2 مُلوك 15
15
عُزِّيَّا بِقي ملك في يَهُوذَا
1وَ فِي سَنِةْ 27 هَنَا حُكُمْ يَرُبَعَامْ مَلِكْ مَمْلَكَةْ إِسْرَائِيلْ، عُزِّيَّا وِلَيْد أَمَصْيَا بِقِي مَلِكْ فِي مَمْلَكَةْ يَهُوذَا. 2وَ عُزِّيَّا عِنْدَهْ 16 سَنَةْ وَكِتْ بِقِي مَلِكْ وَ حَكَمْ 52 سَنَةْ فِي مَدِينَةْ الْقُدُسْ. وَ أَمَّهْ أُسُمْهَا يَكُلْيَا وَ هِي مِنْ مَدِينَةْ الْقُدُسْ. 3وَ عُزِّيَّا سَوَّى الْعَدِيلْ قِدَّامْ اللّٰهْ مِثِلْ أَبُوهْ أَمَصْيَا سَوَّاهْ. 4وَ لَاكِنْ بَيْدَا كُلَ، الْبَكَانَاتْ الْعَالِيِينْ هَنَا عِبَادَةْ الْأَصْنَامْ قَاعِدِينْ وَ فَوْقهُمْ، الشَّعَبْ يِقَدُّمُوا ضَحَايَا وَ يِحَرُّقُوا بَخُورْ. 5وَ اللّٰهْ نَزَّلْ مَرَضْ الْجِدَامْ فِي الْمَلِكْ وَ هُو قَعَدْ مُجَدِّمْ لَحَدِّي مَوْتَهْ. وَ هُو سَكَنْ فِي بَيْت وِحَيْدَهْ طَرَفْ. وَ يُوتَامْ وِلَيْد الْمَلِكْ بِقِي مَسْؤُولْ فِي الْقَصِرْ وَ حَكَمْ فِي شَعَبْ الْبَلَدْ.
6وَ الْبَاقِي مِنْ عَمَلْ عُزِّيَّا وَ كُلَّ شَيّءْ السَّوَّاهْ مَكْتُوبِينْ فِي كِتَابْ تَارِيخْ مُلُوكْ بَنِي يَهُوذَا. 7وَ عُزِّيَّا مَاتْ وَ لِحِقْ أَبَّهَاتَهْ وَ دَفَنَوْه فِي قَبُرْ جُدُودَهْ فِي مَدِينَةْ دَاوُدْ. وَ وِلَيْدَهْ يُوتَامْ حَكَمْ فِي بَدَلَهْ.
زَكَرِيَّا بِقي ملك في إسرائيل
8وَ فِي سَنِةْ 38 هَنَا حُكُمْ عُزِّيَّا مَلِكْ مَمْلَكَةْ يَهُوذَا، زَكَرِيَّا وِلَيْد يَرُبَعَامْ بِقِي مَلِكْ فِي مَمْلَكَةْ إِسْرَائِيلْ فِي مَدِينَةْ السَّامِرَةْ. وَ هُو حَكَمْ سِتَّةْ شَهَرْ. 9وَ هُو سَوَّى الْفَسَالَةْ قِدَّامْ اللّٰهْ مِثِلْ الذَّنِبْ الْجُدُودَهْ سَوَّوْه. وَ هُو مَا خَلَّى مِنَّهْ الذُّنُوبْ السَّوَّاهُمْ يَرُبَعَامْ وِلَيْد نَبَاتْ اللَّزَّ نَاسْ مَمْلَكَةْ إِسْرَائِيلْ فِي الذُّنُوبْ. 10وَ شَلُّومْ وِلَيْد يَابِيشْ أَتْمَرَّدْ ضِدّ الْمَلِكْ وَ قَمَّ ضَرَبَهْ وَ كَتَلَهْ قِدَّامْ الشَّعَبْ وَ حَكَمْ فِي بَدَلَهْ.
