Khuruuj 3

Allah naada Muusa le yamrug chaʼabah

1Wa Muusa gaaʼid yasrah be khanam hana nasiibah Yasruun#3:1 Yasruun Hu nafs al-raajil al-usmah Raʼuwiil. wa hu bas raajil al-diin hana balad Midyaan. Wa yoom waahid, Muusa saag al-khanam khaadi le l-sahara wa wisil fi jabal Allah al-usmah Huuriib. 2Wa fi l-bakaan da, malak Allah baan leyah fi naar fi lubb chideere. Wa Muusa chaaf wa daahu, naar gammat foog al-chideere di laakin hi ma gaaʼide tahrag. 3Wa Muusa gaal : «Khalli namchi nichiif al-cheyy al-ajiib da. Maala al-chideere di ma hirgat ?»

4Wakit Allah chaaf Muusa gaaʼid yihawwig le yichiif al-cheyy da, khalaas hu naada Muusa min lubb al-chideere wa gaal leyah : «Ya Muusa, ya Muusa !» Wa Muusa gaal : «Naʼam.» 5Wa hu gaal leyah : «Ma taji gariib. Sill niʼleek min rijileenak achaan al-bakaan al-inta waagif foogah da ard mukhaddasa. 6Ana Rabb abuuk wa Rabb juduudak Ibraahiim wa Ishaakh wa Yaakhuub.» Wa khalaas, Muusa sadda wijhah achaan hu khaayif ma yagdar yichiif al-Rabb.

7Wa Allah gaal battaan : «Ana chift tamaam al-taʼab hana chaʼabi al-gaaʼidiin fi Masir. Wa simiʼt siraakhhum giddaam al-naas al-gaaʼidiin yitaʼʼubuuhum. Wa hasseet be azaabhum. 8Achaan da, ana jiit le ninajjiihum min iid al-Masriyiin wa niwaddiihum fi balad aakhara wa hi samhe wa wasiiʼe. Wa l-balad di malaane be l-laban wa l-asal. Wa hassaʼ, al-naas al-saakniin foogha humman al-Kanʼaaniyiin wa l-Hittiyiin wa l-Amuuriyiin wa l-Firizziyiin wa l-Hiwwiyiin wa l-Yabuusiyiin. 9Wa daahu siraakh Bani Israaʼiil wisilaani. Wa chift al-Masriyiin gaaʼidiin yazulmuuhum. 10Achaan da, ya Muusa ! Nirassilak hassaʼ le Firʼoon malik Masir. Amchi wa amrug chaʼabi Bani Israaʼiil min Masir !»

Allah bayyan usmah le Muusa

11Wa Muusa gaal le l-Rabb : «Ana ke yaatu lahaddi namchi le l-malik Firʼoon wa namrug Bani Israaʼiil min Masir ?» 12Wa l-Rabb gaal : «Ana nukuun maʼaak wa di hi al-alaama al-tiwassif leek kadar ana bas rassaltak. Wa wakit inta tamrug Bani Israaʼiil min Masir, intu kulluku taju taʼabuduuni fi l-jabal da.»

13Wa Muusa radda le l-Rabb wa gaal : «Tamaam, ana namchi le Bani Israaʼiil wa nuguul leehum : ‹Allah Rabb juduudku rassalaani leeku.› Wa laakin humman yasʼalooni min usmak. Wa kan saʼalooni min usmak da, nuguul leehum usmak yaatu ?» 14Wa l-Rabb gaal leyah : «Ana bas Hu, maʼanaatah Ana Allah al-Daayim. Misil da bas turudd le Bani Israaʼiil. Tuguul : ‹Allah al-Daayim bas rassalaani leeku.›» 15Wa l-Rabb gaal leyah battaan : «Guul misil da le Bani Israaʼiil : ‹Allah Rabb juduudku Ibraahiim wa Ishaakh wa Yaakhuub rassalaani leeku.› Da bas usmi al-daayim al-yinaaduuni beyah min zurriiye le zurriiye.

16«Hassaʼ da, ya Muusa, amchi le kulla chuyuukh Bani Israaʼiil wa guul leehum : ‹Allah Rabb juduudku Ibraahiim wa Ishaakh wa Yaakhuub baan leyi wa gaal hu chaafaaku wa chaaf al-cheyy al-gaaʼidiin yisawwuuh leeku fi Masir. 17Wa gaal yamrugku min Masir al-bakaan al-gaaʼidiin tatʼabo foogah. Wa yiwaddiiku fi balad al-Kanʼaaniyiin wa l-Hittiyiin wa l-Amuuriyiin wa l-Firizziyiin wa l-Hiwwiyiin wa l-Yabuusiyiin fi l-balad al-malaane be l-laban wa l-asal.›

18«Wa chuyuukh Bani Israaʼiil yasmaʼo kalaamak wa tamchi maʼaahum fi bakaan malik Masir. Wa tuguulu leyah : ‹Allah Rabb al-Ibraaniyiin baan leena. Wa hassaʼ da, khalliina namchu masaafit talaata yoom fi l-sahara le nigaddumu dahaaya le Allah Ilaahna.› 19Wa laakin ana naʼarif kadar al-malik ma yikhalliiku tamchu illa kan ana assartah chadiid. 20Wa khalaas, nimidd iidi wa nadrub balad Masir be kulla l-ajaayib al-ninazzilhum foogha. Wa baʼad da, al-malik yikhalliiku tamurgu. 21Wa nisawwiiku intu chaʼabi talgo rida al-Masriyiin wa ma tamchu iideeku yaabsiin. 22Fi l-yoom da, ayyi mara min Bani Israaʼiil tasʼal mara Masriiye al-saakne maʼaaha aw jaaritha tantiiha khumaam hana fudda wa dahab wa khulgaan al-tilabbusuuhum le iyaalku. Wa be da, tanhabo al-Masriyiin marra waahid.»

Currently Selected:

Khuruuj 3: ADT19

Highlight

Copy