Yuuhanna 20

Buʼaas al-Masiih

1Wa awwal yoom al-subuuʼ wakit al-wata lissaaʼ dalma, Mariyam al-Magdaliiye gammat machat le l-khabur wa chaafat kadar al-hajar al-kabiir al-saddo beyah al-khabur ma gaaʼid fi bakaanah. 2Wa hi gammat jarat le Simʼaan Butrus wa le l-tilmiiz al-aakhar, al-Isa yihibbah bilheen, wa gaalat leehum : «Sayyidna chaalooh min al-khabur wa ma naʼarfu al-bakaan al-waddooh foogah !»

3Wa Butrus wa l-tilmiiz al-aakhar marago wa chaalo al-derib al-maachi le l-khabur. 4Wa humman jaariyiin wa laakin al-tilmiiz al-aakhar sabagah le Butrus wa lihig al-khabur gubbaalah. 5Wa dangar taawag fi l-khabur daakhal wa chaaf al-kafan laakin hu ma andassa. 6Wa Simʼaan Butrus wisil waraayah wa andassa tawwaali fi l-khabur. Wa chaaf al-kafan. 7Wa l-mindiil al-rabato beyah raas Isa ma gaaʼid maʼa l-kafan wa laakin gaaʼid fi bakaan wiheedah mutabbag adiil.

8Wa l-tilmiiz al-aakhar al-lihig al-khabur gubbaal Butrus, hu kula andassa daakhal wa chaaf al-khumaam wa aaman. 9Laakin humman lissaaʼ ma fihmo min al-Kitaab kadar Isa laabudda yabʼas min ust al-maytiin. 10Wa l-talaamiiz gabbalo fi buyuuthum.

Mariyam chaafat al-Masiih

11Wa laakin Mariyam waagfe jamb khachum al-khabur wa gaaʼide tabki. Wa wakit gaaʼide tabki, hi dangarat wa taawagat fi l-khabur daakhal. 12Wa chaafat malaaʼika itneen khulgaanhum buyud. Humman gaaʼidiin tihit fi l-bakaan al-awwal janaazit Isa raagde foogah, waahid fi bakaan raasah wa waahid fi bakaan rijileenah. 13Wa hajjo leeha wa gaalo : «Mara zeene, maalki tabki ?» Wa hi raddat leehum wa gaalat : «Ana gaaʼide nabki achaan chaalo sayyidi wa ma naʼarif al-bakaan al-waddooh foogah.»

14Wa baʼad hi gaalat al-kalaam da, hi anlafatat wa chaafat Isa waagif waraaha wa laakin ma irfat kadar da Isa. 15Wa Isa hajja leeha wa gaal : «Mara zeene, maala tabki ? Tifattichi yaatu ?» Wa fi fikirha, hu al-khaddaam al-yakhdim fi l-jineene wa raddat leyah wa gaalat : «Al-sayyid, kan inta chiltah, ooriini al-bakaan al-khatteetah foogah wa ana niwaddiih fi bakaan aakhar.»

16Wa Isa hajja leeha wa gaal : «Mariyam.» Wa anlafatat chaafatah adiil wa gaalat : «Ya rabbunaay !» Wa da, maʼanaatah «ya muʼallim» be kalaam ibraani. 17Wa Isa hajja leeha wa gaal : «Ma takurbiini. Ana lissaaʼ ma talaʼt le Allah abuuyi. Amchi le akhwaani wa ooriihum ana taaliʼ le abuuyi wa abuuku wa le Ilaahi wa Ilaahku.»

18Wa Mariyam al-Magdaliiye machat le talaamiizah wa gaalat : «Ana chift sayyidna !» Wa oorathum be kulla cheyy al-hu gaalah leeha.

Al-Masiih baan le talaamiizah

19Wa fi nafs al-yoom, yaʼni yoom al-ahad, fi l-achiiye al-talaamiiz laammiin fi bakaan waahid wa l-biibaan mugaffaliin achaan humman khaayfiin min al-Yahuud. Wa Isa ja wa wagaf fi usuthum wa gaal : «Al-salaam aleekum !»

20Wa baʼad hu sallamaahum, hu wassafaahum iideenah wa naaytah. Wa wakit al-talaamiiz chaafo sayyidhum, humman firho farha chadiide. 21Wa Isa hajja leehum battaan wa gaal : «Al-salaam aleekum. Misil abuuyi rassalaani, ana kula nirassilku.»

22Wa baʼad hu gaal al-kalaam da, hu nafakh fooghum wa gaal : «Akhbalo al-Ruuh al-Khudduus. 23Al-naadum al-intu tisaamuhu leyah zunuubah, Allah yakhfir leyah. Wa l-naadum al-intu ma tisaamuhu leyah zunuubah, Allah ma yakhfir leyah.»

Al-Masiih wa Tuuma

24Wa Tuuma hu waahid min al-talaamiiz al-atnaachar wa usmah al-aakhar Chigg al-Toom. Wa hu ma gaaʼid maʼaahum wakit Isa ja fi usuthum. 25Wa l-talaamiiz al-aakhariin oorooh beyah wa gaalo : «Aniina chifna sayyidna !» Wa laakin hu radda leehum wa gaal : «Kan ana ma chift be eeni bakaan al-musmaar fi iideenah wa kan ma khatteet usbaʼi fi bakaan al-musmaar wa kan ma limistah fi naaytah be iidi, abadan ma niʼaamin !»

26Wa baʼad usbuuʼ, talaamiiz Isa lammo battaan fi nafs al-beet wa Tuuma maʼaahum. Wa l-biibaan mugaffaliin wa laakin Isa ja wa baan fi usuthum. Wa Isa sallamaahum wa gaal : «Al-salaam aleekum.» 27Wa hajja le Tuuma wa gaal : «Khutt usbaʼak hini wa chiif iideeni. Midd iidak wa almasni fi naayti. Khalli minnak al-chakak wa aamin !» 28Wa Tuuma radda leyah wa gaal : «Inta Rabbi. Inta Ilaahi !» 29Wa Isa gaal : «Inta aamant achaan chiftini. Mabruuk le l-naas al-yiʼaamunu beyi kan ma chaafooni kula.»

30Wa wakit Isa gaaʼid maʼa talaamiizah, hu sawwa ajaayib katiiriin al-ma maktuubiin fi l-kitaab da. 31Laakin al-kalaam al-maktuub hini ankatab achaan intu tisaddugu kadar Isa hu al-Masiih wa Ibn Allah wa tiʼaamunu beyah wa talgo be usmah al-haya al-abadiiye.

Currently Selected:

Yuuhanna 20: ADT19

Highlight

Copy