يُوحَنَّا 12
12
مَرْيَم صبّت عِطِر في رِجِلَيْن عِيسَى
1وَ سِتَّةْ يَوْم قُبَّالْ عِيدْ الْفِصْحَ، عِيسَى جَاءْ فِي حِلَّةْ بَيْت عَنْيَا. وَ دَا الْبَكَانْ اللَّعَازَرْ سَاكِنْ فَوْقَهْ، هُو النَّادُمْ الْعِيسَى قَوَّمَهْ مِنْ الْمَوْت. 2وَ حَصَّلَوْا لِعِيسَى عَشَاءْ. وَ لَعَازَرْ وَاحِدْ مِنْ النَّاسْ الْيَاكُلُوا مَعَايَهْ وَ مَرْثَةْ فَضَّلَتْهُمْ. 3وَ مَرْيَمْ جَاتْ وَ جَابَتْ نُصّ لِيتِرْ هَنَا عِطِرْ أَصْلِي وَ غَالِي بِلْحَيْن الْأُسْمَهْ نَارْدِينْ. وَ صَبَّتْ الْعِطِرْ فِي رِجِلَيْن عِيسَى وَ قَشَّتْهُمْ بِشَعَرْهَا. وَ رِيحَةْ الْعِطِرْ سَدَّتْ الْبَيْت مَرَّةْ وَاحِدْ.
4وَ لَاكِنْ تِلْمِيذْ وَاحِدْ قَمَّ حَجَّى وَ هُو يَهُوذَا الْإِسْخَرِيَوْطِي الْبَعَدْ أَيَّامْ يُخُونْ عِيسَى. وَ هُو قَالْ: 5«مَالَا مَا بَاعَوْا الْعِطِرْ دَا؟ أَكُونْ يَلْقَوْا مِنَّهْ 300 دِينَارْ أَشَانْ يَنْطُوهْ لِلْمَسَاكِينْ.» 6وَ يَهُوذَا مَا قَالْ الْكَلَامْ دَا أَشَانْ هُو حَنُونْ لِلْمَسَاكِينْ لَاكِنْ أَشَانْ هُو سَرَّاقْ. هُو مَسْؤُولْ فِي صَنْدُوقْ هَنَا قُرُسْهُمْ وَ قَاعِدْ يِشِيلْ مِنْ الْقُرُسْ.
7وَ عِيسَى قَالْ: «مَا تَهْرِجْهَا. هِي صَبَّتْ الْعِطِرْ فِي جِسْمِي أَشَانْ تِجَهِّزْنِي لِلْقَبُرْ. 8الْمَسَاكِينْ قَاعِدِينْ مَعَاكُو دَايْماً وَ لَاكِنْ أَنَا كَمَانْ مَا نَقْعُدْ مَعَاكُو دَايْماً.»
المسيح دخل في مدينة القدس
9وَ الْيَهُودْ الْفِي مَدِينَةْ الْقُدُسْ سِمْعَوْا عِيسَى قَاعِدْ فِي حِلَّةْ بَيْت عَنْيَا وَ نَاسْ كَتِيرِينْ مَرَقَوْا لَيَّهْ. مَا مَشَوْا يِشِيفُوا عِيسَى بَسْ لَاكِنْ دَوَّرَوْا يِشِيفُوا لَعَازَرْ كُلَ أَشَانْ هُو النَّادُمْ الْعِيسَى قَوَّمَهْ مِنْ الْمَوْت. 10وَ أَشَانْ دَا، كُبَارَاتْ رُجَالْ الدِّينْ شَالَوْا نِيَّةْ لِيَكْتُلُوا لَعَازَرْ كُلَ. 11أَشَانْ بِسَبَبْ لَعَازَرْ، يَهُودْ كَتِيرِينْ قَاعِدِينْ يِكِسُّوا مِنْهُمْ وَ يِآمُنُوا بِعِيسَى.
12وَ نَاسْ كَتِيرِينْ جَوْا فِي مَدِينَةْ الْقُدُسْ أَشَانْ يِعَيُّدُوا. وَ هُمَّنْ سِمْعَوْا خَبَرْ عِيسَى يِدَوْر يَجِي فِي الْمَدِينَةْ. 13وَ قَطَعَوْا فِرِعْ مِنْ نَخَلْ وَ مَشَوْا بَيَّهْ أَشَانْ يِلَاقُوهْ. وَ قَالَوْا بِحِسّ عَالِي:
«الْحَمْدُ للّٰهْ!
