Matta 14
14
Moot al-nabi Yahya
1Wa fi l-wakit daak, Hiruudus muhaafiz daar al-Jaliil simiʼ khabar Isa. 2Wa gaal le khaddaamiinah : «Da Yahya al-Mukhattis ! Hu baʼas min ust al-maytiin ! Achaan da bas indah al-gudra le yisawwi al-ajaayib.»
3Wa gabul da, Hiruudus karab Yahya fi l-sijin wa rabatah be janaaziir fi chaan martah Hiruudiiya. Wa awwal Hiruudiiya hi marit Filibbus akhuuh le Hiruudus 4wa Yahya gaal leyah : «Hi ma halaala leek le taakhudha.» 5Wa Hiruudus dawwar yaktul Yahya laakin hu khaayif min zaʼal al-naas achaan fi fikirhum Yahya nabi.
6Wa fi yoom iid mawlid Hiruudus, gaaʼidiin yiʼayyudu wa bineeyit Hiruudiiya liʼibat giddaamhum wa Hiruudus farhaan bilheen minha. 7Wa hu halaf yantiiha ayyi cheyy al-tatulbah minnah. 8Wa l-bineeye awwal chaawarat ammaha wa baʼad da, gaalat : «Antiini raas Yahya al-Mukhattis hassaʼ hini fi sufra.»
9Wa l-malik nidim le haliiftah al-halafha giddaam kulla diifaanah wa laakin anta izin le askarah yijiibuuh leeha. 10Wa askari waahid macha fi l-sijin wa gataʼ raas Yahya. 11Wa jaab al-raas fi sufra wa antaah le l-bineeye wa hi waddatah le ammaha. 12Wa talaamiiz Yahya jo wa chaalo janaaztah wa dafanooha wa khalaas macho ooro Isa.
Al-Masiih anta akil le 5 000 naas
13Wa Isa simiʼ al-khabar da wa rikib fi l-markaba wa macha wiheedah fi l-khala. Wa laakin naas katiiriin simʼo hu macha hinaak wa marago min hillaalhum wa macho waraayah be rijleehum. 14Wa wakit Isa dalla min al-markaba, hu chaaf naas katiiriin marra waahid gaaʼidiin yarjooh wa hu hanna fooghum wa chafa al-mardaaniin al-maʼaahum.
15Wa fi l-achiiye al-talaamiiz jo leyah wa gaalo : «Al-bakaan da khala wa l-wakit akhkhar. Khalli al-naas yamchu fi l-hillaal wa yachru cheyy yaakuluuh.» 16Wa laakin Isa gaal le talaamiizah : «Ma waajib leehum yamchu. Intu bas antuuhum akil.» 17Wa gaalo : «Ma indina cheyy illa khamsa khubza wa huut itneen bas !» 18Wa Isa gaal leehum : «Jiibuuhum leyi hini.»
19Wa hajja le kulla l-naas wa gaal : «Agoodu tihit fi l-gechch.» Wa chaal al-khamsa khubza wa l-huut al-itneen wa rafaʼ raasah ale l-sama wa chakar Allah wa kassar al-khubza wa antaahum le talaamiizah wa gassamoohum le l-naas. 20Wa kulla l-naas akalo lahaddi chibʼo. Wa khalaas al-talaamiiz lammo al-akil al-faddal wa malo beyah 12 guffa. 21Wa adad al-naas al-akalo hawaale 5 000 rujaal. Wa da bala l-awiin wa l-iyaal.
Al-Masiih raakh fi raas al-almi
22Wa tawwaali Isa amar al-talaamiiz yarkabo fi l-markaba achaan yagtaʼo al-bahar wa yamchu giddaamah. Wa hu yuguul le l-naas khalli yamchu. 23Wa wakit al-naas macho khalaas, Isa talaʼ fi raas al-hajar le yisalli wiheedah. Wa baʼad al-makhrib, hu gaaʼid hinaak wiheedah.
24Wa markabat al-talaamiiz lihgat ust al-bahar wa l-riih gaaʼide tusuug aleehum min giddaam wa l-challaal gaaʼid yihizz al-markaba. 25Wa be waradde, Isa ja leehum raayikh min foog le l-almi. 26Wa wakit al-talaamiiz chaafo Isa raayikh min foog le l-almi, khaafo khoof chadiid wa gaalo : «Da dull !» Wa sarakho min al-khoof. 27Wa tawwaali Isa hajja leehum wa gaal : «Chiddu heelku, da ana bas. Ma takhaafo !»
28Wa Butrus gaal leyah : «Sayyidna ! Kan sahiih da inta, khalaas naadiini achaan naji leek raayikh min foog le l-almi.» 29Wa Isa gaal leyah : «Taʼaal !» Wa Butrus dalla min al-markaba wa bada yamchi le Isa raayikh min foog le l-almi. 30Wa laakin wakit Butrus hassa gudrat al-riih, hu khaaf bilheen wa bada yatmus. Wa sarakh wa gaal : «Sayyidna ! Najjiini !» 31Wa Isa madda iidah ajala wa karabah wa gaal : «Iimaanak lissaaʼ daʼiif. Maala chakkakt ?» 32Wa wakit rikbo fi l-markaba, khalaas al-riih wagafat. 33Wa fi l-markaba al-talaamiiz jo sajado leyah wa gaalo : «Sahiih, inta Ibn Allah !»
34Wa wakit gataʼo al-bahar khalaas, nazalo fi balad Ginneesarat. 35Wa naas al-bakaan daak irfo Isa wa ballakho al-khabar da fi kula baladhum wa jaabo leyah kulla l-mardaaniin. 36Wa chahado Isa achaan yalmaso taraf khalagah wa kulla naadum al-limsah ligi al-aafe.
Currently Selected:
Matta 14: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.