2 صَمُوِيل 17
17
حُوشَاي بطّل وصايا أَخِتُوفَل
1وَ بَعَدْ دَا، أَخِتُوفَلْ قَالْ لِأَبْشَلُومْ: «مِنْ فَضْلَكْ، خَلِّينِي نَعَزِلْ 12 000 رَاجِلْ وَ نَمْشِي وَرَاءْ دَاوُدْ فِي اللَّيْلَةْ دِي بَسْ. 2أَنَا نِغَفِّلَهْ وَكِتْ هُو عَيَّانْ وَ مَا عِنْدَهْ قُدْرَةْ. وَ أَنَا نِبَرْجِلَهْ وَ كُلَّ الشَّعَبْ الْمَعَايَهْ يِعَرُّدُوا. وَ خَلَاصْ، أَنَا نَكْتُلَهْ هُو وِحَيْدَهْ. 3وَ بِمِثِلْ دَا، نِلِمّ كُلَّ شَعَبَهْ لَيْك مِثِلْ أَوَّلْ الشَّعَبْ لَمَّوْا وَرَاءْ النَّادُمْ الْإِنْتَ قَاعِدْ تِفَتِّشَهْ. وَ بَيْدَا، كُلَّ الشَّعَبْ يُكُونُوا فِي السَّلَامَةْ.» 4وَ أَبْشَلُومْ وَ كُلَّ شُيُوخْ بَنِي إِسْرَائِيلْ مُوَافْقِينْ فِي الْكَلَامْ دَا.
5وَ أَبْشَلُومْ قَالْ: «نَادُوهْ لِحُوشَايْ الْمِنْ حِلَّةْ أَرْكِي أَشَانْ هُو كُلَ يَنْطِينَا فِكْرَهْ.» 6وَ حُوشَايْ جَاءْ لِأَبْشَلُومْ. وَ أَبْشَلُومْ حَجَّى لَيَّهْ بِالْكَلَامْ الْأَخِتُوفَلْ قَالَهْ لَيَّهْ. وَ سَأَلَهْ وَ قَالْ: «هَلْ نِطَبُّقُوا كَلَامَهْ وَلَّا؟ كَنْ لَا كَمَانْ، أَنْطِينَا فِكْرَكْ.»
7وَ حُوشَايْ قَالْ لِأَبْشَلُومْ: «فِي الْمَرَّةْ دِي، وَصِيَّةْ أَخِتُوفَلْ مَا عَدِيلَةْ.» 8وَ حُوشَايْ قَالْ بَتَّانْ: «إِنْتَ تَعَرِفْ أَبُوكْ وَ رُجَالَهْ، هُمَّنْ فُرَّاسْ وَ خَطِيرِينْ مِثِلْ مَرْة الدُّودْ الْوَدَّرَتْ عِيَالْهَا فِي الْخَلَاءْ. وَ أَبُوكْ رَاجِلْ مُحَارِبْ، مَا يُنُومْ مَعَ الشَّعَبْ. 9وَ أَكِيدْ، هَسَّعْ هُو قَاعِدْ مُلَّبِّدْ فِي كَرْكُورْ أَوْ بَكَانْ آخَرْ. وَ كَنْ الْحَرِبْ بَدَا وَ كَتَلَوْا مِنِّنَا، نَاسْ آخَرِينْ يَسْمَعَوْه وَ يُقُولُوا: ‹النَّاسْ الْقَاعِدِينْ مَعَ أَبْشَلُومْ أَنْهَزَمَوْا.› 10وَ بَيْدَا، نَادُمْ فَحَلْ الْقَلْبَهْ مِثِلْ قَلِبْ الدُّودْ كُلَ يَبْقَى كَسْلَانْ. أَشَانْ كُلَّ بَنِي إِسْرَائِيلْ يَعَرْفُوا كَدَرْ أَبُوكْ فَارِسْ وَ عِنْدَهْ مَعَايَهْ رُجَالْ فَحَلِينْ. 11وَ دِي هِي وَصِيّتِي أَنَا. لِمّ كُلَّ بَنِي إِسْرَائِيلْ مَعَاكْ مِنْ دَانْ فِي الْمُنْشَاقْ لَحَدِّي بِيرْ سَبْعَةْ فِي الْوَطِي. وَ هُمَّنْ يِلِمُّوا كَتِيرِينْ مِثِلْ رَمْلَةْ هَنَا خَشُمْ الْبَحَرْ. وَ بَيْدَا، إِنْتَ ذَاتَكْ تَمْشِي مَعَاهُمْ فِي الْحَرِبْ. 12وَ أَنِحْنَ نَلْحَقَوْه لِدَاوُدْ فِي أَيِّ بَكَانْ الْهُو مُلَّبِّدْ فَوْقَهْ. وَ نَنْزُلُوا فَوْقَهْ مِثِلْ الْمَطَرْ الْيَنْزِلْ فِي الْأَرْض. وَ بَيْدَا، نَادُمْ وَاحِدْ كُلَ مِنْهُمْ مَا يِفَضِّلْ وَ لَا هُو وَ لَا رُجَالَهْ الْمَعَايَهْ. 13وَ كَنْ هُو عَرَّدْ وَ دَخَلْ فِي حِلَّةْ وَاحِدَةْ، كُلَّ بَنِي إِسْرَائِيلْ يِشِيلُوا حُبَالْ يَرْبُطُوا دَرَادِرْهَا وَ يُكُرُّوهَا وَ يَرْمُوهَا فِي الْوَادِي لَحَدِّي مَا يِفَضِّلْ مِنْهَا شَيّءْ.»