<مَبْرُوكْ لِلنَّادُمْ الْجَايِ بِأُسُمْ اللّٰهْ!>#12:13 الكلام دا تلقوه في زَبُور 118:26.
مَبْرُوكْ لِمَلِكْ إِسْرَائِيلْ!»
14وَ عِيسَى شَالْ حُمَارْ وَ رِكِبْ فَوْقَهْ. وَ دَا بِقِي مِثِلْ أَوَّلْ مَكْتُوبْ فِي الْكِتَابْ:
15<يَا صَهْيُون الْمِثِلْ بِنَيَّةْ،
مَا تَخَافَيْ.
دَاهُو مَلِكِّ جَايِ لَيْكِ
رَاكِبْ فِي دَحَشْ وِلَيْد حُمَارَةْ.>#12:15 الكلام دا تلقوه في زَكَرِيَّا 9:9.
16وَ تَلَامِيذَهْ أَوَّلْ مَا فِهْمَوْا الشَّيّءْ الْبِقِي دَا. وَ لَاكِنْ وَكِتْ اللّٰهْ رَفَعْ عِيسَى فِي مَجْدَهْ، هُمَّنْ فَكَّرَوْا وَ عِرْفَوْا كَدَرْ النَّاسْ سَوَّوْا لَيَّهْ الشَّيّءْ الْمَكْتُوبْ فِي الْكِتَابْ.
17وَ النَّاسْ الْقَاعِدِينْ مَعَ عِيسَى يَوْم هُو نَادَى لَعَازَرْ مِنْ الْقَبُرْ وَ قَوَّمَهْ، هُمَّنْ حَجَّوْا لِلنَّاسْ الْآخَرِينْ وَ شَهَدَوْا لَيَّهْ. 18وَ النَّاسْ الْجَوْا فِي مَدِينَةْ الْقُدُسْ سِمْعَوْا خَبَرْ الْعَجَبْ دَا وَ قَمَّوْا مَشَوْا لَاقَوْه. 19وَ الْفَرِيزِيِّينْ حَجَّوْا أَمْبَيْنَاتْهُمْ وَ قَالَوْا: «شِيفُوا، مَا نَقْدَرَوْا نِسَوُّوا شَيّءْ. كُلَّ النَّاسْ قَمَّوْا تَابَعَوْه.»
المسيح حجّى بمَوْته
20وَ فِيَّهْ يُونَانِيِّينْ وَاحِدِينْ فِي أُسْط النَّاسْ الْجَوْا فِي مَدِينَةْ الْقُدُسْ أَشَانْ يَعَبُدُوا اللّٰهْ فِي وَكِتْ الْعِيدْ. 21وَ الْيُونَانِيِّينْ جَوْا لِفِلِبُّسْ التِّلْمِيذْ الْمِنْ حِلَّةْ بَيْت صَيْدَا فِي دَارْ الْجَلِيلْ وَ قَدَّمَوْا لَيَّهْ طَلَبْ. وَ قَالَوْا: «يَا السَّيِّدْ، نِدَوْرُوا نِشِيفُوا عِيسَى.»
22وَ فِلِبُّسْ قَمَّ أَوْرَى أَنْدَرَيَّسْ. وَ أَنْدَرَيَّسْ وَ فِلِبُّسْ مَشَوْا وَ أَوْرَوْا عِيسَى. 23وَ عِيسَى رَدَّ لَيْهُمْ وَ قَالْ: «خَلَاصْ، الْوَكِتْ الْاللّٰهْ قَطَعَهْ لِإِبْن الْإِنْسَانْ تَمَّ. وَ هَسَّعْ اللّٰهْ يَرْفَعَهْ فِي مَجْدَهْ. 24أَسْمَعَوْا نُقُولْ لَيْكُو الْحَقّ، كَنْ حَبَّةْ هَنَا تَيْرَابْ الْقَمَحْ مَا تَقَعْ فِي التُّرَابْ وَ مَا تُمُوتْ، هِي تَقْعُدْ حَبَّةْ وَاحِدَةْ بَسْ. وَ لَاكِنْ كَنْ هِي تُمُوتْ، تَلْدَ عِيَالْ كَتِيرْ. 25وَ أَيِّ نَادُمْ الْيِحِبّ حَيَاتَهْ يِوَدِّرْهَا. وَ الْيَكْرَهْ حَيَاتَهْ فِي الدُّنْيَا، يَلْقَى الْحَيَاةْ الْأَبَدِيَّةْ. 26كَنْ نَادُمْ يِدَوْر يَخْدِمْ لَيِّ، وَاجِبْ يِتَابِعْنِي. وَ فِي الْبَكَانْ الْأَنَا نَقْعُدْ فَوْقَهْ، خَدَّامِي كُلَ يَقْعُدْ فَوْقَهْ. وَ أَيِّ نَادُمْ الْيَخْدِمْ لَيِّ، أَبُويِ يِشَرِّفَهْ.
