Takwiin 50

Dafin Yaakhuub fi balad Kanʼaan

1Wa Yuusuf gamma hadan abuuh, baka foogah wa habbaah. 2Wa anta amur le khaddaamiinah al-dakaatiir achaan yijahhuzu al-janaaza. Wa khalaas al-dakaatiir jahhazo janaazit abuuh. 3Wa misil fi aadithum, al-dakaatiir sawwo 40 yoom le yamsaho al-janaaza be riihe achaan ma tiʼaffin. Wa fi moot Yaakhuub, al-Masriyiin gaʼado haznaaniin muddit 70 yoom.

4Wa wakit al-hizin le Yaakhuub faat khalaas, Yuusuf gaal le l-naas al-fi gasir al-malik Firʼoon : «Kan radyaaniin beyi, amchu le Firʼoon wa guulu leyah : 5‹Abuuyi gubbaal ma yumuut hallafaani achaan namchi nadfinah fi balad Kanʼaan fi l-khabur al-hu jahhazah. Achaan da, khalli yantiini izin le namchi nadfinah hinaak wa nigabbil.›» 6Wa Firʼoon gaal leyah : «Amchi adfin abuuk misil hu hallafaak beyah.»

7Wa Yuusuf macha yadfin abuuh wa macho maʼaayah kulla l-jamaaʼa hana l-malik wa kulla l-masʼuuliin hana gasir al-malik wa kulla l-chuyuukh hana Masir. 8Wa kulla aayilat Yuusuf wa akhwaanah wa aayilat abuuh al-aakhariin kula macho maʼaayah. Wa fi turaab Goochan, faddal illa l-iyaal al-dugaag wa l-khanam wa l-bagar. 9Wa macho maʼa Yuusuf arabaat wa siyaad al-kheel wa naas katiiriin.

10Wa wakit wassalo fi madagg Ataad khaadi le bahar al-Urdun, al-hizin bigi chadiid wa Yuusuf sawwa sabʼa yoom hana hizin fi chaan abuuh. 11Wa l-Kanʼaaniyiin, sukkaan hana l-balad di, chaafo al-hizin al-bigi fi madagg Ataad wa gaalo : «Daahu hizin kabiir bigi fi lubb al-Masriyiin !» Fi chaan da, sammo al-bakaan al-khaadi le bahar al-Urdun, Abil Misraayim (maʼanaatah hizin fi lubb al-Masriyiin).

12Wa be misil da bas, iyaal Yaakhuub sawwo al-cheyy al-abuuhum amaraahum beyah. 13Wa waddo janaazit abuuhum fi balad Kanʼaan. Wa dafanooh fi l-karkuur hana l-zereʼ al-fi Makfiila. Wa l-zereʼ da, Ibraahiim charaah min Afruun al-Hitti achaan al-bakaan da yabga bakaan hana khabur hanaayah halaalah. Wa l-bakaan da sabaah le hillit Mamra. 14Wa baʼad dafin hana abuuh, Yuusuf gabbal fi Masir, hu wa akhwaanah wa l-naas al-macho maʼaayah fi dafin hana abuuh.

Baʼad moot Yaakhuub

15Wa akhwaan Yuusuf gaalo ambeenaathum : «Hassaʼ da, abuuna maat. Akuun Yuusuf yilkaffa foogna al-fasaala al-aniina sawweenaaha leyah !» 16Wa rassalo naadum le Yuusuf wa gaalo : «Abuuk gubbaal ma yumuut da, gaal leena : 17‹Ooruuh le Yuusuf min fadlah khalli yisaamih akhwaanah min al-jariime wa l-zanib al-sawwoohum leyah achaan sawwo leyah fasaala. Wa hassaʼ, min fadlah, khalli yisaamih al-jariime al-sawwooha leyah abiid Allah Rabb abuuh.›»

Wakit simiʼ al-kalaam al-mursaal gaalah leyah da, khalaas Yuusuf gamma baka. 18Wa akhwaanah jo sajado giddaamah wa gaalo leyah : «Aniina abiidak.» 19Wa laakin Yuusuf gaal leehum : «Ma takhaafo. Ana wa la Allah tasjudu leyi ! 20Intu dawwartu tisawwu leyi cheyy fasil. Laakin al-Rabb baddalah be kheer achaan yitimm al-cheyy al-intu chiftuuh al-yoom, le yinajji haya hana naas katiiriin. 21Be da, ma takhaafo min cheyy ! Ana nakrubku wa nakrub aayilaatku.» Khalaas, Yuusuf raggad galibhum be l-kalaam da.

22Be misil da, Yuusuf gaʼad fi Masir maʼa ahal abuuh. Wa aach 110 sana. 23Wa hidir iyaal Afraayim wa iyaal iyaalah. Wa Yuusuf rabba iyaal Makiir. Wa Makiir da, hu wileed Manassa.

Moot Yuusuf

24Wa yoom waahid, Yuusuf gaal le akhwaanah : «Ana gariib numuut laakin akiid al-Rabb yifakkir foogku wa yamrugku min Masir wa yiwaddiiku fi l-balad al-hu halaf wa gaal yantiiha le Ibraahiim wa Ishaakh wa Yaakhuub.» 25Wa Yuusuf hallafaahum wa gaal leehum : «Akiid al-Rabb yifakkir leeku wa wakit tamurgu min Masir, waddu udaami maʼaaku.»

26Wa khalaas, Yuusuf maat fi Masir fi umur hana 110 sana. Wa masaho janaaztah be riihe achaan ma tiʼaffin wa dassooha fi sanduug hana hajar.

Currently Selected:

Takwiin 50: ADT19

Highlight

Copy