14وَ خَلَاصْ، أَبْشَلُومْ وَ كُلَّ بَنِي إِسْرَائِيلْ قَالَوْا: «وَصِيَّةْ حُوشَايْ الْمِنْ حِلَّةْ أَرْكِي أَخَيْر مِنْ وَصِيَّةْ أَخِتُوفَلْ.» وَ بَيْدَا، اللّٰهْ فَشَّلْ الْوَصِيَّةْ الْعَدِيلَةْ هِنْت أَخِتُوفَلْ أَشَانْ اللّٰهْ يِدَوْر يِنَزِّلْ مَصِيبَةْ فِي رَاسْ أَبْشَلُومْ.
دَاوُد قطع بحر الأُرْدُن
15وَ خَلَاصْ، حُوشَايْ مَشَى لِصَدُوقْ وَ أَبِيَاتَرْ رُجَالْ الدِّينْ وَ قَالْ لَيْهُمْ: «أَخِتُوفَلْ أَنْطَى وَصِيَّةْ لِأَبْشَلُومْ وَ لِشُيُوخْ بَنِي إِسْرَائِيلْ. وَ أَنَا كُلَ أَنْطَيْت وَصِيّتِي مِثِلْ دِي مِثِلْ دِي. 16وَ هَسَّعْ دَا، رَسُّلُوا عَجَلَةْ لِدَاوُدْ خَبُّرُوهْ وَ قُولُوا لَيَّهْ خَلِّي مَا يَرْقُدْ فِي وَادِي الْأُرْدُنْ. وَاجِبْ يَقْطَعْ الْبَحَرْ أَشَانْ مَا يَكْتُلُوهْ، هُو وَ كُلَّ نَاسَهْ الْمَعَايَهْ.»
17وَ فِي الْوَكِتْ دَا، أَخِمَاعَصْ وَ يُونَتَانْ قَعَدَوْا فِي حِلَّةْ عَيْن رُوقِلْ. وَ وَاجِبْ خَدَّامَةْ وَاحِدَةْ تَمْشِي تِخَبِّرْهُمْ وَ هُمَّنْ كَمَانْ يَمْشُوا يِكَلُّمُوهْ لِدَاوُدْ أَشَانْ هُمَّنْ مَا يَقْدَرَوْا يَدْخُلُوا فِي أُورُشَلِيمْ لِيِشِيفُوهُمْ. 18وَ لَاكِنْ صَبِي وَاحِدْ شَافَاهُمْ وَ مَشَى خَبَّرْ أَبْشَلُومْ. وَ أَخِمَاعَصْ وَ يُونَتَانْ مَشَوْا عَجَلَةْ عَجَلَةْ وَ وَصَّلَوْا بَكَانْ رَاجِلْ وَاحِدْ فِي حِلَّةْ بَحُرِيمْ. وَ فِي الْحَوْش دَا، فِيَّهْ بِيرْ وَ هُمَّنْ دَخَلَوْا أَلَّبَّدَوْا فَوْقهَا. 19وَ سِتّ الْبَيْت شَالَتْ بِرِشْ وَ سَدَّتْ خَشُمْ الْبِيرْ وَ صَبَّتْ فَوْق الْبِرِشْ دَا غَلَّةْ أَشَانْ مَا يِشِيفُوا شَيّءْ.
20وَ خَدَّامِينْ أَبْشَلُومْ مَشَوْا بَكَانْ الْمَرَةْ دِي وَ سَأَلَوْهَا وَ قَالَوْا: «وَيْن أَخِمَاعَصْ وَ يُونَتَانْ؟» وَ الْمَرَةْ قَالَتْ لَيْهُمْ: «هُمَّنْ قَطَعَوْا الرِّجِلْ.» وَ خَلَاصْ، خَدَّامِينْ أَبْشَلُومْ فَتَّشَوْهُمْ كَيْ وَ مَا لِقَوْهُمْ. وَ بَعَدْ دَا، قَبَّلَوْا فِي أُورُشَلِيمْ.