27«وَ هَسَّعْ قَلْبِي مُعَلَّقْ وَ نُقُولْ شُنُو؟ هَلْ نُقُولْ: ‹يَا أَبُويِ، الْوَكِتْ تَمَّ. نَجِّينِي مِنَّهْ›؟ لَا، دَا مَا نُقُولَهْ. أَنَا جِيتْ فِي شَانْ الْوَكِتْ دَا بَسْ. 28أَخَيْر نُقُولْ: ‹يَا أَبُويِ، مَجِّدْ أُسْمَكْ!›»
وَ حِسّ اللّٰهْ أَنْسَمَعْ مِنْ السَّمَاءْ وَ قَالْ: «أَنَا مَجَّدْتَهْ وَ نِمَجِّدَهْ بَتَّانْ.» 29وَ النَّاسْ الْقَاعِدِينْ فِي الْبَكَانْ دَا سِمْعَوْا الْحِسّ وَ قَالَوْا: «دَا دَقْدَاقْ.» وَ نَاسْ وَاحِدِينْ قَالَوْا: «وَاحِدْ مِنْ الْمَلَائِكَةْ حَجَّى لَيَّهْ.»
30وَ عِيسَى رَدَّ لَيْهُمْ وَ قَالْ: «الْحِسّ دَا أَنْسَمَعْ مَا لِفَايْدِتِي أَنَا لَاكِنْ لِفَايْدِتْكُو إِنْتُو. 31هَسَّعْ بَسْ الْعِقَابْ يَجِي فِي الدُّنْيَا. وَ هَسَّعْ بَسْ يِنْطَرِدْ إِبْلِيسْ سُلْطَانْ الدُّنْيَا. 32وَ أَنَا، وَكِتْ يَرْفَعَوْنِي فَوْق مِنْ الْأَرْض، نِلِمّ كُلَّ النَّاسْ عَلَيِّ.» 33وَ عِيسَى قَالْ الْكَلَامْ دَا أَشَانْ يِأَوْرِيهُمْ بِكِكَّيْف هُو يُمُوتْ.
34وَ النَّاسْ الْحَاضْرِينْ رَدَّوْا لَيَّهْ وَ قَالَوْا: «عَلَّمَوْنَا مِنْ كِتَابْ التَّوْرَاةْ كَدَرْ الْمَسِيحْ يَقْعُدْ إِلَى الْأَبَدْ. وَ بَيْدَا، مَالَكْ قُلْت إِبْن الْإِنْسَانْ لَابُدَّ يَرْفَعَوْه؟ وَ إِبْن الْإِنْسَانْ دَا، هُو يَاتُو؟» 35وَ عِيسَى قَالْ لَيْهُمْ: «النُّورْ يَقْعُدْ مَعَاكُو وَكِتْ شِيَّةْ بَسْ. رُوغُوا فِي النُّورْ أَشَانْ الضَّلَامْ مَا يِنَّصِرْ فَوْقكُو. النَّادُمْ الْيُرُوغْ فِي الضَّلَامْ مَا يَعَرِفْ الْبَكَانْ الْهُو مَاشِي لَيَّهْ. 36وَكِتْ النُّورْ لِسَّاعْ مَعَاكُو، آمُنُوا بِالنُّورْ. وَ بِمِثِلْ دَا، تَبْقَوْا أَهَلْ النُّورْ.» وَ بَعَدْ عِيسَى قَالْ الْكَلَامْ دَا، هُو مَشَى وَ أَلَّبَّدْ مِنْهُمْ.
