Takwiin 17

Al-tahuura alaamit al-muʼaahada

1Wakit Abraam indah 99 sana, Allah baan leyah wa gaal : «Ana Allah al-Gaadir. Taabiʼ kalaami wa abga daayman saalih. 2Ana nisabbit muʼaahadati maʼaak wa nantiik zurriiye katiire.»

3Abraam sajad giddaam al-Rabb wa hu gaal leyah : 4«Di hi al-muʼaahada al-beeni wa beenak. Inta tabga abu hana umam katiiriin. 5Min al-yoom, ma yinaaduuk Abraam laakin yinaaduuk Ibraahiim achaan ana nisawwiik abu hana umam katiiriin. 6Wa nantiik zurriiye katiire wa l-zurriiye di tabga umam katiiriin wa yamurgu minnak muluuk. 7Wa muʼaahadati al-sawweetha maʼaak inta wa maʼa zurriiytak min baʼadak tagood daayman. Wa l-muʼaahada al-daayme di tiwassif kadar ana nabga Ilaahak wa Ilaah zurriiytak. 8Wa nantiik inta wa zurriiytak kulla l-turaab hana balad Kanʼaan al-inta saakin foogha ajnabi. Wa l-balad di tabga warasathum ila l-abad wa ana nabga Ilaahhum.»

9Wa battaan Allah gaal le Ibraahiim : «Waajib inta wa zurriiytak titaabuʼu muʼaahadati al-sawweetha maʼaaku min zurriiye le zurriiye. 10Di hi muʼaahadati al-titabbuguuha inta wa zurriiytak. Waajib titahhuru kulla dakar minku. 11Wa tahuuritku di fi jilidku tabga alaama hana l-muʼaahada al-beeni wa beenku. 12Waajib titahhuru ayyi dakar min zurriiyitku fi tamaane yoom baʼad waaluudtah. Waajib titahhuru ayyi dakar al-mawluud fi buyuutku aw abiidku al-chareetuuhum min iyaal al-ajaanib al-ma min nafarku. 13Wa titahhuru kulla l-dukuur al-wildoohum fi buyuutku wa l-abiid al-chareetuuhum. Wa be da, muʼaahadati tagood fi jilidku wa hi muʼaahada daayme. 14Ayyi dakar minku al-ma tahharooh, waajib yafsuluuh min chaʼabah achaan hu gataʼ muʼaahadati.»

Zurriiyit Ibraahiim min Saara

15Wa Allah gaal battaan le Ibraahiim : «Baʼad al-yoom, martak Saaraay battaan ma tinaadiiha Saaraay laakin naadiiha Saara. 16Wa ana nibaarikha wa nantiik minha wileed wa hi tabga amm hana umam wa yamurgu minha muluuk hana chuʼuub.»

17Wa baʼad da, Ibraahiim sajad giddaam Allah wa dihik wa gaal fi galbah : «Kikkeef nagdar nalda, ana al-indi 100 sana ? Wa kikkeef Saara al-indaha 90 sana tagdar talda ?» 18Wa Ibraahiim gaal le l-Rabb : «Khalli barakatak di tukuun fi Ismaaʼiil !» 19Laakin al-Rabb gaal leyah : «La, ma misil ke ! Martak Saara talda leek wileed wa tisammiih Ishaakh. Wa ana nisabbit muʼaahadati al-daayme maʼaayah wa maʼa zurriiytah. 20Wa ana simiʼt suʼaalak fi chaan Ismaaʼiil. Ana nibaarikah hu kula. Wa yalda iyaal katiiriin. Wa zurriiytah tabga katiire marra waahid. Wa yamurgu minnah 12 muluuk wa umma kabiire. 21Laakin muʼaahadati di, nisawwiiha maʼa Ishaakh, al-Saara taldaah leek fi l-sana al-jaaye fi nafs al-wakit da.» 22Wa wakit al-Rabb kammal kalaamah, faat khallaah le Ibraahiim.

23Wa baʼad da, fi nafs al-yoom, Ibraahiim sawwa al-cheyy al-Allah amarah beyah. Chaal Ismaaʼiil wileedah wa kulla l-dukuur al-wildoohum fi beetah wa kulla l-abiid al-charaahum wa l-gaaʼidiin fi beetah wa tahharaahum. 24-25Wa Ibraahiim indah 99 sana wa Ismaaʼiil wileedah indah 13 sana wakit tahharoohum. 26Wa fi nafs al-yoom, Ibraahiim wa wileedah Ismaaʼiil kula tahharoohum. 27Wa l-naas al-wildoohum fi beetah wa l-abiid al-charaahum min iyaal al-ajaanib, kulluhum tahharoohum maʼa Ibraahiim.

Currently Selected:

Takwiin 17: ADT19

Highlight

Copy