2 صَمُوِيل 2
2
دَاوُد بِقي ملك في بلد يَهُوذَا
1وَ بَعَدْ الْحِزِنْ دَا، دَاوُدْ سَأَلْ اللّٰهْ وَ قَالْ: «هَلْ نَمْشِي نَقْعُدْ فِي حِلَّةْ وَاحِدَةْ مِنْ حِلَّالْ بَلَدْ يَهُوذَا وَلَّا؟» وَ اللّٰهْ قَالْ لَيَّهْ: «أَمْشِي.» وَ دَاوُدْ قَالْ: «نَمْشِي وَيْن؟» وَ اللّٰهْ قَالْ لَيَّهْ: «أَمْشِي حِلَّةْ حِبْرُونْ.»
2وَ دَاوُدْ قَمَّ مَشَى حِبْرُونْ مَعَ عَوِينَهْ الْإِتْنَيْن أَخِنُوعَمُ الْمِنْ حِلَّةْ يَزْرَعِيلْ وَ أَبِقَايِلْ مَرِةْ نَابَالْ الْمِنْ حِلَّةْ كَرْمَلْ. 3وَ دَاوُدْ وَدَّى مَعَايَهْ نَاسَهْ وَ عَايِلَاتْهُمْ وَ سَكَنَوْا فِي حِبْرُونْ وَ حَوَالَيْهَا. 4وَ نَاسْ قَبِيلَةْ يَهُوذَا جَوْا لِدَاوُدْ مَسَحَوْه وَ دَرَّجَوْه مَلِكْ فَوْقهُمْ.
وَ وَكِتْ خَبَّرَوْه كَدَرْ نَاسْ حِلَّةْ يَابِيشْ فِي تُرَابْ قِلْعَادْ سَتَرَوْا جَنَازَةْ شَاوُولْ، 5خَلَاصْ دَاوُدْ رَسَّلْ لِنَاسْ يَابِيشْ قِلْعَادْ وَ قَالْ: «اللّٰهْ يِبَارِكُّو أَشَانْ إِنْتُو عِنْدُكُو أَمَانْ لِسِيدْكُو شَاوُولْ وَ سَتَرْتُوا جَنَازْتَهْ. 6وَ هَسَّعْ دَا، خَلِّي اللّٰهْ يِوَصِّفْ لَيْكُو الرَّحْمَةْ وَ الْأَمَانْ. وَ أَنَا كُلَ نِسَوِّي لَيْكُو الْخَيْر مِثِلْ إِنْتُو سَوَّيْتُوهْ. 7صَحِيحْ، كَنْ سِيدْكُو شَاوُولْ مَاتْ كُلَ، شِدُّوا حَيْلكُو وَ أَبْقَوْا رُجَالْ فَحَلِينْ. أَشَانْ نَاسْ قَبِيلَةْ يَهُوذَا مَسَحَوْنِي وَ دَرَّجَوْنِي مَلِكْ فَوْقهُمْ.»
إِشْبُوشَت بِقي ملك في إسرائيل
8وَ أَبْنِيرْ وِلَيْد نِيرْ قَايِدْ دَيْش شَاوُولْ جَابْ إِشْبُوشَتْ وِلَيْد شَاوُولْ فِي حِلَّةْ مَحَنَايِمْ. 9وَ دَرَّجَهْ مَلِكْ فِي تُرَابْ قِلْعَادْ وَ أَشُورِينْ وَ يَزْرَعِيلْ وَ أَفْرَايِمْ وَ بَنْيَامِينْ وَ فِي كُلَّ تُرَابْ بَنِي إِسْرَائِيلْ. 10وَ إِشْبُوشَتْ وِلَيْد شَاوُولْ عِنْدَهْ 40 سَنَةْ وَكِتْ بِقِي مَلِكْ فِي إِسْرَائِيلْ وَ حَكَمْ سَنْتَيْن. وَ لَاكِنْ نَاسْ قَبِيلَةْ يَهُوذَا تَابَعَوْا دَاوُدْ. 11وَ الْمَلِكْ دَاوُدْ حَكَمْ فِي حِبْرُونْ سَبْعَةْ سَنَةْ وَ سِتَّةْ شَهَرْ فَوْق نَاسْ قَبِيلَةْ يَهُوذَا.
