Takwiin 29

Yaakhuub fi bakaan Laabaan

1Wa khalaas, Yaakhuub gamma macha ale balad al-sabaah. 2Wa wakit maachi, ligi biir fi l-khala. Wa fi l-bakaan da, fi talaata door hana khanam raagdiin jamb al-biir achaan di bas al-biir al-yazguuhum foogha. Wa khachum al-biir di masduud be hajar kabiir. 3Wa wakit kulla l-khanam yilimmu khalaas, al-ruʼyaan yilizzu al-hajar min khachum al-biir wa yazgu al-khanam. Wa baʼad da, yigabbulu al-hajar fi khachum al-biir.

4Wa Yaakhuub gaal le l-ruʼyaan : «Ya akhwaani, intu min ween ?» Wa humman gaalo leyah : «Aniina min Haaraan.» 5Wa hu gaal leehum : «Taʼarfu Laabaan wileed wileedah le Naahuur ?» Wa gaalo : «Aywa naʼarfuuh.» 6Wa hu gaal : «Hu gaaʼid aafe walla ?» Wa raddo leyah wa gaalo : «Aafe. Wa diik bittah Raahiil jaaye be l-khanam.» 7Wa Yaakhuub gaal leehum : «Al-harraay lissaaʼ foog, da ma al-wakit al-tilimmu foogah al-khanam. Azguuhum wa asraho beehum.» 8Wa l-ruʼyaan gaalo leyah : «Aniina ma nagdaro nazguuhum illa kan al-khanam kulluhum lammo, khalaas nilizzu al-hajar min khachum al-biir wa nazgu al-khanam.»

9Wa wakit Yaakhuub lissaaʼ gaaʼid yihajji maʼaahum ke bas, Raahiil wassalat be khanam abuuha achaan hi kula raaʼiye. 10Wakit Yaakhuub chaaf Raahiil bineeyit Laabaan akhu ammah wa khanam Laabaan akhu ammah, tawwaali macha lazza al-hajar min khachum al-biir wa zaga khanam Laabaan akhu ammah. 11Wa baʼadeen, habbaaha le Raahiil wa gamma yabki. 12Wa Yaakhuub ooraaha le Raahiil kadar hu min ahal abuuha wa hu wileed Rifga. Wa tawwaali, hi jarat khabbarat abuuha.

13Wa wakit Laabaan simiʼ be l-khabar hana Yaakhuub wileed akhtah, khalaas jara laagaah hadanah wa habbaah wa waddaah beetah. Wa Yaakhuub hajja le Laabaan be kulla cheyy al-kaan leyah. 14Wa Laabaan gaal : «Akiid inta da, wileed bitt ammi ! Inta min dammi wa lahami !»

Akhiidit al-akhwaat al-itneen

Wa Yaakhuub gaʼad maʼa Laabaan muddit chahar. 15Wa baʼad da, Laabaan gaal leyah : «Achaan inta min ahali bas, takhdim leyi saakit walla ? Ooriini maahiiytak kam.»

16Wa Laabaan indah banaat itneen wa l-kabiire usumha Leeya wa l-sakhayre usumha Raahiil. 17Wa Leeya di choofha daʼiif laakin Raahiil daggaha sameh wa jamiile marra waahid. 18Wa Yaakhuub yiriidha le Raahiil wa gamma gaal : «Ana nakhdim leek sabʼa sana achaan naakhud Raahiil, bineeytak al-sakhayre.» 19Wa Laabaan gaal leyah : «Nantiiha leek inta, akheer min nantiiha le naadum aakhar. Khalaas agood maʼaayi.» 20Wa be misil da, Yaakhuub khadam sabʼa sana achaan yaakhud Raahiil. Wa l-siniin dool faato leyah ajala ke bas min hubbah leeha al-katiir.

21Wa baʼad da, Yaakhuub gaal le Laabaan : «Antiini marti ! Al-wakit tamma le nichiilha aruus.» 22Khalaas Laabaan azam kulla naas al-hille wa sawwo al-aruus. 23Laakin be l-leel, Laabaan chaal bineeytah Leeya wa waddaaha le Yaakhuub wa hu dakhal beeha. 24Wa Laabaan antaaha le bineeytah Leeya khaddaamtah al-usumha Zilfa achaan takhdim leeha.

25Wa be fajur, Yaakhuub chaaf wa irif kadar di Leeya ! Khalaas gamma gaal le Laabaan : «Da chunu al-sawweetah leyi da ? Ma le Raahiil bas ana khadamt leek ? Maala khachcheetni ?» 26Wa Laabaan gaal leyah : «Da ma fi aaditna kadar nantu al-sakhayre gubbaal al-kabiire. 27Wa hassaʼ da, kammil al-usbuuʼ da maʼa l-kabiire di wa baʼadeen nantuuk al-sakhayre kula. Wa takhdim leyi battaan sabʼa siniin aakhariin.»

28Wa Yaakhuub khassad wa tamma al-usbuuʼ hana l-iris maʼa Leeya wa baʼad da, Laabaan antaah bineeytah Raahiil kula, le yichiilha aruus. 29Wa Laabaan antaaha le bineeytah Raahiil khaddaamtah al-usumha Bilha achaan takhdim leeha. 30Wa Yaakhuub dakhal be Raahiil kula wa laakin hu habbaaha le Raahiil ziyaada min Leeya. Wa khadam sabʼa siniin battaan le Laabaan.

Iyaal Yaakhuub

31Wa wakit Allah chaaf kadar Leeya ma maryuuda, antaaha iyaal wa laakin Raahiil aagre. 32Wa Leeya bigat khalbaane wa wildat wileed wa sammatah Raʼuubiin (maʼanaatah Allah chaaf taʼabi). Wa gaalat : «Akiid hassaʼ da, raajli yiriidni.»

33Wa Leeya khilbat battaan wa wildat wileed wa gaalat : «Allah simiʼ kadar ana ma maryuuda wa antaani battaan leyah hu da.» Wa be da, sammatah Chimʼuun (maʼanaatah hu simiʼ).

34Wa battaan bigat khalbaane wa wildat wileed wa gaalat : «Hassaʼ da khalaas, raajli yinlawi foogi achaan jibt leyah talaata awlaad.» Achaan da bas, al-wileed sammooh Laawi (maʼanaatah anlawa).

35Wa battaan kula bigat khalbaane wa wildat wileed wa gaalat : «Fi l-marra di, nachkur Allah.» Wa sammatah Yahuuza (maʼanaatah chukur). Wa baʼad da, wagafat min al-waaluuda.

Currently Selected:

Takwiin 29: ADT19

Highlight

Copy