1 مُلوك 10
10
ملِكة سَبَأ زارت سُلَيْمَان
1وَ مَلِكَةْ بَلَدْ سَبَأ سِمْعَتْ بِالْكَلَامْ الْقَاعِدِينْ يِحَجُّوهْ فِي سُلَيْمَانْ وَ فِي الشَّيّءْ السَّوَّاهْ لَيَّهْ اللّٰهْ. وَ هِي جَاتْ لِتِجَرِّبَهْ بِقَدِّمِينْ سُؤَالَاتْ قَاسِيِينْ. 2وَ الْمَلِكَةْ وَصَّلَتْ فِي مَدِينَةْ الْقُدُسْ بِنَاسْ كَتِيرِينْ وَ جُمَالْ شَايْلِينْ عِطِرْ وَ دَهَبْ كَتِيرْ وَ حُجَارْ غَالِيِّينْ. وَ وَكِتْ وَصَّلَتْ بَكَانْ سُلَيْمَانْ، هِي حَجَّتْ لَيَّهْ بِكُلَّ شَيّءْ الْعِنْدَهَا فِي قَلِبْهَا. 3وَ الْمَلِكْ سُلَيْمَانْ رَدَّ لَيْهَا فِي كُلَّ السُّؤَالَاتْ الْقَدَّمَتْهُمْ لَيَّهْ. وَ مَا فِي سُؤَالْ وَاحِدْ الْبِقِي لَيَّهْ قَاسِي الْمَا قِدِرْ رَدَّ فَوْقَهْ. 4وَ مَلِكَةْ بَلَدْ سَبَأ شَافَتْ حِكْمَةْ سُلَيْمَانْ وَ الْقَصِرْ الْهُو بَنَاهْ 5وَ الْأَكِلْ الْفِي رَاسْ طَرَبَيْزِتَهْ وَ الْمَسْكَنْ هَنَا مَسَائِيلَهْ وَ نِظَامْ خِدْمِتْهُمْ وَ اللُّبَاسْ هَنَا النَّاسْ الْيَنْطُوا الْأَكِلْ وَ الشَّرَابْ وَ الضَّحَايَا الْقَاعِدِينْ يِقَدُّمُوهُمْ فِي بَيْت اللّٰهْ. وَ هِي أَلْعَجَّبَتْ بِلْحَيْن وَ مَا قِدْرَتْ تُقُولْ شَيّءْ.
6وَ خَلَاصْ، قَالَتْ لِلْمَلِكْ: «الشَّيّءْ السِّمِعْتَهْ مِنْ بَلَدِي الْبُخُصّ كَلَامَكْ وَ حِكْمَتَكْ دَا صَحِيحْ. 7وَ أَنَا مَا صَدَّقْت بِالْكَلَامْ الْقَالَوْه فَوْقَكْ إِلَّا بَعَدْ جِيتْ وَ شِفْتَهْ بِعَيْنِي. وَ دَاهُو نُصّ حِكْمَتَكْ كُلَ مَا خَبَّرَوْنِي بَيَّهْ! حِكْمَتَكْ وَ خَيْرَكْ زِيَادَةْ مِنْ كُلَّ شَيّءْ الْأَنَا سِمِعْتَهْ. 8مَبْرُوكْ لِنَاسَكْ وَ لِمَسَائِيلَكْ الدَّايْماً قَاعِدِينْ مَعَاكْ وَ يَسْمَعَوْا حِكْمَتَكْ. 9بَارَكْ اللّٰهْ إِلٰـهَكْ الرِّضِي بَيْك وَ خَطَّاكْ فِي كُرْسِي الْمُلُكْ لِتَمْلُكْ فِي بَنِي إِسْرَائِيلْ أَشَانْ اللّٰهْ قَاعِدْ يِحِبّ بَنِي إِسْرَائِيلْ إِلَى الْأَبَدْ. وَ فِي شَانْ دَا بَسْ، هُو خَطَّاكْ مَلِكْ فَوْقهُمْ لِتَحْكِمْ بِالْحَقّ وَ الْعَدَالَةْ.»
