Khuruuj 37

Sanaʼo al-sanduug

1Wa Basaliil sawwa sanduug min khachab al-sunt. Wa tuul al-sanduug da duraaʼeen wa nuss wa urdah duraaʼ wa nuss wa tuulah foog kula duraaʼ wa nuss. 2Wa masahah be dahab saafi min daakhal lahaddi barra. Wa darras khachmah kula be dahab. 3Wa sawwa arbaʼa khawaatim hana dahab wa lassagaahum fi l-koonyaat al-arbaʼa hana l-sanduug. Wa da itneen fi l-nuss al-waahid wa itneen fi l-nuss al-aakhar. 4Wa addal iidaan itneen min hatab al-sunt wa masahaahum be dahab. 5Wa dakhkhalaahum fi l-khawaatim al-arbaʼa al-mulassagiin fi l-sanduug achaan yichiiluuh beehum.

6Wa sanaʼo sidaade le l-sanduug min dahab saafi. Tuul al-sidaade di duraaʼeen wa nuss wa urdaha duraaʼ wa nuss. 7Wa sanaʼo min al-dahab makhluugiin samaawiyiin itneen wa khattoohum ayyi waahid fi taraf al-sidaade mulgaabiliin. 8Khatto ayyi waahid fi taraf al-sidaade yaʼni al-waahid be hini wa l-aakhar be hinaak mulassagiin fi l-sidaade. 9Wa l-makhluugiin al-samaawiyiin dool mumattitiin janaaheehum giddaam wa mukhattiyiin beehum al-sidaade. Ayyi waahid mugaabil al-aakhar wa mudangiriin ale l-sidaade.

Sawwo al-tarabeeza hana l-khubza

10Wa sawwo tarabeeza be khachab al-sunt. Tuulha duraaʼeen wa urdaha duraaʼ wa tuulha foog duraaʼ wa nuss. 11Wa masahooha be dahab saafi. Wa darraso khachumha be dahab. 12Wa hawwago khachum al-tarabeeza be hatab urdah arbaʼa usbaʼ wa darrasooh be dahab. 13Wa sanaʼo arbaʼa khawaatim min dahab wa lassagoohum fi l-koonyaat al-arbaʼa hana l-tarabeeza. Ayyi khaatim bigi muwaafig le rijil waahide min al-tarabeeza. 14Wa l-khawaatim bigo gariibiin le khachum al-tarabeeza. Wa be da, gidro yidissu fooghum iidaan itneen wa yichiilu beehum al-tarabeeza. 15Wa l-iidaan dool sawwoohum be hatab al-sunt wa masahoohum be dahab le yichiilu beehum al-tarabeeza. 16Wa l-tarabeeza di sawwo leeha sufar wa kharaariif wa kiisaan wa abaariig min dahab saafi al-yistaʼmaloohum wakit yigaddumu hadaaya charaab.

Sawwo al-faanuus al-indah sabʼa deyy

17Wa sanaʼo faanuus min dahab saafi. Al-faanuus da wa gaʼarah wa saagah wa kiyeesaatah wa dakaarmah wa zuhuurah kulla ke sunʼa waahide bas. 18Wa alfarraʼ min saag al-faanuus da sitte furuuʼ, talaata furuuʼ min nuss waahid wa talaata min nuss aakhar. 19Wa fi ayyi firiʼ, sawwo talaata kiyeesaat yichaabuhu zahrat al-looz be dukrumitha wa waragha. Wa da fi kulla firiʼ min al-furuuʼ al-sitte. 20Wa fi saag al-faanuus kula, sawwo arbaʼa kiyeesaat yichaabuhu zahrat al-looz be dukrumitha wa waragha. 21Wa tihit ayyi machbak hana furuuʼ itneen, sawwo dukrume. 22Wa kulla l-dakaarim wa l-furuuʼ madguugiin sunʼa waahide bas min dahab saafi. 23Wa sawwo sabʼa tiyeesaat le l-naar min dahab saafi wa khattoohum fi l-faanuus. Wa sawwo kalaaliib wa taffaayaat kula min dahab saafi. 24Wa l-dahab al-saafi al-sanaʼo beyah al-faanuus wa kulla muʼiddaatah, waznah bigi 34 kiilo.

Sawwo mukhbar al-bakhuur

25Wa sawwo mukhbar al-bakhuur min khachab al-sunt. Al-mukhbar da murabbaʼ tuulah duraaʼ wa urdah kula duraaʼ. Wa tuulah foog kamaan duraaʼeen. Wa l-mukhbar wa guruunah sunʼa waahide bas. 26Wa masaho daharah wa kulla jawaanibah wa guruunah be dahab saafi. Wa darraso khachmah kula be dahab. 27Wa sawwo leyah khawaatim itneen tihit min al-diraasa be jaanib al-waahid wa be l-jaanib al-aakhar kula khawaatim itneen. Wa be da, gidro yidakhkhulu le l-mukhbar iidaan itneen le yichiiluuh beehum. 28Wa sawwo al-iidaan al-itneen dool be hatab al-sunt wa masahoohum be dahab. 29Wa sawwo battaan al-dihin al-khaass le l-masahaan. Wa l-bakhuur al-muʼattar al-saafi da sawwaah naadum maʼruuf fi khalbitiin al-itir.

Currently Selected:

Khuruuj 37: ADT19

Highlight

Copy