1 أخبار 15
15
دَاوُد يدَوْر يودّي صنْدوق اللّه
1وَ دَاوُدْ بَنَى بُيُوتْ لِنَفْسَهْ فِي حِلِّتَهْ الْأُسُمْهَا مَدِينَةْ دَاوُدْ. وَ جَهَّزْ بَكَانْ لِصَنْدُوقْ الرَّبّ وَ بَنَى لَيَّهْ خَيْمَةْ. 2وَ بَعَدْ دَا، دَاوُدْ قَالْ: «صَنْدُوقْ الرَّبّ نَادُمْ مَا يِشِيلَهْ إِلَّا اللَّاوِيِّينْ بَسْ يِشِيلُوهْ أَشَانْ هُمَّنْ بَسْ اللّٰهْ عَزَلَاهُمْ لِيِشِيلُوا صَنْدُوقْ اللّٰهْ وَ يَخْدُمُوا لَيَّهْ إِلَى الْأَبَدْ.»
3وَ دَاوُدْ لَمَّ كُلَّ بَنِي إِسْرَائِيلْ فِي أُورُشَلِيمْ لِيِوَدُّوا صَنْدُوقْ اللّٰهْ فِي الْبَكَانْ الْهُو جَهَّزَهْ لَيَّهْ. 4وَ هُو لَمَّ رُجَالْ الدِّينْ مِنْ ذُرِّيَّةْ هَارُونْ وَ اللَّاوِيِّينْ.
5مِنْ ذُرِّيَّةْ قَهَاتْ شَيْخهُمْ أُرِيِيلْ وَ مَعَايَهْ نَاسَهْ عَدَدْهُمْ 120.
6وَ مِنْ ذُرِّيَّةْ مَرَارِي شَيْخهُمْ عَسَايَا وَ مَعَايَهْ نَاسَهْ عَدَدْهُمْ 220.
7وَ مِنْ ذُرِّيَّةْ قِرْشُونْ شَيْخهُمْ يُوِيلْ وَ مَعَايَهْ نَاسَهْ عَدَدْهُمْ 130.
8وَ مِنْ ذُرِّيَّةْ أَلِصَافَنْ شَيْخهُمْ شَمَعْيَا وَ مَعَايَهْ نَاسَهْ عَدَدْهُمْ 200.
9وَ مِنْ ذُرِّيَّةْ حَبْرُونْ شَيْخهُمْ أَلِيِيلْ وَ مَعَايَهْ نَاسَهْ عَدَدْهُمْ 80.
10وَ مِنْ ذُرِّيَّةْ عُزِّيِيلْ شَيْخهُمْ عَمِنَدَابْ وَ مَعَايَهْ نَاسَهْ عَدَدْهُمْ 112.
11وَ دَاوُدْ نَادَى رُجَالْ الدِّينْ صَدُوقْ وَ أَبِيَاتَرْ وَ نَادَى اللَّاوِيِّينْ أُرِيِيلْ وَ عَسَايَا وَ يُوِيلْ وَ شَمَعْيَا وَ أَلِيِيلْ وَ عَمِنَدَابْ. 12وَ قَالْ لَيْهُمْ: «إِنْتُو، يَا كُبَارَاتْ عَايِلَاتْ اللَّاوِيِّينْ، خَصُّصُوا نُفُوسْكُو إِنْتُو وَ أَخْوَانْكُو. وَ شِيلُوا صَنْدُوقْ اللّٰهْ إِلٰـهْ بَنِي إِسْرَائِيلْ وَ وَدُّوهْ فِي الْبَكَانْ الْأَنَا جَهَّزْتَهْ لَيَّهْ. 13أَشَانْ أَوَّلْ وَكِتْ إِنْتُو مَا فِيكُو، اللّٰهْ إِلٰـهْنَا ضَرَبَانَا بِسَبَبْ أَنِحْنَ مَا طَبَّقْنَا الشُّرُوطْ الْبُخُصُّوا صَنْدُوقْ الْمُعَاهَدَةْ.»
14وَ خَلَاصْ رُجَالْ الدِّينْ وَ اللَّاوِيِّينْ خَصَّصَوْا نُفُوسْهُمْ أَشَانْ يِشِيلُوا وَ يِوَدُّوا صَنْدُوقْ اللّٰهْ إِلٰـهْ بَنِي إِسْرَائِيلْ. 15وَ اللَّاوِيِّينْ شَالَوْا صَنْدُوقْ الرَّبّ بِالْعِيدَانْ فِي كَتَافَيْهُمْ مِثِلْ مُوسَى أَمَرْ بَيَّهْ حَسَبْ كَلَامْ اللّٰهْ.
16وَ دَاوُدْ أَمَرْ كُبَارَاتْ اللَّاوِيِّينْ يِكَلُّفُوا أَخْوَانْهُمْ الْغَنَّايِينْ بِآلَاتْ الْمُسِيقَى مِثِلْ الْجِقِنْدِيَّةْ وَ أَمْ سِبَيْبَةْ وَ النُّقَّارَةْ. وَ يِسْتَعْمَلَوْا الْآلَاتْ دَوْل بِشِدَّةْ أَشَانْ يِوَصُّفُوا فَرَحْهُمْ. 17وَ خَلَاصْ كُبَارَاتْ اللَّاوِيِّينْ كَلَّفَوْا هَيْمَانْ وِلَيْد يُوِيلْ وَ قَرِيبَهْ أَسَافْ وِلَيْد بَرَكْيَا وَ إِتَانْ وِلَيْد قُشَايَا الْهُو مِنْ ذُرِّيَّةْ مَرَارِي.
