Takwiin 46

Yaakhuub maachi Masir

1Wa Yaakhuub gamma maachi maʼa aayiltah wa chaal kulla khumaamah. Wa wakit wisil fi hillit Biir Sabʼa, gaddam dahiiye le Allah Rabb abuuh Ishaakh. 2Wa be l-leel al-Rabb hajja le Israaʼiil, al-maʼruuf be Yaakhuub, fi ruʼya wa gaal : «Yaakhuub, Yaakhuub !» Wa Yaakhuub gaal : «Naʼam.» 3Wa l-Rabb gaal : «Ana Allah Rabb abuuk. Ma takhaaf min al-machi fi Masir achaan hinaak ana nisawwiik abu hana umma kabiire. 4Ana bas niwaddiik fi Masir wa nigabbilak kula. Wa fi mootak Yuusuf bas yisidd uyuunak.»

5Wa khalaas, Yaakhuub gamma min hillit Biir Sabʼa. Wa iyaalah rakkabooh hu wa iyaalhum wa awiinhum fi l-arabaat al-Firʼoon malik Masir rassalaahum leehum, le yisaafuru beehum. 6Wa waddo maʼaahum bahaayimhum wa khumaamhum al-ligoohum fi balad Kanʼaan. Wa Yaakhuub macha fi Masir maʼa kulla zurriiytah. 7Hu wassal fi Masir maʼa awlaadah wa awlaad iyaalah wa banaatah wa banaat iyaalah wa kulla zurriiytah.

Iyaal Leeya

8Daahu asaame hana iyaal Israaʼiil al-maʼruuf be Yaakhuub, al-macho fi Masir.

Raʼuubiin hu bikir hana Yaakhuub. 9Wa awlaad Raʼuubiin humman Hanuuk wa Fallu wa Hasruun wa Karmi.

10Wa awlaad Chimʼuun humman Yamuwiil wa Yaamiin wa Uhad wa Yaakiin wa Suuhar wa Chaawuul. Wa Chaawuul da, wileed Yaakhuub al-wildatah martah al-Kanʼaaniiye.

11Wa awlaad Laawi humman Girchuun wa Gahaat wa Maraari.

12Wa awlaad Yahuuza humman Iir wa Unaan wa Chiila wa Faaris wa Zaarah. Laakin Iir wa Unaan maato fi balad Kanʼaan. Wa awlaad Faaris humman Hasruun wa Haamul.

13Wa awlaad Yassaakar humman Tuulaʼ wa Fuwwa wa Yuub wa Chimruun.

14Wa awlaad Zabuluun humman Saarad wa Iluun wa Yahaliil.

15Wa humman dool zurriiyit Yaakhuub al-jaabathum leyah martah Leeya fi Faddaan Araam, maʼa akhuthum Diina. Wa adad awlaadah wa banaatah kulluhum ke 33 nafis.

Iyaal Zilfa

16Wa awlaad Gaad humman Sifyuun wa Haggi wa Chuuni wa Asbuun wa Iiri wa Aruudi wa Ariili.

17Wa awlaad Achiir humman Yimna wa Yichwa wa Yichwi wa Bariiʼa maʼa akhuthum Saarah. Wa awlaad Bariiʼa humman Haabar wa Malkiyiil.

18Wa humman dool zurriiyit Yaakhuub al-jaabathum leyah Zilfa. Wa adadhum 16 maʼa iyaalhum. Wa Zilfa hi al-khaddaama al-Laabaan antaaha le bittah Leeya marit Yaakhuub.

Iyaal Raahiil

19Wa awlaad Raahiil marit Yaakhuub humman Yuusuf wa Banyaamiin.

20Wa fi Masir, Asnaat marit Yuusuf jaabat leyah awlaad itneen, humman Manassa wa Afraayim. Wa Asnaat hi bineeyit Fuuti Faaraʼ wa hu da raajil al-diin fi hillit Uun.

21Wa awlaad Banyaamiin humman Baalaʼ wa Baakar wa Achbiil wa Giira wa Naʼamaan wa Iihi wa Ruuch wa Muffiim wa Huffiim wa Arad.

22Wa humman dool zurriiyit Yaakhuub al-jaabathum leyah martah Raahiil. Wa adadhum 14 maʼa iyaalhum.

Iyaal Bilha

23Wa wileed Daan, hu Huchiim.

24Wa awlaad Naftaali humman Yahsiil wa Guuni wa Yisar wa Chilliim.

25Wa dool zurriiyit Yaakhuub al-jaabathum leyah Bilha. Wa adadhum 7 maʼa iyaalhum. Wa Bilha hi khaddaama al-Laabaan antaaha le bittah Raahiil.

26Wa iyaal Yaakhuub maʼa iyaalhum al-macho maʼaayah fi Masir, adadhum 66 bala awiinhum. 27Wa be l-awlaad al-itneen hana Yuusuf al-wildoohum fi Masir, adad hana aayilat Yaakhuub al-macho fi Masir bigi 70.

Yaakhuub wisil fi Masir

28Wa Yaakhuub rassal Yahuuza giddaamah le yikhabbir Yuusuf achaan yilaagiih fi turaab Goochan. 29Wa wakit Yaakhuub wa aayiltah wassalo fi Goochan, Yuusuf jahhaz arabatah rikib foogha wa macha le yilaagi abuuh. Wa min Yuusuf chaaf abuuh, jara hadanah wa baka foogah tawwal. 30Wa Yaakhuub gaal leyah : «Hassaʼ da, min chiftak inta lissaaʼak gaaʼid hayy da, kan ana mutt kula khalaas !»

31Wa Yuusuf gaal le akhwaanah wa le naas beet abuuh : «Namchi nikhabbir al-malik Firʼoon wa nuguul leyah : ‹Akhwaani wa kulla aayilat abuuyi al-gaaʼidiin fi balad Kanʼaan jo leyi. 32Wa humman siyaad bagar wa khanam. Wa jaabo bagarhum wa khanamhum wa kulla khumaamhum.› 33Wa kan yoom waahid Firʼoon naadaaku wa saʼalaaku gaal leeku : ‹Intu khidmitku chunu ?› 34Waajib tuguulu leyah : ‹Aniina abiidak siyaad al-bahaayim min aniina dugaag lahaddi hassaʼ, misil juduudna.› Be misil da, Firʼoon yikhalliiku taskunu fi turaab Goochan achaan al-Masriyiin yakraho siyaad al-khanam.»

Currently Selected:

Takwiin 46: ADT19

Highlight

Copy