2 مُلوك 16
16
أَحَاز بِقي ملك في يَهُوذَا
1وَ فِي سَنِةْ 17 هَنَا حُكُمْ فَقَحْ وِلَيْد رَمَلْيَا، أَحَازْ وِلَيْد يُوتَامْ بِقِي مَلِكْ فِي مَمْلَكَةْ يَهُوذَا. 2وَ أَحَازْ عِنْدَهْ 20 سَنَةْ وَكِتْ بِقِي مَلِكْ وَ حَكَمْ 16 سَنَةْ فِي مَدِينَةْ الْقُدُسْ. وَ هُو مَا سَوَّى الْعَدِيلْ قِدَّامْ اللّٰهْ إِلٰـهَهْ مِثِلْ جِدَّهْ دَاوُدْ. 3وَ لَاكِنْ هُو تَابَعْ دَرِبْ مُلُوكْ مَمْلَكَةْ إِسْرَائِيلْ لَحَدِّي قَدَّمْ وِلَيْدَهْ وَ حَرَّقَهْ فِي النَّارْ. وَ دَا نَفْس الْمُحَرَّمَاتْ السَّوَّوْهُمْ الْأُمَمْ الْاللّٰهْ قَلَعْ مِنْهُمْ أَرْضُهُمْ وَ أَنْطَاهَا لِبَنِي إِسْرَائِيلْ. 4وَ أَحَازْ قَدَّمْ ضَحَايَا وَ حَرَّقْ بَخُورْ فِي الْبَكَانَاتْ الْعَالِيِينْ هَنَا عِبَادَةْ الْأَصْنَامْ وَ فِي رُوسَيْ الْجِبَالْ وَ تِحِتْ أَيِّ شَدَرَةْ خَضْرَةْ.
أَرَام و إسرائيل هجموا يَهُوذَا
5وَ يَوْم وَاحِدْ، رَصِينْ مَلِكْ بَلَدْ أَرَامْ وَ فَقَحْ وِلَيْد رَمَلْيَا مَلِكْ مَمْلَكَةْ إِسْرَائِيلْ جَوْا لِيِحَارُبُوا أَحَازْ مَلِكْ مَمْلَكَةْ يَهُوذَا. وَ حَاصَرَوْا مَدِينَةْ الْقُدُسْ وَ لَاكِنْ مَا أَنَّصَرَوْا فَوْقَهْ.
6وَ فِي نَفْس الْوَكِتْ دَا، رَصِينْ مَلِكْ أَرَامْ شَالْ بَتَّانْ حِلَّةْ إِيلَاتْ وَ قَبَّلْهَا لِلْأَرَامِيَّيْن. وَ طَرَدْ بَنِي يَهُوذَا الْقَاعِدِينْ فِي لُبَّهَا وَ الْأَدَوْمِيِّينْ جَوْا وَ سَكَنَوْا فَوْقهَا لَحَدِّي الْيَوْم.
7وَ أَحَازْ رَسَّلْ نَاسْ لِتَغْلَتْ فَلَاسَرْ مَلِكْ بَلَدْ أَشُورْ لِيُقُولُوا لَيَّهْ الْكَلَامْ دَا: «أَنَا عَبْدَكْ وَ وِلَيْدَكْ. تَعَالْ نَجِّينِي مِنْ إِيدْ مَلِكْ أَرَامْ وَ مِنْ إِيدْ مَلِكْ إِسْرَائِيلْ هُمَّنْ الْقَمَّوْا ضِدِّي.» 8وَ أَحَازْ شَالْ الْفُضَّةْ وَ الدَّهَبْ مِنْ بَيْت اللّٰهْ وَ مَخَازِنْ هَنَا قَصِرْ الْمَلِكْ وَ رَسَّلَاهُمْ لِمَلِكْ أَشُورْ مِثِلْ هَدِيَّةْ. 9وَ مَلِكْ أَشُورْ رَدَّ فِي طَلَبْ أَحَازْ. هُو قَمَّ وَ مَشَى هَجَمْ مَدِينَةْ دِمَشْق#16:9 دِمَشْق: في الوكت داك، دِمَشْق هي عاصِمة بلد أَرَام. وَ شَالْهَا وَ وَدَّى سُكَّانْهَا فِي الْغُرْبَةْ فِي حِلَّةْ قِيرْ. وَ كَتَلْ رَصِينْ مَلِكْ أَرَامْ.
الملك أَحَاز غيّر المدْبح
10وَ الْمَلِكْ أَحَازْ هَنَا مَمْلَكَةْ يَهُوذَا مَشَى دِمَشْق لِيِلِمّ مَعَ تَغْلَتْ فَلَاسَرْ مَلِكْ أَشُورْ. وَ وَكِتْ الْمَلِكْ أَحَازْ شَافْ مَدْبَحْ هَنَا مَدِينَةْ دِمَشْق، رَسَّلْ لِأُرِيَّا رَاجِلْ الدِّينْ الصُّورَةْ وَ الرَّسِمْ هَنَا الْمَدْبَحْ هَنَا دِمَشْق أَشَانْ يَبْنُوا مَدْبَحْ سَوَا سَوَا مِثْلَهْ.