10وَ بَعَدْ دَا، الْمَلِكَةْ هَنَا بَلَدْ سَبَأ أَنْطَتْ لِلْمَلِكْ زِيَادَةْ مِنْ 4 000 كِيلَوْ هَنَا دَهَبْ وَ عِطِرْ كَتِيرْ وَ حُجَارْ غَالِيِّينْ كُلَ. وَ أَبَداً مَا فِي عِطِرْ زِيَادَةْ مِنْ الْعِطِرْ الْجَابَتَهْ الْمَلِكَةْ هَنَا سَبَأ لِلْمَلِكْ سُلَيْمَانْ.
11وَ السُّفُنْ هَنَا مَلِكْ حِيرَامْ الْقَاعِدِينْ يِجِيبُوا دَهَبْ مِنْ أُفِيرْ جَابَوْا حَطَبْ الصَّنْدَلْ بِكَتَرَةْ وَ حُجَارْ غَالِيِّينْ كُلَ. 12وَ بِحَطَبْ الصَّنْدَلْ دَا، الْمَلِكْ سَوَّى مَرَادِيسْ لِبَيْت اللّٰهْ وَ لِقَصْرَهْ هُو كُلَ. وَ سَوَّى بَيَّهْ جِقِنْدِيَّةْ وَ أَمْ سِبَيْبَةْ لِلْغَنَّايِينْ. وَ مِنْ الْوَكِتْ دَاكْ لَحَدِّي الْيَوْم دَا، مَا شَافَوْا حَطَبْ الصَّنْدَلْ كَتِيرْ مِثِلْ دَا. 13وَ الْمَلِكْ سُلَيْمَانْ أَنْطَاهَا لِمَلِكَةْ بَلَدْ سَبَأ كُلَّ شَيّءْ الدَّوَّرَتَهْ وَ طَلَبَتَهْ مِنَّهْ. وَ زِيَادَةْ مِنْ دَا، الْمَلِكْ سُلَيْمَانْ أَنْطَاهَا هَدَايَا بِجُودْ وَ كَرَمْ. وَ بَعَدْ دَا، الْمَلِكَةْ قَبَّلَتْ بَلَدْهَا مَعَ مَسَائِيلْهَا.
مال سُلَيْمَان
14وَ وَزِنْ الدَّهَبْ الْيِجِيبُوهْ لِسُلَيْمَانْ فِي كُلِّ سَنَةْ يِسَاوِي زِيَادَةْ مِنْ 22 000 كِيلَوْ. 15وَ دَا بَلَا الْمَالْ الْيَلْقَاهْ مِنْ الضَّرَايِبْ الْيِشِيلَهْ مِنْ التُّجَّارْ وَ الْمِيرِي الْيَلْقَاهْ مِنْ مُلُوكْ الْعَرَبْ وَ حُكَّامْ الْبَلَدْ. 16وَ الْمَلِكْ سُلَيْمَانْ دَقَّ 200 دَرَقْ كُبَارْ هَنَا دَهَبْ وَ أَيِّ وَاحِدَةْ وَزِنْهَا يِسَاوِي 850 جِنَيْه. 17وَ دَقَّ بَتَّانْ 300 دَرَقْ دُقَاقْ وَ أَيِّ وَاحِدَةْ وَزِنْهَا يِسَاوِي 200 جِنَيْه هَنَا دَهَبْ. وَ الْمَلِكْ خَطَّاهُمْ فِي بَيْتَهْ السَّمَّوْه غَابَةْ لُبْنَانْ.
18وَ الْمَلِكْ صَنَعْ كُرْسِي كَبِيرْ هَنَا عَاجْ وَ مَسَحَهْ بِدَهَبْ صَافِي. 19وَ الْكُرْسِي دَا عِنْدَهْ سِتَّةْ عَتَبَةْ الْيَطْلَعَوْا بَيْهُمْ. وَ بِوَرَاءْ فِي الْبَكَانْ الْيِنْتَكُوا فَوْقَهْ مُدَوَّرْ وَ الْكُرْسِي دَا سَوَّوْا لَيَّهْ إِيدَيْن بِجَايْ وَ جَايْ. وَ صَنَعَوْا تِمْثَالْ هَنَا دِيدَانْ إِتْنَيْن وَ خَطَّوْهُمْ بِنُصّ الزَّيْنَةْ وَ الْإِسْرَةْ لِلْكُرْسِي. 20وَ 12 دِيدَانْ آخَرِينْ وَاقْفِينْ بِجَايْ وَ جَايْ لِلْعَتَبَاتْ السِّتَّةْ دَوْل. وَ أَبَداً مَا سَوَّوْا شَيّءْ مِثِلْ دَا فِي أَيِّ مَمْلَكَةْ.
