Yuuhanna 15
15
Masal chadarat al-inab
1«Ana bas chadarat al-inab al-sahiihe wa abuuyi hu siid al-jineene. 2Ayyi firiʼ al-ma gaaʼid yalda, hu yamurgah minni. Wa ayyi firiʼ al-gaaʼid yalda, hu yibarbirah achaan yabga nadiif wa yalda ziyaada. 3Wa intu bigiitu nudaaf khalaas be gudrat al-kalaam al-ana gultah leeku. 4Agoodu saabtiin fiyi wa ana nagood saabit fiiku. Al-firiʼ ma yagdar yalda wiheedah. Al-firiʼ yalda achaan gaaʼid saabit fi l-chadara. Wa intu kula ma tagdaro tisawwu al-cheyy al-Allah yidoorah, illa kan intu tagoodu saabtiin fiyi.
5«Ana chadarat al-inab wa intu al-furuuʼ. Kan naadum gaaʼid saabit fiyi, ana nagood saabit fiyah wa hu yabga misil al-firiʼ al-yalda katiir. Intu ma tagdaro tisawwu cheyy illa beyi. 6Kan naadum ma gaaʼid saabit fiyi, hu misil firiʼ al-yamurguuh min al-chadara wa yazguluuh wa yaybas. Wa l-furuuʼ dool, yilimmuuhum wa yazguluuhum fi l-naar wa yiharruguuhum. 7Kan intu tagoodu saabtiin fiyi wa kalaami yagood saabit fi guluubku, asʼalo min Allah ayyi cheyy al-tidooruuh wa Allah yisawwiih leeku. 8Wa majd abuuyi yibiin ziyaada wakit intu tabgo misil furuuʼ al-yaldo iyaal katiir. Wa be da, tiwassufu nufuusku kadar intu talaamiizi.
9«Misil abuuyi habbaani, ana kula habbeetku. Agoodu saabtiin fi mahabbiti. 10Kan intu titaabuʼu al-wasaaya al-anteethum leeku, intu tabgo saabtiin fi mahabbiti misil ana saabit fi mahabbat abuuyi achaan ana taabaʼt wasiiyaatah. 11Ana gult leeku al-kalaam da achaan farhiti talhagku wa tabgo farhaaniin marra waahid.
12«Wa l-wasiiye al-nantiiha leeku di hi, waajib tirraayado ambeenaatku misil ana niriidku. 13Wa ma fi mahabba kabiire min mahabbat al-naadum al-yihibb rufgaanah lahaddi yafdaahum be ruuhah. 14Wa intu rufgaani kan titaabuʼu al-wasaaya al-anteethum leeku. 15Ana ma nuguul battaan intu khaddaamiini achaan al-khaddaam ma yaʼarif kulla cheyy al-sayyidah gaaʼid yisawwiih. Ninaadiiku rufgaani achaan ana ooreetku be kulla cheyy al-simiʼtah min abuuyi. 16Intu ma azaltuuni. Ana bas azaltuku wa rassaltuku achaan tabgo misil chadara taldo fawaakih, wa fawaakihku yagoodu ila l-abad. Wa ayyi cheyy al-tasʼalooh min abuuyi be usmi, hu yantiiku. 17Wa di hi al-wasiiye al-nantiiha leeku. Arraayado ambeenaatku.
Naas al-dunya yakraho al-talaamiiz
18«Kan naas al-dunya yakrahooku, aʼarfu kadar kirhooni ana gubbaal. 19Kan intu min al-dunya, naas al-dunya yihibbuuku achaan intu naashum. Laakin hassaʼ intu ma min al-dunya achaan ana azaltuku min usut naas al-dunya le tabgo naasi. Wa achaan da, naas al-dunya yakrahooku. 20Fakkuru fi l-kalaam al-ana gultah leeku. Ana gult al-abid ma akbar min siidah. Wa kan taʼʼabooni ana, yitaʼʼubuuku intu kula. Wa kan khiblo kalaami, yakhbalo kalaamku intu kula. 21Yitaʼʼubuuku intu be sabab usmi achaan ma irfo Allah al-rassalaani. 22Awwal kan ma jiit kallamt leehum, humman ma yabgo khaatiyiin. Laakin khalaas, ana kallamt leehum wa l-khata saabit fooghum. 23Ayyi naadum al-yakrahni, yakrah abuuyi kula. 24Awwal kan ana ma sawweet fi usuthum amal al-naadum aakhar abadan ma sawwaah, humman ma yabgo muznibiin. Laakin hassaʼ chaafo al-ajaayib wa kirhooni wa kirho abuuyi. 25Wa be misil da, al-kalaam al-maktuub fi l-Tawraat al-humman yagruuh bigi fooghum sahiih. Maktuub : <Kirhooni bala sabab.>#15:25 Al-kalaam da talgooh fi Zabuur 35:19.
26«Laakin al-Muʼaawin yaji. Ana nirassilah leeku min bakaan abuuyi wa hu Ruuh al-Hagg al-naazil min Allah. Wa wakit hu yaji, hu yachhad leyi 27wa intu kula tachhado leyi achaan intu gaaʼidiin maʼaayi min al-bidaaya.»
Currently Selected:
Yuuhanna 15: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.
