1 مُلوك 4
4
سُلَيْمَان نظّم ممْلكته
1وَ سُلَيْمَانْ بِقِي مَلِكْ فِي كُلَّ بَنِي إِسْرَائِيلْ. 2وَ مَسَائِيلَهْ هُمَّنْ عَزَرْيَا وِلَيْد صَدُوقْ هُو رَاجِلْ الدِّينْ 3وَ أَلِحُورَفْ وَ أَخِيَّا وِلَيْد شِيشَا هُمَّنْ كُتَّابَهْ وَ يَهُوشَفَطْ وِلَيْد أَخِلُودْ هُو كَاتِبْ الْيِذَكِّرْ الْمَلِكْ. 4وَ بَنَايَا وِلَيْد يَهُويَدَعْ هُو قَايِدْ الدَّيْش وَ صَدُوقْ وَ أَبِيَاتَرْ هُمَّنْ رُجَالْ دِينْ 5وَ عَزَرْيَا وِلَيْد نَاتَانْ هُو مَسْؤُولْ فِي الْحُكَّامْ وَ زَبُودْ وِلَيْد نَاتَانْ هُو رَاجِلْ دِينْ وَ مُسْتَشَارْ الْخَاصّ هَنَا الْمَلِكْ. 6وَ أَخِشَارْ هُو مَسْؤُولْ فِي قَصِرْ الْمَلِكْ وَ أَدُنِرَامْ وِلَيْد عَبْدَا هُو مَسْؤُولْ فِي الْخِدْمَةْ الْإِجْبَارِيَّةْ.
المناطِق و حُكّامهم
7سُلَيْمَانْ خَطَّ 12 حُكَّامْ فِي كُلَّ بَلَدْ إِسْرَائِيلْ. وَ هُمَّنْ بَسْ مَسْؤُولِينْ مِنْ عِيشَةْ الْمَلِكْ وَ عَايِلْتَهْ. وَ فِي السَّنَةْ، أَيِّ وَاحِدْ مِنْهُمْ يِجِيبْ مَعَاشْ هَنَا شَهَرْ وَاحِدْ. 8وَ دَاهُو أَسَامَيْ الْحُكَّامْ دَوْل.
وِلَيْد حُورْ حَاكِمْ فِي مَنْطَقَةْ جِبَالْ أَفْرَايِمْ.
9وَ وِلَيْد دَقَرْ حَاكِمْ فِي مَاقَصْ وَ فِي شَعَلْبِيمْ وَ فِي بَيْت شَمْس وَ فِي إِيلُونْ بَيْت حَنَانْ.
10وَ وِلَيْد حَسَدْ حَاكِمْ فِي أَرُبُوتْ يَعْنِي مَنْطَقَةْ سُوكُو وَ كُلَّ بَلَدْ حِيفَرْ.
11وَ وِلَيْد أَبِنَدَابْ حَاكِمْ فِي كُلَّ مَنْطَقَةْ جِبَالْ دُورْ. وَ هُو بَسْ رَاجِلْهَا لِطَافَتْ بِنَيَّةْ سُلَيْمَانْ.
12وَ بَعَنَى وِلَيْد أَخِلُودْ حَاكِمْ فِي تَعْنَكْ وَ مَقِدُّو وَ كُلَّ مَنْطَقَةْ بَيْت شَانْ الْقَرِيبَةْ لِصَرْتَانْ قِدَّامْ لِيَزْرَعِيلْ يَعْنِي مِنْ بَيْت شَانْ لَحَدِّي آبِلْ مَحُولَى وَ لَحَدِّي غَادِي لِيَقْمَعَامْ.
13وَ وِلَيْد قِيبَرْ حَاكِمْ فِي رَامُوتْ الْفِي قِلْعَادْ. وَ هُو مَسْؤُولْ فِي حِلَّالْ هَنَا يَيِيرْ وِلَيْد مَنَسَّى فِي قِلْعَادْ. وَ بَتَّانْ هُو حَاكِمْ فِي أَرْقُوبْ فِي تُرَابْ بَاشَانْ وَ 60 مُدُنْ كُبَارْ وَ مُحَوَّقِينْ بِدَرَادِرْ قَوِيِّينْ وَ مُقَفَّلِينْ بِحَوَادِرْ هَنَا نَحَاسْ.