11وَ الْبَاقِي مِنْ عَمَلْ زَكَرِيَّا مَكْتُوبْ فِي كِتَابْ تَارِيخْ مُلُوكْ بَنِي إِسْرَائِيلْ. 12وَ حُكُمْ زَكَرِيَّا بِقِي حَسَبْ كَلَامْ اللّٰهْ لِيَاهُو. وَ هُو قَالْ: «عِيَالَكْ يَحْكُمُوا فِي مَمْلَكَةْ إِسْرَائِيلْ لَحَدِّي الذُّرِّيَّةْ الرَّابْعَةْ.» وَ بِقِي مِثِلْ هُو قَالَهْ.
شَلُّوم بِقي ملك في إسرائيل
13فِي سَنِةْ 39 هَنَا حُكُمْ عُزِّيَّا مَلِكْ مَمْلَكَةْ يَهُوذَا، شَلُّومْ وِلَيْد يَابِيشْ بِقِي مَلِكْ فِي مَمْلَكَةْ إِسْرَائِيلْ. وَ هُو حَكَمْ شَهَرْ وَاحِدْ فِي مَدِينَةْ السَّامِرَةْ. 14وَ مَنَحِيمْ وِلَيْد قَاضِي قَمَّ مِنْ حِلَّةْ تِرْصَةْ وَ مَشَى السَّامِرَةْ وَ ضَرَبَهْ لِشَلُّومْ وِلَيْد يَابِيشْ وَ كَتَلَهْ هِنَاكْ. وَ هُو حَكَمْ فِي بَدَلَهْ.
15وَ الْبَاقِي مِنْ عَمَلْ شَلُّومْ وَ مُؤآمَرَتَهْ السَّوَّاهَا مَكْتُوبِينْ فِي كِتَابْ تَارِيخْ مُلُوكْ بَنِي إِسْرَائِيلْ.
16وَ فِي الْوَكِتْ دَا، مَنَحِيمْ هَجَمْ حِلَّةْ تِفْسَحْ وَ كُلَّ مَنَاطِقْهَا وَ كَتَلْ كُلَّ السُّكَّانْ لَحَدِّي تِرْصَةْ أَشَانْ هُمَّنْ أَبَوْا مَا يَفْتَحَوْا لَيَّهْ بَابْ الْمَدِينَةْ. وَ هُو شَقَّ بُطُونْ الْعَوِينْ الْغَلْبَانَاتْ.
مَنَحِيم بِقي ملك في إسرائيل
17وَ فِي سَنِةْ 39 هَنَا حُكُمْ عُزِّيَّا مَلِكْ مَمْلَكَةْ يَهُوذَا، مَنَحِيمْ وِلَيْد قَاضِي بِقِي مَلِكْ فِي مَمْلَكَةْ إِسْرَائِيلْ. وَ هُو حَكَمْ 10 سَنَةْ فِي مَدِينَةْ السَّامِرَةْ. 18وَ هُو سَوَّى الْفَسَالَةْ قِدَّامْ اللّٰهْ. وَ فِي مُدَّةْ كُلَّ حَيَاتَهْ، هُو مَا خَلَّى مِنَّهْ الذُّنُوبْ السَّوَّاهُمْ يَرُبَعَامْ وِلَيْد نَبَاتْ اللَّزَّ نَاسْ مَمْلَكَةْ إِسْرَائِيلْ فِي الذُّنُوبْ.
19وَ تَغْلَتْ فَلَاسَرْ#15:19 تَغْلَتْ فَلَاسَرْ: هو نفْس الملك الأُسْمه فول. مَلِكْ بَلَدْ أَشُورْ دَخَلْ بِقُوءْ فِي بَلَدْ إِسْرَائِيلْ. وَ مَنَحِيمْ أَنْطَاهْ لِتَغْلَتْ فَلَاسَرْ زِيَادَةْ مِنْ 30 000 كِيلَوْ هَنَا فُضَّةْ أَشَانْ يِسَاعِدَهْ لِيِثَبِّتْ مُلْكَهْ. 20وَ لِيَلْقَى الْفُضَّةْ دِي، مَنَحِيمْ طَلَبْ مِنْ الْغَنِيِّينْ هَنَا مَمْلَكَةْ إِسْرَائِيلْ يِكَفُّوا الْمِيرِي، أَيِّ وَاحِدْ يِكَفِّي 50 حَجَرْ فُضَّةْ. وَ هُو أَنْطَاهْ لِمَلِكْ أَشُورْ وَ بَعَدْ دَا، الْمَلِكْ قَمَّ وَ قَبَّلْ مَا قَعَدْ فِي بَلَدْ إِسْرَائِيلْ.