11وَ أُرِيَّا رَاجِلْ الدِّينْ بَنَى الْمَدْبَحْ حَسَبْ الصُّورَةْ وَ الرَّسِمْ الرَّسَّلَهْ لَيَّهْ الْمَلِكْ أَحَازْ مِنْ دِمَشْق. وَ أُرِيَّا رَاجِلْ الدِّينْ بَنَى الْمَدْبَحْ دَا قُبَّالْ الْمَلِكْ أَحَازْ مَا يِقَبِّلْ مِنْ دِمَشْق. 12وَ وَكِتْ الْمَلِكْ قَبَّلْ مِنْ دِمَشْق، شَافْ الْمَدْبَحْ وَ قَرَّبْ لَيَّهْ 13وَ قَدَّمْ ضَحَايَا مُحَرَّقِينْ وَ هَدَايَا هَنَا دَقِيقْ وَ هَدَايَا شَرَابْ وَ رَشَّ الْمَدْبَحْ بِدَمّ ضَحَايَا السَّلَامَةْ. 14وَ كَنْ لِلْمَدْبَحْ هَنَا النَّحَاسْ الْقَاعِدْ قِدَّامْ بَيْت اللّٰهْ، هُو حَوَّلَهْ مِنْ بَكَانَهْ الْبَيْن الْمَدْبَحْ الْجَدِيدْ وَ بَيْت اللّٰهْ. وَ هُو خَطَّاهْ بِالنُّصّ الْمُنْشَاقِي هَنَا الْمَدْبَحْ الْجَدِيدْ.
15وَ بَعَدْ دَا، الْمَلِكْ أَحَازْ أَمَرْ أُرِيَّا رَاجِلْ الدِّينْ وَ قَالْ لَيَّهْ: «مِنْ الْيَوْم دَا، أَسْتَعْمَلْ الْمَدْبَحْ الْكَبِيرْ. وَ فِي الْمَدْبَحْ الْكَبِيرْ دَا بَسْ، تِقَدِّمْ الضَّحَايَا الْمُحَرَّقِينْ هَنَا الْفَجُرْ وَ هَدَايَا الدَّقِيقْ هَنَا الْعَشِيَّةْ. وَ تِقَدِّمْ كُلَ الضَّحَايَا الْمُحَرَّقِينْ وَ هَدَايَا الدَّقِيقْ هَنَا الْمَلِكْ وَ الضَّحَايَا الْمُحَرَّقِينْ هَنَا كُلَّ شَعَبْ مَعَ هَدَايَاهُمْ هَنَا الدَّقِيقْ وَ هَنَا الشَّرَابْ. وَ بَعَدْ دَا، تُرُشّ الْمَدْبَحْ بِدَمّ هَنَا الْبَهَايِمْ الْقَدَّمْتُوهُمْ ضَحَايَا. وَ كَنْ لِلْمَدْبَحْ هَنَا النَّحَاسْ كَمَانْ، أَنَا بَسْ نِسْتَعْمَلَهْ.»
16وَ أُرِيَّا رَاجِلْ الدِّينْ سَوَّى كُلَّ شَيّءْ الْأَمَرَهْ بَيَّهْ الْمَلِكْ أَحَازْ. 17وَ الْمَلِكْ أَحَازْ مَرَقْ الصَّفَايِحْ مِنْ الْحِيطَانْ الْمُتَحَرِّكِينْ وَ مَرَقْ الْحِيطَانْ هَنَا نَحَاسْ الْفَوْقَهْ. وَ مَرَقْ الْحَوْط الْكَبِيرْ الْمُدَوَّرْ الْقَاعِدْ فِي التِّيرَانْ هَنَا نَحَاسْ وَ خَطَّاهْ فِي رَاسْ حَجَرْ الْقَاعِدْ فِي التُّرَابْ. 18وَ أَشَانْ يِدَوْر يِرَضِّي مَلِكْ بَلَدْ أَشُورْ، هُو غَيَّرْ بَابْ السَّبْت الْبَنَوْه دَاخَلْ فِي بَيْت اللّٰهْ وَ الْبَابْ الْبَرَّانِي هَنَا مَدَخَلْ الْمَلِكْ.
19وَ الْبَاقِي مِنْ عَمَلْ أَحَازْ وَ كُلَّ شَيّءْ السَّوَّاهْ مَكْتُوبِينْ فِي كِتَابْ تَارِيخْ مُلُوكْ بَنِي يَهُوذَا. 20وَ أَحَازْ مَاتْ وَ لِحِقْ أَبَّهَاتَهْ وَ دَفَنَوْه فِي قَبُرْ جُدُودَهْ فِي مَدِينَةْ دَاوُدْ. وَ وِلَيْدَهْ حِزْقِيَّا حَكَمْ فِي بَدَلَهْ.
Currently Selected:
2 مُلوك 16: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