ناس دَاوُد حاربوا بني إسرائيل
12وَ أَبْنِيرْ وِلَيْد نِيرْ وَ نَاسْ إِشْبُوشَتْ وِلَيْد شَاوُولْ مَرَقَوْا مِنْ مَحَنَايِمْ وَ مَشَوْا عَلَيْ حِلَّةْ قِبْعُونْ. 13وَ يُوَابْ وِلَيْدهَا لِصَرُويَةْ وَ نَاسْ دَاوُدْ كُلَ مَرَقَوْا. وَ الْمَجْمُوعْتَيْن دَوْل لَمَّوْا فِي رَهَدْ قِبْعُونْ. وَ دَوْل وَقَفَوْا بِهِنِي وَ دَوْل وَقَفَوْا بِهِنَاكْ لِلرَّهَدْ.
14وَ أَبْنِيرْ قَالْ لِيُوَابْ: «خَلِّي صُبْيَانَّا وَ صُبْيَانْكُو يَمُرْقُوا يِجَرُّبُوا قُدْرِتْهُمْ قِدَّامْنَا.» وَ يُوَابْ قَالْ: «سَمَحْ. خَلِّي يَمُرْقُوا.» 15وَ خَلَاصْ، حَسَبَوْا 12 رَاجِلْ مِنْ قَبِيلَةْ بَنْيَامِينْ نَاسْ إِشْبُوشَتْ وِلَيْد شَاوُولْ وَ 12 رَاجِلْ مِنْ نَاسْ دَاوُدْ. 16وَ أَيِّ وَاحِدْ قَمَّ وَ كَرَبْ قَبِيلَهْ مِنْ رَاسَهْ وَ أَطَّاعَنَوْا بِالسُّيُوفْ فِي نَوَايِطْهُمْ وَ مَاتَوْا كُلُّهُمْ فِي الْبَكَانْ دَا. وَ سَمَّوْه حِلْقَتْ هَصُورِيمْ (مَعَنَاتَهْ زَرَعْ الْحُجَارْ) وَ الْبَكَانْ دَا فِي قِبْعُونْ.
17وَ فِي الْيَوْم دَا، الْحَرِبْ بِقِي شَدِيدْ بِلْحَيْن وَ نَاسْ دَاوُدْ هَزَمَوْهُمْ لِأَبْنِيرْ وَ نَاسْ بَنِي إِسْرَائِيلْ. 18وَ أَوْلَادْهَا لِصَرُويَةْ التَّلَاتَةْ يُوَابْ وَ أَبِشَايْ وَ عَسَاحِيلْ، هُمَّنْ كُلَ حَاضْرِينْ فِي الْحَرِبْ دَا. وَ عَسَاحِيلْ هُو جَرَّايْ مِثِلْ غَزَالْ النَّقَعَةْ. 19وَ عَسَاحِيلْ جَرَى وَرَاءْ أَبْنِيرْ وَ مَا بَارَى مِنْ دَرْبَهْ وَ لَا إِسْرَةْ وَ لَا زَيْنَةْ. 20وَ أَبْنِيرْ أَنْلَفَتْ شَافَهْ وَ قَالْ: «دَا إِنْتَ، يَا عَسَاحِيلْ؟» وَ عَسَاحِيلْ قَالْ: «أَيْوَى، دَا أَنَا.» 21وَ أَبْنِيرْ قَالْ: «أَمْشِي عَلَيْ إِسْرَايْتَكْ أَوْ زَيْنَايْتَكْ وَ تَلْقَى وَاحِدْ مِنْ الصُّبْيَانْ، أَكْتُلَهْ وَ شِيلْ سِلَاحَهْ.» وَ لَاكِنْ عَسَاحِيلْ أَبَى مَا يِقَبِّلْ مِنْ وَرَاءْ أَبْنِيرْ.