21وَ الْبَاقِي مِنْ عَمَلْ مَنَحِيمْ وَ كُلَّ شَيّءْ السَّوَّاهْ مَكْتُوبِينْ فِي كِتَابْ تَارِيخْ مُلُوكْ بَنِي إِسْرَائِيلْ. 22وَ مَنَحِيمْ مَاتْ وَ لِحِقْ أَبَّهَاتَهْ. وَ وِلَيْدَهْ فَقَحْيَا حَكَمْ فِي بَدَلَهْ.
فَقَحْيَا بِقي ملك في إسرائيل
23وَ فِي سَنِةْ 50 هَنَا حُكُمْ عُزِّيَّا مَلِكْ مَمْلَكَةْ يَهُوذَا، فَقَحْيَا وِلَيْد مَنَحِيمْ بِقِي مَلِكْ فِي مَمْلَكَةْ إِسْرَائِيلْ فِي مَدِينَةْ السَّامِرَةْ. وَ هُو حَكَمْ سَنْتَيْن. 24وَ هُو سَوَّى الْفَسَالَةْ قِدَّامْ اللّٰهْ. هُو مَا خَلَّى مِنَّهْ الذُّنُوبْ السَّوَّاهُمْ يَرُبَعَامْ وِلَيْد نَبَاتْ اللَّزَّ نَاسْ مَمْلَكَةْ إِسْرَائِيلْ فِي الذُّنُوبْ.
25وَ وَاحِدْ قَايِدْ دَيْشَهْ لِفَقَحْيَا الْأُسْمَهْ فَقَحْ وِلَيْد رَمَلْيَا أَتْمَرَّدْ ضِدّ الْمَلِكْ وَ كَتَلَهْ هُو وَ أَرْقُوبْ وَ أَرْيِ فِي لُبّ الْقَصِرْ فِي السَّامِرَةْ. وَ سَاعَدَوْه 50 نَاسْ مِنْ قِلْعَادْ. وَ بَعَدْ كَتَلْ الْمَلِكْ، فَقَحْ حَكَمْ فِي بَدَلَهْ. 26وَ الْبَاقِي مِنْ عَمَلْ فَقَحْيَا وَ كُلَّ شَيّءْ السَّوَّاهْ مَكْتُوبِينْ فِي كِتَابْ تَارِيخْ مُلُوكْ بَنِي إِسْرَائِيلْ.
فَقَح بِقي ملك في إسرائيل
27وَ فِي سَنِةْ 52 هَنَا حُكُمْ عُزِّيَّا مَلِكْ مَمْلَكَةْ يَهُوذَا، فَقَحْ وِلَيْد رَمَلْيَا بِقِي مَلِكْ فِي مَمْلَكَةْ إِسْرَائِيلْ فِي مَدِينَةْ السَّامِرَةْ. وَ هُو حَكَمْ 20 سَنَةْ. 28وَ هُو سَوَّى الْفَسَالَةْ قِدَّامْ اللّٰهْ. هُو مَا خَلَّى مِنَّهْ الذُّنُوبْ السَّوَّاهُمْ يَرُبَعَامْ وِلَيْد نَبَاتْ اللَّزَّ نَاسْ مَمْلَكَةْ إِسْرَائِيلْ فِي الذُّنُوبْ. 29وَ وَكِتْ الْفَقَحْ قَاعِدْ يَمْلُكْ فِي مَمْلَكَةْ إِسْرَائِيلْ، تَغْلَتْ فَلَاسَرْ مَلِكْ بَلَدْ أَشُورْ جَاءْ وَ شَالْ حِلَّالْ عِيُونْ وَ آبِلْ بَيْت مَعَاكَةْ وَ يَنُوحْ وَ قَدَشْ وَ حَاصُورْ وَ تُرَابْ قِلْعَادْ وَ بَلَدْ الْجَلِيلْ وَ كُلَّ أَرْض نَفْتَالِي. وَ وَدَّى سُكَّانْهُمْ فِي الْغُرْبَةْ فِي بَلَدْ أَشُورْ.