14وَ أَخِنَدَابْ وِلَيْد عِدُّو حَاكِمْ فِي مَنْطَقَةْ مَحَنَايِمْ.
15وَ أَخِمَاعَصْ حَاكِمْ فِي مَنْطَقَةْ نَفْتَالِي. وَ هُو كُلَ أَخَدْ بِنْت وَاحِدَةْ مِنْ بَنَاتْ سُلَيْمَانْ الْأُسُمْهَا بَاسْمَتْ.
16وَ بَعَنَى وِلَيْد حُوشَايْ حَاكِمْ فِي مَنْطَقَةْ أَشِيرْ وَ بَعَلُوتْ.
17وَ يَهُوشَفَطْ وِلَيْد فَارُوحْ حَاكِمْ فِي مَنْطَقَةْ يَسَّاكَرْ.
18وَ شِمْعِي وِلَيْد إِيلَى حَاكِمْ فِي مَنْطَقَةْ بَنْيَامِينْ.
19وَ قِيبَرْ وِلَيْد أُورِي حَاكِمْ فِي تُرَابْ قِلْعَادْ. وَ التُّرَابْ دِي زَمَانْ هِي هِنْت سِيحُونْ مَلِكْ الْأَمُورِيِّينْ وَ عُوقْ مَلِكْ بَاشَانْ.
وَ زِيَادَةْ مِنْ الْحُكَّامْ الْأَتْنَا عَشَرْ دَوْل، فِيَّهْ حَاكِمْ فِي بَلَدْ يَهُوذَا. 20وَ بَنِي يَهُوذَا وَ بَنِي إِسْرَائِيلْ هُمَّنْ كَتِيرِينْ مِثِلْ رَمْلَةْ هَنَا خَشُمْ الْبَحَرْ. وَ هُمَّنْ عِنْدُهُمْ أَكِلْ وَ شَرَابْ وَ عَايْشِينْ فِي رَاحَةْ.
حُكُم سُلَيْمَان ألْوسّع
21 # 4:21 الفصُل 4 آية 21 بالعربي هو الفصُل 5 آية 1 بالفرنساوي. لاكن ما زاد و لا نقص شيّء إلّا النِمر بس ألبدّلوا. وَ الْمَلِكْ سُلَيْمَانْ حَكَمْ فِي كُلَّ الْمَمَالِكْ مِنْ بَحَرْ الْفُرَاتْ وَ بَلَدْ الْفِلِسْطِيِّينْ لَحَدِّي حُدُودْ بَلَدْ مَصِرْ. وَ هُمَّنْ دَوْل يِكَفُّوا الْمِيرِي وَ يَخْدُمُوا لِلْمَلِكْ سُلَيْمَانْ فِي كُلَّ مُدَّةْ حَيَاتَهْ. 22وَ الْمَعَاشْ الْيِجِيبُوهْ لِسُلَيْمَانْ وَ نَاسَهْ فِي الْيَوْم يِسَاوِي 75 شُوَالْ هَنَا أَحْسَنْ دَقِيقْ وَ 150 شُوَالْ هَنَا دَقِيقْ قَمَحْ 23وَ 10 تِيرَانْ سُمَانْ مُرَبَّيِينْ وَ 20 تِيرَانْ هَنَا سَرْحَةْ وَ 100 غَنَمْ. وَ دَا بَلَا التَّيْتَلْ وَ الْغُزْلَانْ وَ الْوُحُوشْ وَ الطُّيُورْ الْمُرَبَّيِينْ.
