Takwiin 33

Yoom mulaagaat Yaakhuub maʼa Isuu

1Wa Yaakhuub rafaʼ raasah wa chaaf akhuuh Isuu jaayi be 400 raajil maʼaayah. Wa Yaakhuub gassam iyaalah ambeen Leeya wa Raahiil wa khaddaamaatah al-itneen. 2Wa gaddam al-khaddaamaat giddaam maʼa iyaalhum wa waraahum Leeya maʼa iyaalha wa fi l-akhiir Raahiil maʼa Yuusuf. 3Wa Yaakhuub kamaan gaddam giddaamhum wa sajad sabʼa marraat lahaddi garrab le akhuuh.

4Wa Isuu jara laaga akhuuh, hadanah wa habbaah wa humman al-tineen gammo bako. 5Wa baʼad da, Isuu rafaʼ raasah wa chaaf al-awiin wa l-iyaal wa gaal : «Dool yaatumman al-maʼaak ?» Wa Yaakhuub gaal : «Di l-rahma al-antaaha al-Rabb leyi ana abdak.»

6Wa l-khaddaamaat garrabo maʼa iyaalhum wa sajado. 7Wa Leeya kula garrabat maʼa iyaalha wa sajado. Wa baʼad da, garrab Yuusuf maʼa Raahiil kula sajado.

8Wa Isuu gaal : «Tidoor tisawwi chunu be kulla l-maal al-ana laageetah ?» Wa Yaakhuub gaal leyah : «Nidoor tarda leyi, ya siidi.» 9Wa Isuu gaal : «Ana indi maal katiir. Khalli maalak yagood leek, ya akhuuyi.» 10Wa Yaakhuub gaal : «La. Kan inta radyaan beyi, akhbal hadiiyti al-gaddamtaha leek. Ana min chift wijhak da, misil chift wijih al-Rabb achaan inta ridiit leyi. 11Wa hassaʼ da akhbal minni hadiiyti al-gaddamtaha leek achaan al-Rabb antaani niʼma wa indi kulla cheyy.» Wa Yaakhuub hannasah wa khalaas Isuu khibil.

12Wa Isuu gaal leyah : «Gumm namchu wa ana namchi maʼaak fi machiik.» 13Wa Yaakhuub radda leyah wa gaal : «Ya siidi, inta taʼarif kadar al-iyaal daʼiifiin wa indi maʼaayi al-khanam wa l-bagar al-biradduʼu. Wa kan asartuhum fi yoom waahid, kulla l-bahaayim yumuutu. 14Min fadlak, ya siidi, hassaʼ da inta gaddim giddaami. Wa ana abdak kamaan nuruukh bicheech fi ruwaakha hana l-bahaayim wa fi ruwaakha hana l-iyaal lahaddi nawsalo bakaanak inta siidi fi Saʼiir.» 15Wa Isuu gaal leyah : «Wa kan ke da, nikhalli maʼaak min naasi al-jiina sawa.» Wa Yaakhuub gaal : «Wa maala ? Ana min ligiit ridaak da, khalaas ya siidi !» 16Wa khalaas fi nafs al-yoom Isuu gabbal Saʼiir.

Yaakhuub fi Kanʼaan

17Wa Yaakhuub gamma macha Sukkuut wa bana leyah beet wa kuuzi le bahaaymah. Achaan da bas, sammo al-bakaan da Sukkuut (maʼanaatah ligdaabe). 18Wa Yaakhuub taabaʼ safarah min Faddaan Araam lahaddi wassal be sihha wa salaama fi hillit Chakiim al-gaaʼide fi balad Kanʼaan. Wa hu gaabal al-hille di wa sakan. 19Wa chara min iyaal Hamuur abu Chakiim bakaan al-bana foogah kheemtah be miya hajar fudda. 20Wa fi l-bakaan da, bana leyah madbah le yigaddim foogah dahiiye le l-Rabb wa sammaah El Ilaah Bani Israaʼiil.

Currently Selected:

Takwiin 33: ADT19

Highlight

Copy