Khuruuj 6

1Wa Allah gaal le Muusa : «Hassaʼ da, inta tichiif al-cheyy al-nisawwiih le l-malik ! Be iidi al-chadiide, najburah wa yikhalli Bani Israaʼiil yamurgu. Wa be gudurti al-chadiide, najburah wa yatrudhum min daarah.»

Allah gaal yinajji Bani Israaʼiil

2Wa baʼad da, al-Rabb gaal battaan le Muusa : «Ana bas Allah. 3Ana bayyant nafsi le Ibraahiim wa Ishaakh wa Yaakhuub wa gult leehum usmi Allah al-Gaadir. Laakin ma ooreethum kadar ana usmi Allah al-Hayy. 4Wa ana sawweet maʼaahum muʼaahadati wa gult nantiihum balad Kanʼaan al-humman gaaʼidiin foogha ajaanib. 5Wa hassaʼ, ana simiʼt ganiit Bani Israaʼiil al-gaaʼidiin yiʼabbuduuhum al-Masriyiin wa ana fakkart fi muʼaahadati al-sawweetha maʼaahum. 6Fi chaan da, guul le Bani Israaʼiil : ‹Ana Allah. Namrugku min al-ubuudiiye wa ninajjiiku min al-khidme al-gaasiye hana l-Masriyiin. Wa nafdaaku be duraaʼ gawi wa be ikhaab ajiib. 7Wa tabgo chaʼabi wa ana nabga Ilaahku. Wa fi l-wakit da, taʼarfu kadar ana bas Allah Ilaahku al-maragtuku min al-ubuudiiye hana l-Masriyiin 8wa waddeetku fi l-balad al-halaft nantiiha le Ibraahiim wa Ishaakh wa Yaakhuub wa nantiiha leeku intu warasa. Ana bas Allah.›» 9Wa Muusa kallam al-kalaam da le Bani Israaʼiil. Laakin humman ma simʼo kalaamah achaan ayyaso min chiddit al-khidme al-gaasiye.

10Wa battaan Allah hajja le Muusa wa gaal : 11«Amchi le Firʼoon malik Masir wa guul leyah : ‹Khalli Bani Israaʼiil yamurgu min baladak !›» 12Wa Muusa gaal le Allah : «Bani Israaʼiil abo ma yasmaʼo kalaami. Kikkeef al-malik yagdar yasmaʼ kalaami, ana al-khachmi tagiil ?»

13Wa khalaas, Allah hajja le Muusa wa Haaruun wa gaal leehum yamchu le Bani Israaʼiil wa Firʼoon malik Masir wa yaamuruuhum achaan Bani Israaʼiil yamurgu min Masir.

Khuchuum buyuut iyaal Yaakhuub

14Daahu asaame hana kubaaraat gabaayil Bani Israaʼiil.

Raʼuubiin hu bikir Yaakhuub. Wa awlaad Raʼuubiin humman Hanuuk wa Fallu wa Hasruun wa Karmi. Wa humman dool bigo khuchuum buyuut Raʼuubiin.

15Wa awlaad Chimʼuun humman Yamuwiil wa Yaamiin wa Uhad wa Yaakiin wa Suuhar wa Chaawuul, hu al-ammah min balad Kanʼaan. Wa humman dool bigo khuchuum buyuut Chimʼuun.

16Wa daahu zurriiyit Laawi. Laawi indah talaata awlaad. Wa humman Girchuun wa Gahaat wa Maraari. Wa Laawi aach 137 sana.

17Wa awlaad Girchuun humman Libni wa Chimʼi maʼa aayilaathum.

18Wa awlaad Gahaat humman Amraam wa Yishaar wa Habruun wa Uzziyiil. Wa Gahaat aach 133 sana.

19Wa awlaad Maraari humman Mahli wa Muuchi.

Wa humman dool kulluhum bigo khuchuum buyuut Laawi hasab zurriiyithum.

20Wa Amraam akhad Yuukaabad immitah wa jaabat leyah awlaad itneen wa humman Haaruun wa Muusa. Wa Amraam aach 137 sana.

21Wa awlaad Yishaar humman Khuurah wa Nafag wa Zikri.

22Wa awlaad Uzziyiil humman Michayiil wa Alisaafan wa Sitri.

23Wa Haaruun akhad Alichabaʼ hi akhut Nahchuun wa bineeyit Aminadaab. Wa hi jaabat leyah Nadaab wa Abiihu wa Aliʼaazar wa Itamaar.

24Wa awlaad Khuurah humman Assiir wa Alikhaana wa Abiyaasaf. Wa humman dool bigo khuchuum buyuut al-Khuurahiyiin.

25Wa Aliʼaazar wileed Haaruun akhad waahide min banaat Fuutiyiil wa hi wildat leyah Fiinhaas.

Wa dool kubaaraat al-aayilaat hana khuchuum buyuut Laawi.

26Wa Haaruun wa Muusa humman bas al-naaseen al-Allah gaal leehum : «Amurgu Bani Israaʼiil min Masir hasab majmuuʼaathum.» 27Wa Muusa wa Haaruun humman bas al-macho wa hajjo le Firʼoon malik Masir le yikhalli Bani Israaʼiil yamurgu min Masir.

Allah kallaf Haaruun yisaaʼid Muusa

28Wakit Allah hajja le Muusa fi Masir, 29hu gaal leyah : «Ana bas Allah. Amchi guul le Firʼoon malik Masir kulla l-kalaam al-nuguulah leek.» 30Wa Muusa gaal leyah : «Ana khachmi tagiil. Kikkeef al-malik yagdar yasmaʼ kalaami ?»

Currently Selected:

Khuruuj 6: ADT19

Highlight

Copy