2 أخبار 5
5
الصنْدوق خطّوه في بيت اللّه
1وَ وَكِتْ كُلَّ الْخِدْمَةْ هَنَا بَيْت اللّٰهْ كَمَّلَتْ خَلَاصْ، الْمَلِكْ سُلَيْمَانْ جَابْ كُلَّ شَيّءْ الْأَبُوهْ دَاوُدْ خَصَّصَهْ مِثِلْ الْفُضَّةْ وَ الدَّهَبْ وَ الْمَوَاعِينْ وَ خَطَّاهُمْ فِي الْمَخَازِنْ هَنَا بَيْت اللّٰهْ.
2وَ بَعَدْ دَا، الْمَلِكْ سُلَيْمَانْ نَادَى كُلَّ شُيُوخْ بَنِي إِسْرَائِيلْ وَ كُلَّ كُبَارَاتْ الْقَبَايِلْ وَ كُبَارَاتْ الْعَايِلَاتْ هَنَا بَنِي إِسْرَائِيلْ يِلِمُّوا فِي أُورُشَلِيمْ. وَ دَا أَشَانْ يِشِيلُوا صَنْدُوقْ مُعَاهَدَةْ اللّٰهْ مِنْ مَدِينَةْ دَاوُدْ وَ هِي صَهْيُون وَ يِوَدُّوهْ بَيْت اللّٰهْ. 3وَ كُلَّ رُجَالْ بَنِي إِسْرَائِيلْ لَمَّوْا وَرَاءْ الْمَلِكْ فِي وَكْت الْعِيدْ هَنَا الشَّهَرْ السَّابِعْ. 4وَكِتْ كُلَّ شُيُوخْ بَنِي إِسْرَائِيلْ جَوْا، اللَّاوِيِّينْ شَالَوْا الصَّنْدُوقْ. 5وَ رُجَالْ الدِّينْ اللَّاوِيِّينْ شَالَوْا الصَّنْدُوقْ وَ خَيْمَةْ الْإِجْتِمَاعْ وَ كُلَّ الْمُعِدَّاتْ الْمُخَصَّصِينْ الْفِي لُبّ الْخَيْمَةْ. 6وَ الْمَلِكْ سُلَيْمَانْ وَ كُلَّ جَمَاعَةْ بَنِي إِسْرَائِيلْ لَمَّوْا وَ وَقَفَوْا قِدَّامْ الصَّنْدُوقْ. وَ قَدَّمَوْا ضَحَايَا هَنَا غَنَمْ وَ بَقَرْ كَتِيرْ مَرَّةْ وَاحِدْ وَ لَحَدِّي نَادُمْ مَا يَقْدَرْ يَحْسِبْهُمْ وَ لَا يَلْقَى عَدَدْهُمْ.
7وَ بَعَدْ دَا، رُجَالْ الدِّينْ جَابَوْا صَنْدُوقْ مُعَاهَدَةْ اللّٰهْ وَ دَخَّلَوْه فِي لُبّ بَيْت اللّٰهْ فِي الْبَكَانْ الْخَصَّصَوْه لَيَّهْ فِي الْبَكَانْ الْمُقَدَّسْ مَرَّةْ وَاحِدْ تِحِتْ جَنَاحَيْ هَنَا الْمَخْلُوقِينْ السَّمَاوِيِّينْ. 8وَ الْمَخْلُوقِينْ السَّمَاوِيِّينْ دَوْل مُمَطِّطِينْ جَنَاحَيْهُمْ بِفَوْق لِلْبَكَانْ الْقَاعِدْ فَوْقَهْ الصَّنْدُوقْ. وَ بِمِثِلْ دَا، يِغَطُّوا الصَّنْدُوقْ وَ الْعِيدَانْ الْيِشِيلُوهْ بَيْهُمْ. 9وَ الْعِيدَانْ الْيِشِيلُوهْ بَيْهُمْ طُوَالْ. وَ خَشُمْ الْعِيدَانْ دَوْل يِنْشَافْ لِلنَّادُمْ الْقَاعِدْ أَمْبَيْن الصَّنْدُوقْ وَ الْمَدَخَلْ هَنَا الْبَكَانْ الْمُقَدَّسْ مَرَّةْ وَاحِدْ. وَ لَاكِنْ نَادُمْ مِنْ بَرَّا مَا يِشِيفَهْ. وَ الصَّنْدُوقْ دَا قَاعِدْ فِي الْبَكَانْ لَحَدِّي الْيَوْم. 10وَ الصَّنْدُوقْ دَا مَا عِنْدَهْ شَيّءْ دَاخَلْ إِلَّا اللِّيحَانْ الْإِتْنَيْن الْمُوسَى خَطَّاهُمْ فِي لُبَّهْ وَكِتْ هُو قَاعِدْ فِي جَبَلْ حُورِيبْ. وَ دَا، وَكِتْ اللّٰهْ سَوَّى مُعَاهَدَةْ مَعَ بَنِي إِسْرَائِيلْ بَعَدْ مَرِقِينْهُمْ مِنْ بَلَدْ مَصِرْ.
11وَ رُجَالْ الدِّينْ مَرَقَوْا مِنْ الْبَكَانْ الْمُقَدَّسْ. وَ أَوَّلْ كُلُّهُمْ كَيْ خَصَّصَوْا نُفُوسْهُمْ وَ مَا هَمَّوْا بِالنِّظَامْ هَنَا مَجْمُوعَاتْهُمْ. 12وَ كُلَّ اللَّاوِيِّينْ الْغَنَّايِينْ، هُمَّنْ أَسَافْ وَ هَيْمَانْ وَ يَدُوتُونْ وَ عِيَالْهُمْ وَ أَخْوَانْهُمْ لَابْسِينْ خُلْقَانْ مِنْ قُمَاشْ هَنَا كَتَّانْ وَ وَاقْفِينْ بِالنُّصّ الصَّبْحَانِي هَنَا الْمَدْبَحْ بِآلَاتْ الْمُسِيقَى مِثِلْ نَقَاقِيرْ وَ أَمْ سِبَيْبَةْ وَ جِقِنْدِيَّةْ. وَ مَعَاهُمْ 120 رُجَالْ دِينْ الْقَاعِدِينْ يَضُرْبُوا الْبُرُنْجِي. 13وَ النَّاسْ الْيَضُرْبُوا الْبُرُنْجِي وَ الْغَنَّايِينْ كُلُّهُمْ لَمَّوْا حِسُّهُمْ سَوَا لِيَحْمُدُوا اللّٰهْ وَ يَشْكُرُوهْ. وَكِتْ ضَرَبَوْا الْبُرُنْجِي وَ النَّقَاقِيرْ وَ الْآلَاتْ الْآخَرِينْ هَنَا الْمُسِيقَى، قَالَوْا: «اللّٰهْ هُو رَحِيمْ وَ رَحْمَتَهْ دَايْمَةْ إِلَى الْأَبَدْ.» وَ طَوَّالِي كَيْ، بَيْت اللّٰهْ أَنْمَلَى بِسَحَابَايْ. 14وَ رُجَالْ الدِّينْ مَا قِدْرَوْا يِسَوُّوا خِدْمِتْهُمْ بِسَبَبْ السَّحَابَايْ دِي أَشَانْ مَجْد اللّٰهْ مَلَا بَيْتَهْ.
Currently Selected:
2 أخبار 5: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019