21وَ بَعَدْ هُمَّنْ فَاتَوْا، أَخِمَاعَصْ وَ يُونَتَانْ مَرَقَوْا مِنْ الْبِيرْ وَ مَشَوْا خَبَّرَوْه لِدَاوُدْ بِوَصِيَّةْ أَخِتُوفَلْ. وَ هُمَّنْ قَالَوْا لَيَّهْ: «عَجَلَةْ أَقْطَعَوْا الْبَحَرْ.» 22وَ طَوَّالِي، دَاوُدْ وَ كُلَّ النَّاسْ الْمَعَايَهْ قَمَّوْا وَ قَطَعَوْا بَحَرْ الْأُرْدُنْ. وَ بِفَجُرْ بَدْرِي، كُلُّهُمْ قَطَعَوْا الْبَحَرْ وَ نَادُمْ وَاحِدْ كُلَ مِنْهُمْ مَا فَضَّلْ.
23وَ وَكِتْ أَخِتُوفَلْ عِرِفْ كَدَرْ أَبْشَلُومْ مَا طَبَّقْ وَصِيّتَهْ، قَمَّ شَدَّ حُمَارَهْ وَ قَبَّلْ حِلِّتَهْ وَ مَشَى بَيْتَهْ. وَ وَصَّى عَايِلْتَهْ وَ شَنَقْ نَفْسَهْ وَ مَاتْ. وَ دَفَنَوْه فِي قَبُرْ أَبُوهْ.
دَاوُد وصّل حِلّة مَحَنَايِم
24وَ دَاوُدْ وَصَّلْ حِلَّةْ مَحَنَايِمْ وَكِتْ أَبْشَلُومْ قَاعِدْ يَقْطَعْ بَحَرْ الْأُرْدُنْ مَعَ كُلَّ عَسْكَرْ بَنِي إِسْرَائِيلْ. 25وَ أَبْشَلُومْ خَطَّ عَمَاسَا قَايِدْ الدَّيْش فِي بَدَلْ يُوَابْ. وَ عَمَاسَا دَا، أَبُوهْ يَتَرْ الْمِنْ بَنِي إِسْرَائِيلْ وَ أَمَّهْ أَبِقَايِلْ بِنَيَّةْ نَحَاشْ أَخُتْهَا لِصَرُويَةْ أَمّ يُوَابْ. 26وَ أَبْشَلُومْ وَ عَسْكَرْ بَنِي إِسْرَائِيلْ خَطَّوْا مُعَسْكَرْهُمْ فِي بَلَدْ قِلْعَادْ.
27وَ وَكِتْ دَاوُدْ وَصَّلْ مَحَنَايِمْ، لَاقَوْه شُوبِي وِلَيْد نَحَاشْ الْمِنْ مَدِينَةْ رَبَّةْ عَاصِمَةْ بَلَدْ بَنِي عَمُّونْ وَ مَكِيرْ وِلَيْد عَمِيِيلْ الْمِنْ حِلَّةْ لُودَبَارْ وَ بَرْزِلَّايْ الْمِنْ حِلَّةْ رُقْلِيمْ فِي تُرَابْ قِلْعَادْ. 28وَ النَّاسْ دَوْل جَابَوْا لِدَاوُدْ وَ نَاسَهْ فُرَاشْ وَ مَوَاعِينْ وَ بُرَامْ هَنَا طِينَةْ وَ أَكِلْ مِثِلْ قَمَحْ أَحْمَرْ وَ قَمَحْ أَبْيَضْ وَ دَقِيقْ وَ فَرِيكِي وَ لُبْيَى وَ عَدَسْ 29وَ عَسَلْ وَ زِبْدَةْ هَنَا غَنَمْ وَ جِبْنَةْ مِنْ لَبَنْ الْبَقَرْ. وَ هُمَّنْ جَابَوْا كُلَّ الْأَشْيَاءْ دَوْل لِدَاوُدْ أَشَانْ النَّاسْ الْمَعَايَهْ يَاكُلُوا. وَ قَالَوْا: «النَّاسْ دَوْل يُكُونُوا مَيْتِينْ مِنْ الْعَيَا وَ الْجُوعْ وَ الْعَطَشْ هَنَا الصَّحَرَاء.»
Currently Selected:
2 صَمُوِيل 17: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
