دِي هِي الْوَصِيَّةْ الْأَكْبَرْ وَ مَا فِي وَصِيَّةْ أَكْبَرْ مِنْهَا. 39وَ الْوَصِيَّةْ التَّانِيَةْ تِشَابِهَّا وَ دِي هِي: <حِبّ أَخُوكْ مِثِلْ تِحِبّ نَفْسَكْ.>#22‏:39 الكلام دا تلقوه في لاوِيِّين 19‏:18. 40وَ الْوَصَايَا الْإِتْنَيْن دَوْل، هُمَّنْ أَمّ التَّوْرَاةْ وَ كُتُبْ الْأَنْبِيَاء كُلُّهُمْ.»

المسيح إبْن دَاوُد ولّا؟

41وَ وَكِتْ الْفَرِيزِيِّينْ قَاعِدِينْ مَعَ عِيسَى، هُو سَأَلَاهُمْ وَ قَالْ: 42«شُنُو فِكِرْكُو فِي الْمَسِيحْ؟ الْمَسِيحْ يَبْقَى إِبْن يَاتُو؟» وَ رَدَّوْا لَيَّهْ وَ قَالَوْا: «الْمَسِيحْ إِبْن دَاوُدْ.» 43وَ سَأَلَاهُمْ وَ قَالْ: «كَنْ كَلَامْكُو صَحِيحْ، كِكَّيْف دَاوُدْ قَالْ الْمَسِيحْ هُو سِيدَهْ وَكِتْ قَاعِدْ يِكَلِّمْ بِقُدْرَةْ الرُّوحْ الْقُدُّوسْ وَ قَالْ: 44‹اللّٰهْ حَجَّى لِسِيدِي الْمَلِكْ وَ قَالْ: <أَقْعُدْ بِنُصِّي الزَّيْنَايْ لَحَدِّي نُخُطّ عُدْوَانَكْ تِحِتْ رِجِلَيْنَكْ.>›#22‏:44 الكلام دا تلقوه في زَبُور 110‏:1. 45كَنْ دَاوُدْ قَالْ الْمَسِيحْ سِيدَهْ، كِكَّيْف الْمَسِيحْ يَبْقَى وِلَيْدَهْ؟»

46وَ مَا قِدْرَوْا يُرُدُّوا لَيَّهْ كَلَامْ. وَ مِنْ الْيَوْم دَا، نَادُمْ وَاحِدْ مَا سَأَلَهْ أَيِّ سُؤَالْ.

Currently Selected:

مَتَّى 22: ع.د.ت19

Highlight

Copy