1 أخبار 16
16
1وَ هُمَّنْ جَابَوْا صَنْدُوقْ الرَّبّ وَ خَطَّوْه فِي لُبّ الْخَيْمَةْ الدَّاوُدْ جَهَّزَاهَا لَيَّهْ. وَ بَعَدْ دَا، قَدَّمَوْا لِلرَّبّ ضَحَايَا مُحَرَّقِينْ وَ ضَحَايَا سَلَامَةْ. 2وَ وَكِتْ دَاوُدْ قَدَّمْ الضَّحَايَا الْمُحَرَّقِينْ وَ ضَحَايَا السَّلَامَةْ دَوْل خَلَاصْ، هُو بَارَكْ الشَّعَبْ بِأُسُمْ اللّٰهْ. 3وَ بَعَدْ دَا، دَاوُدْ قَسَّمْ أَكِلْ لِكُلَّ بَنِي إِسْرَائِيلْ، مَرَةْ وَ رَاجِلْ. لِأَيِّ وَاحِدْ أَنْطَاهْ خُبْزَةْ وَ عَبُّودْ هَنَا تَمُرْ وَ عَبُّودْ هَنَا عِنَبْ.
اللاوِيِّين يحْمُدوا اللّه
4وَ دَاوُدْ كَلَّفْ وَاحِدِينْ مِنْ اللَّاوِيِّينْ يَقْعُدُوا قِدَّامْ صَنْدُوقْ اللّٰهْ لِيَشْكُرُوا وَ يَحْمُدُوا وَ يِمَجُّدُوا اللّٰهْ إِلٰـهْ بَنِي إِسْرَائِيلْ. 5وَ اللَّاوِيِّينْ دَوْل كَبِيرْهُمْ أَسَافْ وَ نَايْبَهْ زَكَرِيَّا وَ مَعَاهُمْ يَعِيِيلْ وَ شَمِيرَمُوتْ وَ يَحِيِيلْ وَ مَتِّتْيَا وَ أَلِيَابْ وَ بَنَايَا وَ عُبَيْد أَدَوْم وَ يَعِيِيلْ. هُمَّنْ دَوْل قَاعِدِينْ يَضُرْبُوا آلَاتْ الْمُسِيقَى مِثِلْ الْجِقِنْدِيَّةْ وَ أَمْ سِبَيْبَةْ وَ أَسَافْ كَمَانْ قَاعِدْ يَضْرُبْ النُّقَّارَةْ. 6وَ رُجَالْ الدِّينْ بَنَايَا وَ يَحَزِيِيلْ قَاعِدِينْ يَضُرْبُوا دَايْماً الْبُرُنْجِي قِدَّامْ صَنْدُوقْ مُعَاهَدَةْ الرَّبّ.
7وَ الْيَوْم دَا، أَوَّلْ مَرَّةْ دَاوُدْ كَلَّفْ أَسَافْ وَ اللَّاوِيِّينْ الْآخَرِينْ لِيَشْكُرُوا اللّٰهْ. 8وَ دَاهُو غِنَيْهُمْ.
أَشْكُرُوا اللّٰهْ وَ أَطْرُوا أُسْمَهْ!
وَ عَرُّفُوا الشُّعُوبْ الْآخَرِينْ بِأَعْمَالَهْ.
9غَنُّوا لَيَّهْ وَ أَمْدَحَوْه
وَ فَكُّرُوا فِي كُلَّ عَجَايْبَهْ.
10أَنْبَسْطُوا أَشَانْ أُسْمَهْ الْمُقَدَّسْ
وَ خَلِّي قُلُوبْكُو يِنْمَلُوا بِفَرَحْ
إِنْتُو الْقَاعِدِينْ تِتَابُعُوا اللّٰهْ.
11فَتُّشُوا اللّٰهْ وَ قُدُرْتَهْ
وَ وَجُّهُوا عَلَيَّهْ دَايْماً
12أَذَّكَّرَوْا عَجَايْبَهْ السَّوَّاهُمْ،
أَيْوَى، عَجَايْبَهْ وَ قَوَانِينَهْ الْأَمَرْ بَيْهُمْ.
13إِنْتُو، يَا ذُرِّيَّةْ إِسْرَائِيلْ، إِنْتُو عَبِيدَهْ.
