Khuruuj 28

Lubaas rujaal al-diin

1«‹Chiil min Bani Israaʼiil akhuuk Haaruun wa awlaadah Nadaab wa Abiihu wa Aliʼaazar wa Itamaar le yabgo leyi rujaal diin. 2Wa addil le akhuuk Haaruun khulgaan khaassiin al-yantuuh charaf wa ihtiraam. 3Wa guul le kulla l-khayyaatiin al-ana anteethum khibra fi l-khidme di khalli yisawwu khulgaan le Haaruun. Wa hu yalbashum wakit yikhassusuuh le yabga leyi raajil diin. 4Al-khulgaan al-yisawwuuhum humman al-sideeriiye wa l-farmala wa l-jallaabiiye wa l-jawwaaniiye wa l-kadmuul wa l-hizaam. Yisawwu khulgaan khaassiin le Haaruun akhuuk wa le iyaalah le yabgo leyi rujaal diin. 5Wa l-khulgaan dool yisawwuuhum be gumaach hana kattaan al-loonah zahri wa garadi wa ahmar wa mujammaliin be dahab.

Farmalat kabiir rujaal al-diin

6«‹Al-farmala yisawwuuha be gumaach hana kattaan mukhayyat adiil al-loonah zahri wa garadi wa ahmar wa mujammala be dahab. Wa da be khiyaatit khayyaati maʼruuf. 7Wa tukuun indaha hubaal al-yisabbutuuha beehum fi l-kataafe. 8Wa l-hizaam al-yarbutuuh kula yukuun min nafs al-sunʼa min dahab wa gumaach hana kattaan mukhayyat adiil al-loonah zahri wa garadi wa ahmar.

9«‹Chiil hujaar itneen min agiig wa anguch fooghum asaame awlaad Israaʼiil al-atnaachar. 10Hasab nizaam miilaadhum, aktib asaame al-sitte fi l-hajar al-waahid wa asaame al-sitte fi l-hajar al-taani. 11Wa sayyaakhi maʼruuf fi nagich al-khawaatim yanguch asaame awlaad Israaʼiil fi l-hajareen dool. Wa tisabbithum fi halagateen min dahab. 12Wa tukhuttuhum fi kataafe al-farmala le yabgo zikra le Bani Israaʼiil. Wa Haaruun yichiil al-asaame dool fi kataafeeh misil zikra giddaam Allah. 13Wa sawwi al-halagateen min dahab 14wa silsilateen hana dahab saafi maftuuliin misil al-habil. Wa allighum fi l-halagateen.

Sideeriiyit al-kharaar

15«‹Sawwi sideeriiyit al-kharaar misil al-farmala min gumaach hana kattaan mukhayyat adiil al-loonah zahri wa garadi wa ahmar wa mujammala be dahab. Wa da be khiyaatit khayyaati maʼruuf. 16Wa tukuun murabbaʼa tuulha chibir wa urdaha kula chibir. Wa matbuuga marrateen misil jeeb. 17Wa tijammilha be arbaʼa roog min al-hujaar al-khaaliyiin.

Al-roog al-awwal indah agiig ahmar wa yaakhuut asfar wa zumurrud akhdar.

18Wa l-roog al-taani indah marajaan ahmar wa yaakhuut akhdar wa maass.

19Wa l-roog al-taalit indah fayruuz wa yaakhuut ahmar wa zaytuun.

20Wa l-roog al-raabiʼ indah zabarjad wa agiig wa kharaz.

«‹Wa kulla l-hujaar dool yukuunu murassasiin fi l-riigaan hana l-dahab. 21Wa l-hujaar al-khaaliyiin dool fi adad gabaayil Bani Israaʼiil al-atnaachar. Ayyi usum gabiila manguuch fi hajar waahid misil nagich al-khawaatim.

