Takwiin 27

Ishaakh baarak Yaakhuub

1Wa Ishaakh bigi chaayib wa uyuunah ma bichiifu. Wa khalaas, gamma naada wileedah al-bikir Isuu wa gaal : «Ya wileedi !» Wa hu gaal : «Naʼam !» 2Wa Ishaakh gaal leyah : «Chiif ana bigiit chaayib wa ma naʼarif yoom mooti. 3Hassaʼ da chiil silaahak wa nubbaalak wa nuchchaabak wa amchi al-ganiis wa jiib leyi seede. 4Wa sawwi leyi beeha akil al-niriidah wa jiibah leyi naakul achaan nibaarikak gubbaal ma numuut.»

5Wa wakit Ishaakh gaaʼid yihajji le wileedah Isuu da, Rifga gaaʼide tasmaʼ fi kalaamah. Khalaas Isuu marag macha fi l-khala le yaktul seede wa yijiibha.

6Wa baʼad da, Rifga gaalat le wileedha Yaakhuub : «Asmaʼ ! Ana simiʼt abuuk hajja le akhuuk Isuu wa gaal : 7‹Jiib leyi seede wa sawwi leyi akil al-niriidah achaan nibaarikak giddaam Allah gubbaal ma numuut.› 8Hassaʼ da, ya wileedi, asmaʼ kalaami wa sawwi al-cheyy al-naamurak beyah. 9Amchi fi l-zariibe wa jiib leyi sukhlaan itneen sumaan wa ana nisawwi le abuuk al-akil al-halu al-hu yiriidah. 10Wa inta tiwaddi al-akil da le abuuk wa hu yaakulah achaan yibaarikak gubbaal ma yumuut.»

11Laakin Yaakhuub gaal le ammah Rifga : «Akhuuyi Isuu jildah kulla suuf wa ana jildi amlas. 12Wa akuun abuuyi yalmasni wa yaʼarifni wa yuguul ana khachcheetah wa yugumm yalʼanni wa ma yibaarikni.» 13Wa ammah gaalat leyah : «Khalli al-laʼana di talhagni ana, ya wileedi. Asmaʼ kalaami ! Amchi ! Jiib leyi al-sukhlaan.»

14Wa khalaas, Yaakhuub macha jaab al-sukhlaan le ammah wa hi gammat sawwat al-akil al-abuuh yiriidah. 15Wa baʼad da, Rifga chaalat khulgaan al-samhiin hana Isuu wileedha al-kabiir, al-gaaʼidiin fi bakaanha fi l-beet wa labbasathum le Yaakhuub wileedha al-sakhayyar. 16Wa be l-farwa hana l-sukhlaan, hi labbasat iideenah wa ragabatah bakaan al-amlas. 17Wa Rifga antat le wileedha Yaakhuub al-akil al-halu wa l-khubza al-hi sawwatha.

Yaakhuub khachcha abuuh Ishaakh

18Wa khalaas, Yaakhuub gamma macha le abuuh wa gaal : «Ya abuuyi.» Wa Ishaakh gaal : «Naʼam ! Inta yaatu, ya wileedi ?» 19Wa Yaakhuub gaal : «Ana Isuu wileedak al-bikir. Ana sawweet al-cheyy al-inta talabtah minni. Min iznak, gumm wa aakul laham al-seede achaan inta be nafsak tibaarikni.» 20Wa Ishaakh gaal leyah : «Ya wileedi, da kikkeef inta ligiitha ajala ke ?» Wa Yaakhuub gaal : «Achaan Allah Ilaahak bas jaab leyi al-seede.»

21Wa fi l-bakaan da, khalaas Ishaakh gaal le Yaakhuub : «Taʼaal gariib, ya wileedi, achaan nilammisak wa naʼarif kadar inta bas wileedi Isuu walla la.» 22Wa Yaakhuub garrab le abuuh Ishaakh wa hu limsah wa gaal : «Al-hiss, hiss hana Yaakhuub laakin al-iideen, iideen hana Isuu.» 23Wa be misil da, Ishaakh ma irif Yaakhuub achaan iideenah induhum suuf misil akhuuh Isuu. Wa khalaas, hu baarakah.

24Wa gubbaal ma yibaarikah, hu saʼalah battaan wa gaal : «Sahiih ke inta wileedi Isuu ?» Wa Yaakhuub gaal : «Aywa.» 25Wa khalaas, Ishaakh gaal leyah : «Ya wileedi, antiini naakul al-laham al-jibtah achaan ana be nafsi nibaarikak.» Wa Yaakhuub anta al-akil le abuuh. Wa hu akalah wa jaab leyah khamar wa hu chiribah.

