Takwiin 12
12
Abraam hawwal min baladah
1Wa baʼad da, Allah gaal le Abraam : «Amrug min baladak wa min ahalak wa hawwil min beet abuuk wa amchi fi l-balad al-niwassifha leek. 2Ana nisawwiik abu hana umma kabiire wa nibaarikak wa usmak yabga taaliʼ. Wa tabga baraka kabiire le naas katiiriin. 3Wa nibaarik al-naas al-yibaarukuuk wa nalʼan al-naas al-yalʼanook. Wa be sababak inta, kulla gabaayil al-ard yalgo baraka.»
4Khalaas, Abraam hawwal misil Allah gaalah leyah. Wa Luut kula macha maʼaayah. Wakit Abraam marag min hillit Haaraan, umrah 75 sana. 5Wa chaal maʼaayah martah Saaraay wa Luut wileed akhuuh wa kulla l-maal wa l-abiid al-charaahum fi hillit Haaraan. Wa khalaas, chaalo derib balad Kanʼaan.
Abraam fi balad Kanʼaan wa Masir
Wakit wassalo fi balad Kanʼaan, 6Abraam chagga al-balad lahaddi wisil fi l-chadara al-kabiire al-gaaʼide fi hillit Muura fi turaab Chakiim. Wa fi l-wakit da, al-Kanʼaaniyiin saakniin fi l-balad di. 7Wa Allah baan le Abraam wa gaal : «Al-balad di nantiiha le zurriiytak.» Wa fi l-bakaan da, Abraam bana madbah le yigaddim foogah dahaaya le Allah al-baan leyah.
8Wa baʼad da, Abraam macha ale l-hujaar al-gaaʼidiin sabaah le hillit Beet Iil wa sawwa fariigah kharib le hillit Aay wa sabaah le Beet Iil. Wa hinaak kula bana madbah le Allah wa saʼal be usum Allah. 9Wa Abraam gaaʼid yarhal chiyya chiyya ale l-junuub.
10Wa baʼad da, al-juuʼ dakhal fi l-balad di. Wa Abraam macha fi Masir le yagood mudda hinaak achaan al-juuʼ bigi chadiid. 11Wa wakit garrabo le Masir, Abraam gaal le martah Saaraay : «Asmaʼe ! Ana naʼarif kadar inti mara samha bilheen. 12Wa kan al-Masriyiin chaafooki, yuguulu : ‹Hi di martah.› Wa yaktuluuni wa yichiiluuki. 13Achaan da, natlub minki guuli leehum inti akhti. Wa be da, yakurbuuni adiil fi chaanki wa ma yaktuluuni.»
14Wa wakit Abraam wisil fi Masir, al-Masriyiin chaafo marit Abraam samha bilheen. 15Khalaas, masʼuuliin hana Firʼoon malik Masir chaafooha wa chakaro samaahha le l-malik wa macho chaalooha wa waddooha leyah fi gasrah. 16Fi chaan al-mara di, Firʼoon karab Abraam adiil wa antaah khanam wa bagar wa hamiir anaati wa dukuur wa abiid wa khadiim wa jumaal.
17Wa laakin Allah nazzal waba chadiid fi Firʼoon malik Masir wa naas beetah fi chaan Saaraay marit Abraam. 18-19Wa khalaas, Firʼoon naada Abraam wa gaal leyah : «Da chunu al-inta sawweetah leyi da ? Wa maala ma ooreetni kadar hi martak ? Wa maala gult leyi hi akhtak ? Achaan da bas, ana chiltaha le tabga leyi mara ! Khalaas ! Di hi martak ! Chiilha wa yalla fuut !» 20Wa Firʼoon amar naasah yiʼaddu Abraam wa martah wa kulla maalah. Wa khalaas, humman marago min Masir.
Currently Selected:
Takwiin 12: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.