إِنْتُو، يَا عِيَالْ يَعْقُوبْ،
إِنْتُو الْاللّٰهْ عَزَلَاكُو.
14اللّٰهْ هُو بَسْ إِلٰـهْنَا
الْيَحْكِمْ فِي كُلَّ الْأَرْض.
15أَذَّكَّرَوْا دَايْماً مُعَاهَدَتَهْ
وَ كَلَامَهْ الْأَمَرْ بَيَّهْ لِأَلِفْ ذُرِّيَّةْ.
16وَ دِي مُعَاهَدَتَهْ السَّوَّاهَا مَعَ إِبْرَاهِيمْ#16:16 مُعَاهَدَتَهْ السَّوَّاهَا مَعَ إِبْرَاهِيمْ: التاريخ دا تلقوه في تكوين 12:7.
وَ أَكَّدْهَا بِحَلِيفَةْ لِإِسْحَاقْ.
17هُو ثَبَّتْ شَرْط لِذُرِّيَّةْ يَعْقُوبْ
وَ سَوَّى مُعَاهَدَةْ دَايْمَةْ مَعَ بَنِي إِسْرَائِيلْ.
18وَ قَالْ: «أَنَا نَنْطِيكُو بَلَدْ كَنْعَانْ
وَ دَا قِسِمْ التَّلْقَوْه مِثِلْ وَرَثَةْ.»
19وَ فِي الزَّمَنْ دَا، عَدَدْكُو شِيَّةْ،
إِنْتُو شِيَّةْ مَرَّةْ وَاحِدْ
وَ سَاكْنِينْ فِي الْبَلَدْ دِي مِثِلْ أَجَانِبْ.
20إِنْتُو رَايْغِينْ مِنْ أُمَّةْ لِأُمَّةْ
وَ مِنْ مَمْلَكَةْ لِشَعَبْ آخَرْ.
21لَاكِنْ اللّٰهْ مَا خَلَّى نَادُمْ يَظْلُمْكُو
وَ عَاقَبْ مُلُوكْ فِي شَانْكُو.
22وَ قَالْ: «مَا تِلَمُّسُوا النَّاسْ
الْأَنَا مَسَحْتُهُمْ وَ دَرَّجْتُهُمْ
وَ مَا تِسَوُّوا الْفَسَالَةْ لِأَنْبِيَائِي.»
23يَا سُكَّانْ الْأَرْض، أَشْكُرُوا اللّٰهْ بِغِنَيْ
وَ كُلَّ يَوْم بَشُّرُوا بِنَجَاتَهْ.
24حَجُّوا بِمَجْدَهْ لِكُلَّ الْأُمَمْ
وَ بِعَجَايْبَهْ لِكُلَّ الشُّعُوبْ.
25أَشَانْ اللّٰهْ عَظِيمْ
وَ وَاجِبْ لَيَّهْ الْحَمْد الْكَتِيرْ.
هُو مُخِيفْ زِيَادَةْ
وَ فَايِتْ كُلَّ الْإِلٰـهَاتْ.
26أَشَانْ كُلَّ إِلٰـهَاتْ الشُّعُوبْ مَا نَافْعِينْ
وَ لَاكِنْ اللّٰهْ هُو بَسْ خَلَقْ السَّمَاوَاتْ.
27الْمَجْد وَ الْعَظَمَةْ هِنَيْه
وَ فِي بَكَانَهْ تِنْلَقِي الْقُدْرَةْ وَ الْفَرْحَةْ.
28مَجُّدُوا اللّٰهْ،
يَا قَبَايِلْ الْأَرْض!
مَجُّدُوا اللّٰهْ
أَشَانْ هُو الْمَجِيدْ وَ الْقَادِرْ.
29مَجُّدُوا اللّٰهْ
أَشَانْ أُسْمَهْ الْمَجِيدْ!
قَدُّمُوا هَدَايَاكُو قِدَّامَهْ
وَ أَسْجُدُوا لَيَّهْ أَشَانْ هُو الْقُدُّوسْ.
30أَرْجُفُوا قِدَّامَهْ، يَا كُلَّ سُكَّانْ الْأَرْض.
الْعَالَمْ يَقْعُدْ ثَابِتْ، مَا يِنْهَزَّ.
31خَلِّي السَّمَاءْ تِنْبَسِطْ وَ الْأَرْض تَفْرَحْ
وَ يُقُولُوا فِي أُسْط الْأُمَمْ:
«اللّٰهْ هُو الْمَلِكْ.»