21وَ كُلَّ الْكِيسَانْ الْيَشْرَبْ بَيْهُمْ الْمَلِكْ سُلَيْمَانْ هُمَّنْ هَنَا دَهَبْ وَ كُلَّ الْمُعِدَّاتْ الْفِي بَيْت غَابَةْ لُبْنَانْ سَوَّوْهُمْ مِنْ دَهَبْ صَافِي. وَ شَيّءْ السَّوَّوْه بِفُضَّةْ كَيْ مَا فِيهْ أَشَانْ فِي وَكِتْ سُلَيْمَانْ، الْفُضَّةْ مَا عِنْدَهَا قِيمَةْ. 22وَ الْمَلِكْ سُلَيْمَانْ عِنْدَهْ سُفُنْ كُبَارْ هَنَا التِّجَارَةْ الْيَمْشُوا مَعَ سُفُنْ هَنَا الْمَلِكْ حِيرَامْ. وَ فِي أَيِّ تَلَاتَةْ سَنَةْ، السُّفُنْ دَوْل يِقَبُّلُوا مَشْحُونِينْ بِدَهَبْ وَ فُضَّةْ وَ عَاجْ وَ تُقُولَةْ وَ طَاوُوسْ.
23وَ الْمَلِكْ سُلَيْمَانْ فَاتْ كُلَّ مُلُوكْ الْأَرْض بِمَالْ وَ حِكْمَةْ. 24وَ كُلَّ النَّاسْ الْأَرْض يِدَوْرُوا يِقَابُلُوا سُلَيْمَانْ أَشَانْ يَسْمَعَوْا مِنْ حِكْمَتَهْ الْأَنْطَاهَا لَيَّهْ الرَّبّ فِي قَلْبَهْ. 25وَ أَيِّ سَنَةْ، النَّاسْ دَوْل يِجِيبُوا لَيَّهْ هَدَايَا. يِجِيبُوا لَيَّهْ مُعِدَّاتْ هَنَا فُضَّةْ وَ دَهَبْ وَ خُلْقَانْ وَ سِلَاحْ وَ عِطِرْ وَ خَيْل وَ بِغَالْ.
26وَ الْمَلِكْ سُلَيْمَانْ لَمَّ عَرَبَاتْ هَنَا حَرِبْ وَ سِيَادْ خَيْل. هُو عِنْدَهْ 1 400 عَرَبَاتْ حَرِبْ وَ 12 000 سِيَادْ خَيْل. وَ هُو وَدَّى وَاحِدِينْ مِنْهُمْ فِي الْحِلَّالْ الْيُخُطّ فَوْقهُمْ عَرَبَاتَهْ وَ وَاحِدِينْ كَمَانْ خَلَّاهُمْ مَعَايَهْ فِي مَدِينَةْ الْقُدُسْ. 27وَ الْمَلِكْ جَابْ فِي مَدِينَةْ الْقُدُسْ فُضَّةْ كَتِيرَةْ زِيَادَةْ مِثِلْ الْحَصْحَصْ. وَ حَطَبْ الْأَرْز كُلَ بِقِي كَتِيرْ زِيَادَةْ مِثِلْ شَدَرْ الْجِمَّيْز الْيُقُمّ فِي سَهَلَةْ شَفِيلَةْ. 28وَ خَيْل الْمَلِكْ سُلَيْمَانْ، قَاعِدِينْ يِجِيبُوهُمْ لَيَّهْ مِنْ مَصِرْ وَ مِنْ كُوِي. وَ دَا تُجَّارْ الْمَلِكْ بَسْ يَمْشُوا وَ يَشْرُوهُمْ لَيَّهْ مِنْ هِنَاكْ. 29وَ أَيِّ عَرَبَةْ الْيِجِيبُوهَا مِنْ مَصِرْ تَمَنْهَا 600 حَجَرْ فُضَّةْ وَ أَيِّ جُوَادْ تَمَنَهْ 150 حَجَرْ فُضَّةْ. وَ بِنَفْس التَّمَنْ دَا بَسْ، التُّجَّارْ قَاعِدِينْ يِجِيبُوا عَرَبَاتْ وَ خَيْل لِمُلُوكْ الْحِتِّيِّينْ وَ لِمُلُوكْ بَلَدْ أَرَامْ كُلَ.
Currently Selected:
1 مُلوك 10: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