18وَ مَعَاهُمْ أَخْوَانْهُمْ لَاوِيِّينْ آخَرِينْ حُرَّاسْ بِيبَانْ بَيْت اللّٰهْ. وَ هُمَّنْ زَكَرِيَّا وَ بَيْن وَ يَعَزِيِيلْ وَ شَمِيرَمُوتْ وَ يَحِيِيلْ وَ عُنِّي وَ أَلِيَابْ وَ بَنَايَا وَ مَعَسِيَّا وَ مَتِّتْيَا وَ أَلِفَلِيهُو وَ مِقْنِيَا وَ عُبَيْد أَدَوْم وَ يَعِيِيلْ. 19وَ الْغَنَّايِينْ هَيْمَانْ وَ أَسَافْ وَ إِتَانْ عِنْدُهُمْ نَقَاقِيرْ هَنَا نَحَاسْ الْيَضُرْبُوهُمْ. 20وَ زَكَرِيَّا وَ عَزِيِيلْ وَ شَمِيرَمُوتْ وَ يَحِيِيلْ وَ عُنِّي وَ أَلِيَابْ وَ مَعَسِيَّا وَ بَنَايَا هُمَّنْ دَوْل يَضُرْبُوا الْجِقِنْدِيَّةْ بِصَوْت عَالِي. 21وَ مَتِّتْيَا وَ أَلِفَلِيهُو وَ مِقْنِيَا وَ عُبَيْد أَدَوْم وَ يَعِيِيلْ وَ عَزَزْيَا هُمَّنْ دَوْل يَضُرْبُوا الْجِقِنْدِيَّةْ الْعِنْدَهَا تَمَانَةْ حَبِلْ لِيُقُودُوا الْغِنَيْ.
22وَ كَنَنْيَا كَبِيرْ اللَّاوِيِّينْ، هُو بَسْ مَسْؤُولْ بِشَيْلِينْ الصَّنْدُوقْ. وَ هُو يِرَاقِبْ الشَّيْلِينْ أَشَانْ هُو يَعَرِفْ كِكَّيْف يِسَوِّيهْ. 23وَ بَرَكْيَا وَ أَلِقَانَى هُمَّنْ حُرَّاسْ الصَّنْدُوقْ. 24وَ عُبَيْد أَدَوْم وَ يَحِيَا هُمَّنْ كُلَ حُرَّاسْ الصَّنْدُوقْ. وَ رُجَالْ الدِّينْ شَبَنْيَا وَ يُشَافَاطْ وَ نَتَنِيلْ وَ عَمَاسَايْ وَ زَكَرِيَّا وَ بَنَايَا وَ أَلِعَازَرْ، هُمَّنْ يَضُرْبُوا الْبُرُنْجِي قِدَّامْ صَنْدُوقْ الرَّبّ.
صنْدوق اللّه وصّل في أُورُشَلِيم
25وَ خَلَاصْ، بِفَرْحَةْ شَدِيدَةْ دَاوُدْ وَ شُيُوخْ بَنِي إِسْرَائِيلْ وَ قُيَّادْ الْآلَافْ مَشَوْا أَشَانْ يِجِيبُوا صَنْدُوقْ مُعَاهَدَةْ اللّٰهْ مِنْ بَيْت عُبَيْد أَدَوْم. 26وَ بِمُسَاعَدَةْ الرَّبّ، اللَّاوِيِّينْ شَالَوْا الصَّنْدُوقْ. وَ قَدَّمَوْا ضَحَايَا لِلّٰهْ هَنَا سَبْعَةْ تَوْر وَ سَبْعَةْ كَبِشْ. 27وَ دَاوُدْ مَعَ كُلَّ اللَّاوِيِّينْ الشَّايْلِينْ الصَّنْدُوقْ وَ الْغَنَّايِينْ وَ كَنَنْيَا الْمَسْؤُولْ هَنَا الشَّيْلِينْ، هُمَّنْ كُلُّهُمْ لَابْسِينْ جَلَالِيبْ هَنَا قُمَاشْ سَمَحْ. وَ دَاوُدْ كَمَانْ لَابِسْ خَلَقْ قِصَيِّرْ مِثِلْ هَنَا رُجَالْ الدِّينْ. 28وَ كُلَّ بَنِي إِسْرَائِيلْ وَدَّوْا صَنْدُوقْ مُعَاهَدَةْ اللّٰهْ فِي أُورُشَلِيمْ بِزَغْرَاطْ وَ ضَرِبِينْ بُوقْ وَ بُرُنْجِي وَ نُقَّارَةْ وَ بِضَرِبِينْ أَمْ سِبَيْبَةْ وَ جِقِنْدِيَّةْ. 29وَ وَكِتْ قَاعِدِينْ يِجِيبُوا الصَّنْدُوقْ فِي مَدِينَةْ دَاوُدْ، مِكَالْ بِنَيَّةْ شَاوُولْ قَاعِدَةْ تِشِيفْ مِنْ الشُّبَّاكْ. وَ شَافَتْ الْمَلِكْ دَاوُدْ قَاعِدْ يَلْعَبْ وَ يِنَطِّطْ. وَ خَلَاصْ هِي أَبَتَهْ مِنْ قَلِبْهَا.
Currently Selected:
1 أخبار 15: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
