1 أخبار 18
18
دَاوُد أنّصر في جيرانه
1وَ بَعَدْ دَا، دَاوُدْ حَارَبْ الْفِلِسْطِيِّينْ وَ أَنَّصَرْ فَوْقهُمْ. وَ قَلَعْ مِنْهُمْ حِلَّةْ قَاتْ وَ الْحِلَّالْ التَّابْعِينْ لَيْهَا. 2وَ هُو أَنَّصَرْ فِي نَاسْ مُوَابْ. وَ بَعَدْ دَا، نَاسْ بَلَدْ مُوَابْ قَعَدَوْا تِحِتْ حُكُمْ دَاوُدْ وَ يِكَفُّوا مِيرِي. 3وَ دَاوُدْ أَنَّصَرْ فِي هَدَدْعَازَرْ مَلِكْ صُوبَةْ الْفِي حَمَاتْ. وَ دَا، فِي الْوَكِتْ الْهَدَدْعَازَرْ دَوَّرْ يِوَسِّعْ حُكْمَهْ لَحَدِّي مَنْطَقَةْ بَحَرْ الْفُرَاتْ. 4وَ دَاوُدْ قَلَعْ مِنْ هَدَدْعَازَرْ 1 000 عَرَبَاتْ حَرِبْ وَ كَرَبْ 7 000 مَسَاجِينْ مِنْ سِيَادْ الْخَيْل وَ 20 000 عَسْكَرْ مَاشِينْ بِرِجْلَيْهُمْ. وَ هُو قَطَّعْ عَرَاقِيبْ هَنَا الْخَيْل الْيُكُرُّوا الْعَرَبَاتْ وَ خَلَّى مِنْهُمْ إِلَّا 100 خَيْل.
5وَ نَاسْ بَلَدْ أَرَامْ الْمِنْ دِمَشْق جَوْا فَزَعْ لِهَدَدْعَازَرْ مَلِكْ صُوبَةْ. وَ لَاكِنْ دَاوُدْ كَتَلْ مِنْ نَاسْ أَرَامْ 22 000 رَاجِلْ. 6وَ دَاوُدْ خَطَّ مُحَافِظِينْ فِي الْأَرَامِيَّيْن الْقَاعِدِينْ تِحِتْ حُكُمْ مَدِينَةْ دِمَشْق. وَ الْأَرَامِيَّيْن قَعَدَوْا تِحِتْ حُكُمْ دَاوُدْ وَ قَاعِدِينْ يِكَفُّوا مِيرِي. وَ اللّٰهْ أَنْطَى النَّصُرْ لِدَاوُدْ فِي أَيِّ بَكَانْ الْيَمْشِي فَوْقَهْ.
7وَ دَاوُدْ قَلَعْ دَرَقْ هَنَا دَهَبْ مِنْ حُرَّاسْ هَدَدْعَازَرْ وَ وَدَّاهُمْ أُورُشَلِيمْ. 8وَ مِنْ طِبْحَةْ وَ كُونْ حِلَّالْ هَدَدْعَازَرْ، دَاوُدْ قَلَعْ نَحَاسْ كَتِيرْ. وَ بَعَدَيْن، وِلَيْدَهْ سُلَيْمَانْ صَنَعْ بِالنَّحَاسْ دَا حَوْط كَبِيرْ وَ عَمَدْ وَ مُعِدَّاتْ هَنَا بَيْت اللّٰهْ.
9وَ تُوعِي مَلِكْ بَلَدْ حَمَاتْ سِمِعْ كَدَرْ دَاوُدْ أَنَّصَرْ فِي كُلَّ عَسْكَرْ هَدَدْعَازَرْ مَلِكْ صُوبَةْ. 10خَلَاصْ رَسَّلْ وِلَيْدَهْ هَدُرَامْ لِيِسَلِّمَهْ وَ يَشْكُرَهْ أَشَانْ دَاوُدْ حَارَبْ هَدَدْعَازَرْ وَ أَنَّصَرْ فَوْقَهْ. وَ قُبَّالْ دَا، تُوعِي وَ هَدَدْعَازَرْ هُمَّنْ عُدْوَانْ. وَ هَدُرَامْ وِلَيْد تُوعِي جَابْ لِدَاوُدْ مُعِدَّاتْ كَتِيرِينْ هَنَا دَهَبْ وَ فُضَّةْ وَ نَحَاسْ. 11وَ الْمُعِدَّاتْ الْجَابَاهُمْ لَيَّهْ دَوْل، دَاوُدْ خَصَّصَاهُمْ لِلّٰهْ. وَ دَا مِثِلْ أَوَّلْ كُلَ، هُو خَصَّصْ لِلّٰهْ الْفُضَّةْ وَ الدَّهَبْ الشَّالَاهُمْ مِنْ الْأُمَمْ، مِنْ الْأَدَوْمِيِّينْ وَ الْمُوَابِيِّينْ وَ بَنِي عَمُّونْ وَ الْفِلِسْطِيِّينْ وَ الْعَمَالِقْ.
12وَ أَبِشَايْ وِلَيْدهَا لِصَرُويَةْ أَنَّصَرْ فِي الْأَدَوْمِيِّينْ وَ كَتَلْ مِنْهُمْ 18 000 رَاجِلْ فِي وَادِي الْمِلِحْ. 13وَ دَاوُدْ خَطَّ مُحَافِظِينْ فِي بَلَدْ أَدَوْم وَ كُلَّ الْأَدَوْمِيِّينْ قَعَدَوْا تِحِتْ حُكْمَهْ. وَ اللّٰهْ يَنْطِي النَّصُرْ لِدَاوُدْ فِي أَيِّ بَكَانْ الْيَمْشِي فَوْقَهْ.
أسامَي مسائيل دَاوُد
14وَ دَاوُدْ مَلَكْ فِي كُلَّ بَلَدْ إِسْرَائِيلْ. وَ حَكَمْ فِي كُلَّ شَعَبَهْ بِالْحَقّ وَ الْعَدَالَةْ. 15وَ يُوَابْ وِلَيْدهَا لِصَرُويَةْ، هُو قَايِدْ الدَّيْش وَ يَهُوشَفَطْ وِلَيْد أَخِلُودْ، هُو كَاتِبْ الْيِذَكِّرْ الْمَلِكْ. 16وَ صَدُوقْ وِلَيْد أَخِطُوبْ وَ أَبِيمَلِكْ وِلَيْد أَبِيَاتَرْ، هُمَّنْ دَوْل رُجَالْ دِينْ وَ شَوْشَا، هُو كَاتِبْ هَنَا الْمَلِكْ. 17وَ بَنَايَا وِلَيْد يَهُويَدَعْ، هُو مَسْؤُولْ فِي الْكِرِتِيِّينْ وَ الْفِلْتِيِّينْ وَ هُمَّنْ دَوْل حُرَّاسْ الْمَلِكْ. وَ أَوْلَادْ دَاوُدْ، هُمَّنْ مُمَثِّلِينْ الْمَلِكْ.
Currently Selected:
1 أخبار 18: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