22«‹Wa sawwi le l-sideeriiye silsilateen min dahab saafi maftuuliin misil al-habil. 23Wa sawwi battaan khawaatim itneen min dahab wa sabbithum fi koonyaat al-sideeriiye be foog. 24Wa dakhkhil fi l-khawaatim dool al-silsilateen hana l-dahab. 25Wa khachum al-aakhar hana l-silsilateen, dakhkhilah fi l-halagateen al-gaaʼidiin fi kataafe al-farmala be giddaam. 26Wa battaan sawwi khawaatim itneen min dahab fi koonyaat al-sideeriiye be tihit. Wa khuttuhum be daakhal ambeen al-sideeriiye wa l-farmala. 27Wa battaan sawwi khawaatim itneen min dahab wa khuttuuhum fi kataafe al-farmala be tihit min giddaam gariib le hizaam al-farmala. 28Wa arbut al-khawaatim al-itneen hana l-sideeriiye be l-khawaatim al-itneen hana l-farmala be habil zahri. Wa be da, al-sideeriiye tabga foog min al-hizaam wa gaaʼide saabte foog al-farmala ma tilharrak. 29Wa be da, wakit Haaruun yadkhul fi l-bakaan al-mukhaddas, yichiil asaame gabaayil Bani Israaʼiil fi sadrah fi sideeriiyit al-kharaar achaan yabgo zikra daayme giddaam Allah. 30Wa khutt al-Uriim wa l-Tummiim fi sideeriiyit al-kharaar achaan yukuunu fi sadur Haaruun wakit yadkhul giddaam Allah. Wa be da, Haaruun yichiilhum daayman fi sadrah giddaam Allah le yaʼarif kharaaraat Allah le Bani Israaʼiil.

Al-jallaabiiye

31«‹Wa khayyit jallaabiiye le l-farmala kullaha min gumaach zahri. 32Wa l-jallaabiiye indaha gabbe makfuufa wa mudarrasa achaan al-gabbe ma tincharit. Wa yikhayyutuuha be khiyaatit khayyaati maʼruuf. 33Wa khayyit fi daayir al-jallaabiiye rummaanaat masnuuʼiin min gumaach zahri wa garadi wa ahmar wa arbut jursaan min dahab ambeen al-rummaanaat. 34Wa be da, yukuun rummaana wa jaras, rummaana wa jaras fi kulla daayir al-jallaabiiye. 35Wa Haaruun yalbas al-jallaabiiye di wakit yakhdim giddaam Allah. Wa harakat al-jursaan tinsamiʼ wakit hu yadkhul fi l-bakaan al-mukhaddas giddaam Allah wa wakit yamrug. Wa be da, hu ma yumuut.

Lubaas khaass le Haaruun

36«‹Wa sawwi hafiide min dahab saafi wa anguch foogha al-kalaam al-buguul Khaass le Allah. 37Wa arbutha be habil zahri fi raas al-kadmuul be giddaam. 38Wa tagood fi jabhit Haaruun. Wa be da, hu yukuun al-masʼuul min al-khata al-yisawwuuh Bani Israaʼiil wakit yigaddumu hadaayaahum al-mukhaddasiin. Al-hafiide di tagood daayman fi jabhit Haaruun achaan Allah yarda beehum.

39«‹Wa khayyit jawwaaniiye min gumaach hana kattaan. Wa kadmuul kula min kattaan. Wa sawwi hizaam be khiyaatit khayyaati maʼruuf.

Lubaas awlaad Haaruun

40«‹Wa khayyit jawwaaniiye wa hizaam wa kadmuul le ayyi wileed min awlaad Haaruun le tantiihum charaf wa ihtiraam. 41Wa baʼad tilabbis akhuuk Haaruun wa awlaadah al-khulgaan dool, amsahhum#28:41 amsahhum Maʼanaatah yichiilu dihin al-zaytuun wa yamsaho le l-naadum da fi raasah. Wa be da, al-naadum da yukuun khaass le khidmit Allah. wa darrijhum wa khassishum le yabgo leyi rujaal diin. 42Wa khayyit leehum saraawiil min gumaach hana kattaan le yasturu beehum oorithum. Al-saraawiil dool yikhattu al-sulub wa l-dawaarij. 43Haaruun wa awlaadah yalbasoohum wakit yadkhulu fi kheemat al-ijtimaaʼ fi l-bakaan al-mukhaddas wa wakit yigarrubu le l-madbah le yakhdumu. Wa be da, ma yaznubu wa yumuutu. Wa da chart daayim le Haaruun wa zurriiytah al-taji min baʼadah.

Currently Selected:

Khuruuj 28: ADT19

Highlight

Copy