26Wa baʼad da, Ishaakh abuuh gaal leyah : «Ya wileedi, taʼaal gariib wa hibbini.» 27Wa Yaakhuub garrab leyah wa habbaah. Wa Ishaakh chamma al-riihe hint khulgaanah wa gamma baarakah wa gaal :

«Aywa ! Al-riihe di hint wileedi !

Hi misil riihe hint zereʼ

al-Allah baarakah.

28Khalli al-Rabb yantiik

karany al-yanzil min al-sama

wa intaaj al-ard.

Wa yantiik gameh

wa khamar jadiid be katara.

29Khalli al-chuʼuub yakhdumu leek

wa l-umam yasjudu giddaamak.

Wa abga siid akhwaanak

wa iyaal ammak yasjudu giddaamak !

Al-yalʼanak malʼuun

wa l-yibaarikak mubaarak.»

Isuu dawwar abuuh yibaarikah

30Wa wakit Ishaakh kammal min mubaarakat Yaakhuub wa Yaakhuub marag min bakaan abuuh da, khalaas tawwaali ke akhuuh Isuu ja min al-ganiis. 31Wa hu kula sawwa akil halu wa jaabah le abuuh wa gaal : «Ya abuuyi, gumm wa aakul laham al-seede al-ana wileedak jibtah achaan inta be nafsak tibaarikni.» 32Wa abuuh Ishaakh gaal leyah : «Inta yaatu ?» Wa hu radda leyah wa gaal : «Ana wileedak al-bikir Isuu.»

33Wa min simiʼ al-kalaam da, Ishaakh gamma yarjif chadiid wa gaal : «Yaatu al-macha al-ganiis wa jaab leyi laham ? Wa ana akalt minnah hassaʼ gubbaal inta ma taji wa ana baaraktah. Wa akiid hu yabga mubaarak !» 34Wa wakit Isuu simiʼ kalaam abuuh, gamma yikoorik korooraak chadiid hana wajaʼ galib wa gaal le abuuh : «Baarikni ana kula, ya abuuyi !»

35Wa Ishaakh gaal leyah : «Akhuuk ja khachchaani wa ana baaraktah fi badalak.» 36Wa Isuu gaal : «Achaan usmah Yaakhuub (maʼanaatah al-najiid), da bas khachchaani marrateen ! Awwal chaal bukuuriiyti wa hassaʼ daahu chaal barakati !»

Wa gaal battaan : «Inta ma faddalt leyi baraka waahide kula ?» 37Wa Ishaakh radda leyah wa gaal : «Ana sawweetah siidak wa sawweet kulla akhwaanah yabgo khaddaamiin leyah. Wa anteetah gameh wa khamar be katara. Wa battaan ana nagdar nisawwi leek chunu, ya wileedi ?» 38Wa Isuu gaal le abuuh : «Ya abuuyi, indak baraka waahide bas ? Baarikni ana kula, ya abuuyi !» Wa Isuu gamma yabki baki chadiid.

39Wa Ishaakh abuuh gaal leyah :

«Inta taskun fi ard al-ma indaha intaaj

wa ma indaha karany

al-yanzil min al-sama.

40Wa inta tiʼiich be seefak

wa takhdim le akhuuk.

Laakin fi ruwaakhtak al-jaay wa jaay,

tidalli tagalatah min kataafeek.»

Yaakhuub arrad

41Wa Isuu bigi khasiim le Yaakhuub achaan al-baraka al-abuuh Ishaakh baarakah beeha. Wa Isuu gaal fi galbah : «Abuuyi gariib yumuut. Baʼad ayyaam al-hizin, naktul akhuuyi Yaakhuub.»

42Wa khabbaro Rifga be kalaam Isuu wileedha al-kabiir. Khalaas hi rassalat naadat Yaakhuub wileedha al-sakhayyar wa gaalat leyah : «Daahu akhuuk Isuu yidoor yilkaffa foogak wa yaktulak. 43Hassaʼ da, ya wileedi, asmaʼ kalaami. Gumm arrid amchi bakaan akhuuyi Laabaan fi Haaraan. 44Wa agood maʼaayah ayyaam hinaak, lahaddi akhuuk zaʼalah yufuut. 45Wa kan zaʼalah faat wa nisi al-cheyy al-inta sawweetah leyah da, khalaas ana nirassil leek, taji. Maala ana niwaddirku intu al-itneen fi nafs al-yoom ?»

46Wa baʼad da, Rifga gaalat le Ishaakh : «Al-haya bakhkhadat leyi fi chaan banaat al-Hittiyiin dool. Wa kan Yaakhuub kula yaakhud waahide min banaat al-Hittiyiin al-fi l-balad di, ana hayaati ma indaha faayde.»

Currently Selected:

Takwiin 27: ADT19

Highlight

Copy