32خَلِّي الْبَحَرْ يِدَقْدِقْ
بِكُلَّ شَيّءْ الْفِي لُبَّهْ.
وَ خَلِّي الْكَدَادَةْ تَفْرَحْ
بِكُلَّ شَيّءْ الْفَوْقهَا.
33وَ خَلِّي شَدَرْ الْغَابَةْ يِزَغْرُطُوا
قِدَّامْ اللّٰهْ
أَشَانْ اللّٰهْ يَجِي
يَحْكِمْ الْأَرْض.
34أَشْكُرُوا اللّٰهْ أَشَانْ هُو رَحِيمْ
وَ رَحْمَتَهْ دَايْمَةْ إِلَى الْأَبَدْ.
35وَ قُولُوا لَيَّهْ:
«يَا إِلٰـهْ النَّجَاةْ، نَجِّينَا!
أَجْمَعْنَا وَ نَجِّينَا مِنْ أُسْط الْأُمَمْ.
وَ بَيْدَا، نَحْمُدُوا أُسْمَكْ الْمُقَدَّسْ
وَ نِمَجُّدُوكْ وَ نَشْكُرُوكْ.»
36بَارَكْ اللّٰهْ إِلٰـهْ بَنِي إِسْرَائِيلْ
مِنْ زَمَانْ وَ إِلَى الْأَبَدْ.
وَ كُلَّ الشَّعَبْ قَالَوْا: «آمِينْ!» وَ شَكَرَوْا اللّٰهْ.
37وَ دَاوُدْ أَمَرْ أَسَافْ وَ أَخْوَانَهْ يَقْعُدُوا قِدَّامْ صَنْدُوقْ مُعَاهَدَةْ اللّٰهْ أَشَانْ يِسَوُّوا خِدْمِتْهُمْ الْوَاجِبْ حَسَبْ الشُّرُوطْ الْيَوْمِي. 38وَ عُبَيْد أَدَوْم وِلَيْد يَدُوتُونْ وَ حُوسَا وَ 68 مِنْ أَخْوَانْهُمْ هُمَّنْ حُرَّاسْ بِيبَانْ بَيْت اللّٰهْ. 39وَ دَاوُدْ وَكَّلْ صَدُوقْ رَاجِلْ الدِّينْ وَ رُجَالْ دِينْ آخَرِينْ الْمِنْ عَايِلْتَهْ بِخِدْمَةْ خَيْمَةْ اللّٰهْ الْقَاعِدَةْ فِي بَكَانْ الْعِبَادَةْ فِي قِبْعُونْ. 40وَ يِقَدُّمُوا ضَحِيَّةْ مُحَرَّقَةْ لِلّٰهْ أَيِّ يَوْم، فَجُرْ وَ عَشِيَّةْ، فِي الْمَدْبَحْ هَنَا الضَّحَايَا. وَ دَا لِيِطَبُّقُوا كُلَّ شَيّءْ الْمَكْتُوبْ فِي كِتَابْ التَّوْرَاةْ الْاللّٰهْ أَمَرْ بَيَّهْ بَنِي إِسْرَائِيلْ. 41وَ مَعَاهُمْ هَيْمَانْ وَ يَدُوتُونْ وَ النَّاسْ الْآخَرِينْ الْعَزَلَوْهُمْ خَاصَّةً لِيَشْكُرُوا اللّٰهْ أَشَانْ رَحْمَتَهْ دَايْمَةْ إِلَى الْأَبَدْ. 42وَ هَيْمَانْ وَ يَدُوتُونْ هُمَّنْ دَوْل يَضُرْبُوا الْبُرُنْجِي وَ النُّقَّارَةْ وَ آلَاتْ الْمُسِيقَى لِيَشْكُرُوا الرَّبّ بِغِنَيْ. وَ أَوْلَادْ يَدُوتُونْ كَمَانْ يَحَرْسُوا الْبَابْ.
43وَ بَعَدْ دَا، خَلَاصْ كُلَّ الشَّعَبْ شَتَّوْا وَ أَيِّ وَاحِدْ مَشَى بَيْتَهْ. وَ دَاوُدْ قَبَّلْ بَيْتَهْ لِيِبَارِكْ عَايِلْتَهْ.
Currently Selected:
1 أخبار 16: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
