Takwiin 15

Allah sawwa muʼaahada maʼa Abraam

1Wa baʼad da, Allah hajja le Abraam fi ruʼya wa gaal leyah : «Abraam ! Ma takhaaf. Ana gaaʼid maʼaak. Ana daragatak. Wa nantiik ajur kabiir bilheen.» 2Wa Abraam gaal : «Ya Allah Rabbi, tantiini chunu ? Ana ma indi iyaal wa l-naadum al-yawrisni hu Aliʼaazar min hillit Dimachkh.» 3Wa battaan gaal : «Inta ma anteetni zurriiye wa l-abid al-mawluud fi beeti bas yawrisni.»

4Khalaas, Allah gaal leyah : «La ! Hu ma yawrisak. Laakin al-yamrug min sulbak bas yawrisak.» 5Wa Allah maragah barra min kheemtah wa gaal leyah : «Sangiʼ wa chiif al-sama wa ahsib al-nujuum kan tagdar.» Wa gaal leyah battaan : «Zurriiytak kula tabga katiire misil al-nujuum dool.» 6Wa Abraam aaman be kalaam Allah wa fi chaan iimaanah, Allah jaʼalah naadum saalih.

7Wa gaal leyah : «Ana Allah al-maragtak min Uur hillit al-Kaldaaniyiin le nantiik al-balad di le tabga leek warasa.» 8Wa Abraam gaal : «Ya Allah Rabbi, kikkeef naʼarif kadar al-balad di tabga leyi warasa ?» 9Wa Allah gaal leyah : «Jiib leyi ijle umurha talaata sana wa khanamaay umurha talaata sana wa kabich umrah talaata sana wa gimriiye wa hamaama.»

10Wa Abraam jaab al-haywaanaat dool wa chaggagaahum min usut wa ayyi nuss gaabalah maʼa l-nuss al-aakhar. Wa laakin al-tuyuur, ma chaggagaahum. 11Wa fi l-bakaan da, al-suguura tawwaali nazalo fi l-rimam dool wa laakin Abraam taradaahum.

12Wa wakit al-harraay gariib tagaʼ, Abraam naam noom chadiid. Wa ja dalaam chadiid wa mukhiif khattaah. 13Wa Allah gaal le Abraam : «Aʼarif tamaam kadar baʼadeen zurriiytak yabgo ajaanib wa yaskunu fi balad al-ma hintuhum. Wa siyaad al-balad di yiʼabbuduuhum wa yidaayuguuhum muddit 400 sana. 14Wa laakin ana niʼaakhib al-umma al-tiʼabbidhum le zurriiytak. Wa baʼad da, zurriiytak yamurgu min al-balad di be maal katiir. 15Wa kan leek inta, tichayyib wa talhag abbahaatak be salaam wa be farha, wa yadfunuuk. 16Wa zurriiytak al-raabʼe yigabbulu hini fi balad al-Amuuriyiin. Achaan zanib al-Amuuriyiin lissaaʼ ma lihig haddah.»

17Wa wakit al-harraay wagaʼat wa l-dalaam sadda al-bakaan da, daahu kaanuun indah jamur wa dukhkhaan wa muchhaab hana naar faato ambeenaat al-bahaayim al-muchaggagiin. 18Wa be misil da, Allah sawwa muʼaahada maʼa Abraam fi l-yoom da wa gaal : «Ana nanti al-balad di le zurriiytak min bahar Masir lahaddi l-Furaat al-bahar al-kabiir. 19Wa hassaʼ, al-balad di saakniin foogha al-Khiiniyiin wa l-Khinaaziyiin wa l-Khadmuuniyiin 20wa l-Hittiyiin wa l-Firizziyiin wa l-Rafaayiin 21wa l-Amuuriyiin wa l-Kanʼaaniyiin wa l-Girgaachiyiin wa l-Yabuusiyiin.»

Currently Selected:

Takwiin 15: ADT19

Highlight

Copy