Matta 4

Ibliis jarrab al-Masiih

1Wa l-Ruuh al-Khudduus wadda Isa fi l-khala achaan Ibliis yijarribah. 2Wa hu saayim leel wa nahaar 40 yoom wa baʼad da, juuʼ sawwaah.

3Wa Ibliis al-mujarrib ja leyah wa gaal : «Kan sahiih inta Ibn Allah, guul le l-hujaar al-dugaag dool yabgo leek akil.» 4Wa Isa radda leyah wa gaal : «Maktuub fi Kitaab Allah : <Al-insaan ma yiʼiich be l-akil wiheedah laakin yiʼiich be kulli kilme al-yuguulha Allah.>»#4:4 Al-kalaam da talgooh fi Tasniya 8:3.

5Wa Ibliis waddaah fi Madiinat al-Khudus wa khattaah fi bakaan aali fi raas beet Allah. 6Wa gaal leyah : «Kan sahiih inta Ibn Allah, nutt agaʼ tihit achaan fi l-Kitaab maktuub : <Allah yaamur malaaʼikatah achaan yahfadook. Yichiiluuk fi iideehum achaan rijileenak ma yintaggo fi hajar.>»#4:6 Al-kalaam da talgooh fi Zabuur 91:11-12. 7Wa Isa gaal leyah : «Wa kula maktuub fi l-Kitaab : <Ma tijarrib Allah Ilaahak.>»#4:7 Al-kalaam da talgooh fi Tasniya 6:16.

8Wa Ibliis waddaah battaan wa khattaah fi raas hajar tawiil bilheen wa wassaf leyah kulla l-mamaalik al-fi l-dunya wa darajathum. 9Wa gaal le Isa : «Nantiik kulluhum ke kan inta tasjud giddaami wa taʼabudni.» 10Wa Isa gaal leyah : «Amchi minni baʼiid, ya Cheetaan, achaan maktuub fi l-Kitaab : <Le Allah Ilaahak bas tasjud wa hu wiheedah bas taʼabudah.>»#4:10 Al-kalaam da talgooh fi Tasniya 6:13.

11Wa khalaas Ibliis khallaah wa malaaʼika jo le Isa wa saaʼadooh.

Al-Masiih bada khidimtah

12Wa Yahya karabooh fi l-sijin. Wa Isa simiʼ al-khabar da wa gabbal fi daar al-Jaliil. 13Wa khalla hillit al-Naasira wa macha sakan fi hillit Kafar Naahuum al-gaaʼide jamb al-bahar fi turaab Bani Zabuluun wa turaab Bani Naftaali. 14Wa macha hinaak achaan misil da, al-kalaam al-Allah gaalah be khachum al-nabi Ichaʼya yitimm. Al-nabi gaal :

15<Turaab Bani Zabuluun

wa turaab Bani Naftaali

gaaʼid fi l-derib jamb al-bahar

wa khaadi le bahar al-Urdun

wa hu turaab hana daar al-Jaliil

wa hi daar al-ajaanib.

16Hinaak al-chaʼab al-gaaʼidiin fi l-dalaam

chaafo nuur aziim

wa l-saakniin fi balad al-dalaam al-haalik,

nuur talaʼ leehum.>#4:16 Al-kalaam da talgooh fi Ichaʼya 9:1-2.

17Wa min al-wakit daak, Isa bada yiballikh kalaam Allah wa gaal : «Tuubu min zunuubku ! Achaan mamlakat Allah garrabat.»

Al-talaamiiz al-awwalaaniyiin

18Wa wakit Isa raayikh fi khachum bahar al-Jaliil, hu chaaf akhwaan itneen wa humman Simʼaan al-binaaduuh Butrus wa akhuuh Andareeyas. Wa humman hawwaatiin wa gaaʼidiin yazgulu charakhum fi l-bahar achaan yakurbu huut. 19Wa Isa gaal leehum : «Taʼaalu taabuʼuuni. Awwal intu gaaʼidiin takurbu huut wa laakin min al-yoom ana nisawwiiku takurbu al-naas le tiwassufuuhum derib Allah.» 20Wa tawwaali khallo charakhum wa gammo taabaʼooh.

21Wa Isa macha giddaam chiyya wa chaaf akhwaan itneen aakhariin wa humman Yaakhuub wa Yuuhanna awlaad Zabadi. Humman gaaʼidiin fi l-markaba maʼa abuuhum wa gaaʼidiin yiʼaddulu charakhum. Wa Isa naadaahum achaan yitaabuʼuuh. 22Wa tawwaali khallo al-markaba wa abuuhum wa taabaʼo Isa.

23Wa Isa gamma raakh fi kulla bakaan hana daar al-Jaliil wa gaaʼid yiʼallim al-naas fi buyuut al-sala wa yibachchir leehum bichaarat mamlakat Allah. Wa gaaʼid yachfiihum min ayyi wajaʼ wa ayyi marad al-fi lubb al-chaʼab. 24Wa usmah talaʼ fi kulla balad Suuriya wa naas jaabo leyah akhwaanhum al-maʼduuriin wa l-taʼbaaniin min ayyi marad. Jaabo al-muchootiniin wa l-naas al-induhum amfitfit wa l-naas al-jilidhum mayyit wa daawaahum kulluhum. 25Wa naas katiiriin marra waahid taabaʼooh. Wa l-naas dool jo min daar al-Jaliil wa min al-Mudun al-Achara wa min Madiinat al-Khudus wa min daar al-Yahuudiiya wa min al-buldaan al-khaadi le bahar al-Urdun.

Currently Selected:

Matta 4: ADT19

Highlight

Copy