24الْمَلِكْ سُلَيْمَانْ قَاعِدْ يَحْكِمْ فِي كُلَّ الْبَلَدْ الْقَاعِدَةْ غَرِبْ لِبَحَرْ الْفُرَاتْ وَ دَا مِنْ حِلَّةْ تِفْسَحْ لَحَدِّي حِلَّةْ غَزَّةْ. وَ هُو عَايِشْ بِالسَّلَامَةْ مَعَ كُلَّ الْبُلْدَانْ الْمُجَاوِرِينَهْ. 25وَ مِنْ دَانْ فِي الْمُنْشَاقْ لَحَدِّي بِيرْ سَبْعَةْ فِي الْوَطِي، بَنِي يَهُوذَا وَ بَنِي إِسْرَائِيلْ يَقْعُدُوا بِأَمَانْ أَيِّ وَاحِدْ فِي لُبّ جِنَيْنِتَهْ هَنَا الْعِنَبْ وَ التِّينْ فِي كُلَّ مُدَّةْ حَيَاةْ سُلَيْمَانْ. 26وَ سُلَيْمَانْ عِنْدَهْ 40 000 شَايَةْ لِلْخَيْل الْيُكُرُّوا لَيَّهْ عَرَبَاتَهْ هَنَا الْحَرِبْ وَ 12 000 رُجَالْ سِيَادْ خَيْل.
27وَ الْمَلِكْ كَلَّفْ أَتْنَا عَشَرْ حُكَّامْ، وَ هُمَّنْ الْمَسْؤُولِينْ بِمَعَاشْ الْمَلِكْ وَ النَّاسْ الْيَاكُلُوا فِي دَبَلَايْتَهْ. وَ أَيِّ وَاحِدْ يِجِيبْ مَعَاشْ هَنَا شَهَرْ وَاحِدْ وَ مَا يِخَلِّي شَيّءْ يِقَصِّرْ لَيَّهْ. 28وَ الْحُكَّامْ دَوْل أَيِّ وَاحِدْ حَسَبْ الطَّلَبَوْه مِنَّهْ يِجِيبْ قَمَحْ أَبْيَضْ وَ قَشّ لِلْخَيْل الْيَرْكَبَوْا فَوْقهُمْ وَ الْخَيْل الْيُكُرُّوا بَيْهُمْ. وَ الْخُمَامْ دَا، كُلَّ كَيْ يِجِيبُوهْ فِي الْبَكَانْ الْقَاعِدْ فَوْقَهْ الْمَلِكْ.
سُلَيْمَان فات كل الناس بالحكمة
29وَ الرَّبّ أَنْطَاهْ لِسُلَيْمَانْ حِكْمَةْ وَ فِهِمْ زِيَادَةْ وَ مَعْرَفَةْ كَتِيرَةْ مِثِلْ رَمْلَةْ هَنَا خَشُمْ الْبَحَرْ. 30وَ حِكْمَةْ سُلَيْمَانْ بِقَتْ زِيَادَةْ مِنْ حِكْمَةْ كُلَّ نَاسْ الصَّبَاحْ وَ حِكْمَةْ نَاسْ مَصِرْ. 31وَ سُلَيْمَانْ بِقِي حَكِيمْ مِنْ كُلَّ نَاسْ الدُّنْيَا وَ حَكِيمْ مِنْ إِتَانْ الْمِنْ خَشُمْ بَيْت أَزْرَاحِي وَ هَيْمَانْ وَ كَلْكُولْ وَ دَرْدَعْ عِيَالْ مَحُولْ. وَ أُسْمَهْ بِقِي مَعْرُوفْ فِي كُلَّ الْأُمَمْ الْمُجَاوِرِينَهْ. 32وَ سُلَيْمَانْ كَتَبْ 3 000 مَثَلْ وَ 1 005 غِنَيْ. 33وَ هُو حَجَّى بِالنَّبَاتْ مِنْ شَدَرْ الْأَرْز الْعَظِيمْ هَنَا لُبْنَانْ لَحَدِّي نَبَاتْ الزُّوفَةْ الصَّغَيَّرْ الْيُقُمّ فِي الدُّرْدُرْ. وَ حَجَّى بِالْبَهَايِمْ وَ الطُّيُورْ وَ الزَّوَاحِفْ وَ الْحُوتْ. 34وَ كُلَّ الشُّعُوبْ وَ مُلُوكْ الْأَرْض السِّمْعَوْا بِحِكْمَةْ الْمَلِكْ سُلَيْمَانْ رَسَّلَوْا نَاسْهُمْ جَوْا لِيَسْمَعَوْا حِكْمَتَهْ.
Currently Selected:
1 مُلوك 4: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
