Matta 6
6
Al-sadakha
1«Awʼu baalku. Kan tisawwu amal diinku giddaam al-naas achaan tidooru humman yichiifuuku bas, da ma yanfaʼ. Ma talgo ajur min abuuku Allah al-fi l-sama. 2Wakit tanti sadakha le naadum miskiin, ma tisawwi haraka katiire misil al-munaafikhiin. Humman yantu sadakha fi buyuut al-sala wa fi l-chawaariʼ achaan al-naas yachkuruuhum. Nuguul leeku al-hagg, ma yalgo ajur illa l-chukur al-ligooh min al-naas. 3Laakin inta wakit tanti sadakha, ma tikhalli iidak al-isra taʼarif al-cheyy al-iidak al-zeene gaaʼide tisawwiih. 4Wa misil da, wakit tanti sadakha ma tikhalli naadum waahid yaʼarfah wa abuuk Allah al-yichiif al-cheyy al-naas ma yichiifuuh, hu bas yantiik ajrak.
Al-sala
5«Wa wakit tisallu, ma tisallu misil al-munaafikhiin. Humman yiriidu yisallu fi buyuut al-sala wa fi l-chawaariʼ achaan al-naas yichiifuuhum. Nuguul leeku al-hagg, humman ma yalgo ajur illa l-chukur al-yalgooh min al-naas. 6Wa laakin inta, wakit tidoor tisalli, amchi daakhal fi beetak wa sidd baabak wa salli le Allah abuuk al-ma binchaaf. Wa abuuk Allah al-bichiif al-cheyy al-naas ma bichiifuuh, hu bas yantiik ajrak. 7Wa wakit tisallu ma tiraddudu kalaam al-ma indah faayde misil al-naas al-ma yaʼarfu Allah. Fi fikirhum, Allah ma yasmaʼ kalaamhum illa kan kalaamhum bigi katiir. 8Ma tabgo misilhum achaan al-cheyy al-intu tidooruuh, Allah yaʼarfah gubbaal ma tasʼalooh.
9«Khalaas, sallu misil al-sala di.
Ya Abuuna al-fi l-samaawaat,
khalli yaʼarfu kadar usmak khudduus.
10Khalli mamlakatak taji.
Khalli yitabbugu kalaamak fi l-ard
misil tabbagooh fi l-sama.
11Antiina al-akil
al-yitimmina kulla yoom.
12Saamih leena khataana
misil aniina gaaʼidiin nisaamuhu
al-naas al-khito foogna.
13Ma tidissina fi l-tajriba
laakin najjiina min charr Ibliis.
Wa leek inta bas
al-muluk wa l-gudra wa l-majd
daayman wa ila l-abad. Aamiin.
14«Kan intu saamahtu al-naas al-khito foogku, Allah abuuku fi l-sama yisaamihku. 15Wa laakin kan intu ma saamahtu al-naas al-khito foogku, abuuku Allah ma yisaamih leeku khataayaaku.
Al-siyaam
16«Wa wakit tusuumu, ma tarbutu wujuuhku misil al-munaafikhiin. Humman yikarchumu wujuuhhum achaan yidooru al-naas yaʼarfu humman saaymiin. Nuguul leeku al-hagg, ma yalgo ajur illa l-chukur al-ligooh min al-naas. 17Wa laakin wakit inta saayim, khassil wijhak wa amsah raasak be itir 18achaan naadum ma yaʼarif kadar inta saayim illa abuuk Allah al-ma yinchaaf. Wa abuuk Allah, al-yichiif al-cheyy al-naas ma yichiifuuh, hu bas yantiik ajrak.
Al-maal
19«Ma tudummu al-maal fi l-ard achaan hini fi l-ard al-arda wa l-sagar bitallufuuh wa l-saraariig yadkhulu yasurguuh. 20Akheer tudummu al-maal fi bakaan Allah fi l-samaawaat. Hinaak al-arda wa l-sagar ma bitallufuuh wa l-saraariig ma yadkhulu yasurguuh. 21Achaan al-bakaan al-maalak gaaʼid foogah, da bas al-bakaan al-galbak gaaʼid foogah.
22«Al-een hi faanuus al-jilid. Kan eenak taybe, inta gaaʼid fi l-nuur. 23Wa kan eenak talfaane, inta gaaʼid fi l-dalaam. Wa kan nuurak bigi adlam, inta gaaʼid fi dalaam azrag marra waahid.
24«Ma mumkin naadum yabga abid le siyaad itneen. Achaan hu yakrah al-awwal wa yiriid al-taani walla yihibbah le l-awwal be kulla galbah wa yahgir al-taani. Wa intu kula, ma tagdaro tabgo abiid le Allah wa abiid le l-maal.
Al-kalaam al-bukhuss al-hamm
25«Wa fi chaan da, nuguul leeku ma tihimmu le hayaatku fi chaan al-akil wa l-charaab wa ma tihimmu le jilidku fi chaan al-khulgaan. Al-haya ma akheer min al-akil walla ? Wa l-jilid ma akheer min al-khulgaan walla ? 26Chiifu al-tuyuur wa fakkuru fooghum. Humman ma yiteerubu wa la yahartu wa la yagtaʼo wa la yakhzunu wa laakin Allah abuuku fi l-sama yiʼayyichhum. Wa intu ma akheer ziyaada le Allah min al-tuyuur walla ? 27Wa kan naadum minku yihimm katiir kula, al-hamm da ma yagdar yiziid umrah be saaʼa waahide kula.
28«Wa maala tihimmu fi chaan al-khulgaan ? Chiifu al-nuwwaar fi l-kadaade wa fakkuru kikkeef yugumm. Ma yakhdim wa ma yisawwi kiswe. 29Wa laakin nuguul leeku akiid al-malik Suleymaan zaatah fi darajatah al-kabiire abadan ma libis khalag jamiil misil jamaal al-nuwwaar da. 30Wa kan Allah yilabbis gechch al-kadaade be nuwwaar jamiil wa l-gechch da gaaʼid al-yoom wa ambaakir yagtaʼooh wa yazguluuh fi l-naar, akiid Allah yilabbisku intu. Chiddu heelku intu al-iimaanku lissaaʼ daʼiif.
31«Khalaas, ma tihimmu wa ma tasʼalo nufuusku ‹Naakulu chunu ? Nacharbo chunu ? Nalbaso chunu ?› 32Kulla l-naas al-ma muʼminiin khaattiin baalhum fi l-achya dool wa Allah abuuku fi l-sama yaʼarif kulla cheyy al-intu tidooruuh. 33Wa laakin intu gubbaal kulla cheyy, khuttu baalku fi mamlakat Allah wa fi l-haal al-saalhe al-Allah yidoorha wa Allah yantiiku kulla cheyy hana hayaatku.
34«Ma tihimmu le kalaam hana ambaakir. Ambaakir zaatah yihimm le nafsah. Taʼab hana yoom waahid yakfi le yoom waahid.»
Currently Selected:
Matta 6: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.
