Matta 8
8
Al-Masiih daawa naadum indah jidaam
1Wakit Isa dalla min al-hajar, naas katiiriin marra waahid taabaʼooh. 2Wa raajil waahid indah jidaam#8:2 jidaam Fi l-wakit daak, ayyi marad jismi yinaaduuh jidaam. ja sajad giddaam Isa wa gaal : «Ya sayyidna, kan tidoor tachfiini, akiid inta tagdar wa ana nabga taahir.» 3Wa Isa madda iidah wa limis al-raajil al-indah jidaam wa gaal : «Nidoor nachfiik. Abga taahir.» Wa tawwaali bigi taahir min al-jidaam. 4Wa Isa gaal leyah : «Awʼa baalak, ma tiʼoori naadum waahid lahaddi tamchi tiwassif nafsak le raajil al-diin wa tigaddim dahiiye le Allah misil al-nabi Muusa amaraana beeha. Wa misil da, al-naas yaʼarfu kadar inta ligiit al-aafe wa bigiit taahir.»
Iimaan hana kabiir al-askar
5Wakit Isa macha fi hillit Kafar Naahuum tawwaali naadum waahid ja leyah. Hu kabiir askar al-Roomaaniyiin wa chahadah le Isa. 6Wa gaal : «Ya sayyidna, khaddaami mardaan wa bigi mukarsah. Jildah maat. Hu raagid fi l-beet wa taʼbaan chadiid.» 7Wa Isa gaal leyah : «Khalaas, namchu wa nidaawiih.»
8Wa kabiir al-askar radda leyah wa gaal : «Ya sayyidna, ana ma indi hagg le tadkhul fi beeti. Wa laakin guul kilme waahide bas wa khaddaami yalga al-aafe. 9Achaan ana kula indi kabiir min foog leyi al-nitabbig amrah. Wa ana kula masʼuul fi naas al-tihit minni al-yitabbugu amri. Wa kan nuguul le waahid : ‹Amchi›, hu yamchi. Wa kan nuguul le naadum aakhar : ‹Taʼaal›, hu yaji. Wa kan nuguul le abdi : ‹Sawwi ke›, hu yisawwiih.»
10Wa Isa simiʼ kalaamah wa alʼajjab bilheen wa hajja le l-naas al-gaaʼidiin yitaabuʼuuh wa gaal : «Nuguul leeku al-hagg, ma ligiit naadum waahid min Bani Israaʼiil al-indah iimaan chadiid misil iimaan al-naadum da ! 11Wa nuguul leeku, naas katiiriin yaju min sabaah wa min kharib wa yilʼachcho maʼa Ibraahiim wa Ishaakh wa Yaakhuub fi mamlakat Allah. 12Wa laakin al-naas al-waajib yamulku al-mamlaka di, Allah yatrudhum fi l-dalaam al-barraani. Hinaak naas yabku wa yiʼaddu sunuunhum min al-nadaama.»
13Wa Isa hajja le kabiir al-askar wa gaal : «Khalaas amchi wa khalli yabga leek misil inta aamant beyah.» Wa fi l-wakit da bas, khaddaamah ligi al-aafe.
Al-Masiih fi beet Butrus
14Wa Isa macha fi beet Butrus wa ligi nasiibtah le Butrus wa hi raagde indaha wirde. 15Wa Isa limis iidha wa l-wirde khallatha wa hi gammat dayyafatah.
16Wa fi l-makhrib, naas katiiriin jo leyah wa jaabo muchootiniin katiiriin wa Isa gaaʼid yatrud al-chawaatiin be kilme waahide bas wa l-mardaaniin kulluhum ligo al-aafe. 17Wa misil da, al-kalaam al-Allah gaalah be khachum al-nabi Ichaʼya tamma. Al-nabi gaal : <Al-marad al-foogna aniina, hu zaatah chaalah wa l-wajaʼ al-foogna, hu bas himlah.>#8:17 Al-kalaam da talgooh fi Ichaʼya 53:4.
Naaseen dawwaro yitaabuʼu Isa
18Wa Isa chaaf naas katiiriin lammo foogah wa amar talaamiizah wa gaal : «Taʼaalu nagtaʼo al-bahar.» 19Wa waahid min al-ulama ja leyah wa gaal : «Ya sayyidna, nitaabiʼak fi ayyi bakaan al-tamchi foogah.» 20Wa Isa radda leyah wa gaal : «Al-baʼachoom indah nugra wa l-teer indah uchch wa laakin ana Ibn al-Insaan ma indi bakaan nidiss raasi foogah.»
21Wa naadum aakhar min talaamiizah gaal : «Ya sayyidna, antiini izin achaan namchi nadfin abuuyi. Wa baʼad da, naji nitaabiʼak.» 22Wa Isa radda leyah wa gaal : «Taʼaal taabiʼni hassaʼ wa khalli al-maytiin yadfunu maytiinhum.»
Al-Masiih waggaf al-riih al-chadiide
23Wa khalaas Isa rikib fi l-markaba wa talaamiizah taabaʼooh wa rikbo maʼaayah. 24Wa be khafla riih chadiide marra waahid saagat fi l-bahar wa gawwamat al-challaal wa l-markaba anmalat almi. Wa Isa naayim. 25Wa l-talaamiiz garrabo leyah wa gawwamooh min al-noom wa gaalo : «Ya sayyidna, najjiina ! Aniina mutna !» 26Wa Isa gaal leehum : «Iimaanku lissaaʼ daʼiif. Maala takhaafo ?»
Wa gamma foog wa kachcha le l-riih wa l-bahar. Wa tawwaali, al-wata bigat haadiye marra waahid. 27Wa l-naas alʼajjabo marra waahid wa gaalo : «Al-naadum da, hu yaatu ? Lahaddi al-riih wa l-bahar kula yitiiʼuuh !»
Muchootiniin itneen ligo al-aafe
28Wa baʼad Isa gataʼ al-bahar wa wassal fi balad al-Gadariyiin, rujaal itneen marago min al-khubuur wa jo laagooh. Wa humman muchootiniin wa khatiiriin bilheen wa l-naas khaafo minhum wa naadum waahid kula ma yagdar yamchi be l-derib da. 29Wa l-muchootiniin gammo aato wa gaalo : «Ya Ibn Allah, inta tidoor minnina chunu ? Inta jiit achaan tiʼazzibna gubbaal yoom al-Hisaab walla ?»
30Wa chiyya baʼiid minhum, fi khanaaziir katiiriin gaaʼidiin yasraho. 31Wa l-chawaatiin chahado Isa wa gaalo : «Kan tatrudna, khalaas rassilna fi l-khanaaziir dool». 32Wa Isa gaal leehum : «Yalla amchu !» Wa humman marago min al-rujaal dool wa dakhalo fi l-khanaaziir. Wa l-khanaaziir kulluhum jaro min taraf al-hajar wa wagaʼo fi l-bahar wa khalaas al-almi akalaahum.
33Wa ruʼyaan al-khanaaziir arrado wa macho khabbaro fi l-hille be kulla cheyy al-chaafooh wa kikkeef al-muchootiniin ligo al-aafe. 34Wa khalaas naas al-hille marago kulluhum achaan yigaabulu Isa wa wakit laagooh, chahadooh achaan yamrug min baladhum.
Currently Selected:
Matta 8: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.
