Rooma 4

Ibraahiim bigi saalih be sabab iimaanah

1Wa be misil da, nuguulu chunu fi abuuna Ibraahiim al-aniina maragna minnah ? Chunu al-bigi leyah ? 2Kan Ibraahiim bigi saalih giddaam Allah be sabab amalah, hu indah hagg yistakbar. Laakin ma fi naadum indah hagg yistakbar giddaam Allah. 3Wa l-Kitaab buguul chunu ? Buguul : <Ibraahiim aaman be kalaam Allah wa fi chaan iimaanah, Allah jaʼalah naadum saalih.>#4:3 Al-kalaam da talgooh fi Takwiin 15:6.

4Fakkuru fi l-kalaam da. Kan naadum yakhdim, hu yalga ujra wa l-ujra di ma hadiiye. Hi al-cheyy al-waajib leyah. 5Wa be l-aks, kan naadum ma yakhdim le yalga ajur laakin yiʼaamin be Allah al-yisawwi al-muznib saalih, khalaas al-naadum da, Allah yichiif iimaanah wa yajʼalah saalih. 6Wa l-nabi Dawuud kula hajja be barakat al-naadum al-Allah jaʼalah saalih bala ma yichiif amalah. 7Gaal :

<Mabruuk le l-naas al-Allah marag minhum isyaanhum

wa khafar leehum zunuubhum.

8Mabruuk le l-naadum

al-Allah ma yajʼalah muznib.>#4:8 Al-kalaam da talgooh fi Zabuur 32:1-2.

9Wa nasʼalku, al-baraka di hint al-Yahuud ahal al-tahuura wiheedhum walla ? La, hi hint al-naas al-ma mutahhariin kula. Awwal, gulna be sabab al-iimaan bas Allah jaʼal Ibraahiim saalih. 10Wa Allah jaʼalah saalih mata ? Hal da bigi wakit hu mutahhar walla wakit hu lissaaʼ ma mutahhar ? Da bigi leyah wakit hu ma mutahhar, gubbaal ma tahharooh.

11Wa Allah anta alaamat al-tahuura le Ibraahiim achaan yiwassif kadar gubbaal ma yitahhuruuh, hu bigi saalih be sabab iimaanah. Wa be misil da, Ibraahiim bigi abu kulla l-naas al-Allah jaʼalaahum saalihiin be sabab iimaanhum hatta kan humman ma mutahhariin kula. 12Wa Ibraahiim bigi abu al-naas al-mutahhariin kula, al-ma yintaklu ale l-tahuura wiheedha laakin al-induhum battaan al-iimaan misil al-iimaan al-abuuna Ibraahiim indah, wakit hu lissaaʼ ma mutahhar.

Waʼad Allah wa l-iimaan

13Wa Allah waaʼad Ibraahiim wa zurriiytah humman yawrusu al-dunya. Wa Allah waaʼad Ibraahiim ma achaan hu taabaʼ churuut al-Tawraat, laakin be sabab iimaanah al-bigi beyah saalih. 14Achaan kan al-warasa hi hint al-naas al-yitaabuʼu churuut al-Tawraat bas, khalaas al-iimaan ma indah faayde wa l-waʼad bigi baatil. 15Achaan churuut al-Tawraat yijiibu khadab Allah foog al-naas.#4:15 churuut al-Tawraat yijiibu khadab Allah foog al-naas Maʼanaatah al-Tawraat indah churuut wa l-naas yikhaalufuuhum wa achaan da humman khaatiyiin wa khadab Allah yaji fooghum. Wa laakin kan churuut ma fi, mukhaalafat al-churuut kula ma fi.

16Wa achaan da, Allah waaʼad be l-warasa fi asaas al-iimaan wa l-muʼminiin yalgooha be niʼmat Allah. Wa Allah dawwar yiʼakkid kadar al-waʼad yabga le zurriiyit Ibraahiim kullaha. Al-waʼad ma le ahal al-Tawraat bas laakin le kulla l-naas al-iimaanhum misil iimaan Ibraahiim. Wa misil da, hu abuuna kullina. 17Achaan da bas, fi l-Kitaab, Allah gaal : <Ana nisawwiik abu hana umam katiiriin.>#4:17 Al-kalaam da talgooh fi Takwiin 17:5. Wa khalaas hu abuuna giddaam Allah al-hu aaman beyah. Wa Allah hu bas al-yanti al-haya le l-maytiin wa be amrah, hu yikawwin al-cheyy al-awwal ma mawjuud.

18Hatta kan acham ma fiih kula, Ibraahiim aaman be kalaam Allah wa achamah fi Allah gaaʼid saabit. Wa fi l-akhiir, hu bigi abu hana umam katiiriin misil Allah awwal gaalah leyah : <Zurriiytak tabga katiire misil al-nujuum.>#4:18 Al-kalaam da talgooh fi Takwiin 15:5. 19Ibraahiim irif fi nafsah kadar hu bigi chaayib wa ma indah gudra le l-waaluuda achaan umrah misil miya sana. Wa martah Saara kula ajuuz ma indaha acham fi l-waaluuda. Wa laakin iimaan Ibraahiim ma nagas. 20Abadan ma chakkak fi waʼad Allah wa ma khalla minnah al-iimaan. Laakin bigi gawi ziyaada fi iimaanah wa chakar Allah 21achaan hu muʼakkid tamaam kadar Allah yagdar yitimm al-cheyy al-waaʼadah beyah. 22Wa fi chaan iimaanah, Allah jaʼalah naadum saalih. 23Al-kalimaat «Allah jaʼalah naadum saalih» dool ma ankatabo le Ibraahiim wiheedah bas. 24Laakin ankatabo leena aniina kula, achaan Allah yajʼalna aniina kula saalihiin kan niʼaamunu beyah hu al-baʼas Rabbina Isa min ust al-maytiin. 25Allah sallamah le l-moot be sabab khataayaana wa baʼasah achaan beyah hu, nabgo saalihiin.

Currently Selected:

Rooma 4: ADT19

Highlight

Copy