30وَ هُوشَعْ وِلَيْد إِيلَى أَتْمَرَّدْ ضِدّ فَقَحْ وِلَيْد رَمَلْيَا. وَ هُو ضَرَبَهْ وَ كَتَلَهْ وَ حَكَمْ فِي بَدَلَهْ وَ دَا فِي سَنِةْ 20 هَنَا حُكُمْ يُوتَامْ وِلَيْد عُزِّيَّا.
31وَ الْبَاقِي مِنْ عَمَلْ فَقَحْ وَ كُلَّ شَيّءْ السَّوَّاهْ مَكْتُوبِينْ فِي كِتَابْ تَارِيخْ مُلُوكْ بَنِي إِسْرَائِيلْ.
يُوتَام بِقي ملك في يَهُوذَا
32وَ فِي السَّنَةْ التَّانِيَةْ هَنَا حُكُمْ فَقَحْ وِلَيْد رَمَلْيَا مَلِكْ مَمْلَكَةْ إِسْرَائِيلْ، يُوتَامْ وِلَيْد عُزِّيَّا بِقِي مَلِكْ فِي مَمْلَكَةْ يَهُوذَا. 33وَ يُوتَامْ عِنْدَهْ 25 سَنَةْ وَكِتْ بِقِي مَلِكْ وَ حَكَمْ 16 سَنَةْ فِي مَدِينَةْ الْقُدُسْ. وَ أَمَّهْ أُسُمْهَا يَرُوشَةْ بِنَيَّةْ صَدُوقْ. 34وَ يُوتَامْ سَوَّى الْعَدِيلْ قِدَّامْ اللّٰهْ مِثِلْ أَبُوهْ عُزِّيَّا سَوَّاهْ. 35وَ لَاكِنْ بَيْدَا كُلَ، الْبَكَانَاتْ الْعَالِيِينْ هَنَا عِبَادَةْ الْأَصْنَامْ قَاعِدِينْ وَ فَوْقهُمْ، الشَّعَبْ يِقَدُّمُوا ضَحَايَا وَ يِحَرُّقُوا بَخُورْ. وَ يُوتَامْ عَدَّلْ الْبَابْ الْفَوْقَانِي هَنَا مَدَخَلْ بَيْت اللّٰهْ.
36وَ الْبَاقِي مِنْ عَمَلْ يُوتَامْ وَ كُلَّ شَيّءْ السَّوَّاهْ مَكْتُوبِينْ فِي كِتَابْ تَارِيخْ مُلُوكْ بَنِي يَهُوذَا.
37وَ فِي وَكِتْ يُوتَامْ بَسْ، اللّٰهْ رَسَّلْ رَصِينْ مَلِكْ بَلَدْ أَرَامْ وَ فَقَحْ وِلَيْد رَمَلْيَا ضِدّ مَمْلَكَةْ يَهُوذَا. 38وَ يُوتَامْ مَاتْ وَ لِحِقْ أَبَّهَاتَهْ وَ دَفَنَوْه فِي قَبُرْ جُدُودَهْ فِي مَدِينَةْ دَاوُدْ جِدَّهْ. وَ وِلَيْدَهْ أَحَازْ حَكَمْ فِي بَدَلَهْ.
Currently Selected:
2 مُلوك 15: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