عِيسَى المسيح و كلام النبي إشَعْيا
37عِيسَى سَوَّى عَجَايِبْ كَتِيرِينْ فِي أُسْط الْيَهُودْ وَ لَاكِنْ بَيْدَا كُلَ، هُمَّنْ مَا آمَنَوْا بَيَّهْ. 38وَ بِمِثِلْ دَا، كَلَامْ النَّبِي إِشَعْيَا تَمَّ. هُو قَالْ: <يَا اللّٰهْ، يَاتُو الْآمَنْ بِخَبَرْنَا؟ وَ قُدْرَةْ اللّٰهْ بَانَتْ لِيَاتُو؟>#12:38 الكلام دا تلقوه في إشَعْيا 53:1. 39وَ الْيَهُودْ مَا قِدْرَوْا يِآمُنُوا بَيَّهْ أَشَانْ إِشَعْيَا كُلَ قَالْ: 40<اللّٰهْ عَمَى عُيُونْهُمْ وَ قَوَّى قُلُوبْهُمْ أَشَانْ مَا يِشِيفُوا بِعُيُونْهُمْ وَ مَا يَفْهَمَوْا بِقُلُوبْهُمْ. وَ بَيْدَا، مَا يُتُوبُوا أَشَانْ نَشْفِيهُمْ.>#12:40 الكلام دا تلقوه في إشَعْيا 6:10. 41وَ إِشَعْيَا قَالْ الْكَلَامْ دَا أَشَانْ هُو شَافْ مَجْد الْمَسِيحْ وَ حَجَّى بَيَّهْ.
42وَ فِي الْوَكِتْ دَا كُلَ، نَاسْ كَتِيرِينْ مِنْ الْكُبَارَاتْ آمَنَوْا بِعِيسَى. وَ لَاكِنْ مَا قَالَوْا شَيّءْ قِدَّامْ النَّاسْ أَشَانْ هُمَّنْ خَايْفِينْ مِنْ الْفَرِيزِيِّينْ. هُمَّنْ مَا دَوَّرَوْا الْفَرِيزِيِّينْ يَطُرْدُوهُمْ مِنْ بُيُوتْ الصَّلَاةْ 43أَشَانْ دَوَّرَوْا رِضَى النَّاسْ زِيَادَةْ مِنْ رِضَى اللّٰهْ.
44وَ عِيسَى حَجَّى بِحِسّ عَالِي وَ قَالْ: «أَيِّ نَادُمْ الْمُؤمِنْ بَيِّ، هُو مَا مُؤمِنْ بَيِّ أَنَا بَسْ لَاكِنْ هُو مُؤمِنْ بِاللّٰهْ الرَّسَّلَانِي كُلَ. 45وَ أَيِّ نَادُمْ الْيِشِيفْنِي، يِشِيفْ الرَّسَّلَانِي كُلَ. 46أَنَا جِيتْ فِي الدُّنْيَا مِثِلْ نُورْ أَشَانْ أَيِّ نَادُمْ الْيِآمِنْ بَيِّ مَا يَقْعُدْ فِي الضَّلَامْ.
47«كَنْ نَادُمْ يَسْمَعْ كَلَامِي وَ مَا يِتَابِعَهْ، أَنَا ذَاتِي مَا نِحَاكِمَهْ أَشَانْ أَنَا مَا جِيتْ لِنِحَاكِمْ نَاسْ الدُّنْيَا لَاكِنْ جِيتْ لِنِنَجِّي نَاسْ الدُّنْيَا. 48النَّادُمْ الْيَابَانِي وَ مَا يِتَابِعْ كَلَامِي عِنْدَهْ قَاضِي الْيِحَاكِمَهْ. الْكَلَامْ الْأَنَا قُلْتَهْ يِجِيبْ فَوْقَهْ الْحُكُمْ فِي الْيَوْم الْأَخِيرْ. 49وَ يَبْقَى مِثِلْ دَا، أَشَانْ أَنَا مَا كَلَّمْت حَسَبْ رَايّ أَنَا بَسْ. أَبُويِ اللّٰهْ رَسَّلَانِي بِوَصِيّتَهْ وَ أَوْرَانِي كُلَّ الْكَلَامْ الْوَاجِبْ نُقُولَهْ. 50وَ أَنَا نَعَرِفْ كَدَرْ وَصِيَّةْ اللّٰهْ تَنْطِي الْحَيَاةْ الْأَبَدِيَّةْ. وَ أَشَانْ دَا، أَنَا نُقُولْ الْكَلَامْ الْأَبُويِ أَوْرَانِي بَيَّهْ.»
Currently Selected:
يُوحَنَّا 12: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