22وَ أَبْنِيرْ قَالْ بَتَّانْ لِعَسَاحِيلْ: «قَبِّلْ مِنْ دَرْبِي وَلَّا تِدَوْر نَكْتُلَكْ؟ وَ كَنْ كَتَلْتَكْ، نُقُولْ شُنُو لِأَخُوكْ يُوَابْ؟» 23وَ لَاكِنْ عَسَاحِيلْ أَبَى مَا يِقَبِّلْ مِنْ وَرَاءْ أَبْنِيرْ. وَ خَلَاصْ، أَبْنِيرْ طَعَنَهْ فِي بَطْنَهْ بِقَعَرْ حَرِبْتَهْ لَحَدِّي مَرَقَتْ لَيَّهْ مِنْ وَرَاءْ. وَ هُو وَقَعْ وَ مَاتْ فِي الْبَكَانْ دَا. وَ كُلَّ النَّاسْ يَقِيفُوا وَكِتْ وَصَّلَوْا فِي الْبَكَانْ الْمَاتْ فَوْقَهْ عَسَاحِيلْ.
24وَ لَاكِنْ يُوَابْ وَ أَبِشَايْ شَالَوْا دَرِبْ أَبْنِيرْ. وَ وَكِتْ وَصَّلَوْا جَبَلْ أَمَّةْ، الْحَرَّايْ وَقَعَتْ خَلَاصْ. وَ الْجَبَلْ دَا قَاعِدْ صَبَاحْ لِحِلَّةْ قِيَّحْ فِي الدَّرِبْ الْمَاشِي عَلَيْ صَحَرَاء قِبْعُونْ. 25وَ قَبِيلَةْ بَنْيَامِينْ لَمَّوْا كُلُّهُمْ وَرَاءْ أَبْنِيرْ مِثِلْ رَاجِلْ وَاحِدْ فِي رَاسْ جَبَلْ وَاحِدْ. 26وَ أَبْنِيرْ نَادَاهْ لِيُوَابْ بِحِسّ عَالِي وَ قَالْ: «لِمَتَى نِخَلُّوا مِنِّنَا الدُّوَاسْ؟ إِنْتَ مَا تَعَرْفَهْ كَدَرْ الشَّيّءْ دَا يِكَمِّلْ بِحِزِنْ؟ وَ لِمَتَى تُقُولْ لِنَاسَكْ يِخَلُّوا مِنْهُمْ مُطَارَدَةْ أَخْوَانْهُمْ؟» 27وَ يُوَابْ قَالْ لِأَبْنِيرْ: «نَحْلِفْ لَيْك بِاللّٰهْ الْحَيّ، أَوَّلْ كَنْ إِنْتَ مَا حَجَّيْت دَا، نَاسِي يِطَارُدُوكُو لَحَدِّي أَمْبَاكِرْ فَجُرْ.» 28وَ خَلَاصْ، يُوَابْ ضَرَبْ الْبُوقْ وَ كُلَّ نَاسَهْ وَقَفَوْا مِنْ مُطَارَدَةْ أَخْوَانْهُمْ بَنِي إِسْرَائِيلْ وَ بَتَّانْ مَا أَلْحَارَبَوْا.
29وَ أَبْنِيرْ وَ نَاسَهْ رَاغَوْا طُولْ اللَّيْل فِي وَادِي الْأُرْدُنْ وَ شَقَّوْا الْبَحَرْ وَ رَاغَوْا لَحَدِّي حِلَّةْ بِتْرُونْ وَ وَصَّلَوْا مَحَنَايِمْ. 30وَ بَعَدْ يُوَابْ خَلَّى مُطَارَدَةْ أَبْنِيرْ، لَمَّ كُلَّ نَاسَهْ. وَ فَقَدْ عَسَاحِيلْ وَ 19 نَاسْ مِنْ نَاسْ دَاوُدْ. 31وَ لَاكِنْ نَاسْ دَاوُدْ كَتَلَوْا 360 نَاسْ مِنْ رُجَالْ هَنَا بَنْيَامِينْ وَ أَبْنِيرْ. 32وَ شَالَوْا جَنَازَةْ عَسَاحِيلْ وَ دَفَنَوْهَا فِي قَبُرْ أَبُوهْ الْفِي بَيْت لَحَمْ. وَ بَعَدْ دَا، يُوَابْ وَ نَاسَهْ رَاغَوْا طُولْ اللَّيْل وَ وَصَّلَوْا فِي حِبْرُونْ بِفَجُرْ بَدْرِي.
Currently Selected:
2 صَمُوِيل 2: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
