تكوين 10

1دَاهُو ذُرِّيَّةْ سَامْ وَ حَامْ وَ يَافَثْ أَوْلَادْ نُوحْ، هُمَّنْ وَ أَوْلَادْهُمْ الْوِلْدَوْهُمْ بَعَدْ الْغَرَقْ.

ذُرّية يَافَث

2أَوْلَادْ يَافَثْ هُمَّنْ قُومَرْ وَ مَاجُوجْ وَ مَادَايْ وَ يَوَانْ وَ تُوبَلْ وَ مَاشَكْ وَ تِرَاسْ. 3وَ أَوْلَادْ قُومَرْ هُمَّنْ أَشْكَنَازْ وَ رِفَاثْ وَ تُقَرْمَا. 4وَ أَوْلَادْ يَوَانْ هُمَّنْ أَلِيشَى وَ تَرْشِيشْ وَ كِتِّيمْ وَ رُدَانِيمْ. 5وَ مِنْهُمْ هُمَّنْ بَسْ مَرَقَوْا النَّاسْ السَّاكْنِينْ فِي خَشُمْ الْبُحُورْ.

وَ هُمَّنْ شَتَّتَوْا فِي بُلْدَانْهُمْ عَلَيْ حَسَبْ لُغَّاتْهُمْ وَ قَبَايِلْهُمْ وَ أُمَمْهُمْ.

ذُرّية حَام

6أَوْلَادْ حَامْ هُمَّنْ كُوشْ وَ مِصْرَايِمْ وَ فُوطْ وَ كَنْعَانْ. 7وَ أَوْلَادْ كُوشْ هُمَّنْ سَبَا وَ حَوِيلَةْ وَ سَبْتَا وَ رَعْمَا وَ سَبْتَكَا. وَ أَوْلَادْ رَعْمَا هُمَّنْ شَبَا وَ دَدَانْ.

8وَ كُوشْ وِلِدْ نِمْرُودْ. وَ نِمْرُودْ هُو أَوَّلْ رَاجِلْ فَارِسْ فِي الْأَرْض. 9وَ هُو بِقِي قَنَّاصِي شَدِيدْ قِدَّامْ اللّٰهْ. وَ فِي شَانْ دَا بَسْ، النَّاسْ يُقُولُوا: «فِلَانْ مِثِلْ نِمْرُودْ الْقَنَّاصِي الشَّدِيدْ قِدَّامْ اللّٰهْ.» 10وَ هُو بَدَا يَمْلُكْ مِنْ مَدِينَةْ بَابِلْ وَ أَرَكْ وَ أَكَّدْ وَ كَلْنَةْ فِي تُرَابْ شِنْعَارْ. 11وَ مَرَقْ مِنْ الْبُلْدَانْ دَوْل وَ مَشَى أَشُورْ وَ بَنَى مَدِينَةْ نِينَوَى وَ رَحُبُوتْ عِيْر وَ كَالَحْ 12وَ رَسَنْ الْحِلَّةْ الْقَاعِدَةْ أَمْبَيْن نِينَوَى وَ كَالَحْ الْحِلَّةْ الْكَبِيرَةْ.

13وَ مِصْرَايِمْ جَابْ قَبَايِلْ لُودْ وَ عَنَامْ وَ لَهَابْ وَ نَفْتُوحْ 14وَ فَتْرُوسْ وَ كَسْلُوحْ وَ كَفْتُورْ. وَ مِنْ قَبِيلَةْ كَسْلُوحْ بَسْ مَرَقَوْا الْفِلِسْطِيِّينْ.

15وَ كَنْعَانْ وِلِدْ صِدُونْ وِلَيْدَهْ الْبِكِرْ وَ بَعَدَهْ وِلِدْ حِتَّا. 16وَ هُو بَسْ جَابْ قَبَايِلْ الْيَبُوسِيِّينْ وَ الْأَمُورِيِّينْ وَ الْقِرْقَاشِيِّينْ 17وَ الْحِوِّيِّينْ وَ الْعَرْقِيِّينْ وَ السِّينِيِّينْ 18وَ الْأَرْوَدِيِّينْ وَ الصَّمَارِيِّينْ وَ الْحَمَاتِيِّينْ. وَ بَعَدَيْن، الْقَبَايِلْ هَنَا الْكَنْعَانِيِّينْ شَتَّتَوْا. 19وَ التُّرَابْ هَنَا الْكَنْعَانِيِّينْ أَلْوَسَّعْ مِنْ صَيْدَا عَلَيْ قَرَارْ لَحَدِّي غَزَّةْ وَ مَاشِي عَلَيْ سَدُومْ وَ عَمُورَةْ وَ أَدْمَةْ وَ صَبُويِيمْ لَحَدِّي لَاشَعْ.

20وَ دَوْل ذُرِّيَّةْ حَامْ فِي بُلْدَانْهُمْ عَلَيْ حَسَبْ لُغَّاتْهُمْ وَ قَبَايِلْهُمْ وَ أُمَمْهُمْ.

ذُرّية سَام

21سَامْ كُلَ جَابْ أَوْلَادْ. هُو أَخُو كَبِيرْ هَنَا يَافَثْ وَ جِدّ هَنَا كُلَّ أَوْلَادْ عِبَارْ. 22وَ أَوْلَادْ سَامْ هُمَّنْ عِلَامْ وَ أَشُورْ وَ أَرْفَكْشَادْ وَ لُودْ وَ أَرَامْ. 23وَ عِيَالْ أَرَامْ هُمَّنْ عُوصْ وَ حُولْ وَ قَاتَرْ وَ مَاشْ. 24وَ أَرْفَكْشَادْ وِلِدْ شَالَحْ وَ شَالَحْ وِلِدْ عِبَارْ.

25وَ عِبَارْ وِلِدْ أَوْلَادْ إِتْنَيْن. الْوَاحِدْ أُسْمَهْ فَالَقْ (مَعَنَاتَهْ قِسِمْ) أَشَانْ فِي زَمَنَهْ، الْأَرْض قَسَّمَوْهَا. وَ أَخُوهْ أُسْمَهْ يَقْطَانْ. 26وَ يَقْطَانْ وِلِدْ أَلِمُدَادْ وَ شَالَفْ وَ حَضَرْمُوتْ وَ يَارَحْ وَ 27هَدُرَامْ وَ أُزَالْ وَ دِقْلَى 28وَ عُبَالْ وَ أَبِمَايِلْ وَ شَبَا 29وَ أُفِيرْ وَ حَوِيلَى وَ يُبَابْ. وَ دَوْل كُلُّهُمْ أَوْلَادْ يَقْطَانْ. 30هُمَّنْ سَاكْنِينْ مِنْ مِيشَا جَنْب سَفَارْ لَحَدِّي جَبَلْ الصَّبْحَانِي.

31وَ دَوْل أَوْلَادْ سَامْ فِي بُلْدَانْهُمْ حَسَبْ لُغَّاتْهُمْ وَ قَبَايِلْهُمْ وَ أُمَمْهُمْ.

32وَ دَوْل قَبَايِلْ أَوْلَادْ نُوحْ بِذُرِّيِّتْهُمْ وَ أُمَمْهُمْ. وَ مِنْهُمْ هُمَّنْ بَسْ مَرَقَوْا كُلَّ النَّاسْ الشَّتَّتَوْا فِي الْأَرْض بَعَدْ الْغَرَقْ.

Currently Selected:

تكوين 10: ع.د.ت19

Highlight

Copy